Read Eastern Krahn Noo-deh:⧾ 10 Bible Online

Noo-deh:⧾ 10 - Eastern Krahn bible

Noo-deh:⧾ 10

¹:Yee' 'do :gwlor an 'da-dih-a 'Sehsali'a 'di, 'do :wor 'yu :due' an 'da-dih-a :Korli'nor, or 'ti. Or no nyor :klaba' 'do sorye'-a' kpor :on 'wluh-a 'Etole-bluhba ken bo.

²Or-a' 'jeh :dao', or-: 'dekorn: or-a'a: 'cheh-: on no Nyorsoa-nyor:⧾ 'jeh, 'de an za-or :weheh'. Or se 'kwa dih :kmu, or no deh⧾ :dhulu' 'do :Jueh'-nyor⧾-a' :yuh :on :korn-a son⧾ se-a 'o nyni bo. 'De or wlu 'de Nyorsoa bo 'do ti-a' klehkpeh bo.

³:Yee' 'we-eh :due', :yeh eh no-a 'gwie-yluh-gbao', :yee' or-a' 'yli-eh 'kpa deh 'i. 'De or 'ye Nyorsoa-a' 'enjor :due' deh 'jeh, or yi 'o or bo, or :wlu 'de or bo, or 'dae:, :Korli'nor:.

⁴:Yeh or 'da :ao', :yee' :Korli'nor-a pobo-or-: ya 'dhuan, 'de :fano: ka 'di, 'de or :wlu, or 'da, Eh-a' 'nyne :eh? :Gwlor :baa'. 'De 'enjor: :dao', or 'da, Nyorsoa worn :an-a' bale-wlu 'weh, 'de or 'ye :ka :an no-a nyor⧾ :on se-a deh-a' :za-da 'ble deh⧾ 'nyi-eh 'weh :ke.

⁵:Yee' eh-a' dhih, dbo nyor⧾ 'de 'Japa, on 'ye 'yu :due' an 'da-dih-a Samor', :or :korn-a 'nyne :nee' 'dhu-a :Piteh'-', :gwie 'i mu.

⁶Or no 'duhba-yu: 'de Samor' :or no-a deh⧾-ku⧾-a' :koan 'bli 'gbu, 'de :or :korn-a 'gbu :ne-a 'o yobo' worn 'i.

⁷:Yeh 'enjor: :dao', or gweh-a :wlu-a' 'i, :yee' or mu-: de. :Yee' :Korli'nor 'da or-a'a: 'bhoi-nynuu-a' nyor⧾ 'sororn'-: 'dekorn: or-a'a: sorye'-a' nyor :due' :or no-a or-a'a: 'gbeh⧾ 'ble-yu, 'de :or no-a Nyorsoa-nyor: 'jeh :ke.

⁸'De or zela-uh deh⧾-a' klehkpeh :en :no-eh :gwluhuh', 'de or dbo-uh 'Japa. 'De on mu.

⁹:Yee' :yeh zorn zen-a, 'de an 'koan'-dih-a 'Japa dih 'yluh-gbao', :yee' :Piteh' 'ya 'de 'gbu 'dlu,[1] or 'ye 'de Nyorsoa bo :wlu 'do 'yluh-gbao'-we-eh: :dao' 'di.

¹⁰:Yeh or wlu-a 'de Nyorsoa bo, :yee' 'moeh: no-or :blaa'a:, 'de or 'bhorn deh or 'ye di. :Yeh an 'ye-a dii-deh⧾-a' deh bo dih, :yee' or-a' 'yli-eh 'kpa deh 'i.

¹¹'De or 'ye yao, on kan-dih: worn, 'de deh :eh gweh-a 'yli-eh: :klaba', eh-: 'dhle, eh-: yi 'bluhbor :eh gweh-a :ka nyor kpon-a eh-a' 'for⧾ :ne-a :nyieh dih.

¹²:Yee' 'de eh 'di :dao', 'do :wor 'kwla-nimi⧾-: 'dekorn: :gwlor-nimi⧾-: :en se-a goor-dih: :en na-dih-a buh⧾ :nyieh en :ne. Nimi⧾ :or na-dih-a 'bhehleh' :ka sane-a no-a-: 'dekorn: neme: :en zi-dih-a-' dih 'de yai'-:, me-: :ne 'de :ke.

