Read Eastern Krahn :Jororn' 6 Bible Online

:Jororn' 6 - Eastern Krahn bible

:Jororn' 6

¹:Yeh :Yusu' no :ao', :yee' or 'dhan-', or 'kpa 'de :Galali'i-yobo'-pehnu 'de. (Pehnu: :dao', mo-: an 'da-dih :Tabi'lor-yobo'-pehnu :ke.)

²:Yeh or 'dhan-a, :yee' :gwlor-nyor:⧾ :doru' zi 'o or klei'. Deh no-eh, nyor⧾ 'di dih 'ma-dih-deh:⧾ or no-a 'do puhba-nyor⧾-a' 'puh-dih-eh bo, me-: on 'ye.

³:Yee' or mu 'de tluh ken, 'de or :ne or-a'a: bo :na-nyor⧾-: on :dhe dih.

⁴:Yee' :Jueh'-nyor⧾-a' 'Meh-a' :bla-dih: 'dlu dih-gor-a' ti-a 'koan'-dih 'o-: dih.

⁵:Yeh :Yusu' pobo:-a 'de or ybei', 'de or 'ye-a nyor⧾ :doru'-a yi-a 'de, :yee' or dhele: Felor'-: dih, or 'da, Dha :a mu 'bhlee :dhen-dih: 'do nyor⧾ :daa bo, 'de on 'ye deh di :eh?

⁶Or 'dhen-or', eh-: :korn dhih or dhele-or deh :daa dih. Deh no-eh, deh or mu-a :no, eh :ne 'de or 'di 'weh :dee' see.

⁷:Yee' Felor' 'da, 'Wlii: nyor :due'-a 'ye-a 'de 'chuh⧾ :meheh' na 'di, :mor nyor⧾ :dhen-dih-ih 'bhlee, 'bhlee: :dao', eh se 'o nyor⧾ :doru' :daa worn 'i :gweh i.

⁸:Yeh or 'da :ao', :yee' :Yusu'-a'a: bo :na-nyor: Andlu', :or no-a Samor' :Piteh'-a' dei', or-: 'da,

⁹'Yu-yu-beh :due' :ne :daa, or-: 'ble 'bale-bhlee: :kpuan'⧾ :mm'-: 'dekorn: zimi: 'sororn'-:. Jorwor: deh en mu nyor⧾ :dhulu' :daa :no-dih: :eh?

¹⁰'De :Yusu' 'da, A no-eh, nyor⧾ :daa, on 'ye-' dih dhele:. (:Yee' :peli' :doru' :ne 'o :dha 'o, 'de nyor⧾ dhele:-' dih 'do en ken.) Nyor⧾-kpalu⧾-a' 'wlu :mm', mo-: 'beh-dih: :on 'ye 'de on 'nyne-' :ne.

¹¹:Yee' :Yusu' 'duo: 'bhlee: :kpuan'⧾ :dao' 'weh, 'de or po Nyorsoa-a' 'zio, 'de or no-eh, on :gble-dih-ih nyor⧾ :on dhele:-a-' dih 'yi dih, 'de an-a' klehkpeh, on 'ye :ka an no-a en-' 'bhorn-a'. :Yee' 'ka :wor or no zimi-a' gble-a' :ke.

¹²:Yeh an-a' klehkpeh di-a deh, 'de on dbo-a, :yee' or 'dae: 'de or-a'a: bo :na-nyor⧾ bo, A po :yih :sie:-a 'o dih :dha :due', en-' deh-beh-deh-beh :po-eh:-' dih.

¹³:Yee' on po 'bale-bhlee: :yih :sie:-a 'o dih, :dha :due', 'de en 'yi :too'⧾-a' :bhue: 'yor 'sororn'.

¹⁴:Yee' :yeh nyor⧾ :dao', on 'ye-a nyor⧾ 'yi :to-dih-deh: :kolu' :dao' :Yusu' no-a, :yee' on 'kpa 'o :wlu 'da 'weh, on 'da, Keen' 'jeh, 'yu :daa, or-: Nyorsoa-a' wele-eh: :po-nyor: :or mu-a 'noror yao 'zorn :yi, or-: 'o 'bla.

¹⁵:Yeh on 'da :ao', :yee' :Yusu' yubo-eh-: 'i, :ka an 'bhorn-a on 'ye-or' 'kpih :kpa-dih:, 'de on 'ye-or' 'keen-' no. :Yee' or 'wluh 'o on bo 'weh, or 'ya-dih: ya, 'de or :ne :due', or chehn kpor :neheh'.

