Read Eastern Krahn Noo-deh:⧾ 16 Bible Online

Noo-deh:⧾ 16 - Eastern Krahn bible

Noo-deh:⧾ 16

¹:Yee' :Poror' 'i mu 'Dorbi:. 'De on zi, on mu 'Lesla, 'do :dha :Yusu'-a' klei' :zi-yu an 'da-dih-a :Timehte', or 'ti-a. Or 'de no :Yusu'-a' dhih 'jeh-' :po-nynor: :ke, 'de or no :Jueh'-nynor. Jorwor: or :baa' no 'Glii-yu:.

²'Klae :de-di'-boi'-a' klehkpeh :on :ne-a 'Lesla-: 'dekorn: :Iko'nia-: an 'tmo :Timehte'-a' 'nyne 'jeh :ne.

³:Poror' 'bhorn or 'ye :Timehte' kpa. Eh-: :korn dhih or 'dba-or :bhlororn'. Deh no-eh, :Jueh'-nyor:⧾ :on 'ti-a 'o 'do :dha 'o-a' klehkpeh, on yubo-eh' :ka or :baa' 'dhu-a 'Glii-yu-'.

⁴:Yeh an no-a 'wluh gwlor 'di, mu gwlor 'di, :yee' 'tele' :Yusu'-a'a: dboo-nyor⧾-: 'dekorn: 'chore-a' nyor⧾ :klaba'⧾-: on po-a 'de :Julu'slehn, :yee' on za-eh-: 'kwla 'de on bo, on 'ye-eh' 'o dih dhe.

⁵:Yee' 'chore-nyor⧾-a' klehkpeh ku-: dih 'de an-a' :Yusu'-a' dhih 'jeh-' :po-eh 'di, 'de an 'kpuhba ken dih zorn 'o zorn.

⁶:Yee' :Poror' 'i :yi-dih: 'Fleya-bluhba-: 'dekorn: :Gale'tia-bluhba ken-:. Jorwor: Gban 'i :ne :Zulu :se-' 'worn on 'ye Nyorsoa-a' tubo-wlu⧾ po 'de 'Esea-bluhba ken.

⁷:Yeh on nyni-a 'o 'Mesea-bluhba-a' 'dhuna 'i, :yee' an 'bhorn on 'ye 'de :Behfi'nia-bluhba ken mu. Jorwor: :Yusu'-a' :Zulu :se-' 'worn, on 'ye-eh' no.

⁸Eh-: no-eh, 'de on zi 'Mesea dih, 'de on mu :gwlor an 'da-dih-a 'Tloa 'di.

⁹:Yee' :yeh glu gor-a, :yee' :Poror'-a' 'yli-eh 'kpa deh 'i, 'de or 'ye 'Masordo'nia-yu :due', or-: :nyna dih, 'de or bale-or, or 'da, Yi 'noror :a bo 'Masordo'nia, :on 'ye :a bo 'kpa.

¹⁰:Yeh deh :daa, eh :no-eh 'do :Poror' bo, :yee' :a 'bhorn :ka :a 'ye-a' no, 'de :a 'ye-a' 'Masordo'nia mu 'do :dha :due' :dao'. Deh no-eh, :a 'worn-dih-eh ken dih 'weh, :ka Nyorsoa 'da-a :a-uh, :a 'ye-a or-a' tubo-wlu:⧾ 'jeh po, 'de nyor⧾ :on :ne-a 'de bo.

¹¹:Yee' :a 'kpa 'de 'ni ken-meheh 'di, 'de :a 'wluh 'Tloa, :a mu 'o yobo'-a' dubeh: an 'da-dih-a :Samor'tle ken :dhehehn:. :Yeh zorn zen-a, :yee' :a mu :Nia'poli:.

¹²:Yeh :a 'wluh-a 'o :neheh', :yee' :a mu :gwlor an 'da-dih-a :Fele'pa, :or no-a 'Masordo'nia-bluhba-a' 'for :dao', or-a' :gwlor :klaba', :or 'Wloon-nyor⧾ 'ya-a ken, 'de on :korn-a wlu 'ken. 'De :a zi 'o :gwlor :dao' 'di 'we-kpor-bei.

