Read Eastern Krahn Noo-deh:⧾ 22 Bible Online

Noo-deh:⧾ 22 - Eastern Krahn bible

Noo-deh:⧾ 22

¹:Yee' 'on 'bei'-a-: 'dekorn: 'on-bai'-a-: 'an yi 'an 'jeh dhih ken :za 'da :naa. :Yee' a :to 'on :dou'⧾ bo.

²:Yeh on 'worn-a or-a' wlu, 'de or po-a :Hiblu'-wlu 'de on bo, :yee' an-a' klehkpeh, on no dhliin. :Yee' :Poror'-a kpa or-a' wlu 'dlu bo :chio'lo:, or 'dae:,

³'Mor :Jueh'-yu: 'o. 'De 'Tasor-gwlor 'di, 'do :wor 'on 'wluh-dih:, 'de :Sele'sia-bluhba ken. Jorwor: dha :Julu'slehn:, dha :wor 'on :ku-dih:. 'De 'on 'chean'-dih: 'o :Game'la 'zorn deh :or :torne:-a 'on :a :bai'-a' :bai'-a' 'tele' deh 'jeh neh. :Ka a-a' klehkpeh, :or :ne-a dha 'zean', a no-a, 'de a-a' Nyorsoa-a' :weheh' :za :porluh⧾ 'beh-a 'i, 'ka :wor 'an no :ke :dee'.

⁴:Zai', 'an 'ye-dih nyor⧾ :an zi-a 'o :Gwlor :baa'-a' :gwie klei' 'kle :dee' 'gabaa, 'de :noo' 'meh-dih-eh 'zorn. Nyor⧾-kpalu⧾-: 'dekorn: 'nynor⧾-kpao'⧾-: mo-: 'an kpon, 'de 'an po-uh 'de :kasue 'di :dee'.

⁵Nyorsoa-a' 'slaa: :za-nyor⧾-a' nyor :klaba'-: 'dekorn: :Jueh'-nyor⧾-a' zabe: :zi-nyor:⧾ :klaba'⧾-a' klehkpeh-: on 'beh-dih: on 'ye a :gwluhuh' zela: :ka dhih :daa 'an za-a-', 'de en :se-a sih. On 'nyi 'on 'chlee-deh⧾-a' 'jeh :sloror', 'on 'ye-ih'-a an-a' 'de-di'-boi' :on no-a :Jueh'-nyor⧾, 'de :Dama'kor kpa. 'De 'on mu 'de, 'on 'ye nyor⧾ :an zi-a 'o :Yusu' klei' kpon, 'on 'ye-uh :Julu'slehn :ya, on 'ye-uh 'kle 'ye-eh: 'dlu po.

⁶:Yee' :Poror'-a kpa or-a' wlu 'dlu bo, or 'da, Ti 'an 'koan'-dih-a :Dama'kor dih, 'yluh-gbao'-we-eh :due', :yeh 'an mu-a 'ye-:, :yee' zorn-pli:, me-: 'wluh 'de yai', :en 'si 'de 'on 'yli dih, :en 'dleh 'on.

⁷:Yeh en no :ao', :yee' 'on 'ga-: dih 'do 'bluhbor. :Yee' 'on 'worn wlu, mo-: 'da, :Soror', :Soror'. :Eh :korn dhih :an 'ye-dih 'on 'kle :eh?

⁸'De 'on 'da, :Gwlor :baa', :an-a' 'nyne :eh? 'De wlu :dao', on :za-eh: de :neheh', on 'da, 'Mor :Yusu' :oo', :an 'ye-dih-a 'kle.

⁹:Yeh eh no :ao', :yee' nyor⧾ :on :ne 'an mu-a :dee', on 'ye zorn-pli: :dao' 'weh. Jorwor: an-a' 'worn nyor :or wlu-a 'de 'on bo, or-a' wlu-' dih.

¹⁰'De 'on dhele-or dih, 'on 'da, :Gwlor :baa'. :Yee' :kaa 'on 'ye no :eh? :Yee' or :wlu-' 'de 'on bo, or 'dae:, :Sorn-', :on 'ye :Dama'kor mu. 'Do :wor deh Nyorsoa 'bhorn-a :on 'ye-a' no, 'do :wor an mu-eh :on :gwluhuh' zela-dih:.

