Read Eastern Krahn Noo-deh:⧾ 25 Bible Online

Noo-deh:⧾ 25 - Eastern Krahn bible

Noo-deh:⧾ 25

¹:Yee' :yeh 'Fehtor no-a 'o 'bluhba-a' 'for :dao' ken 'we taan, :yee' or 'wluh 'o 'Sehsali'a-gwlor 'weh, 'de or mu :Julu'slehn.

²'Do :wor Nyorsoa-a' 'slaa: :za-nyor:⧾ :klaba'⧾-: 'dekorn: :Jueh'-nyor⧾-a' nyor⧾ :na-dih-nyor⧾-: on :mu-dih: 'o or ybei', 'de on zela-or :gwluhuh', 'do zabe: on 'ble-a 'do :Poror' 'bhun, en-' dhih bo. 'De on bale-or, on 'da,

³:On :korn 'gen. Deh :daa, :mor :on no-eh 'do :a bo, eh-: mu :a-a' :porluh⧾ dih 'pehn-dih:. Dbo :Poror' wlu bo, or 'ye dha :a bo :Julu'slehn yi. Deh :korn-a dhih on :za-a deh :daa-', eh-: 'dhu, an po 'sleh, on 'dhu-ih, an 'bhorn :mor :Poror' :taa 'de yi, on 'ye-or 'o :gwie 'i :kpon-dih:, on 'ye-or' 'dba.

⁴:Yeh on 'da :ao', :yee' 'Fehtor 'da, 'Kei:. 'Nyi :Poror' :dhe 'de :kasue 'di dih, 'de 'Sehsali'a. Eh :se 'o :gwle i, 'an 'jeh 'yor-eh 'ye 'de mu.

⁵:Mor 'on :taa mu, :yee' 'nyi a-a' nyor⧾ :klaba'⧾ zi 'o 'on klei'. :Mor eh 'dhu or no deh-zon, on 'ye-ih' :za 'de mor.

⁶'Fehtor zi 'o :Julu'slehn 'we :meheh' na-: 'we :bhue-: :neheh' 'bla, 'de or mu 'Sehsali'a. :Yeh or 'si-a 'o dih, 'de zorn zen-a, :yee' or :dhe dih 'de zabe: :zi :kpala' 'di 'de 'koti-', 'de or dbo nyor⧾, on 'ye 'de :Poror' :ya 'do or ybei'.

⁷:Yeh :Poror' pa-a, :yee' :Jueh'-nyor:⧾ :dao' :on 'wluh-a :Julu'slehn, :yee' on 'dleh :Poror' 'weh, 'de an po-or zabe: :kolu'⧾ :kolu'⧾ 'dlu. Jorwor: zabe: :kolu'⧾ an po-a 'o or 'dlu, on se 'beh-dih: on 'ye-eh' ken dih zela: :eh :mor en no dhih-a' 'yor-eh:.

⁸:Yeh on no :ao', :yee' :Poror' :wlu-', or :za or-a' 'jeh dhih ken, or 'dae:, 'On :se-' deh-zon no, 'do :Jueh'-nyor⧾-a' 'tele'-: Nyorsoa-a' 'sla-: 'dekorn: 'Wloon-nyor⧾-a' 'keen bo-:.

⁹:Yee' 'Fehtor-a 'bhorn or 'ye :Jueh'-nyor⧾-a' :porluh⧾ dih 'pehn-dih:. Eh-: :korn dhih or dhele: :Poror' dih, or 'dae:, :On 'worn-dih-eh ken dih 'weh, :a 'ye :Julu'slehn mu, 'de :on 'ye dih :nyna 'do 'on ybei', 'de 'on 'ye :an-a' zabe zi 'de mor, 'do dhih on po-a 'o :on 'dlu, en-' dhih bo :e?

¹⁰'De :Poror' 'da, Dha 'Wloon-nyor⧾-a' 'keen 'bli 'koti-' :oo', 'on :nyna dih :naa. :Yee' dha :wor 'an zabe 'ye :zi-dih-eh:. :An-a' 'jeh 'yor-eh:, :on yubo-eh' deh 'jeh, 'on :se-' :Jueh'-nyor⧾ deh-zon-' no.

