Read Eastern Krahn Noo-deh:⧾ 20 Bible Online

Noo-deh:⧾ 20 - Eastern Krahn bible

Noo-deh:⧾ 20

¹:Yeh :zaa'za: :dao', or 'bor-eh, :yee' :Poror' dbo :Yusu'-a' klei' :zi-nyor⧾ wlu bo. 'De or po 'de an-a' 'kpih. :Yeh or no :ao', :yee' or kpa-uh-: wlu, 'de or 'kpa 'Masordo'nia: :gwie 'i.

²Or na 'bluhba-a' 'for :dao' ken dih, 'de or wlu 'de nyor⧾ :ne-a 'de bo, or po 'de an-a' 'kpih. Eh-: or no :noo:, 'de or 'si-dih: 'Glii-bluhba ken dih.

³'Do :wor or :ne 'do 'chuh⧾ taan 'di. :Yee' :yeh or po-a or-a'a: 'tiei 'kpa or 'ye-a 'de 'ni ken-meheh 'di 'kpa, or 'ye-a 'Silia-bluhba ken mu, :yee' or 'worn-ih' :ka :Jueh'-nyor:⧾ :on :ne-a 'de, on 'dhu-a dhih, 'do or-a' dhih bo. Eh-: no-eh, 'de or polo-eh 'do or :gwlii', 'de or mu deka, or :yi-dih: 'Masordo'nia.

⁴:Yeh or :taa mu, :yee' :Sopa'tor: :or no-a 'Pilor-a' 'yu :or 'wluh-a :Behli'a-gwlor-: 'Alita'kor-: :korn :Sehkorn'dor-: :on 'wluh-a 'Tehsolo'nika-gwlor-: 'Geyeh: :or 'wluh-a 'Dorbi-gwlor-: :Teki'kor-: :korn :Tlofi'ma-: :on 'wluh-a 'Esea-bluhba ken-: 'dekorn: :Timehte'-: an-a' 'jeh :dao', mo-: :ne :Poror' :mu-dih: 'de.

⁵Nyor⧾-kpalu⧾-a' 'jeh :dao', mo-: mu :a ybei', 'de on :fuo: :a 'ken 'do 'Tloa-gwlor-'.

⁶Jorwor: :yeh Se 'vu-bhlee-a' gor :jla-a, :yee' :a 'kpa 'de 'ni ken-meheh 'di, 'de :a 'wluh 'o :Fele'pa-gwlor-'. :Yeh 'we :mm' zi-a, :yee' :a nyni 'o on bo 'Tloa-gwlor-' 'weh, 'de :a-a' klehkpeh :a :zi 'o :gwlor :dao' 'di 'we :meheh' 'sorn.

⁷:Yee' 'do 'doror' 'gwie-yluh bo-we-eh 'di, :yee' :a 'kpa :dha :due', :a 'ye :Gwlor :baa'-a' gban 'i :ne-dii-deh di. 'Do :wor :Poror' :wlu-dih: 'de nyor⧾ bo. Or :wlu :wluu:, 'de eh no dholo-' zuee, deh no-eh, or yubo-eh', :mor zorn zen, :yee' or mu :mu.

⁸'De :chuu: :on :ne-a 'de 'gbu-a' yai', :a :ne-a 'de 'di, 'de or wlu-a, 'nape⧾ :dhulu' :ne 'de, me-: wan.

⁹:Yeh :Poror' :wlu-a :wluu: :blaa'a:, :yee' 'yu :due' an 'da-dih-a :Yute'kor, or-: :dhe dih 'do 'wina worn 'dlu. :Yeh or :ne-a 'o, 'de or :to-a :Poror'-a' wlu :dou'⧾ bo :too: :blaa'a:, :yee' or 'kpa-' 'nyinor:. 'De or blu 'o, or 'kpa 'zorn. 'Do :dha or blu-a, 'do no 'o 'gbu-a' 'dlu :dhe-dih-eh-a' kpor⧾ taan :dha. :Yeh on 'ye-or ya-' 'duo:, :yee' or 'meh-'.

