Read Eastern Krahn Noo-deh:⧾ 15 Bible Online

Noo-deh:⧾ 15 - Eastern Krahn bible

Noo-deh:⧾ 15

¹:Yee' nyor⧾-kpalu:⧾ :noo', mo-: 'wluh :Judi'a-bluhba ken, 'de on mu 'Antior, 'de an torne :Yusu'-a' dhih 'jeh-' :po-nyor:⧾ :on :ne-a 'de deh, on 'dae:, :Mor nyor se :bhlororn' 'meh, :ka :Mose'-a' 'tele' 'da-a, :yee' or se 'beh-dih: or 'ye 'puh.

²:Yee' :yeh nyor⧾ :dao', on :za-a deh :daa-', :yee' :Poror'-: 'dekorn: :Bana'ba-: on :se-eh' 'worn-dih: klehkpeh klehkpeh, 'de on :ne an dhobo. Eh-: no-eh, 'de 'chore-nyor⧾ :za :Poror'-: 'dekorn: :Bana'ba-: 'dekorn: :Yusu'-a' dhih 'jeh-' :po-nyor:⧾ :noo'-: on 'ye :Julu'slehn mu, on 'ye :Yusu'-a'a: dboo-nyor⧾-: 'dekorn: 'chore-a' nyor⧾ :klaba'⧾-: on 'ye-uh dih dhele: 'do deh :daa, eh-a' dhih bo.

³'De on dbo-uh, 'de on 'kpa :gwie 'i. :Yee' on :yi-dih: :Feni'sia-: 'dekorn: Sehmeh'la-: 'de an zela :Yusu'-a' dhih 'jeh-' :po-nyor:⧾ :on :ne-a 'de :gwluhuh' :ka nyor⧾ :on :se-a :Jueh'-nyor:⧾ on 'bili:-a-' dih 'de Nyorsoa bo. :Yeh dhih 'jeh-' :po-nyor:⧾ :on :ne-a 'de, on 'worn-ih'-a, :yee' 'mona 'yi-dih-uh-: dih 'gabaa.

⁴:Yee' :yeh :Poror' 'i 'si-a :Julu'slehn dih, :yee' 'chore-nyor⧾-: :Yusu'-a'a: dboo-nyor⧾-: 'dekorn: 'chore-a' nyor⧾ :klaba'⧾-: on kpon-uh-: dih. 'De :Poror'-: 'dekorn: :Bana'ba-: on zela-uh deh⧾-a' klehkpeh Nyorsoa :yi-dih-uh-a-', 'de :en :no-eh :gwluhuh'.

⁵:Yee' :Yusu'-a' dhih 'jeh-' :po-nyor:⧾ :noo' :on :ne-a 'de :Falasi'i-deh 'di, mo-: :wlu, on 'da, Nyor⧾ :on :se-a :Jueh'-nyor:⧾, on :korn on 'ye :bhlororn' 'meh :gbor :gbor. :Yee' on :korn on 'ye 'o :Mose'-a' 'tele' dih dhe :ke.

⁶:Yeh on 'da :ao', :yee' :Yusu'-a'a: dboo-nyor⧾-: 'dekorn: 'chore-a' nyor⧾ :klaba'⧾-: on 'kpa :dha :due', on 'ye 'de dhih :daa 'di pobo:.

⁷:Yeh on dhobo:-a :dhoboo:, :yee' :Piteh' :sorn-' 'weh, 'de or :wlu, or 'dae:, 'An 'de-di'-boi'-a:. A yubo-eh', 'do ti-kpor-bei: :en zi-a 'di, Nyorsoa tba 'on :jii-eh: 'de a 'nyne-', 'on 'ye or-a' tubo-wlu:⧾ 'jeh po, 'de nyor⧾ :on :se-a :Jueh'-nyor⧾ bo, on 'ye-ih 'worn, 'de on 'ye-ih dhih 'jeh-' po.

⁸Nyorsoa :or 'ye-a 'o nyor⧾ :porluh ken dih, or-: :to-dih-eh nyor⧾ 'i, :ka or 'worn-dih-a an-a' dhih ken dih, 'do an-a' Gban 'i :ne :Zulu: 'nyi-eh bo, :ka or no-a :a-a' 'nyi-a' :ke.

