Read Eastern Krahn :Jororn' 7 Bible Online

:Jororn' 7 - Eastern Krahn bible

:Jororn' 7

¹:Yeh deh⧾ :daa, en no :ao', :yee' :Yusu'-a na :Galali'i-bluhba ken dih. Or :tehn-dih: :Judi'a-bluhba bo dih, deh no-eh, :Jueh'-nyor⧾-a' nyor⧾ :na-dih-nyor:⧾ :on :ne-a 'de, an 'bhorn :ka on 'ye-a' no, 'de on 'ye-or' 'dba.

²:Yee' :yeh :Jueh'-nyor⧾-a' :Ylehih'-gor-a' ti-a 'koan'-dih-a 'o dih,

³:yee' :Yusu'-a' dei'-nyor⧾-kpalu⧾ :wlu-' 'de or bo, on 'dae:, :On :korn :on 'ye dha :dha :daa 'wluh, :on 'ye 'de :Judi'a-bluhba ken mu, 'de :an-a'a: bo :na-nyor:⧾ :on :ne-a 'de, on 'ye deh⧾ :kolu'⧾ :an no-a 'ye.

⁴Deh no-eh, nyor :or 'bhorn-a nyor⧾ 'ye-or yubo:, :yee' or-a' no :koan 'de 'zile: ka 'di. :Ka :an no-a deh⧾ :daa, :yee' :to-dih: :an-a' 'jeh 'bluhba 'i.

⁵Deh :korn-a dhih or-a' dei'-boi' :za-a deh :daa-' 'de or bo, eh-: 'dhu, an-a' 'jeh :sloror', on :se-' or-a' dhih dhih 'jeh-' po.

⁶Eh-: no-eh, 'de or :wlu 'de on bo, or 'dae:, Ti 'jeh :en :korn-a 'de 'on bo, en 'see 'o nyni, 'on 'ye :Judi'a-bluhba ken mu. Jorwor: a :mor :mloror', ti-a' klehkpeh, en :nmor-: 'yi 'do a bo.

⁷'De 'kmo se 'beh-dih: on 'ye a-' 'nyeh. Jorwor: on 'nyeh 'on-' 'weh, deh no-eh, deh⧾ an no-a, en no deh⧾-zon:⧾. Me-: :korn dhih 'an za-a-',

⁸a :mor 'ye ybei' mu 'do gor :dao'. 'On :se-or' :mu i kele'a:. Deh no-eh, ti 'jeh :en :korn-a 'de 'on bo, 'on 'ye-a' 'de mu, en 'see 'o nyni.

⁹:Yeh or 'da :ao', :yee' or :sie: 'de :Galali'i-bluhba ken 'weh.

¹⁰Jorwor: :yeh or-a' dei'-boi' mu-a gor :dao', :yee' or zi 'o on klei' 'weh :ke. Or :se 'i :nyeh, or :se 'o mu. Jorwor: or mu-' 'de 'zile: ka 'di.

¹¹:Yee' :Jueh'-nyor⧾-a' nyor⧾ :na-dih-nyor:⧾ :on :ne-a 'o 'do gor :dao', an 'bhorn-dih-or 'yli-eh dih, 'de an dhele or-a' dhih dih, on 'da, Dha nyor-kpalu: :dao', or :ne :eh?

¹²:Yee' :gwlor-nyor:⧾ :dhulu', :on :ne-a 'o 'do gor :dao', an pa 'slan⧾ 'de an-a' 'jeh 'klu-', 'do :Yusu'-a' dhih bo. :Noo' 'da, Or-: nyor 'jeh :nor 'o. 'De :noo' 'da, A 'gbeh-'. Or :se nyor 'jeh :nor. Nyor⧾ dih :bo-dih-nyor: 'o.

¹³Jorwor: deh⧾-a' klehkpeh an no-a, nyor :or 'ye-a' 'i :nyeh, 'de :or 'ye-a' :wlu, or se :ne. Deh no-eh, an ple :Jueh'-nyor⧾-a' nyor⧾ :na-dih-nyor⧾ 'weh.

¹⁴:Yee' :yeh gor-a na-dih-a 'o gwea, :yee' :Yusu' mu 'o Nyorsoa-a' 'sla ybei', 'de or 'kpa 'o nyor⧾-a' deh :torne: 'da.