¹⁰:Yeh eh no :ao', :yee' :Poror' 'si-: 'zorn, 'de or mu 'o or bo, or 'jli-or ken, 'de or 'dhu-or :gwlii'. 'De or :wlu 'de on bo, or 'dae:, :Fano-a' :no-' a-uh. Or 'wluh 'de 'weh.

¹¹:Yeh or no :ao', :yee' or mu 'de :chuu: :dao', :on :ne-a 'de 'gbu-a' yai'-: de, 'de or :ne on :chehn-dih: 'bhlee dih, 'de on di :Gwlor :baa'-a' gban 'i :ne-dii-deh. 'De or 'kpa 'o :wlu-a' :neheh', or :wlu :wluu: :walaa: 'de zorn :gba dih. :Yeh or no :ao', :yee' or mu-'.

¹²:Yee' 'yu :dao' :or 'kpa-a 'zorn, on kpa-or 'gbu bo, 'de an no 'mona. Deh no-eh, or :ne-' 'kmo :neheh'.

¹³:Yeh eh no :ao', :yee' :a 'wluh 'o 'weh, :a mu :Poror' ybei', 'de :a 'kpa 'de 'ni ken-meheh 'di, :a mu :gwlor an 'da-dih-a 'Asor, 'do :dha :a mu-a :Poror' 'duo-dih:, 'de or 'ye-a 'de :a bo 'kpa. Or zela: :a :gwluhuh' 'weh, :a 'ye-eh' no 'do or bo. Deh no-eh, or na 'bluhbor:, 'de or mu 'de.

¹⁴:Yeh or :yeh-dih:-a :a ken 'do 'Asor, :yee' :a 'duo-or 'weh, 'de or 'kpa 'de :a bo. 'De or :ne :a mu :gwlor an 'da-dih-a 'Mehtoli.

¹⁵:Yee' :yeh :a 'si-a 'Mehtoli dih, 'de :a 'pehn-a 'o, 'de zorn zen-a, :yee' :a 'kpa 'de 'ni ken-meheh 'di 'weh :neheh'. 'De :a 'wluh 'o, :a :yi-dih: yobo'-a' dubeh: an 'da-dih-a 'Kior worn dih. 'De :a 'pehn :gwie 'i. :Yeh zorn zen-a, :yee' :a 'si 'o yobo'-a' dubeh: an 'da-dih-a 'Semor ken-: dih. :Yee' 'do 'we-eh-a' 'sororn' neh 'di, 'de jorwor: :a nyni :Mali'ta.

¹⁶:A :se-' 'Ehfesor :yi-dih:. Deh no-eh, :Poror' polo-eh' :dee' see 'do or :gwlii', :eh :mor or :se 'de :yi-dih:. Deh no-eh, or :se-' 'bhorn or 'ye ti :dhulu' :zi-dih: 'do 'Esea-bluhba-a' 'for :dao' ken. Or 'dhobo-', or 'ye :Julu'slehn dih 'si, 'de jorwor: eh 'ye 'Pehnti'kor-we-eh no, :mor or 'beh-dih-eh.

¹⁷:Yeh :a 'si-a :Mali'ta dih, :yee' :Poror' dbo tubo-wlu:⧾ 'de 'chore-a' nyor⧾ :klaba'⧾ :on :ne-a 'Ehfesor bo, on 'ye 'de or bo yi 'de :Mali'ta.

¹⁸:Yeh on 'si-a dih, :yee' or :wlu-' 'de on bo, or 'dae:, A-a' 'jeh 'kpa 'yor-eh yubo-eh', :eh 'wluh-a 'o :zai'-we-eh: 'on 'si-dih:-a dha 'Esea-bluhba ken dih, :ka 'on no-a dha a bo-a' :ne-a'.

