Read Eastern Krahn :Jororn' 9 Bible Online

:Jororn' 9 - Eastern Krahn bible

:Jororn' 9

¹Eh :korn 'we-eh :due', :yeh :Yusu'-a na :gwie bo, :yee' or 'ye 'yu :due' :or 'wluh-dih:-a 'dor-a'.

²:Yeh or-a'a: bo :na-nyor⧾ 'ye-a 'yu :dao' :ke, :yee' on dhele: :Yusu'-: dih, on 'dae:, Nyor⧾ deh :torne-nyor:, :or :korn deh⧾-zon:⧾ no-eh, 'de 'yu :daa, or 'wluh-dih: 'dor-a' :eh? Or-a' 'jeh 'yor-eh :e? :Ae' or 'de-: 'dekorn: or :baa' :oo'-: ke?

³'De or 'da, Eh :se or-a' deh⧾-zon:⧾, 'de mor eh :se or 'de-: 'dekorn: or :baa'-: an-a' :ne :ke. Eh :no-eh:-', 'de Nyorsoa-a' 'kpih 'ye 'ye-eh: 'do or 'bhun.

⁴:Dha glu 'see-a goor-dih, :a :korn :a 'ye nyor :or dbo-a 'on, or-a' :koan no. Glu-a mu :gor. :Yee' nyor :se-' :koan: :no-eh 'beh-dih: i.

⁵:Yee' :ka eh mu-a 'dlu-' :tehn, 'de 'an mu-a dha yao 'zorn :ne, 'mor-: no dha 'bluhba ken-a' zorn-pli.

⁶:Yeh :Yusu' gweh-a deh :daa, eh-a' :za-a' 'i, :yee' or po 'o :dhehmeh 'do 'bluhbor, 'de or zian-dih-eh 'bluh. 'De or 'duo: 'bluh :dao', or tli-uh 'o 'yu :dao' 'yli ken.

⁷:Yeh :Yusu' no :ao', :yee' or zela-or-: :gwluhuh', or 'dae:, Mu, :on 'ye 'yi dih :dle, 'do :Silo'a-pehnu worn 'i. (:Silo'a :bleh-dih: 'i, Nyor :dbo-eh:.) :Yee' 'yu :dao', or mu-', 'de or :dle 'yi dih. :Yee' or 'ye-: dih, 'de or mu 'gbu bo.

⁸:Yeh nyor⧾ :on :ne or 'ti-a :dha :due'-: 'dekorn: nyor⧾ :yuh 'ye-or ti or zlor-a :dee'-: on 'ye-or, :yee' an wlu-' 'de an-a' 'jeh 'nyne-', on 'da, Eh :se 'yu :daa, :or 'dor-a, 'de :or zlor-a :dee' :e?

⁹:Yee' :noo' 'da, Or-: 'o. 'De :noo' 'da, 'Kei:, eh :se or :mor. On goor-dih:-'. Jorwor: or-a' 'jeh 'yor-eh :wlu-', or 'dae:, 'Mor-: 'o.

¹⁰:Yeh or 'da :ao', :yee' on dhele-or-: dih, on 'dae:, :Yee' :kaa :an-a' 'yli no 'i kan-dih-eh: 'da :eh?

¹¹'De or 'dae: 'de on bo, 'Yu an 'da-dih-a :Yusu', or-: po 'bluh :dhehmeh bo, 'de or tli-uh 'o 'do 'on 'yli ken. :Yeh or tli-uh-a 'o, :yee' or dbo 'on 'weh 'do :Silo'a-pehnu worn 'i, 'on 'ye 'yi dih :dle. :Yee' 'on mu 'de 'weh, 'de 'on :dle 'yi dih. :Yee' 'an 'ye-: dih.

¹²'De on 'da, Dha 'yu-a' 'jeh :dao', or :ne :eh? 'De or 'da, 'On se 'o yubo:.

¹³:Yee' on :ya 'de 'yu :dao' :or 'dor-a :dee', 'de :Falasi'i-nyor⧾ bo.

¹⁴'Do Nyorsoa-a' :gwlee-we-eh 'di :oo', :Yusu' :no-dih: 'bluh, 'de or kan-dih: 'yu :dao', :or 'dor-a, or-a' 'yli 'i.