⁹Mo-: 'dekorn: :a mor-: or :se-' :a-uh dih zela:. :Ka :a no-a 'de :a-a' dhih 'jeh-' :po-eh no-eh, 'de :a-a' :porluh⧾ :gweh-a :vlehehn'-', 'ka-: on no :ke.

¹⁰:Yee' :eh :korn dhih :oo' :naa, 'de a 'dhen Nyorsoa, 'do 'gbeh⧾ :a :bai'-a' :bai'-: 'dekorn: :a-a' 'jeh 'yor-eh-: :a se-a kpa-a' 'beh-dih:, 'de a po-ih 'o :Yusu'-a' klei' :zi-nyor⧾ 'dlu :eh?

¹¹'Kei:. Eh se :korn eh 'ye :ao' :ne. :A po-eh' dhih 'jeh, :ka eh 'dhu-a :Gwlor :baa' :Yusu'-a' mla-' :or no-eh, 'de :a 'puh-a, 'ka-: on :ne :ke.

¹²:Yee' :Poror'-: 'dekorn: :Bana'ba-: an po kuna', :ka Nyorsoa :yi-dih-uh-a-', 'de on no-a nyor⧾ 'i :to-dih-deh⧾-: 'dekorn: nyor⧾ 'di dih 'ma-dih-deh⧾-: 'de nyor⧾ :on :se-a :Jueh'-nyor⧾ 'nyne-'. :Yeh an po-a kuna', :yee' :gwlor-nyor⧾-a' klehkpeh :on :gweh-dih:-a 'o, on no 'dhuan, 'de an to-uh :dou'⧾ bo.

¹³:Yeh on gweh-a :wlu-a' 'i, :yee' 'Jeen :wlu-', or 'dae:, A :to 'on :dou'⧾ bo, 'an 'de-di'-boi'-a:.

¹⁴Samor' :wlu-' :kana, or zela-eh ken dih 'weh, :ka Nyorsoa no-a 'de nyor⧾ :on :se-a :Jueh'-nyor:⧾, an-a' bo :yi-eh :zai', 'de or 'kpa-a 'de on 'nyne-' son, 'de or :za-a: 'de nyor⧾ or tba-a :jii-eh 'do or-a' 'jeh bo.

¹⁵Deh Nyorsoa-a' wele-eh: :po-nyor⧾ :za-a-', eh-: 'o, eh :gweh-dih: 'i :kpeheh:, :ka eh no-a 'chle-eh, eh no-a,

¹⁶:Gwlor :baa' 'dae:, 'De ybei'-a' ybei', 'an mu de :yi, 'on 'ye :Debe'-a' 'gbu :on blu-a :po :dele' ka. Or-a'a: 'gbu :on :gba-a ya, an-a' 'tiei: :en 'pehn-a 'o an-a' :gbaan' ken dih, 'an mu-ih-' 'duo:, 'on 'ye-uh po :dele' ka, 'on 'ye-uh dih :ku-dih: :neheh'.

¹⁷Eh-: mu-eh :no, 'de nyor⧾ :yuh :on :sie:-a 'o, on 'ye 'on 'kwla⧾-' dih 'bhorn, 'de mor nyor⧾ :on :se-a :Jueh'-nyor:⧾ 'on 'da-a 'de on 'ye 'an-a: nyor⧾-' 'dhu-eh:.

¹⁸Deh :daa, eh-: :Gwlor :baa' :za-a-', :or no-eh, 'de :a yubo:-a deh⧾-a' klehkpeh :daa, :en :za-eh :dee' see.

¹⁹:Yee' 'Jeen-a kpa or-a' wlu 'dlu bo, or 'dae:, :Yee' 'do eh-a' dha, deh :yeh :ne-a 'o 'on :gwlii', eh-: 'dhu, nyor⧾ :daa :on :se-a :Jueh'-nyor:⧾ 'de :an 'bili-a-' dih 'noror Nyorsoa bo, :a-a' 'beh-dih:-uh' 'worn dih.