¹¹:Mor eh 'dhu, 'on no deh-zon :eh :korn-a dhih 'on 'ye-a' 'meh, :yee' 'an mu-eh ken dih 'worn-dih:, 'on 'ye 'meh. Jorwor: dhih :daa, :Jueh'-nyor⧾ po-a 'o 'on 'dlu, :mor en se 'on kpon, :yee' nyor-beh-nyor-beh se eh-a' 'kpih 'ble, or 'ye 'on 'kwla :za 'de on bo. 'An dhele :on dih, :on 'ye 'de zabe: :daa 'de 'Wloon-nyor⧾-a' 'keen bo dbo, or 'ye 'an zabe zi.

¹²:Yeh :Poror' 'da :ao', :yee' 'Fehtor :wlu-' 'de nyor⧾ :an 'dhu-or 'slen bo. :Yeh or :wlu-a 'de on bo, :yee' or :wlu-' 'de :Poror' bo, or 'dae:, :On dhele: 'on-: dih, :on 'ye 'de 'Wloon-nyor⧾-a' 'keen bo mu. 'On 'worn-'. Mu 'de, :an-a' zabe 'ye :zi-eh: 'de mor.

¹³:Yeh 'we-kpor-bei :zi-dih:-a 'o ken dih, :yee' 'Keen :Agle'pa-: 'dekorn: or-a'a: 'nynor :Behni'i-: on mu :na 'da 'de 'Fehtor bo, 'do 'Sehsali'a-gwlor 'di. On mu-or :gwluhuh' zela: 'da :ka an-a' :porluh⧾ 'pehn-a dih 'do or-a' yi-a' bo.

¹⁴:Ka an mu-a 'o 'we :doru' :zi, :yee' eh-: no-eh, 'de 'Fehtor zela: 'keen :gwluhuh', 'do :Poror'-a' dhih bo, or 'dae:, 'Yu :due', or-: :ne :daa, or-: File' sie 'de :kasue 'di.

¹⁵:Yee' ti 'on mu-a :Julu'slehn, 'do :wor Nyorsoa-a' 'slaa: :za-nyor:⧾ :klaba'⧾-: 'dekorn: :Jueh'-nyor⧾-a' 'bluhba: :korn-nyor⧾-: on 'da, 'Yu :daa, or no deh-zon:. :Yee' eh-a' dhih, 'on no-eh zabe 'ye-or' kpon.

¹⁶Jorwor: 'on zela-uh-: :gwluhuh', 'on 'da, eh :se 'Wloon-nyor⧾-a' 'bli-deh:, nyor 'ye nyor :or :ne or 'be 'ble-a zabe 'kwla :za 'de or bo. On :korn on 'ye ybei' dih dhele: :zai' :weh, 'de jorwor: deh or no-a, 'de :on 'ye-eh' :za, 'de or 'ye ti 'ye, or 'ye or-a' 'jeh dhih ken :za :ke.

¹⁷:Yeh on :ya-a: 'de 'yu-a' 'jeh :dao', or-a' zabe 'noror 'on bo, :yee' 'on :se-' ti :zi-dih:. :Yeh zorn zen-a, :yee' 'on :dhe dih, 'de zabe: :zi :kpala' 'di, 'de 'koti-', 'de 'on zela: nyor⧾ :gwluhuh' on 'ye 'de 'yu-a' 'jeh :dao' :ya 'do 'on ybei'.

¹⁸:Yee' :yeh on ya-or 'de, :yee' nyor⧾ :on :ne or 'ble-a dhih, on :sorn-' 'weh, 'de on :nyna dih, an wlu. 'Mor :mloror', :mor 'on :taa 'ye :dee', :yee' 'on 'da or no deh-zon: :klaba'. Jorwor: deh on zela:-a ken dih, deh-zon: :yeh or 'ye-a' no, 'on :se-eh' 'ye.

¹⁹Jorwor: deh :eh :korn-a dhih on :ne or dhobo-a, eh tba 'o an-a' Nyorsoa-a' :weheh' :za-deh 'bhun dih, 'dekorn: 'yu :due' :or 'meh-a an 'da-dih-a :Yusu' :or :Poror' no-a :or :ne-' 'kmo :neheh'.

