Read Eastern Krahn Noo-deh:⧾ 14 Bible Online

Noo-deh:⧾ 14 - Eastern Krahn bible

Noo-deh:⧾ 14

¹:Yee' :Poror'-: 'dekorn: :Bana'ba-: on mu 'de :Jueh'-nyor⧾-a' 'di :gweh-dih-sla 'zorn 'de :Iko'nia, :ka on no-a 'de 'Antior :ke. 'Do :wor on :wlu-dih: :neheh' 'gabaa. Eh-: no-eh, 'de :Jueh'-nyor:⧾ :dhulu'-: 'dekorn: nyor⧾ :on :se-a :Jueh'-nyor⧾-: on po :Yusu'-a' dhih dhih 'jeh-'.

²:Yeh eh no :ao', :yee' :Jueh'-nyor⧾-a' :yuh :on se-a :Yusu'-a' dhih dhih 'jeh-' :po-dhih 'worn-dih:, on po nyor⧾ :on :se-a :Jueh'-nyor:⧾ wlu⧾ :dou'⧾-', 'de on 'bili: 'de :Yusu'-a' dhih 'jeh-' :po-nyor⧾ ya.

³:Yee' eh-: no-eh, 'de :Poror'-: 'dekorn: :Bana'ba-: on :gwle 'o :gwlor :dao' 'di 'do ti :dhorno'⧾ 'di. On :za :fano :gwlii', 'de on po tubo-wlu:⧾ :en kor-a :Gwlor :baa' 'i. 'De :Gwlor :baa' :to-dih-eh nyor⧾ :dao' 'i :ka or-a' tubo-wlu:⧾ an po-a, :en kor-a or-a' mla 'i, en :se-a sih, 'do 'kpih or 'nyi-uh-a bo, on 'ye-a nyor⧾ 'i :to-dih-deh⧾-: 'dekorn: nyor⧾ 'di dih 'ma-dih-deh⧾-: no.

⁴:Yeh deh :daa, eh :no-eh, :yee' nyor⧾ :on :ne-a 'o :gwlor :dao' 'di, on :gble-eh:-' 'weh. :Noo' :ne 'de :Jueh'-nyor⧾ 'de, 'de :noo' :ne 'de :Yusu'-a'a: dboo-nyor⧾ 'de.

⁵:Yee' nyor⧾ :on :se-a :Jueh'-nyor⧾-: 'dekorn: :Jueh'-nyor⧾-: :korn mor an-a'a: nyor⧾ :na-dih-nyor⧾-: an 'dhu dhih, on 'ye :Yusu'-a'a: dboo-nyor⧾ dhih-' no, on 'ye-uh sobu'⧾ dih :tba-dih:, on 'ye 'meh.

⁶Jorwor: :yeh :Yusu'-a'a: dboo-nyor:⧾ :dao', on yubo-eh 'i, :yee' on ple-', on 'wluh 'o :gwlor :dao' 'di 'weh. 'De on mu :gwlor⧾ an 'da-dih-a 'Lesla-: 'dekorn: 'Dorbi-: :en :ne-a 'de 'Lekao'nia-bluhba ken, :korn mor en-' :gbalie⧾ bo dih-:.

⁷'Do :wor on mu, 'de an kpa Nyorsoa-a' tubo-wlu:⧾ 'jeh-a' :po-eh 'dlu bo.

⁸:Yee' 'de 'Lesla-gwlor 'di, 'do :wor 'yu :due' :or 'wluh-dih:-a :klor-a', 'de :or 'see-a na :zai', or :ne. 'We-eh :due', :yee' 'yu-a' 'jeh :dao', or :dhe dih,

⁹'de or to :Poror' wlu :dou'⧾ bo ti :Poror'-a wlu-a. 'De :Poror' pobo-or ya 'dhuan. :Yee' or yubo-eh' :ka 'yu :dao', or po-eh dhih 'jeh-', :ka :Yusu' 'beh-dih:-a or 'ye-eh' no, or 'ye-a' 'puh.

