Read Eastern Krahn Noo-deh:⧾ 27 Bible Online

Noo-deh:⧾ 27 - Eastern Krahn bible

Noo-deh:⧾ 27

¹:Yee' :yeh on polo-eh, :a 'ye-a 'de 'ni ken-meheh 'di 'kpa, :a 'ye-a 'Etole-bluhba ken mu, :yee' on po 'de :Poror'-: 'dekorn: :kasue-nyor:⧾ :noo'-: 'de 'yu :due' 'kwa, an 'da-dih-a :Julia' :or no-a nyor :klaba' 'do sorye'-a' kpor :on :dhe-dih-eh 'for 'i, 'de 'Wloon-nyor⧾-a' 'keen bo.

²'De :a 'kpa 'de 'ni ken-meheh 'di :eh 'wluh-a 'Adlami'tior-gwlor 'di, :eh 'bhorn-a :eh 'ye-a 'Esea-bluhba-a' gwlor⧾ 'di dih :pa-dih:, 'de :a mu. :Yee' 'yu :due' an 'da-dih-a 'Alita'kor :or no-a 'Masordo'nia-yu, :or 'wluh-a 'Tehsolo'nika-gwlor 'di, or-a' 'jeh :dao', or-: :ne :a mu.

³:Yee' :yeh zorn zen-a, :yee' :a 'si 'Saedorn-gwlor 'di-: dih. 'De :Julia' no deh 'jeh 'do :Poror' bo, or 'tali-or dih, or 'ye or 'bei' 'ye 'da mu, on 'ye deh or se-a 'ble, on 'ye-or 'nyi.

⁴:Yee' :yeh :a 'wluh-a 'o, :yee' :a 'kpa 'de 'ni ken-meheh 'di-: de, 'de :a mu. :Yeh :a mu-a, :yee' :pobor'-a yi :a :gwlii'. Eh-: no-eh, 'de :a :yi-dih: 'noror 'Sapor-bluhba-a' 'for :yor :pobor' se-a bo :ne.

⁵:Yeh :a :yi-dih-or worn dih, :yee' :a :mu-dih: 'de yobo'-a' gwea:, 'de :a :yi-dih: :Sele'sia-bluhba-: 'dekorn: :Panfi'la-bluhba-: worn dih, 'de jorwor: :a 'si :gwlor an 'da-dih-a 'Mala dih, :or :ne-a 'de 'Lisia-bluhba ken.

⁶'Do :wor sorye'-a' nyor :klaba' :dao', or 'ye-dih: 'ni ken-meheh :eh 'wluh-a :gwlor an 'da-dih-a 'Ehlezan'dla 'di, 'de :eh mu-a 'Etole-bluhba ken, 'de or po 'de eh 'di :a-uh.

⁷:Yeh :a mu-a, :yee' 'ni ken-meheh: :a :ne-a 'de 'di, eh na :wleh :wleh, 'do 'we :dhulu' 'di. 'De :a 'ye 'kle 'gabaa, 'do :gwlor an 'da-dih-a 'Klalor, or-a' ken :yeh-dih: 'da, deh no-eh, :pobor' :dhie: 'i 'gabaa. Eh-: no-eh, 'de :gwie: :a kpa-a :dee', :a se eh-a' kpa-a' 'beh-dih:. 'De :a :yi-dih: 'noror 'Klii-bluhba-a' 'for :yor :pobor' se-a bo :ne-dih: ka, 'do :dha 'bluhba 'nyna-dih:-a 'de yobo' 'di, an 'da-dih-a 'Samorne.

⁸Ti :a na-dih-a 'kpuhbuh' worn dih, :a 'ye 'kle 'do :gwie 'i 'gabaa, 'de :a mu 'o :dha an 'da-dih-a Dubeh: :po 'da 'jeh nor :nyni. 'Do 'koan'-dih: 'o 'Lasea-gwlor: worn 'i dih.

