Read Eastern Krahn Noo-deh:⧾ 1 Bible Online

Noo-deh:⧾ 1 - Eastern Krahn bible

Noo-deh:⧾ 1

¹:Yee' nyor :klaba' :Tiofelor', 'mor 'ye :on. 'De 'an-a: :zai'-chlee-deh 'di, 'do :wor 'on 'chle-dih: deh⧾-a' klehkpeh :Yusu' no-a-: 'dekorn: deh⧾-a' klehkpeh or :torne:-a nyor⧾-: :eh 'wluh-a 'o ti or 'dhu-a or-a'a: :koan glu,

²'de :eh :yeh-dih:-a ti or 'nyi-a or-a'a: dboo-nyor⧾ or gan-a 'tele', :eh :yi-dih:-a Gban 'i :ne :Zulu, 'de jorwor: Nyorsoa-a mu-or 'de yai' :kpa.

³:Eh 'wluh-a 'o ti or 'ye-dih:-a 'kle, 'de or 'meh-a 'di, 'de :eh :yeh-dih:-a 'we-a' :kwlaa :nyieh ken, or :to-dih: or-a' 'jeh or-a'a: dboo-nyor⧾ 'i 'do kpor⧾ :dhulu' 'di. 'De mor deh⧾ 'doror: 'dor or no-a :ke, me-: no-eh, 'de on yubo-eh :ka or :ne-a 'kmo-' 'jeh ka. 'De or :za Nyorsoa-a' nyor⧾ wlu 'ken :korn-eh-a' dhih-' 'de on bo.

⁴:Yee' 'we-eh :due', ti :Yusu' :ne-a 'o or-a'a: bo :na-nyor⧾ bo 'gboror:, or 'nyi-uh 'tele' :daa, or 'dae:, A-a' 'wluh-:-' :Julu'slehn kele'a:. Jorwor: a :fuo: 'nyii'-deh: :eh :korn-a wlu 'On-ba po-a :dhama'-' 'ken, :eh :korn-a dhih 'on zela: a :gwluhuh'.

⁵:Jororn' po nyor⧾ 'ni 'dlu 'weh :mloror'. Jorwor: :mor 'we-kpor-bei :zi-dih: 'o ken dih, :yee' Nyorsoa-a mu or-a' Gban i :ne :Zulu a 'dlu :po.

⁶:Yee' :yeh :Yusu'-: 'dekorn: or-a'a: dboo-nyor⧾-: on 'kpa-a :dha :due', :yee' on dhele-or-: dih, on 'dae:, :Gwlor :baa', :an mu-eh :no, 'Ezlea-nyor⧾ 'ye an-a'a: 'bluhba-dlu: :daa wlu 'ken :korn :neheh', dha ti :daa 'i :e?

⁷'De :Yusu' 'da, A se :korn a 'ye ti 'On-ba polo:-a deh :daa 'de or-a' 'jeh-a' 'kpih 'di, eh 'ye-a' :no-eh: yubo:.

⁸Jorwor: a mu 'kpih 'ye-: :mor Gban i :ne :Zulu 'yle, 'de on 'ye a-uh' :ne. :Yee' a :mor mu 'an-a: dhih bo zela-nyor⧾ :no, 'de :Julu'slehn-: 'de :Judi'a-bluhba-a' klehkpeh ken-: 'dekorn: Sehmeh'la-bluhba-a' klehkpeh ken-: 'de mor :korn dha 'bluhba-a' klehkpeh yobo' po-a 'de :gle 'gbeheh 'di-:.

⁹:Yeh or gweh-a deh⧾ :daa, en-' :za-a' 'i, :yee' 'do :dha :due' :dao', Nyorsoa kpa-or 'de or 'bli yai' 'do on ybei'. 'De yao-pli 'zile-or, 'de on 'bor or-a' 'ye-a'.

¹⁰:Yeh or mu-a, :yee' an pobo 'de yai' 'weh 'dhuan :chio'lo:. :Yeh an no :ao', 'de an mu-a 'ye-:, :yee' on 'ye nyor⧾-kpalu⧾ 'sororn', mo-: pa 'tiei-plu⧾-', :on :nyna dih 'do on 'bhun.

¹¹:Yee' nyor⧾-kpalu⧾ 'sororn' :dao', on :wlu-' 'de on bo, on 'dae:, A :mor :Galali'i-nyor:⧾ :daa. :Eh :korn dhih a :nyna dih dha :dha :daa :eh, 'de a pobo 'de yai' 'gboror: :eh? :Yusu' :daa :or 'wluh-a dha a bo, :or Nyorsoa kpa-a 'de or 'bli yai', :ka a 'ye-or, or no-a mu-a', 'ka :wor or mu de :ka :yi-eh :no.

¹²:Yeh nyor⧾-kpalu⧾ 'sororn' :dao', on zela-uh-a :gwluhuh', :yee' :Yusu'-a'a: dboo-nyor:⧾ :dao', on 'wluh 'o 'Orle-tluh ken 'weh, 'de on mu :Julu'slehn de, :eh se-a 'de tluh 'bor gweh.

¹³:Yeh on nyni-a :gwlor-', :yee' on pa 'de :chuu: :on :ne-a 'de 'gbu-a' yai' 'di, an 'pehn-a 'di. Nyor⧾ :on pa-a 'de :chuu: :dao' 'di, an-a' 'nyne :wor :dhe dih. :Piteh'-: :Jororn'-: 'Jeen-: Andlu'-: Felor'-: :Tormor'-: :Batale'meor-: Matio'-: 'Jeen-: :or 'dhu-a 'Ehfea-a'a: 'yu-', Samor' :or no-a or-a'a: 'bluhba-dlu-a' dhih :vorn-nyor-: 'dekorn: :Juda' :or no-a 'Jeen-a'a: 'yu-:.

