Read Eastern Krahn Noo-deh:⧾ 11 Bible Online

Noo-deh:⧾ 11 - Eastern Krahn bible

Noo-deh:⧾ 11

¹:Yee' :Yusu'-a'a: dboo-nyor⧾-: 'dekorn: dhih 'jeh-' :po-nyor:⧾ :on :ne-a dha :Judi'a-bluhba-a' klehkpeh :daa ken-: on 'worn-ih' :ka nyor⧾ :on :se-a :Jueh'-nyor:⧾ an-a' :noo' kpon-a Nyorsoa-a' wlu dih.

²:Yee' :Piteh' mu :Julu'slehn:. :Yeh or mu-a, :yee' :Jueh'-nyor⧾-a' :yuh :on no-a :bhlororn' 'meh-deh 'kpa deh ken, 'de :on po-a :Yusu'-a' dhih dhih 'jeh-' :naa, mo-: :an wlu-dih :Piteh' 'bhun dih,

³on 'dae:, Nyor⧾ :on se-a :bhlororn' 'meh, 'de on 'bli 'gbu, 'do :wor :on mu, 'de on :ne :an kpuhba son⧾ ybei'.

⁴:Yeh on :za-a deh :daa-', :yee' :Piteh' zela-uh deh⧾-a' klehkpeh :en :no-eh :gwluhuh' :ka en no-a 'dlu bo :mu-eh :kpeen:, or 'dae:,

⁵Ti 'an wlu-a 'de Nyorsoa bo, 'do 'Japa-gwlor-', :yee' 'an 'yli-eh 'kpa deh 'i. :Yeh 'an mu-a 'ye-:, :yee' 'on 'ye deh :eh gweh-a 'yli-eh: :klaba', eh-: 'wluh 'de yai', eh-: 'dhle, eh-: yi 'noror 'on bo, :eh gweh-a :ka nyor kpon-a eh-a' 'for⧾ :ne-a :nyieh dih.

⁶:Yee' 'on pobo: 'de eh 'di 'weh. 'De 'on 'ye 'kwla-nimi⧾-: 'dekorn: :gwlor-nimi⧾-: :en na-dih-a buh⧾ :nyieh 'do 'bluhbor-: nimi⧾ :en na-dih-a 'bhehleh' :ka sane-a no-a-: 'dekorn: neme: :en zi-dih-a-' dih 'de yai'-: en :ne.

⁷:Yee' 'on 'worn wlu, mo-: 'da, :Piteh', :sorn-'. 'Dba-ih, :on 'ye-ih di.

⁸Jorwor: 'on :wlu-', 'on 'da, :Sago', :Gwlor :baa'. Deh :eh se-a 'yi dih :nmor 'do di-a' bo, 'de :eh no-eh 'de nyor⧾-a ne-a :kane' dih, eh 'see 'o 'on worn 'i 'ye :zai'.

⁹:Yeh 'on 'da :ao', :yee' wlu :dao', :on 'wluh-a 'de yai', on :wlu-' :neheh' 'do kpor⧾-a' 'sororn' neh 'di, on 'dae:, Deh Nyorsoa :za-a :kane' dih, :an-a' :no-', eh se 'yi dih :nmor 'do di-a' bo.

¹⁰Wlu :daa, on :wlu-' 'do kpor⧾ taan 'di. :Yee' 'yli-eh: :dao', eh-a' klehkpeh, eh :kpa-eh: yai' de.

¹¹:Yee' 'do :dha :due' :dao', :yee' nyor⧾-kpalu⧾ taan :Korli'nor dbo-a :on 'wluh-a 'Sehsali'a, :yee' on 'si-: dih 'do 'gbu 'on :ko-dih:-a 'di worn 'i.

¹²:Yee' Nyorsoa-a' :Zulu zela: 'on-: :gwluhuh', :ka 'on :sor tba-a 'o wlu 'do mu 'da. :A-a' 'Klae :de-di'-boi' :meheh'lo: :daa, mo-: :ne 'on mu :ke. 'De :a pa 'de nyor-kpalu: :dao' 'bli 'gbu.

¹³'De or zela: :a :gwluhuh' :ke, :ka 'enjor: :or 'wluh-dih-or 'i 'de or 'bli 'gbu, 'de or :wlu-a 'de or bo, or no-a, Dbo Samor' :Piteh' :or :ne-a 'Japa wlu bo, or 'ye 'de yi.

¹⁴Or mu tubo-wlu⧾ :po 'de :on bo, :en mu-a mor-: 'dekorn: :an-a'a: 'gbu-a' klehkpeh-: 'puh-dih:.

¹⁵:Yee' :yeh 'on 'kpa 'o an-a' bo :wlu 'da, :yee' Gban 'i :ne :Zulu yi 'o on ken, :ka on no-a 'o :a ken :yi-eh :dee'.

¹⁶:Yee' dhih :Gwlor :baa' :za-a-', 'on :po-dih-eh :gwluhuh' bo 'weh, or no-a, :Jororn' po nyor⧾ 'ni 'dlu, jorwor: Gban 'i :ne :Zulu:, mo-: a mu 'dlu :po-eh.

¹⁷:Yee' 'do eh-a' dha, :mor Nyorsoa 'nyi-uh 'nyii'-deh: :eh :korn-a 'be or 'nyi :a :mor :or po-a :Gwlor :baa' :Yusu' 'Klae-a' dhih dhih 'jeh-', :yee' deh 'i-deh-nyor: 'on 'dhu-eh:-', 'on 'ye Nyorsoa 'borboa' 'i po :eh?