¹⁰'De or 'wor, or 'da, :Sorn-', :on 'ye dih :nyna. :Yeh or 'da :ao', :yee' 'yu :dao', or wan 'o 'bluhbor-: dih, 'de or :na 'do :dha :due' :dao'.

¹¹:Yeh nyor⧾ :dhulu' :dao' :on :ne-a 'o, on 'ye-a deh :Poror' no-a, :yee' on 'kpa 'geh⧾ :po-eh-: ken, 'de an po on 'bli 'Lekao'nia-wlu, an no, Nyorsoa⧾ :za-dih:-' :gwlor-nyor⧾-a' nyior-tu:, 'de on yi 'noror :a bo yao 'zorn.

¹²:Yee' on 'dhu-dih: :Bana'ba 'Zuza: nyorsoa-a' 'nyne. 'De on 'dhu-dih: :Poror' 'Hormi: nyorsoa-a' 'nyne, deh no-eh, or no dhih-' :za-nyor:.

¹³:Yee' 'yu :or za-a 'Zuza: nyorsoa-a' 'slaa, :or :korn-a 'sla :nyna-a 'o :gwlor 'worn 'i dih, or-a' 'jeh :dao', or-: :ya 'de :blii'⧾-gblor⧾-: 'dekorn: 'gborn⧾-: 'do gwlor-a' gba-dih-gba worn 'i. Deh no-eh, or :ne nyor⧾ :dhulu' :dao' an 'bhorn on 'ye 'slaa :za 'do :Poror'-: 'dekorn: :Bana'ba-: bo.

¹⁴Jorwor: :yeh :Poror'-: 'dekorn: :Bana'ba-: on 'worn-a deh nyor⧾ :daa, an 'bhorn-a on 'ye-a' no, :yee' on 'fa-dih: an-a'a: paa-tiei-'-: dih, 'de on ple, on :ge-dih: 'de nyor⧾ :dhulu' :dao' 'nyne-', an po 'geh⧾, an no,

¹⁵:A 'bli-nyor⧾-a:. :Eh :korn dhih a no deh⧾ :daa :eh? :A-a' 'jeh :ke, :a :mor :gwlor-nyor:⧾ 'o, :ka a :ne-a :ke. Tubo-wlu:⧾ 'jeh, me-: :a :ya a-uh, 'de a 'ye 'o deh⧾ :daa :en se-a deh ken 'kpa 'zorn 'wluh, a 'ye dih 'bili: 'noror 'kmo :ne-Nyorsoa bo, :or no-a yao-: 'bluhba-: yobo'-: 'dekorn: deh⧾-a' klehkpeh :en :ne-a 'de en 'di-:.

¹⁶'Do ti :en zi-a 'di, Nyorsoa :za 'dawor'⧾-dlu⧾-a' klehkpeh 'yli-eh dih, en 'ye en-' 'jeh-a' 'ton :korn-deh no.

¹⁷Jorwor: or :to-dih: or-a' 'jeh nyor⧾ 'i 'weh 'do deh⧾ 'jeh or no-a bo. Or 'nyi a dbaa-ni: :eh 'wluh-a 'de yai', 'de or 'nyi a 'dhuu'-deh⧾ 'do en-' :noror' 'i. 'De or 'nyi a dii-deh:⧾ :dhulu', or 'yi-dih: a-a' :porluh⧾ 'mona-' dih.

¹⁸Jorwor: :yeh :Poror'-: 'dekorn: :Bana'ba-: on :za-a deh :daa-' 'gboror:, :yee' an-a' 'worn, 'de on 'ye 'kle 'do nyor⧾ :dao', an-a' 'borboa' 'i :po-eh bo, on :ne-' 'slaa :za 'do on bo.

