Read Eastern Krahn :Jororn' 8 Bible Online

:Jororn' 8 - Eastern Krahn bible

:Jororn' 8

²:Yee' zorn bo-mlai', or mu 'o Nyorsoa-a' 'sla ybei' de. :Yee' :gwlor-nyor⧾-a' klehkpeh yi 'o or bo, 'de or :dhe dih, or torne-uh deh.

³'De nyor⧾ 'tele' :torne-nyor⧾-: 'dekorn: :Falasi'i-nyor⧾-: on :ya 'de or bo, 'nynor :or 'si-a 'o 'nyne :zaan' :no 'da, 'de on kpon-a. :Yee' on no-eh', 'de or :nyna dih 'do an-a' klehkpeh ybei'.

⁴'De on :wlu 'de :Yusu' bo, on 'dae:, Nyor⧾ deh :torne-nyor:, 'nynor :daa, or 'si 'o 'nyne :zaan' :no 'da, 'de :a kpon-or.

⁵:Mose'-a' 'tele' za-eh' 'weh 'de or-a' 'chlee-deh 'di, :eh :mor 'nynor :or no-a deh :ne :ao', :yee' :a :tba-dih-or sobu'⧾ dih, :a 'ye-or' 'dba. :Yee' :kaa :on 'da :ke :eh?

⁶Deh :korn-a dhih, 'de an dhele-a deh :daa dih, pluh :oo', an gba. An 'bhorn :ka on 'ye-a' no, 'de on 'ye-or' dhih :kpon-dih:. Jorwor: :Yusu' 'jli-: dih 'do 'bluhbor, 'de or no or-a' :jii-eh, or 'chle 'o 'bluhbor dih.

⁷:Yeh on dhele-or dih :dhelee:, :yee' or kpa 'dlu yai', or :nyna dih, or 'dae:, Nyor :or 'see-a deh-zon no :zai', 'de a 'klu-', :yee' nyor :dao', or-: 'ye :zai'-nyor no, :or 'ye-or sobu' tba.

⁸:Yeh or 'da :ao', :yee' or 'jli-: dih :neheh', 'de or 'chle 'bluhbor dih.

⁹:Yee' nyor :yor :or 'worn-a deh :Yusu' :za-a-', :yee' or mu-', on 'slo-eh: :due' :due', on 'wluh 'o. :Yuh 'beh-a 'i, mo-: no :zai', :on mu. Eh-: on 'ble :blee:, 'de :Yusu' :due' :sie: 'o. :Yee' 'nynor :nyna dih 'do or ybei' 'gboror:.

¹⁰'De :Yusu' kpa 'dlu yai', or :nyna dih, or dhele-or dih, or 'dae:, 'Nynor, dha nyor⧾ :on :ya-a: 'de :on, on :ne :eh? Nyor :se-' :an-a' zabe 'i chehn :e?

¹¹'De 'nynor 'da, Nyor :klaba'. Nyor-beh-nyor-beh :se-' 'an zabe 'i chehn. 'De :Yusu' 'dae: 'de or bo, 'On :se-' :an-a' zabe 'i :chehn i :ke. 'Kpa 'o, :on 'ye mu. Jorwor: :an-a' :no-' deh-zon :neheh' o.]

¹²:Yee' :Yusu' :wlu-' 'de :Falasi'i-nyor⧾ bo :dele' ka, or 'dae:, 'Mor 'dhu 'bluhba-a' zorn-pli-'. Nyor :or mu-a 'o 'on klei' :zi, or :se-' :kule-' :na i. Jorwor: or mu zorn-pli: :en 'nyi-a nyor⧾ 'kmo :sie: :febeh' 'ble-:.

¹³:Yeh or 'da :ao', :yee' :Falasi'i-nyor⧾ :wlu-' 'de or bo, on 'dae:, :An zela :an-a' 'jeh-a' dhih ken dih. Deh⧾ :an zela-a ken dih, 'do :an-a' 'jeh 'bhun, en se deh-' 'dhu-eh:.

¹⁴'De or 'da, :Mor 'an 'jeh zela: 'an 'jeh-a' dhih ken dih, :yee' dhih 'an za-a-', en no dhih 'jeh :ne. Deh no-eh, 'on yubo: :dha 'on 'wluh-a 'weh, 'de mor 'on yubo: :dha 'an mu-a 'weh. Jorwor: a :mor :mloror', :dha 'on 'wluh-a, 'de mor :dha 'an mu-a, a se eh-a' :toror' 'ble.

¹⁵A zi nyor⧾-a' zabe: 'de :gwlor-nyor: ka 'di. Jorwor: 'an-a' 'worn, 'an-a' zi nyor-a' zabe.