⁹:Yee' :yeh :a :zi-dih:-a ti :doru' :zi-dihih: 'do :gwie 'i, 'de 'we-eh: :Jueh'-nyor⧾-a 'dhu-dih-a Nyorsoa gban 'i, eh zi-a, :yee' ti :en :korn-a 'di 'ni ken-meheh 'di 'kpa-eh nyni-a 'yi dih, en nyni 'o 'weh. Eh-: no-eh, 'de :Poror' 'dhu-uh 'slen, or 'dae:,

¹⁰:A 'bli-nyor⧾-a:. 'An 'ye-eh', :ka :mor :a 'wluh :daa, eh mu-a 'yi dih :nyni 'do :a bo. 'Meheh-: 'dekorn: 'tiei: :en :ne-a 'de eh 'di-: en mu 'kor-:. Eh se en :due' :deh, jorwor: :a-a' :febeh' :ne 'o 'weh :ke.

¹¹:Yeh :Poror' 'da :ao', :yee' sorye'-a' nyor :klaba' :dao', or :se-' :Poror'-a' wlu :dou'⧾ bo :to. Jorwor: 'ni ken-meheh-a' :janbe-: 'dekorn: 'yu :or korn-eh-: an-a' wlu, mo-: or :to :dou'⧾ bo.

¹²:Yee' :ka 'do :dha 'o se-a 'yi dih :nmor, on 'ye-a 'o :ne, 'do :chehbe'-a' ti 'di, eh-: no-eh, 'de nyor⧾-a' :dha :dhulu' polo-eh, :a 'ye 'o 'wluh. An 'bhorn :a 'ye vorn, :a 'ye 'Fineh-a' dubeh: :po 'da nyni, :or :ne-a 'Klii-bluhba ken, :a 'ye 'o dih :dhe, 'do :chehbe'-a' ti 'di. Dubeh: :po 'da :dao', or kan-dih: worn 'noror 'yluh-a' 'nior: 'kpa 'da-a' :dila bo-: 'dekorn: 'noror kona bo-: :ke.

¹³:Yee' :yeh :pobor'-a 'wluh-dih-a 'de 'yluh-a' 'kwla 'wluh-dih: 'da-a' kona-for bo :wleh :wleh, :yee' :mor on :taa 'ye :dee', :yee' on 'da eh mu 'yi dih :nmor, on 'ye deh an na-dih-a :gwluhuh' dih no. :Yee' eh-a' dhih, on bhehn-dih: 'ni ken-meheh 'weh, 'de :a 'kpa :gwie 'i, :a :yi-dih: 'kpuhbuh' :on :ne-a 'noror 'Klii-bluhba worn dih.

¹⁴:Yeh :a ken-dih:-a 'o dih :weh-beh:, :yee' :pobor' :or ku-a dih 'gabaa, :or 'wluh-dih:-a 'noror 'yluh-a' 'kwla 'wluh-dih: 'da-a' :dila bo ka, or-: chehn 'Klii-bluhba: :or no-a yobo'-a' dubeh :dhie', 'de or :yi-dih: :a-uh'.

¹⁵:Yeh :pobor' :dao', or bla 'ni ken-meheh-: 'i, :yee' :ka :a 'ye-eh' :gwie :po ka no, :yee' ka se :ne. 'De :a 'tali-eh dih, 'de :pobor'-a kpa-eh :dha or 'bhorn-a or 'ye-eh :kpa-dih:.

¹⁶:Yeh :a :yi-dih:-a 'noror yobo'-a' dubeh-yu:, an 'da-dih-a 'Korla, 'noror or-a' 'for :yor :pobor' se-a bo :ne-dih: ka, :yee' :a 'ye 'kle 'gabaa 'do 'dho-yu: :or :san-dih-eh 'o 'ni ken-meheh 'kpuh 'i, 'do or-a' 'ni ken-meheh 'di :po 'da.

¹⁷On jli-or', 'de on po-or 'de 'ni ken-meheh 'di. 'De on :ya-dih: 'de dubu'⧾ 'de 'ni ken-meheh-a' 'jeh 'yor-eh 'zorn, on san-eh 'kpan 'kpan, eh :ne 'i 'wo-dih:. :Yeh on no :ao', :yee' on :za 'yli-eh: :eh :pobor' bla-a, 'de 'ni ken-meheh na-a yai', 'de on :za 'ni ken-meheh 'yli-eh dih, 'de :pobor'-a kpa-eh. Deh no-eh, :fano-a: no-uh, eh :ne 'o :bhehneh' :eh :ne-a 'o 'nior ken ze, 'do 'ni-a' :dha an 'da-dih-a 'Siti.