¹³:Yee' :yeh :a :ne-a 'o, 'de Nyorsoa-a' :gwlee-we-eh nyni-a 'o, :yee' :a 'wluh 'o gwlor-a' 'yor-eh 'weh, 'de :a mu 'de 'ni :klaba' :eh :ne-a 'o worn 'i, 'do :dha :a dhe-a :gwlii', :a mu-a :Jueh'-nyor⧾ 'ye-dih: on 'ye-a' 'de Nyorsoa bo :wlu. 'Do :wor :a :dhe dih, 'de :a :wlu 'de 'nynor⧾-kpao'⧾ :on 'kpa-a :dha :due' 'do mor bo.

¹⁴'Nynor⧾-kpao'⧾ :on :dhe-a 'o dih, 'de :an to-a :Poror' :dou'⧾ bo, an-a' nyor :due' :wor 'Ledia, :or 'wluh-a :Taya'ta, :or za-a Nyorsoa :weheh'. Or plo 'ylii: :nmaa'e: :en :kpe-a gbor, 'de :en 'kpa-a deh ken. Or-a' 'jeh :dao', or-: :korn :porluh: :Gwlor :baa' 'tuh dih, or 'ye dhih :Poror' :za-a-' dih kpon.

¹⁵:Yee' or-: 'dekorn: or-a'a: nyor⧾-a' klehkpeh :on :ne-a 'de or 'bli 'gbu-:, on :po-eh: 'ni 'dlu. :Yeh on gweh-a 'ni 'dlu :po-eh 'i, :yee' or 'da :a 'weh 'de or 'bli 'gbu, or 'dae:, :Mor a :zlo-dih: 'on :Gwlor :baa'-a' dhih 'jeh-' :po-nyor, :yee' a 'yle, a 'ye 'noror 'on 'bli 'gbu :ko-dih:. :Yeh or 'neh-a :a ken, :yee' :a 'worn-'.

¹⁶Eh :korn 'we-eh :due', :yee' :a mu 'o :dha :ne-a :due', :Jueh'-nyor⧾-a wlu-dih-a 'de Nyorsoa bo. :Yeh :a mu-a 'o, :yee' 'nynor-kpao'-yu: :or no-a 'ge-yu, 'de :or 'ble-a 'kwla 'ye-dih-deh 'do or 'de, 'de :eh no-eh, 'de or zi-a de, or-: :a :yeh-dih: ken. 'Nynor-kpao'-yu-a' 'jeh :dao', or no 'wlii: :dhulu' 'do de :zi-eh bo, 'do or-a'a: nyor⧾ :on korn-or wlu 'ken bo.

¹⁷:Yeh 'nynor-kpao'-yu: :dao', or 'ye-a :a mor-: 'dekorn: :Poror'-: :yee' or zi 'o :a klei' 'weh, 'de or po 'geh⧾, or no, Nyor⧾-kpalu:⧾ :daa, on no Nyorsoa :or no-a 'yi 'beh-Nyorsoa, or-a' 'bhoi-nynuu: :an zela :a :gwluhuh' :ka :a 'ye-a' no, 'de :a 'ye-a' 'puh.

¹⁸Deh :dao', eh-: or no :noo:, 'do 'we :dhulu' 'di. :Yee' :Poror' sea :blaa'a:, 'de or 'bili:-' dih, 'de or :wlu 'de 'kwla 'ye-dih-deh bo, or 'dae:, 'De :Yusu' 'Klae-a' 'nyne 'di, 'an zela :on :gwluhuh', 'wluh 'o or 'de. :Yeh or 'da :ao', :yee' 'do :dha :due'-a' 'jeh :dao', eh 'wluh 'o or 'de 'weh.

¹⁹:Yeh nyor⧾ :on :korn-a 'nynor-kpao'-yu: :dao' wlu 'ken, on 'ye-a deh :Poror' no-a, 'de on yubo-eh :ka or kan-a an-a'a: 'wlii: 'ye :gwie 'i, :yee' on kpon :Poror'-: 'dekorn: :Salor'-: 'weh, 'de on 'kla-uh dih, on kpa-uh 'de 'koti-', 'do 'doror'.