¹³:Yeh or 'ye-a deh⧾ :dao', :yee' wlu, mo-: :wlu 'de or bo, :on 'dae:, :Piteh', :sorn-'. 'Dba-ih, :on 'ye-ih di.

¹⁴:Yee' :Piteh' 'dae:, :Sago', :Gwlor :baa'. 'On 'see nimi :eh se-a 'yi dih :nmor 'do di-a' bo, 'de :eh no-eh 'de nyor⧾-a ne-a :kane' dih, di :zai'.

¹⁵:Yee' wlu :dao', on :wlu-' 'de or bo :neheh' 'do kpor⧾-a' 'sororn' neh 'di, on 'dae:, Deh Nyorsoa :za-a :kane' dih, :an-a' :no-', eh se 'yi dih :nmor 'do di-a' bo.

¹⁶Wlu :dao', on :wlu-' 'do kpor⧾ taan 'di. :Yee' 'do :dha :due' :dao', 'yli-eh: :dao', eh :kpa-eh: yai' de.

¹⁷:Yee' :yeh :Piteh'-a na-dih-a deh or 'ye-a, deh eh :bleh-dih:-a 'i, eh-a' dhih :gwluhuh' dih, :yee' nyor⧾-kpalu:⧾ :Korli'nor dbo-a, on 'ye :dha Samor'-a'a: 'gbu :ne-a 'weh, 'de on :nyna dih 'do 'gbu-a' gba-dih-gba worn 'i.

¹⁸'De on dhele: deh dih, on 'da, 'Duhba-yu: or-: :ko-dih: 'de a 'bli 'gbu, an 'da-dih Samor' :Piteh' :e?

¹⁹:Yee' :yeh :Piteh' 'si-a 'o deh :daa, eh-a' :gwluhuh' dih :na-dih: 'da 'gboror:, :yee' Nyorsoa-a' :Zulu :wlu-' 'de or bo, on 'dae:, Samor', nyor⧾-kpalu⧾ taan, mo-: :an 'bhorn :on 'kwla⧾-' dih.

²⁰:Yee' eh-a' dhih, 'dhle, :on 'ye 'zorn 'si. :An-a' :tba 'o wlu, 'do an-a' klei' :zi 'da. Deh no-eh, 'mor-: 'o, :or dbo-uh.

²¹'De :Piteh' 'dhle, or mu 'de on bo. 'De or :wlu 'de on bo, or 'dae:, 'Mor a 'bhorn-a 'kwla⧾-' dih, 'mor :wor :dhe dih. :Eh :korn dhih a yi 'noror :eh?

²²:Yee' nyor⧾-kpalu:⧾ :dao', on 'da, :Korli'nor: :or no-a sorye'-a' nyor :klaba', or-: dbo :a-uh. Or no nyor :or 'sleh-a 'i, 'de :or za-a Nyorsoa :weheh'. 'De an-a' klehkpeh, an 'ye-or deh-'. Gban 'i :ne-enjor :due', or-: zela-or :gwluhuh', or 'ye :on wlu bo dbo, 'de :on 'ye 'de or 'bli 'gbu yi. 'De deh :an mu-a :za-a-', or 'ye-eh' :dou'⧾ bo :to.

²³'De :Piteh' kpa nyor⧾ :dao' :on yi-or :gwie 'i, 'gbu bo, on 'ye dih 'pehn. :Yee' :yeh zorn zen-a, :yee' :Piteh' po or-a'a: 'tiei 'kpa, 'de or :ne on 'kpa :gwie 'i, on mu. :Yee' :Yusu'-a' dhih 'jeh-' :po-nyor:⧾ :noo', :on :ne-a 'Japa, mo-: :ne or mu :ke.

²⁴:Yee' 'do 'we-eh-a' 'sororn' neh 'di, :yee' on 'si-: dih 'do 'Sehsali'a. :Yee' 'do :wor :Korli'nor :ne, or 'da or-a'a: 'wluh-a-nyor⧾-: 'dekorn: or 'bei' :on :ne or mu-dih-a 'bli-: :dha :due', 'de an fuo :Piteh' ken 'de or 'bli 'gbu.

²⁵:Yee' :yeh :Piteh'-a yi-a 'de 'gbu 'di :pa 'da, :yee' :Korli'nor 'ya-dih-or 'i, 'de or 'jli dih 'do or ybei' 'de deh-' 'ye ka 'di.