¹⁶:Yeh eh no-a 'gwie-yluh bo :peheh'eh, :yee' :Yusu'-a'a: bo :na-nyor⧾ 'dhle tluh, 'de an mu 'de yobo'-pehnu: :dao' worn 'i.

¹⁷:Yeh glu-a gor-a, 'de or 'see-a de yi, :yee' on 'kpa 'de 'blagbe 'di 'weh, on 'ye yobo'-pehnu 'dhan, on 'ye :Kapa'nior-gwlor 'di mu.

¹⁸:Yeh an 'dhan-a, :yee' yobo'-pehnu-a po nyor-kpalu-duh:⧾, deh no-eh, :pobor' :dhulu'-a: 'yle.

¹⁹:Yeh on bli-a 'blagbe :blii:, :yee' eh 'beh-dih: eh 'ye 'yluh-buh :due' no, 'de on 'ye :Yusu', or na 'ni ken dih, or 'koan'-dih an-a'a: 'blagbe dih. :Yeh on 'ye-or, :yee' :fano-a: no-uh 'gabaa.

²⁰Jorwor: or :wlu-' 'de on bo, or 'dae:, 'Mor :oo'. A 'bor :fano-a' :no-' a-uh.

²¹:Yeh or 'da :ao', :yee' on 'worn-dih-eh ken dih 'weh, or 'ye 'de on bo 'blagbe 'di 'kpa. :Yee' 'do :dha :due' :dao', eh nyni 'o 'kpuhba' 'i 'weh, 'do :dha an mu-a :dee'.

²²:Yeh zorn zen-a, :yee' nyor⧾ :dhulu' :dao', :on :sie:-a 'do yobo'-pehnu-a' 'kpuhbuh'-a' 'for-a' 'sororn' nor bo, on yubo-eh-: 'i :ka 'blagbe :due' :ne-a 'o zama, 'de :Yusu' se-a 'de or-a'a: bo :na-nyor⧾ bo 'blagbe 'di 'kpa, 'de eh 'dhu-a or-a'a: bo :na-nyor⧾ :due'-' :on kpa-eh.

²³:Yee' 'blagbe:⧾ :nee', me-: 'wluh :Tabi'lor-gwlor 'di, 'de en :nyna dih 'do :dha 'koan'-dih:-a 'o :dha :Gwlor :baa' :po-dih:-a Nyorsoa-a' 'zio dih, 'de or 'nyi-a nyor⧾ 'bhlee, on di-ih-a.

²⁴:Yee' :yeh nyor⧾ :dhulu' :dao', on yubo-eh 'i, :ka :Yusu'-: 'dekorn: or-a'a: bo :na-nyor⧾-: on se-a 'o :ne, :yee' on 'kpa 'de 'blagbe:⧾ :dao' 'di, 'de on mu :Kapa'nior-gwlor 'di, on 'ye :Yusu' 'kwla⧾-' dih 'bhorn.

²⁵:Yeh on 'ye-or 'de 'for :yor :dao' bo, :yee' on dhele-or-: dih, on 'dae:, Nyor⧾ deh :torne-nyor:, ti :yihih :eh, :on yi 'noror :eh?

²⁶'De or 'da, Dhih 'jeh, 'an zela a :gwluhuh', eh :se nyor⧾ 'yi :to-dih-deh:⧾ :kolu'⧾ a 'ye-a, en-' dhih, a :se 'on 'kwla⧾-' dih 'bhorn. Jorwor: 'bhlee: :dhulu' a di-a, 'de a dbo-a, eh-a' dhih :oo', a 'bhorn 'on 'kwla⧾-' dih.

²⁷:Yee' dii-deh: :eh mu-a 'kor-:, a-a' :no-' eh-a' :koan. Jorwor: dii-deh: :eh mu-a a 'kmo :sie: :febeh' 'nyi-:, eh-: :korn :koan: a 'ye no. Dii-deh: :daa, 'yu an 'da-dih-a Nyor-kpalu-a' 'yu, or-: mu-eh a 'nyi-:. Deh no-eh, or :Baa' Nyorsoa 'worn-dih: or-a' dhih ken dih 'weh.

²⁸'De on 'dae:, Deh 'i-deh: :a 'ye no, 'de :a 'ye :koan: Nyorsoa 'bhorn-a no :eh?

²⁹'De or 'da, Nyorsoa-a' :koan :wor 'dhu, a po nyor or dbo-a dhih 'jeh-'.