²⁰:Yee' :ka 'on 'ye-a zabe: :daa, en-' zi-a' no, 'on se-eh yubo:, :yee' eh-a' dhih, 'on dhele: :Poror'-: dih, 'on 'da, :An mu-eh 'worn-dih: :on 'ye :Julu'slehn mu, 'de :an-a' zabe 'ye :zi-eh: 'do deh⧾ :daa on po-a 'o :on 'dlu bo :e?

²¹Jorwor: :Poror' dhele: 'on-: dih, 'on 'ye-or ken dih kpon, 'de jorwor: 'Wloon-nyor⧾-a' 'keen 'ye or-a' zabe zi. Eh-: no-eh, 'de 'on zela: nyor⧾ :gwluhuh', on 'ye-or ken dih kpon, 'de jorwor: 'on 'ye-or 'de 'Wloon-nyor⧾-a' 'keen bo dbo.

²²:Yeh 'Fehtor jla-a, :yee' 'Keen :Agle'pa :wlu-' 'de or bo, or 'dae:, 'An 'jeh 'yor-eh:, 'an 'bhorn 'on 'ye 'yu-a' 'jeh :daa, or-a' wlu 'worn :ke. 'De 'Fehtor 'da, :An mu or-a' wlu 'worn-: :glaa'e.

²³:Yee' :yeh zorn zen-a, :yee' 'Keen :Agle'pa-: 'dekorn: :Behni'i-: an na :dhuo-deh:, 'de on pa 'de :chuu: :klaba' :on :korn-a 'di :gwlor-nyor⧾-a 'gbon-dih-a. :Yee' sorye'-a' :janbe-boi'-: 'dekorn: 'nyne :korn-nyor:⧾ :on :ne-a 'o :gwlor :dao' 'di-: mo-: :ne on :mu-dih: 'de. :Yeh on pa-a, :yee' 'Fehtor zela: nyor⧾-: :gwluhuh' on 'ye 'o :Poror' 'do on ybei' :ya.

²⁴:Yeh on :pa-dih:-a :Poror', :yee' 'Fehtor :wlu-' 'de 'Keen :Agle'pa bo, or 'dae:, 'Keen :Agle'pa:. Mor-: 'dekorn: nyor⧾-a' klehkpeh :on :ne-a dha :a bo :naa-: a 'ye 'yu :dhe-a dih 'weh :e? :Jueh'-nyor⧾-a' klehkpeh :on :ne-a dha :gwlor :daa 'di-: 'dekorn: :yuh :on :ne-a :Julu'slehn-: mo-: :to or-a' :jii-eh 'noror 'on bo, an po 'geh⧾, an no, Or-a' :ne-' 'kmo :neheh'.

²⁵Jorwor: deh or no-a :eh :korn-a dhih an 'bhorn-a or 'ye-a 'meh, 'on se-eh yubo:. Jorwor: :ka or no-a 'Wloon-nyor⧾-a' 'keen, or-: 'ye or-a' zabe zi, :yee' eh-: no-eh, 'de 'on polo-eh 'do 'on :gwlii', 'on 'ye-or 'Wloon dbo.

²⁶Jorwor: deh or no-a :eh :korn-a dhih 'on 'ye-a 'Wloon-nyor⧾-a' 'keen bo 'chle, 'on se-eh yubo:. Eh-: :korn dhih, 'on ya-or 'noror a-a' klehkpeh bo. Jorwor: 'Keen :Agle'pa:, :mor 'dhu-eh mor-', :mor eh 'dhu :on pobo: 'de zabe: :daa 'di, 'de deh 'an mu-a 'chle-:, :eh 'ye-a 'de 'Wloon-nyor⧾-a' 'keen bo mu, 'de 'on 'ye-eh yubo:.

²⁷'On :se-eh' :toror' 'di 'ye, 'on 'ye 'de or bo :kasue-nyor dbo, 'de deh or no-a 'on 'ye :ao', 'on :se-eh' :za.