¹¹:Yeh zorn-pli: :dao', en 'si-a 'de 'on 'yli dih, :yee' 'on 'bor dih 'ye-eh 'weh :neheh'. Eh-: no-eh, 'de nyor⧾ :on :ne 'an mu-a :dee', on kpon 'an son dih, on kpa 'on :Dama'kor.

¹²'Do :gwlor :dao' 'di, 'do :wor 'yu :due' an 'da-dih-a 'Anenaya' or :ne, :or dhe-a 'o :Mose'-a' 'tele' dih, 'de :or chehn-a 'de eh bo. 'De :Jueh'-nyor⧾-a' klehkpeh :on :ne-a 'o :gwlor :dao' 'di, an 'ye-or deh-' 'gabaa.

¹³'Yu-a' 'jeh :dao', or-: yi 'de 'on bo, :or :nyna dih 'do 'on 'bhun, or :wlu, :or 'dae:, 'An 'de-di' :Poror'. 'Ye-dih: :neheh'. :Yeh or 'da :ao', :yee' 'do :dha :due' :dao', 'an 'ye-: dih :neheh', 'de 'an pobo-or ya.

¹⁴:Yee' or :wlu-' 'de 'on bo, or 'dae:, Nyorsoa :a :bai'-a' :bai'-a za-a :weheh', or-: gan :on, :on 'ye deh or 'bhorn-a, :on 'ye-a' no, :on 'ye-eh' yubo:, 'de :on 'ye or-a' 'Yi 'sleh-nyor 'ye, 'de :on 'ye or-a' wlu 'worn, or 'ye 'de :on bo :wlu.

¹⁵:Mor mu or-a' dhih bo zela-nyor :no, 'de :gwlor-nyor⧾-a' klehkpeh bo, 'de deh⧾ :on 'worn-a, deh⧾ :on 'ye-a, me-: :an mu-uh :gwluhuh' zela:.

¹⁶:Eh :korn dhih 'de :an zi-dih ti :eh? :Sorn-', mu, :on 'ye 'ni 'dlu :po. 'De :on 'ye 'de :Gwlor :baa' bale:, or 'ye :an-a' deh⧾-zon⧾ worlor:.

¹⁷:Yee' 'on mu :Julu'slehn de. 'De 'on mu 'o Nyorsoa-a' 'sla ybei', 'on 'ye 'de Nyorsoa bo :wlu. :Yeh 'an wlu-a 'de or bo, :yee' 'an 'yli-eh 'kpa deh 'i.

¹⁸'De 'on 'ye :Gwlor :baa', or :wlu 'de 'on bo, or 'dae:, 'Dhobo:, :on 'ye dha :Julu'slehn 'wluh. Deh no-eh, :mor :on :za 'an dhih-' dha mor, on :se-ih' 'worn-dih: i.

¹⁹:Yeh or 'da :ao', :yee' 'on :wlu-' 'de or bo, 'on 'dae:, :Gwlor :baa'. Nyor⧾ :daa, on yubo-eh' :ka 'on pa-a 'di :gweh-dih-sla⧾ 'zorn dih, 'de 'on :kpon-dih:-a 'de nyor⧾ :on po-a :an-a' dhih dhih 'jeh-', 'de 'on bla-uh-a.

²⁰Ti on 'ye-a Timi' :or no-a :an-a' dhih ken dih zela-nyor 'dba, :yee' 'do :wor 'on :ne. 'On 'worn-dih: or-a' 'meheh'-dhih ken dih 'weh. 'Mor :oo' :or 'dhu nyor⧾ :on 'dba-or, an-a'a: 'korlor⧾ 'yli-eh bo, 'do ti :dao' bo.

²¹:Yee' :Gwlor :baa' :wlu-' 'de 'on bo, or 'dae:, 'Yle. 'An mu :on :dha :dhorno' :dbo 'de nyor⧾ :on :se-a :Jueh'-nyor⧾ bo.