²⁰'De on kpa-uh 'o 'kwi⧾ :klaba'⧾ ybei', :yee' on 'da, Nyor⧾-kpalu:⧾ :daa, mo-: :Jueh'-nyor:⧾ 'o. Mo-: :ya 'de :zaa'za dha :a 'bli :gwlor-'.

²¹Mo-: :an torne nyor⧾ on 'bli-deh⧾ :en se-a 'o :a :mor 'Wloon-nyor:⧾ :a-a'a: 'tele'-a' :gwie 'i :ne, 'de an 'bhorn :a 'ye-ih' 'worn-dih:, :a 'ye-ih' no.

²²:Yee' nyor⧾-a' klehkpeh :on :ne-a 'o, on 'kpa nyor⧾ :yuh :dao' bo, 'de an po :Poror'-: 'dekorn: :Salor'-: dhih 'dlu :ke. 'De 'kwi⧾ :klaba'⧾ :dao', on chena: :Poror' 'i-a' paa-tiei dih, 'de on chehn 'kpanua', 'de on 'nyi nyor⧾ 'tele' on 'ye-uh' bla.

²³:Yeh on bla-uh-a :blaa:, :yee' on kpa-uh', 'de on po-uh :kasue 'di, 'de on zela: 'yu :or :korn-a 'de :kasue-gbu-a' wlu bo :gwluhuh', or 'ye-uh' 'yli-eh bo 'dhu deh 'jeh, on :ne-' ple.

²⁴:Yee' :yeh or 'worn-a tubo-wlu:⧾ :dao', :yee' eh-: no-eh, 'de or po-uh 'de :kasue-gbu-a' :chuu: :on :ne-a 'de 'di ka 'di, 'de or po-uh :gbolo-eh buh⧾-'.

²⁵:Yeh eh 'koan'-dih-a 'o glu-a' gwea dih, :yee' :Poror'-: 'dekorn: :Salor'-: an wlu 'de Nyorsoa bo, 'de an ble or-a' 'zio :po-duh⧾ 'do or bo. :Yee' nyor⧾ :on :ne on :ne-a 'de :kasue 'di, an to an-a' wlu :dou'⧾ bo.

²⁶:Yeh an mu-a 'ye-:, :yee' 'bluhba-a tleh-' 'gabaa. Eh-: no-eh, 'de 'do :dha :kasue-gbu :nyna-a dih, 'de 'do-a tleh. :Yee' 'do :dha :due' :dao', :kasue-gbu-a' :kpaa'⧾-a' klehkpeh kan-dih: worn, 'de 'chen-dubu'⧾ :en :ne-a 'de an-a' klehkpeh buh⧾-', 'de en bhehn-dih:.

²⁷:Yeh eh no :ao', :yee' 'yu :or :korn-a 'de :kasue-gbu-a' wlu bo, or 'wluh 'nyinor:, 'de or :sorn-'. :Yeh or 'ye-a :kasue-gbu-a' :kpaa'⧾ :florn-a worn, :yee' or jli 'de or-a'a: :bhla 'jlehn kpla-'-: dih, or 'ye or-a' 'jeh 'dba. :Mor or :taa 'ye :dee', :yee' or 'da :kasue-nyor⧾-a' klehkpeh, on ple-'.

²⁸Jorwor: :yee' :Poror' 'wor-', or 'da, 'Bor, 'bor, :an-a' :tba-' :an-a' 'jeh deh. :A-a' klehkpeh, :a :ne :daa 'weh.

²⁹:Yeh :Poror' 'da :ao', :yee' 'yu :dao', or 'da nyor⧾ on 'ye-or :dhali-pu⧾ :ya. :Yeh on ya-ih-a 'de, :yee' or ple, or :ge-dih: 'de :kasue-gbu 'di 'weh. 'De or 'jli dih 'do :Poror'-: 'dekorn: :Salor'-: ybei', or-a' 'tiei-a tleh.