¹⁸:Yeh :Jueh'-nyor:⧾ :dao', on 'worn-a deh :Piteh' :za-a-', :yee' deh on 'ye-a' 'o :za-dih:, eh se :ne. :Yee' an po Nyorsoa-a' 'nyne ya, an no, :Yee' Nyorsoa 'worn-dih-eh ken dih 'weh, nyor⧾ :on :se-a :Jueh'-nyor:⧾ on 'ye an-a' deh⧾-zon⧾ dih 'tali:, 'de on 'ye 'kmo :sie: :febeh' 'ble :ke.

¹⁹:Yee' :Yusu'-a' klei' :zi-nyor:⧾ :on gboba:-a dih, ti :Jueh'-nyor⧾ 'dba-a Timi', 'de on 'ye-uh'-a 'kle 'ye-dih:, an-a' 'jeh :dao', on mu :Feni'sia-: 'Sapor-: 'dekorn: 'Antior-: 'de an po tubo-wlu⧾ :en kor-a :Yusu' 'i, 'de :Jueh'-nyor⧾ :due' bo 'klein'.

²⁰Jorwor: :Yusu'-a' klei' :zi-nyor:⧾ :noo', :on no-a nyor⧾-kpalu⧾ :on 'wluh-a 'Sapor-: 'dekorn: :Sali'na-: an-a' 'jeh :dao', mo-: mu 'Antior, 'de on :wlu 'de nyor⧾ :on :se-a :Jueh'-nyor⧾ bo :ke, on po Nyorsoa-a' tubo-wlu:⧾ 'jeh :en kor-a :Gwlor :baa' :Yusu' 'i, 'de on bo.

²¹:Gwlor :baa'-a' 'kpih :ne 'o on bo 'weh, 'de nyor⧾ :dhulu' po-eh dhih 'jeh-', 'de on 'bili: 'de or bo.

²²:Yee' deh :daa, eh-a' 'nyne nyni 'de 'chore :eh :ne-a 'de :Julu'slehn bo 'weh. Eh-: no-eh, 'de on dbo :Bana'ba, or 'ye 'de mu.

²³:Yeh or 'si-a dih, 'de or 'ye-a :ka Nyorsoa no-a nyor⧾ :on :ne-a 'de, an-a' mla bo :po-eh, :yee' or-a' :porluh 'pehn-: dih, 'de or po 'de an-a' 'kpih, on 'ye :Gwlor :baa'-' :ne, :ka ti-a mu-a 'dlu-' :tehn, 'do an-a' :porluh⧾-a' klehkpeh bo.

²⁴:Bana'ba-a' 'jeh :dao', or no nyor 'jeh :nor, :or 'yi-dih:-a Gban 'i :ne :Zulu-: dih, 'de :or :korn-a dhih 'jeh-' :po-eh 'beh-a 'i. 'De or no-eh, 'de nyor⧾ :dhulu' po :Gwlor :baa'-a' dhih dhih 'jeh-'.

²⁵:Yeh eh no :ao', :yee' or mu 'de 'Tasor-gwlor 'di, or 'ye :Soror' 'kwla⧾-' dih 'bhorn.

²⁶:Yeh or 'ye-or, :yee' or ya-or 'Antior:. :Yee' 'do zon :due' 'di, :Bana'ba-: 'dekorn: :Soror'-: on :ne 'chore-a 'gbon-dih-' 'do ti-a' klehkpeh bo, 'de an torne nyor⧾ :dhulu' deh. 'Do 'Antior :oo', on 'da-dih: :Yusu'-a' klei' :zi-nyor⧾ 'Klae-a' nyor⧾ :zai'.

²⁷'Do ti-a' 'jeh :dao' 'di :oo', Nyorsoa-a' wele-eh: :po-nyor:⧾ :noo' 'wluh-dih: :Julu'slehn, 'de on mu 'Antior.

²⁸:Yeh on :ne-a 'o, :yee' an-a' nyor :due' an 'da-dih-a :Aga'ba, or-: :sorn-', :or :nyna dih, 'de or :wlu 'de Nyorsoa-a' :Zulu-a' 'kpih 'di, or sie ti de, or :za 'moeh: :klaba' :eh 'kpa-a Ji Kou'-moeh: :eh mu-a 'de :yi dha 'bluhba⧾-a' klehkpeh 'Wloon-nyor⧾ :korn-a wlu 'ken bo, eh-a' dhih. 'Moeh: :daa or 'da-a, eh yi-: 'de, 'do 'keen Klordior'-a' ti 'i.

²⁹:Yee' eh-a' dhih, :Yusu'-a' klei' :zi-nyor:⧾ :on :ne-a 'Antior, on polo-eh' 'de an-a' 'jeh 'nyne-', on 'ye an-a' 'Klae :de-di'-boi' :on 'ti-a :Judi'a-' :za-dih:, 'do deh an-a' nyor :due' 'beh-dih:-a or 'ye-a' dbo, or 'ye-eh' dbo.

³⁰:Yeh on polo-eh, :yee' on 'worn-dih-eh', 'de on 'nyi an-a'a: 'nyii'-deh:⧾ :Bana'ba-: 'dekorn: :Soror'-: on 'ye-ih 'chore-nyor:⧾ :klaba'⧾ kpa. 'De on kpa-ih.