¹⁶Jorwor: :mor 'on zi nyor-a' zabe, :yee' 'an zabe: :zi-eh 'sleh-: 'i. Deh no-eh, 'on se :due' :ne. 'On-ba: :or dbo-a 'on, or-: :ne 'o 'on bo.

¹⁷Eh 'chle-eh:-' 'de a-a' 'jeh 'yor-eh-a'a: 'tele' 'di, :mor nyor⧾ 'sororn' zela: deh :due' ken dih, :yee' deh :dao', eh no dhih 'jeh.

¹⁸'On no nyor :or zela-a 'an 'jeh-a' dhih ken dih. :Yee' 'On-ba: :or dbo-a 'on, or-: zela 'an dhih ken dih :ke.

¹⁹:Yeh or 'da :ao', :yee' on 'da, Dha :on :Baa'-a' 'jeh :ne :eh? 'De or 'da, A se 'on yubo:. 'De mor a se 'On-ba yubo: :ke. :Mor eh 'dhu, a yubo: 'on :dee', :yee' a mu 'On-ba yubo: :ke.

²⁰:Yee' ti :Yusu'-a torne-a nyor⧾ deh, 'do Nyorsoa-a' 'sla ybei', :or 'koan'-dih:-a 'o, :dha an :za-dih:-a 'wlii dih, 'do :wor or :za-dih: deh⧾ :daa-'. Jorwor: nyor :se-or' kpon, deh no-eh, ti on :korn on 'ye-or' :kpon-dih:, en se 'o nyni.

²¹:Yee' :Yusu' :wlu-' 'de nyor⧾ :dao' bo :dele' ka, or 'dae:, 'An mu dha :mu. :Yee' a mu 'on 'kwla⧾-' dih 'bhorn-:, jorwor: a mu 'de a-a' deh⧾-zon⧾ 'di 'meh-dih:. :Dha 'an mu-a, a se 'o-a' mu-a' 'beh-dih:.

²²Deh or :za-a-', eh-: no-eh, 'de :Jueh'-nyor⧾-a' nyor⧾ :na-dih-nyor⧾ dhele-eh dih, on 'dae:, Or mu or-a' 'jeh 'dba-: :e? Eh-: :korn dhih 'de or za deh :daa-', :eh :mor, :Dha 'an mu-a, a se 'beh-dih:, a 'ye 'o yi :e?

²³:Yee' or kpa or-a' wlu 'dlu bo, or 'dae:, A 'wluh dha yao 'zorn, 'de 'on 'wluh 'de yai'. A no 'kmo bo-nyor:⧾ 'de 'on :se 'kmo bo-nyor:.

²⁴'On zela: a :gwluhuh' 'weh see, :ka a mu-a 'de a-a' deh⧾-zon⧾ 'di 'meh-dih:. :Mor eh 'dhu, a se-eh dhih 'jeh-' po nyor 'on no-a, 'on 'dhu-eh:-',[3] :yee' a mu 'de a-a' deh⧾-zon⧾ 'di 'meh-dih: deh 'jeh.

²⁵'De on 'da, Nyor :on 'dhu-eh:-' :eh? 'De or 'da, :Eh 'wluh-a 'de eh-a' glu 'dhu 'da, deh 'on :za-a-', eh-: 'o.

²⁶'On 'ble deh⧾ :dhulu', 'on 'ye 'o a 'bhun :za-dih:, 'do a-a' zabe: :zi 'da. Jorwor: 'On-ba: :or dbo-a 'on, or no :gwlii' :dhe-nyor:, 'de deh 'on 'worn-a 'de or 'worn, eh-: 'an zela 'bluhba :gwluhuh'.

²⁷:Yeh or :za-a deh :daa-', :yee' on se-eh-' dih 'worn, :ka eh 'dhu-a or :Baa' dhih-' or za-a-'.

²⁸'Do eh-a' dha, or 'dae: 'de on bo, Ti a mu-a 'yu an 'da-dih-a Nyor-kpalu-a' 'yu yai' :to, 'do tu 'i, :yee' a mu-eh yubo: nyor 'on no-a, 'on 'dhu-eh:-', 'de :ka 'an-a' no-a deh 'de 'an 'jeh-a' 'kpih 'di, jorwor: deh⧾ 'On-ba :torne:-a 'on, me-: 'an za-'.

²⁹'De nyor :or dbo-a 'on, or :ne 'o 'on bo 'weh. Or :se-' 'on buh 'de :za i, deh no-eh, deh⧾ :en 'pehn-dih-a or-a' :porluh dih, me-: 'an no 'do ti-a' klehkpeh bo.

³⁰:Yee' :ka or wlu-a, 'ka-: :gwlor-nyor:⧾ :doru'-a po or-a' dhih dhih 'jeh-'.

