Read Eastern Krahn Noo-deh:⧾ 23 Bible Online

Noo-deh:⧾ 23 - Eastern Krahn bible

Noo-deh:⧾ 23

¹:Yeh :Poror' :nyna-a dih 'do on ybei', :yee' or pobo-uh-: ya 'dhuan, 'de or :wlu, or 'dae:, 'An 'de-di'-boi'-a:. 'An :porluh :se-' 'on zabe :kpon-dih:, 'de 'an 'kmo :ne-eh 'di, 'do 'an Nyorsoa-deh bo, 'de eh :yeh-dih: 'zean'-we-eh: :daa ken.

²:Yeh or 'da :ao', :yee' 'Anenaya' :or no-a Nyorsoa-a' 'slaa: :za-nyor⧾-a' nyor :klaba', or zela: nyor⧾ :on :nyna-a 'o :Poror' 'bhun dih :gwluhuh', on 'ye-or' 'kpa 'worn po.

³:Yee' :yeh on po-a :Poror' 'kpa 'worn, :yee' or :wlu-' 'de 'slaa: :za-nyor⧾-a' nyor :klaba' :dao' bo, or 'dae:, Nyorsoa-a mu :on 'kpa 'worn :po :ke, :mor 'yli-eh ken dih :nmor-nyor: :daa, 'de :or :korn-a 'di :nyni-a worn. :Mor :or :dhe-a 'o :dha 'o dih, :or 'ye-a 'an zabe zi :ka :Mose'-a' 'tele' no-a mu-a', :mor 'o :or wa-eh 'do nyor⧾ :gwluhuh' zela-eh bo, on 'ye 'on 'kpa 'worn po :e?

⁴:Yee' nyor⧾ :on :nyna-a 'o :Poror' 'bhun dih, on 'da, :An 'jle-dih Nyorsoa-a' 'slaa: :za-nyor⧾-a' nyor :klaba' 'weh o.

⁵'De :Poror' 'da, 'On se-eh yubo:, 'an 'de-di'-boi'-a:, :ka or 'ye-a Nyorsoa-a' 'slaa: :za-nyor⧾-a' nyor :klaba' 'dhu-eh:. Eh 'chle-eh:-' 'de Nyorsoa-a' 'chlee-deh 'di, eh 'da, :An-a' :za-' deh-zon-' 'do nyor :or :korn-a :an-a' nyor⧾ wlu 'ken 'bhun.

⁶:Yee' :Poror' yubo-eh' :ka zabe: :zi-nyor:⧾ :dao', an-a' :noo' 'dhu-a :Sayusi'i-nyor⧾-', 'de :noo' 'dhu-a :Falasi'i-nyor⧾-', 'de or van-dih: wlu dih, or :wlu deh 'jeh 'de zabe: :zi-gbu: :dao', on :ne-a 'zorn, or 'dae:, 'An 'de-di'-boi'-a:. 'Mor :Falasi'i-yu: 'o. 'De mor 'on no :Falasi'i-yu-a' 'yu. Deh :korn-a dhih, 'de a zi-a 'an zabe 'zean', eh-: 'dhu, 'on dhe-eh-: :gwlii' :ka Nyorsoa-a mu-a 'meheh'-nyor⧾ de :ya :neheh'.

⁷:Yeh :Poror' :za-a deh :dao', :yee' dhobo-eh 'kpa 'o :Falasi'i-nyor⧾-: 'dekorn: :Sayusi'i-nyor⧾-: 'nyne bo 'weh. :Yee' :gwlor-nyor:⧾ :dhulu' :dao', on 'wluh 'sororn'.

⁸Deh no-eh, :Sayusi'i-nyor⧾ 'da 'meheh'-nyor⧾ :se-' :sorn i, 'de mor on :se-eh' dhih 'jeh-' po :ka 'enjor-: 'dekorn: deh⧾-a' :zulu⧾-: en :ne-a. Jorwor: :Falasi'i-nyor⧾ po, me-: :ne-a taan dhih 'jeh-' 'weh.

⁹:Yee' :dhlumeh' 'kpa-: ken 'de on 'nyne-'. 'De nyor⧾ 'tele' :torne-nyor:⧾ :noo' :on :ne-a 'de :Falasi'i-nyor⧾-a' 'for bo, mo-: :nyna dih, 'de on :ne nyor⧾-a dhobo: 'gabaa, on 'da, :A :se-' 'yu :daa deh-zon 'bhun 'ye. Eh gweh deh-a' :zulu-: :eh beh 'enjor-: mo-: :wlu 'de or bo 'bla.