¹⁵:Yee' eh :florn-dih: :Jueh'-nyor⧾-a' nyor⧾ :na-dih-nyor⧾-: worn, on 'da, :Kaa 'yu :daa, :or se-a :zuku'-' mu, or no deh⧾ :daa, en-' yubo-eh deh :dao' :eh?

¹⁶:Yeh on 'da :ao', :yee' :Yusu' 'dae:, Deh⧾ 'an torne-a nyor⧾, en :se 'an 'jeh-a' nyor⧾ deh :torne-eh:. Jorwor: en 'wluh 'de Nyorsoa :or dbo-a 'on bo.

¹⁷Nyor :or 'bhorn-a :or 'ye-a' Nyorsoa-a' 'ton :korn-deh no, :yee' or mu-eh yubo:, :eh beh deh⧾ 'an torne-a nyor⧾, en 'wluh 'de Nyorsoa bo-: :eh beh 'an 'jeh-a' 'kpih bo-:.

¹⁸Nyor :or wlu-dih-a 'de or-a' 'jeh-a' 'kpih 'di, :yee' nyor :dao', or 'bhorn dhih-a' 'i 'beh-a' 'do or-a' 'jeh bo. Jorwor: nyor :yor 'bhorn-a dhih-a' 'i 'beh-a' 'do nyor :or dbo-or bo, :yee' nyor :dao', or za-' dhih-a' 'yor-eh:. Or-a' 'tmo sih.

¹⁹Eh :se :Mose' :se-' a Nyorsoa-a' 'tele' :daa 'nyi :e? Jorwor: eh se nyor :korn :or 'ye-a' 'o 'tele' :daa dih dhe 'de a 'klu-'. :Yee' :eh :korn dhih, 'de a vorn, a 'ye 'on 'dba :eh?

²⁰:Yeh or 'da :ao', :yee' nyor⧾ :dhulu' :dao', on 'dae:, :On 'ble 'kwla 'ye-dih-deh: 'do :on 'de. Nyor :yoror :or vorn, or 'ye :on 'dba :eh?

²¹'De or 'da, 'On no deh :kolu' :due', 'de a-a' klehkpeh, a :florn worn.

²²Keen' :mloror' :bhlororn' 'meheh'-tele' a 'ble-a, eh :se 'de :Mose' bo 'wluh. Eh 'wluh 'de a :bai'-a' :bai' bo. Jorwor: :ka :Mose' 'nyi-a a 'tele', a 'ye-a' nyor⧾-kpalu⧾-nynuu :bhlororn' 'dba, eh-: :korn dhih, a 'dba nyor⧾-kpalu⧾-nynuu :bhlororn', 'do Nyorsoa-a' :gwlee-we-eh 'di.

²³:Mor a :taa nyor-kpalu-yu :bhlororn' 'dba, 'do Nyorsoa-a' :gwlee-we-eh 'di, :Mose'-a' 'tele' :ne-' :wa dhih, :yee' :eh :korn dhih, 'de a 'kpa-dih 'on 'chehn-', deh 'on 'puh-dih:-a 'gba-glao', 'do Nyorsoa-a' :gwlee-we-eh 'di :eh?

²⁴:Yee' a-a' :zi-' nyor⧾-a' zabe, :ka a no-a an-a' ya pobo-eh. Jorwor: a zi nyor⧾-a' zabe, 'de 'yi 'sleh ka 'di.

²⁵:Yeh eh no :ao', :yee' nyor⧾ :noo', :on 'ti-a :Julu'slehn, :yee' on 'kpa 'o eh-a' dih dhele: 'da 'weh, on 'dae:, Eh :se 'yu an vorn-a, on 'ye-a' 'dba, eh :se or :mor, or se dih :dhe :e?

²⁶Or-: :nyna 'o :gwlor :gwea dih, or-: wlu. 'De on :se-' deh-beh :za 'de or bo. :A-a' nyor⧾ :na-dih-nyor⧾ 'worn-dih-eh ken 'weh 'jeh ka, :eh :mor 'yu :daa, or 'dhu-a Nyorsoa-a' 'taan'-yu-' :e?