²⁰Deh :due' :a 'ye-a' no, :a 'chle-uh bo, :a 'ye-uh' :gwluhuh' zela:, on :ne-' dii-deh:⧾ :en 'dhu-dih-eh zuu⧾ gban 'i di. :A mu-uh :gwluhuh' zela:, on :ne-' 'tmeor:⧾ :korn-eh buh 'di po. 'De on :ne-' :gwlor-nimi-: 'dekorn: 'kwla-nimi-: nyor⧾ 'dba-a, :en se-a nyomor-' 'wluh, 'de :en :dhe-dih:-a nyomor-' dih di,[4] 'dekorn: nyomor 'na-a'-:.

²¹Deh no-eh, :Mose'-a' 'tele'-a zlo-eh-' 'de :a-a' 'di :gweh-dih-sla⧾ 'zorn, 'do Nyorsoa-a' :gwlee-we-a' klehkpeh 'di, 'de mor eh-a' tubo-wlu⧾-a po-eh-' gwlor⧾ 'di dih :dee' see.

²²:Yee' :Yusu'-a'a: dboo-nyor⧾-: 'chore-a' nyor⧾ :klaba'⧾-: 'dekorn: 'chore-nyor⧾-a' klehkpeh-: mo-: polo: dhih, on 'ye nyor⧾-kpalu⧾ :za 'de on 'klu-', 'de nyor⧾-a' 'jeh :dao', mo-: :Poror'-: 'dekorn: :Bana'ba-: on 'ye 'Antior mu. Nyor⧾ 'sororn' on :za-a, an-a' 'nyne :wor :Juda' an 'da-dih-a :Basa'ba, 'dekorn: :Salor'-: :on no-a :Yusu'-a' dhih 'jeh-' :po-nyor⧾-a' nyor⧾ :na-dih-nyor⧾-a' nyor⧾ 'sororn'.

²³:Yee' on 'chle 'chlee-deh:, eh-: on 'nyi-uh, on 'ye kpa. 'Chlee-deh-a' 'jeh :daa, eh-a' wlu 'da, :A :mor :Yusu'-a'a: dboo-nyor⧾-: 'dekorn: 'chore-a' nyor⧾ :klaba'⧾-: :a :mor :or no-a a-a' 'Klae :de-di'-boi', :a :mor 'ye a-uh, a :mor :or 'dhu-a :a-a' 'Klae :de-di'-boi'-' :on 'ti-a 'Antior-: 'Silia-: 'dekorn: :Sele'sia-: :on :se-a :Jueh'-nyor:⧾.

²⁴:A 'worn-ih' :ka nyor⧾ 'wluh-a 'noror :a 'nyne-', :a se-a 'tele' 'nyi, 'de on yi-a 'de a bo, 'de deh⧾ on :za-a-' 'de a bo, en 'beh-dih-a a 'worn dih, 'de en po-a a-a' :porluh⧾ 'zorn.

²⁵:Yee' 'do eh-a' dha, :a 'worn-dih-eh ken dih 'weh, :a 'ye nyor⧾-kpalu:⧾ :noo' :za, on :ne :Poror'-: 'dekorn: :Bana'ba-: :on no-a :a-a' :dhih :kma-nyor⧾, on 'ye 'de a bo yi,

²⁶:on 'ma-dih:-a an-a' 'meheh'-dhih bo, 'do :a-a' :Gwlor :baa' :Yusu' 'Klae-a' dhih bo.

²⁷:Yee' eh-: :korn dhih, :a dbo :Juda'-: 'dekorn: :Salor'-: on 'ye-a deh⧾ :a 'chle-a 'de 'chlee-deh: :daa 'di, on 'ye wlu no, on 'ye a :gwluhuh' zela:, :ka en 'dhu-a dhih 'jeh-'.