²⁶Jorwor: :Piteh' no-eh' or 'ye dih :nyna, or 'da, :Nyna dih. 'Mor :gwlor-nyor: 'o :ke, :ka :on :ne-a.

²⁷:Yee' :Piteh'-a wlu 'de or bo, 'de an na, an pa 'de 'gbu 'di, 'de :Piteh' 'ye nyor⧾ :dhulu' :on 'kpa-a :dha :due' 'de mor.

²⁸:Yeh or 'ye-uh'-a, :yee' or :wlu-' 'de on bo, or 'dae:, A-a' 'jeh 'yor-eh yubo-eh' deh 'jeh, :ka eh se-a 'o :Jueh'-nyor⧾-a' 'tele'-a' :gwie 'i :ne, 'de :Jueh'-yu-: 'dekorn: :yor :or :se-a :Jueh'-yu-: on 'ye-a' bo nena:, 'de mor or 'ye-a :na 'da mu 'de or 'bli 'gbu. Jorwor: Nyorsoa zela: 'on :gwluhuh', :ka 'on se-a :korn, 'on 'ye :ao' nyor :daa, or :ne :kane' dih, 'de mor 'on 'ye :ao', or-: 'mor-: :a se :korn :a 'ye bo nena:.

²⁹:Yee' eh-: :korn dhih :oo', :yeh a dbo-a 'on wlu bo, 'de 'on :se 'o wlu tba, 'de 'on 'yle. 'An dhele a dih :naa, :Eh :korn dhih a dbo 'on wlu bo :eh?

³⁰:Yee' :Korli'nor 'da, Eh :korn 'we-eh :due', 'an wlu 'de Nyorsoa bo, 'de 'on 'bli 'gbu 'di, :ka ti :ne-a :naa, :yee' 'ka-: ti :ne, 'gwie-yluh-gbao'. :Yeh 'an mu-a 'ye-:, :yee' nyor-kpalu :due', or-: pa 'tiei: :en fan-a-', 'de or :nyna dih 'do 'on ybei', eh-a' 'we :nyieh :naa 'zean'.

³¹'De nyor-a' 'jeh :dao', or :wlu 'de 'on bo, or 'dae:, :Korli'nor:, Nyorsoa 'worn :an-a' bale-wlu 'weh, 'de or 'ye :ka :an no-a nyor⧾ :on se-a deh-a' :za-da 'ble deh⧾ 'nyi-eh 'weh.

³²:Yee' 'do eh-a' dha, dbo nyor⧾ 'de 'Japa, on 'ye 'yu an 'da-dih-a Samor' :Piteh' :gwie 'i mu, :or :ko-dih:-a 'de Samor' :or no-a deh⧾-ku⧾-a' :koan, 'de or 'bli 'gbu, :on :ne-a 'de yobo' worn 'i.

³³:Yee' eh-: :korn dhih 'de 'on dbo :on wlu bo, 'do :dha :due' 'jeh :dao'. :Yee' eh :nmor-: 'yi, :ka :on yi-a 'de :naa. :A-a' klehkpeh, :a :ne :daa :Gwlor :baa' Nyorsoa ybei' 'weh :naa. Deh or zela: :on :gwluhuh', :on 'ye-eh :a :gwluhuh' zela:, :a 'ye-eh' 'worn.

³⁴:Yeh :Korli'nor 'da :ao', :yee' :Piteh' 'kpa 'o :wlu 'da 'weh, or 'dae:, Jorwor: 'on yubo-eh' :naa, :ka eh 'dhu-a dhih 'jeh-', :ka Nyorsoa-a' :za-a :gwie-for :due'.

³⁵Jorwor: nyor-beh-nyor-beh: :or :korn-a or-a' :fano-a' ple-a', 'de :or no-a deh :eh 'sleh-a 'i, 'dawor'-dlu-a' :yuh or mu-a 'i 'wluh-:, :ka eh 'ye eh :ne, Nyorsoa-a mu or-a' dhih 'worn-dih:.

³⁶A yubo: tubo-wlu:⧾ Nyorsoa dbo-a 'noror 'Ezlea-nyor⧾ bo :en :ya-a: 'de wlu-' dih 'worn-eh:, 'de :en :yi-dih:-a :Yusu' 'Klae, :or no-a :Gwlor :baa' 'do nyor⧾-a' klehkpeh bo 'weh.