¹⁹:Jueh'-nyor:⧾ :noo', mo-: 'dhu dhih 'do 'on bo. Eh-: no-eh, 'de 'on 'ye 'kle, 'de 'an 'vin 'gabaa. Jorwor: 'mor :or 'dhu-a :Gwlor :baa'-a' 'bhoi-yu-', 'an-a' 'worn, 'an-a' 'beh-dih 'an 'jeh 'i, 'do :koan 'an no-a or-a' dhih.

²⁰A yubo-eh' :ka 'on se-a a deh :eh mu-a a :za-dih: dih 'zile:. Jorwor: 'on po Nyorsoa-a' tubo-wlu⧾ 'weh 'de a bo, 'de 'on :torne: a Nyorsoa-deh 'do :gwlor :gwea-: 'dekorn: a 'bli 'gbu⧾ 'di dih-:.

²¹:Jueh'-nyor⧾-: 'dekorn: nyor⧾ :on :se-a :Jueh'-nyor⧾-: 'on zela-uh-: :gwluhuh' :ka on 'ye-a an-a' deh⧾-zon⧾ dih 'tali:, 'de on 'ye-a 'de Nyorsoa bo 'bili:, 'de on 'ye-a :a-a' :Gwlor :baa' :Yusu'-a' dhih dhih 'jeh-' po.

²²:Yeh :daa :naa 'on :ne-a ken, 'an mu :Julu'slehn de, 'do Nyorsoa-a' :Zulu-a' wlu-a' deh-' 'ye-eh-a' dha. Jorwor: deh :eh mu-a 'on :no 'de mor, 'on se-eh yubo:.

²³Deh :due' 'on yubo:-a, eh-: 'dhu, gwlor⧾-a' klehkpeh 'on :yi-dih:-a 'di dih, Gban 'i :ne :Zulu-a zela 'on :gwluhuh', :ka :kasue 'di :mu-eh-: 'dekorn: 'kle 'ye-eh-: en fuo 'on 'ken 'de ybei'.

²⁴Jorwor: 'on :se-' 'an 'jeh-a' 'yor-eh-a' :febeh'-a' dhih zi. Deh :due' 'an 'bhorn-a, eh-: 'dhu, :koan: :Gwlor :baa' :Yusu' 'nyi-a 'on, 'on 'ye-or 'dlu-' jla. :Koan: :dao', or 'nyi-a 'on, or-: 'dhu, 'on :korn 'on 'ye Nyorsoa-a' tubo-wlu:⧾ 'jeh po :ka or no-a :gwlor-nyor⧾ mla bo :po-eh.

²⁵'On :na a-a' klehkpeh bo dih 'weh, 'de 'on po tubo-wlu⧾ :en kor-a Nyorsoa-a' nyor⧾ wlu 'ken :korn-eh 'i, 'de a bo. Jorwor: 'on yubo-eh' :naa, :ka a-a' nyor :se-a' 'an 'yuba 'ye-: i :neheh' :dele' ka.

²⁶:Yee' eh-a' dhih, 'an zela a :gwluhuh' :naa, :eh 'wluh-a dha 'zean'-zorn: :daa 'bli, :mor a-a' nyor 'ma, :yee' eh :se 'an dhih o.

²⁷Deh no-eh, 'on :se-' a deh dih 'zile:. Jorwor: 'on zela: a deh⧾-a' klehkpeh Nyorsoa 'bhorn-a a 'ye-a' yubo:, en-' dhih, a :gwluhuh' 'weh.

²⁸:Yee' eh-a' dhih, a 'dhu a-a' 'jeh 'yli-eh bo, 'de mor a 'dhu nyor⧾-a' klehkpeh Gban 'i :ne :Zulu po-a 'de a 'kwa, 'yli-eh bo :ke. A :mor :korn :or 'ye Nyorsoa-a' 'chore-nyor⧾ 'yli-eh bo 'dhu, :ka 'blae'⧾-a' 'yli-eh bo 'dhu-nyor⧾-a no-a. Or-a' 'yu-a' 'meh-a', eh-: no-eh, 'de 'chore-nyor:⧾ :dao', on no or-a'a: nyor⧾.