²⁷Jorwor: :dha 'yu :daa, or 'wluh-a, :a yubo: 'o 'weh. :Mor Nyorsoa-a' 'taan'-yu 'yle, :dha or mu-a 'wluh-:, nyor :se 'o yubo: i.

²⁸:Yeh eh no :ao', :yee' :Yusu'-a torne nyor⧾ deh, 'do Nyorsoa-a' 'sla ybei' 'gboror:, or 'wor, or 'da, Keen', a yubo: 'on 'weh. 'De a yubo: :dha 'on 'wluh-a 'weh. 'On se dha yao 'zorn :ne, 'de 'an 'jeh-a' 'kpih 'di. Nyor :or dbo-a 'on, or za-' dhih-a' 'yor-eh:. Jorwor: a se-or yubo: deh 'jeh neh.

²⁹Jorwor: 'mor :mloror', 'on yubo-or' deh 'jeh neh. Deh no-eh, 'on 'wluh 'de or bo, 'de or dbo 'on.

³⁰:Yeh on 'worn-a deh :daa, :yee' an 'bhorn :ka on 'ye-a' no, 'de on 'ye-or' kpon. Jorwor: nyor :se-or' son 'bhun po. Deh no-eh, ti on :korn on 'ye-or' :kpon-dih:, en se 'o nyni 'gboror:.

³¹:Yee' :gwlor-nyor:⧾ :doru', :on :ne-a 'de nyor⧾ :dao' 'klu-', on po or-a' dhih dhih 'jeh-' 'do mor, on 'da, :Mor eh 'dhu, Nyorsoa-a' 'taan'-yu 'yle, or 'beh-dih: or 'ye deh⧾ :kolu'⧾ :doru' no, or 'ye 'o 'yu :daa :zi :e?

³²:Yee' :Falasi'i-nyor⧾ 'worn 'slan⧾ an pa-', 'do or 'bhun 'weh. :Yee' Nyorsoa-a' 'slaa: :za-nyor:⧾ :klaba'⧾-: 'dekorn: :Falasi'i-nyor:⧾ :dao'-: on dbo Nyorsoa-a' 'sla-a' :poli'si 'weh, on 'ye-or' kpon.

³³:Yee' :Yusu'-a kpa or-a' wlu 'dlu bo, or 'dae:, 'An mu dha a bo :ne 'do ti-kpor-bei 'di kele'a:, 'de jorwor: 'on 'ye 'de nyor :or dbo-a 'on bo deka mu.

³⁴A mu 'on 'kwla⧾-' dih 'bhorn-:. Jorwor: a :se 'on 'ye-: i. 'De mor :dha 'an mu-a :mu, a se 'de-a' mu-a' 'beh-dih:.

³⁵:Yeh or :za-a deh :daa-', :yee' :Jueh'-nyor⧾-a' nyor⧾ :na-dih-nyor⧾ :wlu-' 'de an-a' 'jeh 'nyne-', on 'da, Dha 'yu :daa, or mu :mu, 'de :a :se-or' 'ye-: i :eh? Or mu 'de :a-a'a: nyor⧾ :on 'ti-a 'de 'Glii-nyor⧾ 'nyne-', 'de or 'ye 'Glii-nyor⧾ deh :torne: :e?

³⁶:Mor or 'da, A mu 'on 'kwla⧾-' dih 'bhorn-:, jorwor: a :se 'on 'ye-: i, 'de mor :dha 'an mu-a :ne, a se 'de-a' yi-a' 'beh-dih:, :mor or 'da :ao', :yee' deh eh :bleh-dih: 'i :eh?

³⁷:Yee' gor :dao', or-a' 'bor-dih: 'o-we-eh: :eh no-a 'we-eh: :klaba', 'do :wor :Yusu' :sorn-', 'de or :nyna dih, 'do :gwlor :gwea, or 'wor, or 'dae:, :Mor 'ni 'na-ton :taa nyor no, :yee' or yi 'noror 'on bo, or 'ye 'na.

³⁸:Ka Nyorsoa-a' 'chlee-deh no-a eh-a' :za-a', eh no-a, Nyor :or po-a 'an dhih dhih 'jeh-', 'do or :porluh ken, 'do :wor 'ni :eh 'nyi-a nyor⧾ 'kmo :sie: :febeh', eh mu 'wluh-:.