³⁷'De mor a yubo: deh :klaba' :eh :no-eh 'de :Judi'a-bluhba-a' klehkpeh ken 'weh. Deh :daa, eh tba :Galali'i dih :chio'lo:, ti :Jororn' gweh-a nyor⧾ 'ni 'dlu :po-eh-a' tubo-wlu:⧾ :po-eh 'i.

³⁸'De mor a yubo-eh' :ke, :Yusu' :or 'ti-a 'Nazla :dee', :ka Nyorsoa no-a or-a' gan-a', 'de or no-eh, 'de or-a' Gban 'i :ne :Zulu-: 'dekorn: 'kpih-: en 'yi-dih-or dih, 'dekorn: :ka or no-a deh⧾-' dih :mu-eh, 'de or no-a deh⧾ 'jeh ne-a' no-a', 'de or 'puh-dih:-a puhba-nyor⧾-a' klehkpeh :on :ne-a 'o 'ku-a' 'kpih 'zorn. Deh no-eh, Nyorsoa :ne 'o or bo 'weh.

³⁹Deh⧾-a' klehkpeh or no-a 'de :Julu'slehn-: 'dekorn: 'Ezlea-bluhba-a' klehkpeh ken-: :a :mor dhe-ih ken dih. On bhele-or-: ya 'do tu 'i, 'de on 'dba-or.

⁴⁰Jorwor: Nyorsoa za-or 'de nma-dih-deh 'di 'weh 'do 'we-eh-a' taan neh 'di, 'de or no-eh, 'de nyor⧾ 'ye-or.

⁴¹Eh :se nyor⧾-a' klehkpeh on :se-or' 'ye. Jorwor: :a :mor dhih bo zela-nyor:⧾ Nyorsoa gan-a, :a :mor 'ye-or. Ti or 'wluh-a 'de nma-dih-deh 'di, or :ne :a mor-: :a kpuhba: son⧾ ybei' 'weh.

⁴²Or 'nyi :a 'tele' :a 'ye tubo-wlu⧾ po 'de nyor⧾ bo, 'de :a 'ye-uh :gwluhuh' zela: :ka eh 'dhu-a or mor-' Nyorsoa gan-a, :or 'ye-a zabe: :zi-nyor no, 'do 'kmo :ne-nyor⧾-: 'dekorn: 'meheh'-nyor⧾-: bo.

⁴³Nyorsoa-a' wele-eh: :po-nyor⧾-a' klehkpeh, on :za or-a' dhih-' 'weh, :ka nyor-beh: :or mu-a or-a' dhih dhih 'jeh-' :po, :yee' or-a' deh⧾-zon⧾-a' dhih-a mu-a bo 'ma-dih-eh:, 'de or-a' 'nyne 'di.

⁴⁴:Yeh :Piteh' 'si-a 'o wlu 'da, :yee' nyor⧾-a' klehkpeh :on :ne-a 'o, 'de :an to-a or-a' wlu :dou'⧾ bo, :yee' Gban 'i :ne :Zulu yi 'o on ken 'weh.

⁴⁵:Yeh eh no :ao', :yee' :Jueh'-nyor⧾-a' :yuh :on po-a :Yusu' 'Klae-a' dhih dhih 'jeh-', :on 'wluh-a 'Japa, 'de :on :ne :Piteh' yi-a 'de, :yee' eh 'ma-dih: 'de on 'di-: dih, Nyorsoa 'ye or-a' Gban 'i :ne :Zulu nyor⧾ :on :se-a :Jueh'-nyor⧾ 'nyi :ke.

⁴⁶Deh no-eh, on 'worn an-a' wlu, an po wlu⧾ 'doror: 'dor, :en Gban 'i :ne :Zulu 'nyi-uh-a, on 'ye-a' po. 'De nyor⧾ :dao', an po Nyorsoa-a' 'nyne ya. :Yeh eh no :ao', :yee' :Piteh' :wlu-', or 'dae:,

⁴⁷:Ka :a no-a Gban 'i :ne :Zulu-a' 'ye-a', 'ka-: nyor⧾ :daa, on no :ke. Nyor 'beh-dih: or 'ye-uh 'i kan, 'do 'ni 'dlu :po-eh bo :e?

⁴⁸:Yeh or 'da :ao', :yee' or 'nyi 'tele' on 'ye 'ni 'dlu :po 'de :Yusu' 'Klae-a' 'nyne 'di. :Yeh on gweh-a 'i, :yee' on dhele-or-: dih, or 'ye 'o on bo 'we-kpor-bei zi.