³⁰:Yee' or 'si-dih-uh-: 'zorn, 'de or dhele-uh dih, or 'dae:, Nyor⧾ :klaba'⧾-a:. :Kaa 'on 'ye no, 'de 'on 'ye 'puh :eh?

³¹'De on 'da, Po :Gwlor :baa' :Yusu'-a' dhih dhih 'jeh-'. :Yee' :an mu 'puh-:, mor-: 'dekorn: :an-a'a: 'gbu-a' klehkpeh-:.

³²'De on :za :Gwlor :baa'-a' dhih-' 'de or bo-: 'dekorn: nyor⧾-a' klehkpeh :on :ne-a 'de or 'bli 'gbu bo-:.

³³'Do glu-we-eh: :dao' 'di, or 'duo: :Poror'-: 'dekorn: :Salor'-: 'weh, 'de or :dle an-a' sene'eh⧾-a' :momae. 'De or-: 'dekorn: or-a'a: 'cheh-a' klehkpeh-: on po 'ni 'dlu, 'do :dha :due' :dao'.

³⁴:Yeh or no :ao', :yee' or kpa-uh 'de or 'bli 'gbu 'di, 'de or 'nyi-uh dii-deh⧾ on 'ye di. :Yee' or-a'a: 'cheh-a' klehkpeh, on 'yi-dih: 'mona-'-: dih. Deh no-eh, an-a' klehkpeh, on po Nyorsoa-a' dhih dhih 'jeh :naa.

³⁵:Yee' :yeh zorn zen-a, :yee' 'kwi⧾ :klaba'⧾ :dao', on dbo an-a'a: :poli'si 'weh, 'de :kasue-gbu-a' wlu 'ken :korn-nyor bo, on 'dhu-uh wlu worn, or 'ye :Poror' 'i dih 'tali:.

³⁶:Yeh or 'worn-a tubo-wlu:⧾ :daa, :yee' or zela: :Poror'-: :gwluhuh', or 'dae:, :A-a'a: 'kwi⧾ :klaba'⧾ dbo wlu 'noror 'on bo, on 'da, 'on 'tali: a dih, a 'ye mu. A 'kpa 'o, a 'ye mu :naa, 'de :porluh-a' dih 'pehn ka 'di o.

³⁷:Yeh or 'da :ao', :yee' :Poror' :wlu-' 'de :poli'si: :on :dbo-eh bo, or 'dae:, 'Kwi⧾ :klaba'⧾ :daa, on :se-' :a-a' zabe zi, 'de on bla :a-uh 'do :gwlor :gwea. Keen' :mloror' :a :mor 'Wloon-nyor⧾-a' nyor⧾ :oo', jorwor: on bla :a 'weh, 'de on po :a :kasue 'di. :Yee' jorwor: an 'bhorn on 'ye :a dih 'tali: :weheh:, :a 'ye mu 'de 'zile: ka 'di :naa :e? 'Kei:. :A :se-' 'worn. 'Nyi an-a' 'jeh 'yor-eh 'yle, on 'ye 'de :a :kasue 'di :za 'do :gwlor-nyor⧾-a' klehkpeh ybei'.

³⁸:Yee' :poli'si: :dao', on mu-: de, 'de on po kuna' 'de 'kwi⧾ :klaba'⧾ :dao' bo. :Yee' :yeh on 'worn-ih'-a :ka :Poror' 'i 'dhu-a 'Wloon-nyor⧾-a' nyor⧾-', :yee' :fano: 'kpa 'de on 'di 'weh 'gabaa.

³⁹Eh-: no-eh, 'de on mu 'de on bo 'de :kasue 'di, on bale-uh, on za-uh 'de :kasue 'di. 'De an bale-uh on 'ye 'o :gwlor-' 'wluh.

⁴⁰:Yee' :yeh :Poror'-: 'dekorn: :Salor'-: on 'wluh-a 'de :kasue 'di, :yee' on mu 'de 'Ledia 'bli 'gbu. 'Do :wor on :ne 'Klae :de-di'-boi' 'gbon-dih:, 'de :Poror' 'i :wlu 'de on bo, 'de deh on :za-a-' 'de on bo, eh po 'de an-a' 'kpih. :Yeh on no :ao', :yee' on mu-'.