³⁰'De on 'da :neheh', Nyor⧾ 'yi :to-dih-deh-' :yeheh, :an mu :no, :a 'ye 'ye, 'de :a 'ye :on dhih 'jeh-' po, :ka :on 'wluh-a 'de Nyorsoa bo :eh? Deh 'i-deh: :an mu :no :eh?

³¹:A :bai'-a' :bai' di 'mana: 'de :bhehneh'-bluhba ken, :ka eh no-a 'chle-eh 'de Nyorsoa-a' 'chlee-deh 'di, eh no-a, Nyorsoa 'nyi-uh dii-deh:⧾ :en 'wluh-a 'de or 'bli yai', on 'ye di.

³²:Yee' :Yusu' 'dae: :neheh', Dhih 'jeh, 'an zela a :gwluhuh', eh :se :Mose' or :se-' a dii-deh:⧾ :en 'wluh-a 'de Nyorsoa 'bli yai' 'nyi. Jorwor: 'On-ba: 'o, or-: 'nyi a dii-deh:⧾ 'jeh :en 'wluh-a 'de or 'bli yai'.

³³Nyor :or 'wluh-a 'de or 'bli yai', 'de :or 'nyi-a nyor⧾ :on :ne-a dha yao 'zorn :febeh', or-: 'dhu dii-deh: Nyorsoa 'nyi-a nyor⧾-'.

³⁴'De on 'da, Nyor :klaba', :eh 'wluh-a dha 'zean' 'bli, 'nyi :a dii-deh: :daa.

³⁵'De or 'da, 'Mor-: 'dhu dii-deh: :eh 'nyi-a nyor⧾ 'kmo :sie: :febeh'. Nyor :or yi-a 'noror 'on bo, 'moeh :se-or' :no i :neheh'. 'De mor nyor :or po-a 'an dhih dhih 'jeh-', :yee' 'ni 'na-ton :se-or' :no i :neheh'.

³⁶Jorwor: :ka 'on no-a a-a' :gwluhuh' zela-eh, a 'ye 'on 'weh, 'de a :se-' 'an dhih dhih 'jeh-' po :chio'lo:.

³⁷Nyor⧾-a' klehkpeh 'On-ba 'nyi-a 'on, an mu 'noror 'on bo :yi. 'De mor nyor-beh-nyor-beh: :or mu-a 'noror 'on bo :yi, 'on :se-or' dih :no i, :ka ti-a mu-a 'dlu-' :tehn.

³⁸Deh no-eh, 'on :se 'de Nyorsoa 'bli yai' 'wluh, 'on 'ye 'an 'jeh 'yor-eh-a' 'ton :korn-deh no. Jorwor: 'on yi-: 'de, 'on 'ye nyor :or dbo-a 'on, or-a' 'ton :korn-deh no.

³⁹:Yee' nyor :or dbo-a 'on, or-a' 'ton :korn-deh :wor 'dhu, 'on se :korn 'on 'ye nyor⧾-a' klehkpeh or 'nyi-a 'on, an-a' nyor :due' 'ma-dih:. Jorwor: 'on :korn 'on 'ye-eh' no, 'de an-a' klehkpeh, on 'ye 'de nma-dih-deh 'di 'wluh, 'do :de 'bor-dih-we-eh 'di.

⁴⁰:Yee' 'On-ba-a' 'ton :korn-deh :wor 'dhu, nyor-beh-nyor-beh: :or pobo:-a 'on ya, :ka 'on 'dhu-a or-a' 'Yu-', 'de mor :or po-a 'an dhih dhih 'jeh-', or-: mu 'kmo :sie: :febeh' 'ye-:, :yee' 'an mu-or 'de nma-dih-deh 'di :za, 'do :de 'bor-dih-we-eh 'di.

⁴¹:Yeh :Jueh'-nyor⧾ 'worn-a deh :daa, :yee' on 'kpa 'o or-a' 'bhun dih :wlu-dih: 'da 'weh, deh no-eh, or 'da, or-: 'dhu dii-deh: :eh 'wluh-a 'de Nyorsoa 'bli yai'-'.

⁴²'De on 'da, Eh :se :Yusu', :or 'dhu-a 'Joseh-a'a: 'yu-', :or :korn-a 'de-: 'dekorn: :baa'-: :a yubo:-a, or se dih :dhe :e? :Yee' :kaa or no :naa, 'de or 'da, or 'wluh 'de Nyorsoa 'bli yai' :eh?