²⁹'On yubo-eh', :mor 'on 'wluh 'noror a 'klu-', 'on mu, :yee' nyor⧾ :noo' :on :korn-a noo-deh:⧾ gweh-a ji-a' noo-deh⧾, an mu 'noror a 'klu-' :yi, 'de on :se-' a-a' :wehlih 'ye-: i, an mu a bo :pa :gbor :gbor.

³⁰'De mor nyor⧾-a mu 'noror a-a' 'jeh 'yor-eh 'nyne-' 'wluh-:, on 'ye sih 'tmo 'noror a 'nyne-', eh 'ye-eh' no, 'de nyor⧾ 'ye 'o on klei' zi.

³¹:Yee' eh-a' dhih, a 'dhu a-a' 'jeh :dhororn'. :Yee' a :na-dih-eh :gwluhuh' dih, :eh :mor 'do zon⧾ taan 'di, 'gwie-: :glaa'e-: 'on :se-' a-a' 'slen 'dhu-eh 'bor 'do 'mii-a' dih 'wla-eh bo.

³²:Yee' :kana :naa, 'on po 'de a Nyorsoa 'kwa. Nyor-a' 'ma-dih:-' tubo-wlu:⧾ :en za-a or-a' mla-a' dhih-', en-' dhih bo. Tubo-wlu:⧾ :daa, en 'beh-dih: en 'ye-eh' no, 'de a 'ye 'kpih ken :ne, 'de Nyorsoa-deh 'di. 'De en 'beh-dih: en 'ye a deh :eh :korn-a 'de a bo 'nyi, :ka a 'dhu-a Nyorsoa-a' nyor⧾-'.

³³'An :porluh :se-' sin, a-a' nyor-beh-a' 'sebla-: 'goo-: 'dekorn: paa-tiei-: en-' dhih.

³⁴A-a' 'jeh 'yor-eh:, a yubo-eh' :ka eh 'dhu-a 'an 'jeh 'yor-eh-a' :kola⧾ 'an no-dih-a :koan-', 'de jorwor: 'mor-: 'dekorn: 'on 'bei'-: 'de :a 'ye-a deh :a se-a 'ble.

³⁵'Do deh⧾-a' klehkpeh 'on no-a bo, 'on :torne: a 'weh, :ka :a :korn-a :a 'ye-a :koan no 'gabaa, :a 'ye-a nyor⧾ :on :korn-a 'kpih-a chehn-a-' :za-dih:. A 'nyi :a :po-dih-eh :gwluhuh' bo, :ka :Gwlor :baa' :Yusu'-a' 'jeh 'yor-eh za-eh', or no-a, :Mor :on 'nyi nyor deh, :yee' eh no :bhorlie'-deh: 'do :on bo, :eh :zi 'o nyor 'nyi :on deh.

³⁶:Yeh :Poror' gweh-a :wlu-a' 'i, :yee' on :ne or bla 'koor-dlu⧾ 'yi glu. 'De jorwor: or :wlu 'de Nyorsoa bo.

³⁷:Yeh or yi-a mu 'da, :yee' an-a' klehkpeh, on :gble-dih-or :gwlii', 'de an 'vin.

³⁸Deh :eh po-a an-a' :porluh⧾ 'zorn 'gabaa, eh-: 'dhu, deh or :za-a-' 'de on bo :zai', or no-a, A :se-' 'an 'yuba 'ye-: i :neheh' :dele' ka. :Yee' an-a' klehkpeh, on kpa-or :gwie 'i, 'do 'ni ken-meheh bo, or 'ye mu.