³¹:Yee' :Yusu' :wlu-' 'de :Jueh'-nyor⧾-a' :yuh :on po-or dhih 'jeh-' bo, or 'dae:, :Mor eh 'dhu, a kpon 'an nyor⧾ deh :torne-eh: :daa dih, :yee' a :mor 'an-a: bo :na-nyor:⧾ 'o 'jeh ka.

³²:Yee' a mu dhih-a' 'yor-eh yubo:, 'de dhih-a' 'yor-eh: :dao', me-: mu-eh :no, a 'ye 'de deh⧾-zon⧾-a' 'gegeye 'zorn 'wluh, 'de a 'ye dih 'tali-eh:.

³³:Yeh or 'da :ao', :yee' on :wlu-' 'de or bo, on 'dae:, :A :mor 'Eble'hehn 'di-a' 'nynuu: 'o. 'De mor :a 'see nyor-a' 'ge-yu no :zai'. :Yee' :kaa eh no 'de :on 'da, :a mu dih 'tali-eh :eh?

³⁴'De :Yusu' 'da, Dhih 'jeh, 'an zela a :gwluhuh', nyor-beh-nyor-beh: :or no-a deh⧾-zon⧾, :yee' or no 'ge-yu: 'do deh⧾-zon:⧾ or no-a bo.

³⁵'De mor 'ge-yu se 'for 'ble 'do neh 'i, jorwor: nyor-kpalu: :or 'wluh-a 'o 'cheh-dlu: :dao' 'i, or-a'a: 'yu 'ble 'for, :ka ti-a mu-a 'dlu-' :tehn.

³⁶:Yee' 'do eh-a' dha, :mor Nyorsoa-a' 'Yu 'tali: a-a' deh⧾-zon⧾-a' dhih dih, :yee' a mu dih 'tali-eh: deh 'jeh.

³⁷'On yubo-eh', :ka a 'dhu-a 'Eble'hehn 'di-a' 'nynuu-'. Jorwor: a vorn-' :chio'lo:, a 'ye 'on 'dba. Deh no-eh, 'an wlu se :dhe-da :korn 'de a 'di.

³⁸Deh 'on 'ye-a 'do 'On-ba ybei', eh-: 'an zela a :gwluhuh'. 'De deh⧾ a 'worn-a 'de a :baa' 'worn, me-: a no.

³⁹'De on 'da, 'Eble'hehn:, or-: no :a :baa'. 'De or 'dae:, :Mor a 'dhu 'Eble'hehn 'di-a' 'nynuu-' :dee', :yee' a mu deh⧾ or no-a :no.

⁴⁰:Ka eh no-a :ne-a' :naa, 'mor :or zela:-a a dhih-a' 'yor-eh: 'on 'worn-a 'de Nyorsoa 'worn :gwluhuh', 'mor-: 'o, a 'ble-dih-eh 'dlu 'di dih, a 'ye 'dba :naa. 'Eble'hehn :se-' deh no, eh se :ao' :ne.

⁴¹Deh⧾ a :baa' no-a, me-: 'o, a no. 'De on 'da, :A :se 'zorn-nynuu:. :Baa' :due' :a 'ble-a, or-: 'dhu Nyorsoa :due' 'klein'.

⁴²'De or 'da, :Mor eh 'dhu, Nyorsoa 'dhu a :Baa' :dee', :yee' a mu 'on-' :ybeh. Deh no-eh, 'on 'wluh 'de Nyorsoa bo, 'de 'on :ne :daa. 'On :se 'de yi, 'de 'an 'jeh-a' 'kpih 'di, jorwor: or-: dbo 'on.

⁴³:Eh :korn dhih, 'de deh⧾ 'an za-a-', a-a' 'worn-ih' dih :eh? Eh :se :ka a se-a en-' 'yi :nyna-eh 'beh-dih: :e?

⁴⁴A :korn 'de a :baa' :or 'dhu-a 'ku-' bo, 'de a 'bhorn a 'ye a :baa'-a' 'ton :korn-deh no. Or no :nyor⧾ 'dba-nyor: :eh 'wluh-a 'de eh-a' glu 'dhu 'da, 'de or :se-' dhih-a' 'yor-eh dih kpon. Deh no-eh, dhih-a' 'yor-eh se 'de or 'di :ne. :Mor or 'tmo sih, :yee' or 'bli-deh: 'o, or no. Deh no-eh, or no sih 'tmo-nyor:, 'de or no sih 'tmo-nyor⧾-a' klehkpeh :baa'.

⁴⁵Jorwor: 'mor :or za-a dhih-a' 'yor-eh-', a :se-' 'on dhih 'jeh-' po.