¹⁸:Yee' :yeh zorn zen-a, 'de :kmuu-pobor' :dao', or-a' 'worn-dih:-a 'boror'-dhih 'gboror:, :yee' on 'kpa 'o 'tiei: :en :ne-a 'noror :a bo 'ni ken-meheh 'di, en-' 'nior: :po 'da 'weh.

¹⁹:Yee' 'do 'we-eh-a' taan neh 'di, :yee' deh⧾ :nee' on 'dhu-a 'meheh 'bhun dih, :yee' on no an-a' 'jeh 'yor-eh-a' son⧾, 'de on po en-' :nee' 'nior.

²⁰:Yee' :ka :a se-a 'yluh-: 'dekorn: 'chuh :dhlaen-: 'ye, 'do 'we :dhulu' 'di, 'de :kmuu-pobor' :dao', or bla :a 'i 'gboror:, :yee' :a :se-eh' :gwlii' dhe :neheh', :a 'ye 'puh.

²¹:Yee' :yeh an-a' klehkpeh se-a deh di, 'de eh kpa-a 'we :dhulu', :yee' :Poror' :sorn-' 'weh, 'de or :nyna dih 'do on ybei', or :wlu, or 'dae:, A :korn a 'ye 'an wlu :dou'⧾ bo :to :dee'. :Mor a no-eh :dee', :yee' :a :se-' 'Klii 'wluh-: i :dee'. :Yee' deh⧾ :dhulu' :daa :en 'kor-a-: 'dekorn: deh⧾-a' klehkpeh :daa :en 'ma-a-: en se :korn en 'ye :ao' :ne :dee'.

²²Jorwor: 'an bale a 'weh :naa. A po a-a' 'jeh 'kpih bo. A 'bor :fano: :ple-eh. Deh no-eh, a-a' nyor-beh-nyor-beh: :or 'ye-a' 'ma, or se :ne. 'Ni ken-meheh :due' 'klein', eh-: mu ya :gba.

²³'Gwie-glu: zi-a, Nyorsoa :or 'on :korn-a 'de bo, 'de 'an za-a :weheh', or-a' 'enjor :due', or-: :nyna 'o 'on 'bhun dih.

²⁴Or-: :wlu 'de 'on bo, or 'dae:, :Poror', :an-a' :ple-' :fano. :An-a' zabe-a mu :zi-eh: 'do 'Wloon-nyor⧾-a' 'keen ybei' :gbor :gbor. 'De :an-a' dhih, Nyorsoa-a mu nyor⧾-a' klehkpeh :on :ne-a 'noror :on bo 'meheh 'di 'puh-dih:.

²⁵:Yee' 'do eh-a' dha, a po a-a' 'jeh 'kpih bo, :a 'bli-nyor⧾-a:. Deh no-eh, 'on dhe Nyorsoa :gwlii', :ka or no-a 'an :gwluhuh' zela-eh:, 'ka-: eh mu :ne.

²⁶Jorwor: 'ni ken-meheh: :a :ne-a 'di, eh mu :ze 'do yobo'-a' dubeh :due' ken.

²⁷:Yee' 'do 'we-eh-a' :bhue: 'yor :nyieh-a' dholo-we-eh 'di, :yee' :pobor'-a 'tun :a 'weh 'gboror: 'noror 'Edlea'te-yobo' ken. :Yeh eh no-a dholo-' zuee, :yee' nyor⧾ :an no-a :koan 'de 'meheh 'di, on yubo-eh' :ka an 'koan'-dih-a 'kpuhbuh' dih :weh-beh:.

²⁸'De on :yba-dih: 'ni. 'De eh-a' 'di :tehn-eh no, po son bo-a' :kwlaa :nyieh. :Yeh on 'beh-dih:-a 'o dih :weh-beh:, :yee' on :yba-dih-eh :neheh'. 'De eh no po son bo-a' :kwlaa taan.

²⁹:Yee' :yeh on 'ye-eh, :yee' :fano-a: no-uh, an-a'a: 'ni ken-meheh :ne 'o 'soba 'i 'ya. Eh-: no-eh, 'de on po 'meheh-a' dubeh⧾ :nyieh 'nior 'noror eh-a' :gborluh' bo, eh 'ye dih :nyna :dee'. 'De an bale Nyorsoa zorn 'ye zen.