¹⁹:Yee' :Jueh'-nyor⧾-a' nyor⧾ :noo', mo-: 'wluh 'Antior-: 'dekorn: :Iko'nia-: mo-: :pa-dih: nyor⧾ :dhulu' :dao' 'zorn dih, 'de an-a' :porluh⧾ 'bili:-' dih. On :tba-dih: :Poror' sobu'⧾ dih, 'de on 'kla-or dih, on za-or 'o :gwlor-'. :Mor on :taa 'ye :dee', :yee' on 'da or 'meh-'.

²⁰:Yeh on za-or 'o :gwlor-', :yee' :Yusu'-a' klei' :zi-nyor⧾ 'gola-or 'de dih, 'de or :sorn-', or mu :gwlor-' de. :Yee' :yeh zorn zen-a, :yee' or-: 'dekorn: :Bana'ba-: on 'wluh 'o :gwlor :dao' 'di 'weh, 'de on mu 'Dorbi.

²¹:Yee' :yeh on nyni-a 'o, :yee' on po Nyorsoa-a' tubo-wlu:⧾ 'jeh 'do :gwlor :dao' 'di, 'de on no-eh, 'de nyor⧾ :dhulu' po :Yusu'-a' dhih dhih 'jeh. :Yeh on no :ao', :yee' on chehn 'o :dhie', 'de on mu 'Lesla-: :Iko'nia-: 'dekorn: 'Antior-: gwlor⧾ 'di de.

²²:Yee' an po 'de :Yusu'-a' klei' :zi-nyor⧾-a' 'kpih, 'de an zela-uh :gwluhuh', on 'ye :Yusu'-a' dhih 'jeh-' :po-eh 'dlu bo kpa. 'De an zela-uh :gwluhuh' :ke, an no, :A :korn :a 'ye 'de 'kle 'ye-eh: :dhulu' 'di :yi-dih:, 'de jorwor: :a 'ye 'de Nyorsoa-a' nyor⧾ wlu 'ken :korn-eh 'zorn pa.

²³'Chore :yeh :Poror'-: 'dekorn: :Bana'ba-: on mu 'di, :yee' an tba nyor⧾ :jii-eh: :on 'ye-a nyor⧾ :klaba'⧾ no 'de mor. :Mor on 'ye-uh' :jii-eh tba, :yee' an pa-' 'suehn:, 'de an wlu 'de Nyorsoa bo, 'de an po 'de nyor⧾ :klaba'⧾ :dao', 'de :Gwlor :baa' 'kwa, on dhe-a :gwlii'.

²⁴:Yee' on mu :Pasi'la-bluhba ken. :Yeh on gweh-or 'dlu, :yee' on zi-', on mu :Panfi'la-bluhba ken.

²⁵'Do :wor on :po-dih: Nyorsoa-a' tubo-wlu⧾ 'de 'Pehka-gwlor 'di. 'De on mu :gwlor an 'da-dih-a :Ati'lia 'di, 'de yobo' worn 'i.

²⁶:Yeh on 'wluh-a :Ati'lia, :yee' on 'kpa 'de 'ni ken-meheh 'di, 'de on mu 'Antior de, 'do :dha on :po-dih-uh-a 'de Nyorsoa 'kwa, 'do :koan: on mu-a no 'da bo. :Koan: :dao', or-: on gweh 'i :naa, 'de on yi 'o de.

²⁷:Yeh on 'si-a :gwlor-' dih, :yee' on po 'chore-nyor⧾-a' klehkpeh :dha :due', 'de on zela-uh :gwluhuh', deh⧾-a' klehkpeh Nyorsoa no-a :en :yi-dih-uh-a-', 'dekorn: :ka or no-a :gwie 'i kan-dih-eh 'do nyor⧾ :on :se-a :Jueh'-nyor⧾ bo, 'de on po-a :Yusu'-a' dhih dhih 'jeh-'.

²⁸:Yeh on no :ao', :yee' on :gwle 'o :Yusu'-a' klei' :zi-nyor⧾ bo 'weh, 'de an mu :mu.