⁴⁶A-a' nyor 'beh-dih: or 'ye-eh' ken dih zela: :eh :mor deh⧾-zon⧾-a' zabe kpon 'on :weh :e? :Yee' :mor eh 'dhu, 'on :taa dhih-a' 'yor-eh-' za, :yee' :eh :korn dhih, 'de a-a' po 'on dhih 'jeh-' :eh?

⁴⁷Nyor :or :korn-a 'de Nyorsoa bo, or to deh⧾ Nyorsoa za-a-' :dou'⧾ bo 'weh. Deh :korn-a dhih a-a' :to-a deh⧾ Nyorsoa za-a-' :dou'⧾ bo, eh-: 'dhu, a se 'de or bo :korn.

⁴⁸:Yeh :Yusu' 'da :ao', :yee' :Jueh'-nyor:⧾ :dao', on :wlu-' 'de or bo, on 'dae:, Deh :a za-a-', :a no-a, :Mor Sehmeh'la-yu: 'o, 'de :on 'ble 'kwla 'ye-dih-deh 'do :on 'de, eh :se dhih 'jeh :e?

⁴⁹'De :Yusu' 'da, 'On se 'kwla 'ye-dih-deh 'ble 'do 'on 'de. 'De mor 'an 'dhu 'o 'On-ba 'weh. Jorwor: a po 'on yaa'e.

⁵⁰'On :se-' dhih-a' 'i 'beh-a' 'bhorn, 'do 'an 'jeh bo. Jorwor: nyor, or-: :ne 'o, or-: 'bhorn-eh 'kwla⧾-' dih, 'do 'on bo, 'de mor, or-: 'dhu zabe: :zi-nyor-'.

⁵¹Dhih 'jeh, 'an zela a :gwluhuh', nyor-beh-nyor-beh: :or dhe-a 'o 'an wlu dih, or :se-' 'meh-: i, :ka ti-a mu-a 'dlu-' :tehn.

⁵²:Yeh or :za-a deh :daa-', :yee' on 'dae:, Jorwor: :a yubo-eh' :naa, :ka :on 'ble-a 'kwla 'ye-dih-deh 'do :on 'de. 'Eble'hehn 'meh-', 'de mor Nyorsoa-a' wele-eh: :po-nyor⧾ 'meh-' :ke. Jorwor: :mor :mloror', :on 'da, :mor nyor dhe 'o :an-a' wlu dih, or :se-' 'meh-: i, :ka ti-a mu-a 'dlu-' :tehn.

⁵³:On 'beh-: 'i, :on :zi 'o :a :bai'-a' :baa' 'Eble'hehn-' :e? 'Eble'hehn-a' 'jeh :dao', or 'meh-'. 'De mor Nyorsoa-a' wele-eh: :po-nyor⧾ 'meh-' :ke. Nyor :an 'da-dih :an-a' 'jeh ke :eh?

⁵⁴'De or 'da, :Mor eh 'dhu, 'on 'nyi 'an 'jeh dhih-a' 'i 'beh-a' :dee', :yee' 'an dhih-a' 'i 'beh-a' :dao', or se deh-' 'dhu-eh:. 'On-ba: a no-a :or 'dhu a-a' Nyorsoa-', or-: 'beh-dih 'an dhih 'i.

⁵⁵Keen' :mloror', a se-or yubo: deh 'jeh, jorwor: 'mor :mloror', 'on yubo-or'. :Mor 'on 'da, 'on se-or yubo:, :yee' 'an mu sih 'tmo-nyor-' 'dhu-eh:, :ka a :ne-a. Jorwor: 'on yubo-or' deh 'jeh, 'de 'on dhe 'o or-a' wlu-: dih.

⁵⁶:A :bai'-a' :baa' 'Eble'hehn no 'mona: or 'ye ti 'an mu-a 'de :ya 'ye. :Yeh or 'ye-dih-ih-a ybei', :yee' or-a' :porluh 'pehn-: dih.

⁵⁷:Yeh or 'da :ao', :yee' on 'da, :Mor :or 'see-a zon⧾-a' :kwlaa :mm' no, :mor 'ye 'Eble'hehn :e?

⁵⁸'De or 'da, Dhih 'jeh, 'an zela a :gwluhuh', :yeh 'Eble'hehn 'ye-a' 'wluh, :yee' 'on :ne-'.

⁵⁹:Yeh on 'worn-a deh :daa, :yee' on 'duo: sobu'⧾-' 'weh, on 'ye-or dih :tba-dih:, on 'ye-or' 'dba. Jorwor: or 'zile: or-a' 'jeh 'weh, 'de or 'wluh 'o Nyorsoa-a' 'sla ybei', 'de or mu.