³⁹Deh :Yusu'-a za-a-', Nyorsoa-a' :Zulu-a' dhih :oo', :on nyor⧾ :an mu-a or-a' dhih dhih 'jeh-' :po, an mu-a 'ye-:. Ti or za-a deh :daa-', :yee' Nyorsoa 'see or-a' :Zulu nyor 'nyi. Deh no-eh, Nyorsoa 'see :Yusu' dhih-a' 'i 'beh-a' 'nyi kele'a:.

⁴⁰:Yeh on 'worn-a deh⧾ :daa, :yee' nyor⧾ :noo' :noo' 'da, Keen' 'jeh, 'yu :daa, or-: Nyorsoa-a' wele-eh: :po-nyor: :or :korn :or 'ye-a' 'de yi :oo'.

⁴¹:Yee' nyor⧾ :noo' 'da, Or-: Nyorsoa-a' 'taan'-yu: 'o. :Yee' nyor⧾ :noo' dhele-eh-: dih :ke, on 'da, :Kaa Nyorsoa-a' 'taan'-yu-a mu :Galali'i-bluhba ken-a' 'wluh-a' :no :eh?

⁴²Eh :se-' 'chle-eh: 'de Nyorsoa-a' 'chlee-deh 'di, :ka Nyorsoa-a' 'taan'-yu-a mu-a 'de 'Keen :Debe' 'di-a'a: 'cheh 'klu-' 'wluh-: :e, 'dekorn: :gwlor :Debe' 'ti-a 'di, an 'da-dih-a 'Behble'hehn :e?

⁴³:Yee' nyor⧾ :dao', on :gble-eh:-' 'weh, :Yusu'-a' dhih.

⁴⁴Nyor⧾ :noo'-a 'bhorn on 'ye-or' kpon. Jorwor: nyor :se-or' son 'bhun po.

⁴⁵:Yeh eh no :ao', :yee' Nyorsoa-a' 'sla-a' :poli'si mu-: de, 'de Nyorsoa-a' 'slaa: :za-nyor:⧾ :klaba'⧾-: 'dekorn: :Falasi'i-nyor⧾-: bo, 'de on dhele-uh dih, on 'dae:, :Eh :korn dhih, a :se-or' 'de :ya :eh?

⁴⁶'De :poli'si 'dae:, :Ka 'yu :daa, or no-a :wlu-a', nyor se :ao' :wlu-a' no :zai'.

⁴⁷'De :Falasi'i-nyor⧾ 'da, A 'bhorn a 'ye :a :gwluhuh' zela: :eh :mor 'yu :dao', or :bo-dih: a dih :ke :e?

⁴⁸A 'ye :a-a'a: 'bluhba-a' nyor⧾ :na-dih-nyor⧾-: :eh beh :Falasi'i-nyor⧾-: an-a' nyor :due' po or-a' dhih dhih 'jeh-' :e?

⁴⁹Jorwor: nyor⧾ :dhulu' :dao', :on po-a or-a' dhih dhih 'jeh-', 'de :on se-a :Mose'-a' 'tele' yubo:, Nyorsoa po-uh 'chlo bo 'weh.

⁵⁰:Yee' 'Nekodi'ma: :or mu-a 'de :Yusu' bo :zai', 'de :or no-a an-a' nyor :due', or-: dhele-uh dih, or 'dae:,

⁵¹:A-a'a: 'tele'-a chehn nyor-a' zabe 'i :e, :mor eh 'dhu, :a se or-a' wlu 'worn :zai', 'de mor :a se deh or no-a yubo: :e?

⁵²:Yeh or 'da :ao', :yee' on dhele-or-: dih, on 'da, :On 'wluh :Galali'i-bluhba ken :ke :e? Pobo: 'de Nyorsoa-a' 'chlee-deh 'di. :An mu-eh 'ye-:, :ka Nyorsoa-a' wele-eh: :po-nyor se-a :korn or 'ye-a' :Galali'i-bluhba ken 'wluh. [

⁵³:Yeh on no :ao', :yee' nyor⧾-a' klehkpeh, on mu on 'bli deh⧾-' dih.