¹⁵'De :Falasi'i-nyor⧾ dhele-or dih :ke, on 'dae:, :Kaa :on no dih 'ye-a' :eh? :Yeh on dhele-or dih, :yee' or 'da, :Yusu' tli 'o 'bluh 'do 'on 'yli ken. :Yeh or tli-uh-a 'o, 'de 'on :dle-a 'yi dih, :yee' 'an 'ye-: dih.

¹⁶:Yee' :Falasi'i-nyor⧾-a' nyor⧾ :noo' 'da, 'Yu :or no-a deh :daa, or :se 'de Nyorsoa bo 'wluh. Deh no-eh, or :se 'o Nyorsoa-a' :gwlee-we-eh-a' 'tele' dih dhe. :Yee' :noo' 'da, :Kaa nyor :or 'dhu-a deh⧾-zon:⧾ :no-nyor-', or 'beh-dih: or 'ye deh :kolu' :eh :ne :ao', eh-a' no-a' no :eh? :Yee' :Falasi'i-nyor⧾ :gble-eh:-' 'weh 'de on 'nyne-'.

¹⁷'De on dhele: 'yu :or 'dor-a :dee' dih :neheh', on 'dae:, :Mor 'o :or :korn 'yli or kan-dih: 'i. :Yee' :kaa :on 'da or-a' dhih :eh? 'De or 'da, Nyorsoa-a' wele-eh: :po-nyor: 'o.

¹⁸Jorwor: :Jueh'-nyor⧾-a' nyor⧾ :na-dih-nyor⧾ :se-eh' dhih 'jeh-' po :chio'lo:, :ka 'yu :daa, or 'dor-a :dee', 'de or 'ye-a dih :naa. Eh-: :korn dhih, 'de on dbo or 'de-: 'dekorn: or :baa'-: wlu bo.

¹⁹:Yeh or 'de-: 'dekorn: or :baa'-: on yi-a 'de, :yee' on dhele-uh-: dih, on 'dae:, A-a' 'yu :oo', :or :dhe dih :e, a no-a or 'wluh-dih: 'dor-a'? :Kaa eh no, 'de or 'ye dih :naa :eh?

²⁰'De on 'da, :A yubo-eh', :a-a' 'yu :oo'. 'De :a yubo-eh', :ka or 'wluh-dih:-a 'dor-a'.

²¹Jorwor: :ka or no-a dih 'ye-a'-: 'dekorn: nyor :or kan-dih:-a or-a' 'yli 'i-: :a se-or yubo:. A dhele-or dih. Or :se 'yu-yu:. Or 'beh-dih: eh-a' bo dih zela-eh 'weh.

²²Deh :korn-a dhih on 'da :ao', an ple :Jueh'-nyor⧾-a' nyor⧾ :na-dih-nyor⧾-a' 'yli 'weh. Deh no-eh, :Jueh'-nyor⧾-a' nyor⧾ :na-dih-nyor⧾ za-eh' 'weh 'de an-a' 'jeh 'nyne-', 'de on 'worn-dih-eh ken dih, :eh :mor nyor :or mu-eh 'i 'worn-dih: :ka :Yusu' no-a Nyorsoa-a' 'taan'-yu, :yee' an mu-or 'zorn :po, or 'ye 'de an-a' 'di :gweh-dih-sla 'zorn 'wluh.

²³Eh-: :korn dhih, or 'de-: 'dekorn: or :baa'-: on 'da, Or :se 'yu-yu:. A dhele-or dih.

²⁴:Yee' on 'da 'yu :or 'dor-a :dee' 'weh :neheh' :dele' ka, on 'da, :Za dhih-a' 'yor-eh 'do Nyorsoa ybei'. :A :mor :mloror', :a yubo-eh', 'yu :daa :or 'puh-dih:-a :on, or-: deh⧾-zon:⧾ :no-nyor: 'o.

²⁵'De or 'da, :Mor or 'dhu deh⧾-zon:⧾ :no-nyor-', 'on se-eh yubo:. Deh :due' 'on yubo:-a, 'on 'dor-' :dee', jorwor: 'an 'ye-: dih :naa.

²⁶'De on 'da, Deh or :no-dih: :on :eh? :Kaa or no :an-a' 'yli-a' 'yi kan-dih-eh :eh?