¹⁰:Yee' dhobo-eh: :eh :ne-a 'de nyor⧾ :dao' 'nyne-', eh :dhie: 'i 'gabaa. :Yee' :fano-a: no :janbe :dao', on :ne-' :Poror' dih :chehn-dih:. Eh-: no-eh, 'de or zela: or-a'a: sorye' :gwluhuh', on 'ye :Poror' 'de on 'kwa :za, on 'ye-or 'de :bale' 'gle kpa.

¹¹:Yee' :yeh glu gor-a, :yee' :Gwlor :baa' :nyna dih 'do :Poror' 'bhun, 'de or 'da, Ku :gwluhuh'. :Ka :on no-a 'an dhih-' :za-eh dha :Julu'slehn, 'ka :wor :on 'ye 'an dhih-' :za-eh no 'de 'Wloon-gwlor 'di :ke.

¹²:Yee' :yeh zorn :dele' zen-a, :yee' :Jueh'-nyor:⧾ :noo', mo-: 'kpa :dha :due', 'de on 'dhu dhih 'de an-a' 'jeh 'nyne-'. 'De on :zlehn-dih: deh, :eh :mor on :se-' deh :di i, 'de mor on :se-' 'na-: i, on 'ye :Poror' 'dba :gbor :gbor.

¹³Nyor⧾-a' klehkpeh :on 'dhu-a dhih :daa, on zi nyor⧾-kpalu⧾-a' :kwlaa :nyieh-: dih.

¹⁴'De on mu 'de Nyorsoa-a' 'slaa: :za-nyor:⧾ :klaba'⧾-: 'dekorn: an-a' 'bluhba: :korn-nyor⧾-: bo, 'de on 'da, :A :zlehn-dih: deh 'gabaa. :A 'da :a :se-' deh :di i, 'de mor :a :se-' 'na-: i, :a 'ye :Poror' 'dba :gbor :gbor.

¹⁵:Yee' 'do eh-a' dha, a mor-: 'dekorn: :Jueh'-nyor⧾-a' zabe: :zi-nyor⧾-: a bale: sorye'-a' :janbe or 'ye 'de :Poror' :ya 'do a ybei', a 'ye 'sleh po, a 'ye :ao', a 'bhorn :Poror' 'ye a kuna' 'jeh nor 'nyi 'do or-a' zabe: :dao' bo. :Mor a no :ao', :yee' :a fuo-or 'ken, :mor or :taa 'de yi, :a 'ye-or' 'dba.

¹⁶Jorwor: :yeh :Poror'-a' 'de-di'-nynor-kpao'-a'a: 'yu-nyor-kpalu-yu 'worn-a dhih :daa on 'dhu-a, :yee' or mu 'de :Poror' bo :bale' 'gle 'weh. 'De or zela-or :gwluhuh', eh-a' dhih.

¹⁷'De :Poror' 'da sorye'-a' nyor :klaba' :due', or :wlu 'de or bo, or 'dae:, Kpa 'de 'yu :daa 'de :janbe bo. Or 'ble deh or 'ye-or :gwluhuh' zela:.

¹⁸'De or 'duo: nyor-kpalu-yu: :dao', or kpa-or 'de :janbe bo, 'de or 'da, :Poror' :or :ne-a 'de :kasue 'di, or-: 'da 'on, 'de or bale: 'on, 'on 'ye 'de 'yu :daa 'noror :on bo :ya. Deh no-eh, or 'ble deh or 'ye :on :gwluhuh' zela:.

¹⁹'De :janbe :dao', or kpon nyor-kpalu-yu: :dao', or-a' son dih, 'de or kpa-or 'o 'for 'i, or dhele-or dih, or 'da, Deh 'i-deh: :on 'ble :on 'ye 'on :gwluhuh' zela: :eh?

²⁰'De nyor-kpalu-yu: :dao', or :wlu, or 'dae:, :Jueh'-nyor⧾-a' nyor⧾ :na-dih-nyor⧾ 'dhu dhih, on 'ye :on dih dhele:, :on 'ye :Poror' 'de :Jueh'-nyor⧾-a' zabe: :zi-nyor⧾ ybei' kpa :glaa'e, on 'ye 'sleh po, on 'ye :ao', an 'bhorn on 'ye kuna' 'jeh nor 'worn 'de or 'worn.

²¹:An-a' :to-uh' :dou'⧾ bo. Deh no-eh, nyor⧾-kpalu:⧾ :on zi-a :kwlaa :nyieh dih, mo-: 'zile:, :an fuo-or 'ken. On :zlehn-dih: deh :eh :mor on :se-' deh :di i, 'de mor on :se-' 'na-: i, on 'ye :Poror' 'dba :gbor :gbor. :Yeh :a :ne-a ken, an fuo-or 'ken :naa, :eh :sie: 'o :on 'ye 'worn 'klein'.