⁴³:Yee' or :wlu-' 'de on bo, or 'dae:, A 'bor worn dih :wlu-dih-eh, 'de a-a' 'jeh 'klu-'.

⁴⁴Nyor se 'beh-dih: or 'ye 'noror 'on bo yi, :mor eh 'dhu, 'On-ba: :or dbo-a 'on, or se-or jli. :Yee' 'do :de 'bor-dih-we-eh 'di, 'an mu-or 'de nma-dih-deh 'di :za.

⁴⁵:Yee' Nyorsoa-a' wele-eh: :po-nyor⧾ 'chle-eh' see, on 'da, Nyor⧾-a' klehkpeh, Nyorsoa-: mu-uh deh :torne:. :Yee' 'do eh-a' dha, nyor⧾-a' klehkpeh :on :to-a 'On-ba :dou'⧾ bo, 'de :on 'chean'-a deh 'de or 'kwa, mo-: :an mu 'noror 'on bo :yi.

⁴⁶Nyor-beh-nyor-beh 'see 'On-ba 'ye. Jorwor: 'mor :or 'wluh-a 'de or bo, 'on :due' 'ye-or.

⁴⁷Dhih 'jeh, 'an zela a :gwluhuh', nyor :or po-a 'an dhih dhih 'jeh-', or-: 'ble 'kmo :sie: :febeh'.

⁴⁸'Mor-: 'dhu dii-deh: :eh 'nyi-a nyor⧾ 'kmo :sie: :febeh'-'.

⁴⁹A :bai'-a' :bai' di 'mana 'weh, 'de :bhehneh'-bluhba ken, jorwor: on 'meh-' 'gboror:.

⁵⁰Jorwor: dii-deh: :eh 'wluh-a 'de Nyorsoa 'bli yai', :mor nyor di-ih-a, :yee' or :se-a' 'meh-: i, eh-: :dhe dih.

⁵¹'Mor-: 'dhu dii-deh: :dao', :eh 'wluh-a 'de Nyorsoa 'bli yai'-'. 'De mor :mor nyor di dii-deh: :daa, or mu 'kmo :ne, :ka ti-a mu-a 'dlu-' :tehn. 'An yau :wor 'dhu dii-deh: 'an mu-a 'bluhba 'nyi-:, 'de on 'ye-a' 'kmo :sie: :febeh' 'ble.

⁵²:Yeh or 'da :ao', :yee' :Jueh'-nyor⧾ 'kpa 'o worn dih :jeh-dih: 'da 'weh, 'de an-a' 'jeh 'klu-', on 'dae:, :Kaa 'yu :daa, or mu or-a' yau :a 'nyi-a' :no, 'de :a 'ye-uh' di :eh?

⁵³:Yee' or 'dae: 'de on bo, Dhih 'jeh, 'an zela a :gwluhuh', :mor eh 'dhu, a se 'yu an 'da-dih-a Nyor-kpalu-a' 'yu-a' yau di, 'de mor :mor a se or-a' nyomor 'na, :yee' 'kmo :sie: :febeh' :se 'de a 'di :ne i.

⁵⁴Jorwor: nyor-beh-nyor-beh: :or di-a 'an yau, 'de mor :or 'na-a 'an nyomor, :yee' or-: 'ble 'kmo :sie: :febeh', :yee' 'do :de 'bor-dih-we-eh 'di, 'an mu-or 'de nma-dih-deh 'di :za.

⁵⁵Deh no-eh, 'an yau:, mo-: no dii-deh: 'jeh neh. 'De 'an nyomor, or-: no 'naa'-deh: 'jeh neh.

⁵⁶Nyor :or di-a 'an yau, 'de mor :or 'na-a 'an nyomor, :yee' or mu 'on-' :ne, 'de 'on 'ye-or' :ne.

⁵⁷:Ka Nyorsoa :or no-a 'kmo :ne :Baa', or dbo-a 'on, 'de 'on :ne-a 'kmo, or-a' dhih, 'ka :wor nyor :or mu-a 'on :di, or mu 'kmo :ne-eh :no, 'do 'an dhih bo :ke.

⁵⁸'Mor-: 'o, :or 'dhu dii-deh: :eh 'wluh-a 'de Nyorsoa 'bli yai'-'. Eh :ne 'mana: a :bai'-a' :bai' di-a 'de on 'meh-a, eh :ne eh se goor-dih:. Jorwor: nyor :or di-a dii-deh: :daa, or mu 'kmo :ne, :ka ti-a mu-a 'dlu-' :tehn.