²⁷:Yeh on dhele-or dih, :yee' or 'dae:, 'On zela: a :gwluhuh' 'weh see. 'De a :se-' 'an wlu :dou'⧾ bo :to. :Eh :korn dhih, a 'bhorn a 'ye-eh' 'worn :neheh' :eh? A 'bhorn a 'ye or-a' bo :na-nyor⧾ no :ke :e?

²⁸:Yeh or 'da :ao', :yee' on 'wor-dih-or 'dlu dih, on 'da, :Mor :mloror', :mor 'yu :dao', or-a' bo :na-nyor: 'o. Jorwor: :a :mor :mloror', :a :mor :Mose'-a' bo :na-nyor:⧾ 'o.

²⁹:A yubo-eh', Nyorsoa :wlu-' 'de :Mose' bo. Jorwor: 'yu :yor :daa :mloror', :dha or 'wluh-a, :a se 'o yubo: :sloror'.

³⁰'De or 'da, Deh :daa, eh no nyor⧾-a' :porluh:⧾ 'ma-dih-deh:. A se :dha or 'wluh-a yubo:, jorwor: or kan-dih: 'an 'yli-: 'i.

³¹:A yubo-eh', :ka Nyorsoa-a' :to-a deh⧾-zon:⧾ :no-nyor⧾ :dou'⧾ bo. 'De :a yubo-eh', nyor⧾ :an za or-a' :weheh', 'de :an no-a or-a' 'ton :korn-deh, mo-: or :to :dou'⧾ bo.

³²:Eh 'wluh-a 'de 'bluhba-a' glu 'dhu 'da, nyor 'see-eh 'worn :zai', :eh :mor nyor :or 'wluh-dih:-a 'dor-a', nyor 'ye or-a' 'yli 'i kan-dih:.

³³:Mor 'yu :dao', or :se 'de Nyorsoa bo 'wluh :dee', or se 'beh-dih: or 'ye deh no.

³⁴:Yeh or 'da :ao', :yee' on :wlu-' 'de or bo, on 'dae:, :Mor :or 'wluh-dih:-a 'de deh⧾-zon⧾ 'nyne-', :mor 'o :or torne :a deh :e? :Yee' on po-or-: 'zorn, on za-or 'de an-a' 'di :gweh-dih-sla 'di 'weh.

³⁵:Yee' :Yusu' 'worn-ih' :ka on po-or 'zorn. :Yeh or 'ye-or, :yee' or dhele-or-: dih, or 'da, :On po 'yu an 'da-dih-a Nyor-kpalu-a' 'yu, or-a' dhih dhih 'jeh-' 'weh :e?

³⁶'De 'yu :dao', or 'da, Nyor :klaba', zela: 'on :gwluhuh', or-a' 'nyne :eh? 'De 'on 'ye or-a' dhih dhih 'jeh-' po.

³⁷'De :Yusu' 'da, :On 'ye-or' :weh. Nyor :or wlu-a 'de :on bo, or-: 'o.

³⁸:Yeh :Yusu' 'da :ao', :yee' or 'da, :Gwlor :baa', 'on po :an-a' dhih-' dhih 'jeh. :Yee' or 'jli-: dih 'do or 'zorn, or za-or :weheh'.

³⁹'De :Yusu' 'da, 'On yi dha yao 'zorn, 'de zabe 'ye :zi-eh:. 'De nyor⧾ :on 'dor-a, on 'ye dih 'ye. 'De nyor⧾ :an 'ye-a dih, on 'ye 'dor.

⁴⁰:Yee' :Falasi'i-nyor:⧾ :noo' :on :ne-a 'o or bo, on 'worn deh or :za-a-' 'weh. :Yeh on 'worn-ih'-a, :yee' on dhele-or-: dih, on 'dae:, :An 'bhorn :on 'ye :a :gwluhuh' zela: :eh :mor :a 'dor-' :ke :e?

⁴¹'De :Yusu' 'da, :Mor eh 'dhu, a 'dor, :yee' deh⧾-zon⧾-a' zabe :se-' a :kpon i :dee'. Jorwor: :ka a no-a, a 'ye-: dih, :yee' deh⧾-zon⧾-a' zabe kpon a 'weh.