²²:Yeh or zela: :janbe :dao' :gwluhuh', :yee' :janbe 'dhu-or 'slen, or :ne-' nyor :gwluhuh' zela: :ka or zela-or :gwluhuh'. 'De or zela: nyor-kpalu-yu: :dao' :gwluhuh', or 'ye de mu.

²³:Yee' :janbe :dao', or 'da or-a'a: sorye'-a' nyor⧾ :klaba'⧾-a' nyor⧾ 'sororn' 'weh, or 'nyi-uh 'tele', or 'da, A po sorye'-a' :kehehn' 'sororn' :dha :due', a 'ye 'Sehsali'a-gwlor 'di mu, :mor nyor⧾ :taa 'mo 'da mu 'gwior. :Yee' a po :soo'⧾-a' :na-dih-nyor⧾-a' :kwlaa :meheh' 'sorn-: 'dekorn: 'di-a' 'ble-nyor⧾-a' :kehehn' 'sororn'-: :dha :due' :ke, a 'ye-uh kpa.

²⁴A :za 'o :soo'o:⧾ :nee' 'do :Poror' bo, en 'ye-or' kpa :pehleh'peh:, 'de 'gomla-nyor⧾-a' nyor :klaba' File' bo.

²⁵'De :janbe :dao', or 'chle 'chlee-deh, or 'nyi-uh. 'Chlee-deh: or 'chle-a, eh-a' wlu 'da,

²⁶'Mor :or 'dhu-a Klordior' 'Lesea, 'mor 'ye :on, File', :mor :or 'dhu-a 'gomla-nyor⧾-a' nyor :klaba'-'.

²⁷Nyor-kpalu: :daa 'an dbo-a 'de :on bo, or-: :Jueh'-nyor⧾ kpon, eh :sie: 'o deh-beh: on 'ye-or 'dba :dee'. Jorwor: :ka 'on yubo-eh 'i, 'de or 'dhu-a 'Wloon-nyor⧾-a' nyor-', :yee' eh-: :korn dhih 'de 'on kpa sorye' 'de on bo, 'de :a za-or on 'kwa.

²⁸'An 'bhorn 'on 'ye deh :eh :ne-a 'o or-: 'dekorn: on mor-: 'nyne bo yubo: :dee'. Eh-: :korn dhih 'de 'on kpa-or 'de an-a'a: zabe: :zi-nyor⧾ ybei'.

²⁹'On yubo-eh', or :se-' deh no, :eh :korn-a dhih or 'ye-a 'meh, 'de mor or 'ye-a :kasue 'di :po-eh:. Deh :korn-a dhih on po-or dhih 'dlu, eh tba 'o an-a'a: 'tele' 'bhun dih.

³⁰:Yee' :yeh 'on 'worn-ih'-a :ka :Jueh'-nyor⧾ 'dhu-a dhih, on 'ye-or' 'dba, :yee' eh-: :korn dhih, 'do :dha :due' :dao', 'an dbo-or 'de :on bo. 'On zela: nyor⧾ :on :ne or 'ble-a dhih :gwluhuh', on 'ye 'de dhih-a' 'jeh :dao' 'do :on ybei' :ya.

³¹:Yee' deh :janbe zela: or-a'a: sorye' :gwluhuh', eh-: on no. 'De on 'duo: :Poror'-' dholo-', on 'si 'o 'Antipa'tor-gwlor 'di dih.

³²:Yee' :yeh zorn :zen-dih-uh-a 'o, :yee' sorye' :an na-a 'bluhbor, on mu 'de :bale' 'gle-: de. :Yee' :yuh :on :ne-a 'o :soo'o⧾ ken, mo-: kpa-or.

³³:Yee' :yeh on nyni-a 'Sehsali'a, :yee' on 'nyi 'gomla-nyor⧾-a' nyor :klaba' :dao' 'chlee-deh: :dao' 'weh. 'De on :za :Poror' 'kwla 'de or bo.

³⁴:Yeh or zlo-eh, :yee' or dhele: :Poror'-: dih, or 'da, 'Bluhba-a' 'for :yoror :on 'wluh bo :eh? :Yeh or yubo-eh 'i, :ka :Poror' 'wluh-a :Sele'sia-bluhba ken,

³⁵:yee' or 'dae:, 'An mu :on :dou'⧾ bo :to, :mor eh 'dhu, nyor⧾ :ne :on 'ble-a dhih, on 'yle. 'De or 'nyi nyor⧾ 'tele', on 'ye-or 'de 'keen :Hehlo'-a'a: 'sla ya kpa, or po-a :dee' see, on 'ye-or 'yli-eh bo 'dhu 'de mor, or :ne-' ple.