²²:Yee' :gwlor-nyor:⧾ :dhulu' :dao', on :to :Poror'-a' wlu :dou'⧾ bo :chio'lo:, 'de or :za nyor⧾ :on :se-a :Jueh'-nyor:⧾ an-a' dhih-'. :Yeh on 'worn-ih'-a, :yee' on 'kpa 'o 'geh⧾ :po 'da 'weh, an no, A :za 'yu :daa 'noror :a 'klu-'. A 'dba-or. Or se-eh 'i :bleh-dih:, or 'ye 'kmo-' :ne :neheh'.

²³:Yeh an po-a 'geh⧾, :yee' an 'vuan an-a'a: 'wla⧾ yaa'e, 'de an po :bhuhbuh' yaa'e.

²⁴:Yeh an no :ao', :yee' :janbe zela: or-a'a: sorye'-: :gwluhuh', on 'ye :Poror' 'de :bale' 'gle :pa-dih:, on 'ye-or' bla deh 'jeh neh, on 'ye-or' dih dhele: deh :eh :korn-a dhih :Jueh'-nyor⧾-a po-dih-or 'geh⧾ 'dlu dih deh :dao', or-a' dhih, on 'ye-eh' yubo:.

²⁵:Yeh on san-or, 'de on 'pehn-dih-or dih, on 'ye-or' bla, :yee' or :wlu-' 'de sorye'-a' nyor :klaba' :due' :or :nyna-a 'o dih bo, or 'dae:, Eh :ne 'o 'Wloon-nyor⧾-a' 'tele'-a' :gwie 'i 'weh :e, :eh :mor a bla 'Wloon-nyor⧾-a' nyor :or :korn-a zabe: se-a :zi-eh:, 'de mor dhih 'see-a kpon :e?

²⁶:Ka sorye'-a' nyor :klaba' :dao', or 'worn-a deh :Poror' :za-a-', :yee' or mu 'de an-a'a: :janbe bo 'weh, or dhele-or dih, or 'da, :Kaa :an mu :no :naa :eh? 'Yu :daa, or-: 'Wloon-nyor⧾-a' nyor :oo'.

²⁷:Yeh or 'worn-ih'-a, :yee' :janbe :dao', or mu 'de :Poror' bo 'weh, 'de or dhele-or dih, or 'da, Zela: 'on :gwluhuh'. :Mor 'Wloon-nyor⧾-a' nyor :oo' :e? 'De :Poror' 'da, Keen'.

²⁸'De :janbe 'da, 'Mor :mloror', 'on plo 'wlii: :dhulu' 'de 'Wloon-nyor⧾-a' 'gomla bo, 'de jorwor: 'an mu 'Wloon-nyor⧾-a' nyor :no. 'De :Poror' 'da, 'An neh se-a 'o :ne. 'Wloon-nyor⧾-a' nyor 'wluh 'on.

²⁹:Yeh :Poror' 'da :ao', :yee' nyor⧾ :an yi-or dih dhele: 'da :dee', an-a' klehkpeh :za-dih: ken 'do :dha :due' :dao'. :Yee' :ka :janbe yubo-eh 'i :ka :Poror' 'dhu-a 'Wloon-nyor⧾-a' nyor-', :yee' :fano 'kpa 'de or 'di 'weh. Deh no-eh, :Poror' or po-a 'chen-dubu'⧾ son⧾-', on 'ye-a' bla :dee', or-: 'Wloon-nyor⧾-a' nyor :oo'.

³⁰:Yeh zorn zen-a, :yee' :janbe :dao', or 'bhorn deh :eh :korn-a dhih 'de :Jueh'-nyor⧾ po-a :Poror' dhih 'dlu, or 'ye-eh yubo: deh 'jeh neh. Eh-: no-eh, 'de or :za :Poror' 'chen-dubu'⧾ son⧾-', 'de jorwor: or 'da Nyorsoa-a' 'slaa: :za-nyor:⧾ :klaba'⧾-: 'dekorn: zabe: :zi-nyor⧾-a' klehkpeh-: on 'ye :dha :due' 'gbon-dih:. :Yee' :yeh on 'kpa-a :dha :due', :yee' or 'duo: :Poror'-' 'weh, 'de or :nyna-dih-or dih 'do on ybei'.