⁵⁹Deh :daa, eh-: :Yusu' :za-a-', ti or torne-a nyor⧾ deh, 'de :Jueh'-nyor⧾-a' 'di :gweh-dih-sla 'zorn, 'do :Kapa'nior-gwlor 'di.

⁶⁰:Yeh :Yusu'-a'a: bo :na-nyor⧾-a' :dha :doru' 'worn-a deh or :za-a-', :yee' on :wlu-', on 'da, Nyor⧾ deh :torne-eh: :daa, eh :kma 'i, nyor 'ye-eh' dih kpon. Nyor :yoror :or 'beh-dih: :or 'ye-eh' dih kpon :eh?

⁶¹:Yee' :Yusu' yubo-eh 'i, :ka or-a'a: bo :na-nyor⧾-a wlu-dih-a worn dih, 'do deh :daa, eh-a' dhih bo, 'de or dhele-uh dih, or 'dae:, Deh :daa, eh 'gele: a-'-: dih :e?

⁶²:Yee' :mor eh 'dhu, a :taa 'yu an 'da-dih-a Nyor-kpalu-a' 'yu 'ye, or :taa 'de yai' mu, :dha or :ne-a :dee', :yee' :kaa a mu :no :eh?

⁶³Nyorsoa-a' :Zulu:, mo-: :an 'nyi nyor⧾ 'kmo :sie: :febeh'. Jorwor: :gwlor-nyor⧾-a' 'kpih se deh-' 'dhu-eh: klehkpeh. Wlu⧾ 'on :za-a-' 'de a bo, me-: no-eh, 'de a 'ye Nyorsoa-a' :Zulu, 'de Nyorsoa-a' :Zulu 'nyi a 'kmo :sie: :febeh'.

⁶⁴Jorwor: a-a' nyor⧾ :noo' 'see-eh dhih 'jeh-' po. Deh :korn-a dhih :Yusu' :za-a deh :daa-', eh-: 'dhu, or yubo-eh', :eh 'wluh-a 'de eh-a' glu 'dhu 'da, nyor⧾ :yuh :se-a' or-a' dhih dhih 'jeh-' :po i-: 'dekorn: nyor :yor :or mu-or :plo-: or yubo-uh'.

⁶⁵:Yee' :Yusu'-a kpa or-a' wlu 'dlu bo, or 'dae:, Eh-: :korn dhih 'on zela: a :gwluhuh' see, 'on 'da, nyor se 'beh-dih: or 'ye 'noror 'on bo yi, :mor 'On-ba se-eh ken dih 'worn-dih:.

⁶⁶:Eh 'wluh-a 'o ti or :za-a deh :dao' bo, :yee' nyor⧾ :dhulu' :an na-or bo :dee', on 'wluh 'o or klei' 'weh, 'de on 'bor or-a' bo :na-eh.

⁶⁷:Yeh on no :ao', :yee' :Yusu' dhele: or-a'a: bo :na-nyor:⧾ :on :ne-a :bhue: 'yor 'sororn'-: dih, or 'dae:, :A 'worn 'de a bo. A 'bhorn a 'ye mu :ke :e?

⁶⁸:Yeh or dhele-uh-a dih, :yee' Samor' :Piteh' zela-or-: :gwluhuh', or 'dae:, :Gwlor :baa', :or :korn 'de bo, :a 'ye mu :eh? :Mor 'ble wlu⧾ :en 'nyi-a nyor⧾ 'kmo :sie: :febeh'.

⁶⁹:A po-eh dhih 'jeh, 'de mor :a yubo-eh', :ka :on 'dhu-a gban 'i :ne-nyor: :or 'wluh-a 'de Nyorsoa bo-'.

⁷⁰:Yee' :Yusu' 'dae: 'de or bo, Eh :se a-a' :bhue: 'yor 'sororn', 'on :se-' gan :e? Jorwor: a-a' nyor :due' no 'ku.

⁷¹:Juda' :oo', or-: or 'da, :or 'dhu-a Samor' :Ehkeh'lior-a' 'yu-'. Keen' :mloror' or no :Yusu'-a'a: bo :na-nyor:⧾ :on no-a nyor⧾-a' :bhue: 'yor 'sororn', an-a' nyor :due', jorwor: :mor ti :zi-dih: 'o ken dih, :yee' or mu :Yusu' nyor⧾ bo :plo-dih:.