²⁸:A mor-: 'dekorn: Gban 'i :ne :Zulu-: :a 'worn-dih-eh ken dih 'weh, :a 'ye 'o 'gbeh⧾-a' :yih :daa, 'do a 'dlu po 'klein', :en no-a,

²⁹A-a' :di-' dii-deh:⧾ :en 'dhu-dih-eh zuu⧾ gban 'i. A-a' 'na-:-' nyomor. 'De mor a-a' :di-' :gwlor-nimi-: 'dekorn: 'kwla-nimi-: nyor⧾ 'dba-a, :en se-a nyomor-' 'wluh, 'de :en :dhe-dih:-a nyomor-' dih. A-a' :po-' 'tmeor:⧾ :korn-eh buh 'di. :Mor eh 'dhu, a :tehn-dih: deh⧾ :daa bo dih, :yee' eh mu 'yi dih :nmor 'do a bo. :A 'ye 'ye-dih: o.

³⁰:Yee' on dbo dboo-nyor:⧾ :dao' 'weh, 'de on mu 'Antior. :Yeh on 'si-a dih, :yee' on po 'chore-nyor⧾-a' klehkpeh :dha :due', 'de on :za 'chlee-deh: :dao' 'kwla.

³¹:Yeh nyor⧾ :dao', on zlo-a 'chlee-deh: :dao', :yee' 'mona 'yi-dih-uh-: dih. Deh no-eh, eh no 'de nyor⧾-a' 'kpih :po-chlee-deh:.

³²:Yee' :Juda'-: 'dekorn: :Salor'-: :on :korn-a 'jeh 'yor-eh: no-a Nyorsoa-a' wele-eh: :po-nyor⧾, mo-: :za deh⧾ :doru' :en 'ye-uh'-a 'kpih bo po, 'de on 'ye-a dih ku.

³³:Yeh on zi-a 'o ti-kpor-bei 'do on bo 'de 'Antior, :yee' an-a' 'Klae :de-di'-boi' :on :ne-a 'o, on po-uh :bhorlie' bo, 'de on dbo-uh 'de :yuh :on dbo-uh-a de bo. [

³⁴Jorwor: :Salor' polo-eh' 'do or-a' 'jeh :gwlii', or 'ye 'de :sie:.]

³⁵Jorwor: :Poror'-: 'dekorn: :Bana'ba-: on :sie: 'Antior 'weh, 'de mo-: 'dekorn: nyor⧾ :dhulu' :noo'-: an torne nyor⧾ deh, 'de an po tubo-wlu:⧾ :en kor-a :Gwlor :baa' 'i.

³⁶:Yee' :yeh 'we-kpor-bei :zi-dih:-a 'o ken dih, :yee' :Poror' :wlu-' 'de :Bana'ba bo, or 'dae:, 'Nyi :a mu de, 'de gwlor⧾-a' klehkpeh :a :yi-dih:-a 'di dih, :eh :korn-a 'de 'di :a :po-dih:-a :Gwlor :baa'-a' tubo-wlu⧾, :a 'ye :a-a' 'Klae :de-di'-boi'-a' klehkpeh :on :ne-a 'de 'ye, :a 'ye 'de on bo dih 'worn.

³⁷:Yeh or :za-a deh :daa-', :yee' :Jororn' an 'da-dih-a 'Make :ke, or-: :Bana'ba-a 'bhorn or 'ye kpa :ke.

³⁸Jorwor: :Poror' :se-eh' :toror' 'di 'ye, on 'ye-or' kpa. Deh no-eh, ti on mu-a :zai', or :ne on :se-' :koan 'dlu-' jla, or sie-uh :koan kwa dih 'de :Panfi'la, 'de or yi de.

³⁹Eh-: no-eh, 'de mo-: :ne-a 'sororn', on 'ya-ih'-a wlu ken dih, 'de on :gble-eh:-'. 'De :Bana'ba 'duo: 'Make-', 'de mo-: :ne-a 'sororn', on 'kpa 'de 'ni ken-meheh 'di, on mu 'Sapor.

⁴⁰'De mor :Poror' 'duo: :Salor'-' :ke, 'de on mu. :Yeh on 'ye-a' mu, :yee' an-a' 'Klae :de-di'-boi' po-uh 'de :Gwlor :baa' 'kwa, 'de jorwor: an mu :mu.

⁴¹:Yeh :Poror' :taa mu, :yee' or :yi-dih: 'Silia-bluhba-: 'dekorn: :Sele'sia-bluhba-: ken, 'de or po 'chore-nyor⧾ :on :ne-a 'de 'kpih bo.