¹⁴:Yee' dboo-nyor⧾-a' klehkpeh :daa, mo-: :an 'kpa :dha :due', 'do ti-a' klehkpeh bo, :an wlu 'de Nyorsoa bo. :Yusu' 'de :Mehle'-: 'nynor⧾-kpao'⧾ :noo'-: 'dekorn: :Yusu'-a' dei'-nyor⧾-kpalu⧾-: mo-: :ne 'de nyor⧾ :dao' 'klu-' :ke.

¹⁵Eh :korn 'we-eh :due', ti :Yusu'-a'a: dhih 'jeh :po-nyor⧾ 'kpa-a :dha :due', :yee' :Piteh' :nyna dih 'de on 'nyne-', :on 'beh-dih:-a :on 'ye-a' nyor⧾-a' :kehehn' :due' :kwlaa 'sororn' no, or 'dae:,

¹⁶'An 'de-di'-boi'-a:. Nyorsoa-a' 'chlee-deh-a' wlu :korn on 'ye dhih 'jeh-' 'kpa :gbor :gbor, :ka Gban 'i :ne :Zulu no-a eh-a' :za-a' :dee' see, :eh :yi-dih:-a 'de :Debe' 'worn, 'do :Juda'-a' dhih bo, :or kpa-a nyor⧾ on 'ye-a :Yusu' kpon.

¹⁷:Juda' :daa, or no :a-a' nyor :due' :dee', :or :ne :a no-dih-a :koan :dha :due'. (

¹⁸:Juda' :korn-a dhih :Piteh'-a za-a-', 'wlii: or 'ye-a 'do 'kulu-deh: or no-a bo, me-: or :dhen-dih: 'bluhba-a' 'kplo. 'Do :wor or :po-dih: 'dlu glu, 'de or-a' 'kwli wa 'i, or-a' 'me-a' klehkpeh 'wla 'zorn.

¹⁹:Yee' nyor⧾-a' klehkpeh :on :ne-a :Julu'slehn, on 'worn dhih :daa 'weh. :Yee' eh-: :korn dhih an 'da-dih 'bluhba-a' 'kplo :dao' :Akade'ma 'de on 'bli-wlu 'di, :eh :bleh-dih:-a 'i, Nyomor-bluhba:.)

²⁰:Yee' :Piteh' :wlu-' :neheh', or 'dae:, Eh 'chle-eh:-' 'de :Saan'-chlee-deh 'di, eh 'da, 'Nyi or-a'a: 'gbu :florn 'di dih. Nyor-a' 'ti-:-' 'de on 'di. :Yee' eh 'dae: :neheh', 'Nyi nyor :noror' 'kpa-dih: 'o or 'gor-', or 'ye or-a'a: :koan no.

²¹:Yee' eh-a' dhih, :a :korn :a 'ye nyor⧾-kpalu:⧾ :daa, an-a' nyor :due' gan 'noror :a 'klu-', :on :ne :a mor-: :a na-dih-a :dha :due' :dee' see, ti :Gwlor :baa' :Yusu' :ne-a 'noror :a 'nyne-'.

²²Nyor :dao', or :korn or 'ye nyor :or :ne-a 'noror :a 'nyne-' no, :eh 'wluh-a 'o ti :Jororn' :po-dih:-a :Yusu' 'ni 'dlu, 'de :eh :yeh-dih:-a ti Nyorsoa :za 'o :Yusu' 'do :a ybei' ken, 'de or kpa-or 'de or 'bli yai' de. :Yee' nyor :dao', or :ne :a mor-: :a :korn :a 'ye :Yusu'-a' 'meheh' :sorn-' dhih bo zela-nyor⧾ no.

²³:Yeh or jla-a, :yee' on :za nyor⧾-kpalu⧾ 'sororn'. :Due'-a' 'nyne :wor 'Joseh:, an 'da-dih-a :Basa'ba. Or-a' 'nyne :nee' :wor 'Jehtor:. :Yee' nyor-kpalu-a' 'sororn' nor-a' 'nyne :wor :Mata'ya:.

²⁴:Yeh on no :ao', :yee' on :wlu-' 'de :Gwlor :baa' bo, on 'dae:, :Gwlor :baa', :on yubo: deh⧾-a' klehkpeh :en :ne-a 'o :gwlor-nyor⧾-a' :porluh⧾ ken 'weh. :Yee' eh-a' dhih, :torne: :a nyor :on gan-a 'noror nyor⧾ 'sororn' :daa 'nyne-',

²⁵or 'ye 'o :Juda'-a' 'gor bo 'kpa-dih:, or 'ye :Yusu'-a'a: dboo-nyor no, or 'ye :koan: :Juda' 'tali:-a dih no, ti :Juda' mu-a :dha or :korn-a or 'ye-a' mu.

²⁶:Yeh on gweh-a 'de Nyorsoa bo :wlu-eh 'i, :yee' on po :nobo:, 'de :Mata'ya-a'a: :nobo 'wluh, 'de or 'kpa 'o :Yusu'-a'a: dboo-nyor⧾-a' :bhue: 'yor-eh :ne-a :due' :dao' ken.