³⁰:Yee' nyor⧾ :an no-a :koan 'de eh 'di, an 'bhorn on 'ye ple. Eh-: :korn 'sleh an po, 'de on 'duo: 'dho-yu-', on za-or 'de 'ni ken-meheh 'di, 'de on po-or 'nior, :eh gweh-a :ka nyor :or 'bhorn-a :or 'ye-a 'meheh-a' dubeh: :eh :ne-a 'de eh mlai', 'nior po :dee'.

³¹:Yeh an no :ao', :yee' :Poror' :wlu-' 'de sorye'-a' nyor :klaba'-: 'dekorn: or-a'a: sorye'-: bo, or 'da, :Mor eh 'dhu nyor⧾ :daa, on se 'noror 'ni ken-meheh 'di dih :dhe, :yee' a :se-' 'puh-: i.

³²:Yeh :Poror' 'da :ao', :yee' sorye' :dao', on chehn dubu'⧾ :en kpon-a 'dho-yu: :dao' dih 'weh, 'de or 'kpa 'nior, or mu.

³³:Yeh zorn yi-a zen 'da, :yee' :Poror' bale: an-a' klehkpeh :on :ne-a 'de 'ni ken-meheh 'di 'weh, on 'ye deh-beh di, or 'da, 'We-a' :bhue: 'yor :nyieh :a zi-a 'noror 'ni ken-meheh 'di, deh a :ne-a ken, a se-eh yubo:, a 'see deh-beh di.

³⁴:Yee' 'do eh-a' dha, 'an bale a 'weh :naa, a 'ye deh-beh di. A :korn a 'ye deh di, 'de a :ne-' 'meh. A-a' nyor-beh-nyor-beh-a' 'mii-eh :due' :sloror' :se-' 'ma-: i 'do or 'dlu.

³⁵:Yeh or :za-a deh :daa-', :yee' or 'duo: 'bhlee 'weh. 'De or po Nyorsoa-a' 'zio 'do on ybei', or :chehn-dih-eh dih, or di-eh.

³⁶:Yee' :ka or di-a or-a' neh, :yee' eh po 'de an-a' klehkpeh-a' 'kpih 'weh, 'de on di deh-beh :ke.

³⁷:A-a' klehkpeh :or :ne-a 'de 'ni ken-meheh: :dao' 'di, :a no nyor⧾-a' :kehehn' 'sororn' :kwlaa :meheh' 'sorn 'yor :meheh'lo:.

³⁸:Yee' :yeh on di-a deh, on dbo-a, :yee' on po deh⧾-yor: an 'da-dih-a 'wii 'nior:, 'de 'meheh 'ye kwa 'fele:.

³⁹:Yee' :yeh zorn zen-a, :yee' 'bluhba-a' 'for :yor on :ne-a bo, on se-or 'i yubo:. Jorwor: on 'ye :bhehneh'-dhu: 'do :dha yobo' :du-dih:-a :kolo. 'Do :wor on polo-eh, on 'ye 'o 'ni ken-meheh 'do 'kpuhba' 'i kpa, :mor eh 'dhu on 'beh-dih-eh.

⁴⁰:Yee' on chehn dubu'⧾ :en kpon-a 'meheh-a' dubeh⧾ dih 'weh, 'de on sie-ih 'o yobo' 'worn. :Yee' 'do :dha :due' :dao', on bhehn-dih: deh :eh po-a 'meheh :gwie-', eh-a' dubu'⧾ 'weh. 'De on po 'yli-eh: :eh na-dih-a 'meheh yai' 'de 'meheh mlai', :pobor' 'ye-eh 'i bla, eh 'ye 'o 'kpuhba' 'i mu. 'De eh kpa :gwie-'.

⁴¹:Yeh an mu-a 'o 'kpuhba' 'i, :yee' eh ze-' 'do :bhehneh' :eh :ne-a 'o 'nior ken. 'De eh-a' 'mla ze glu. :Yee' eh se :gwliin' 'wluh-dih-eh 'beh-dih:. :Yeh eh no :ao', :yee' yobo'-a' nyor-kpalu-duh⧾-a gba eh-a' :gborluh'-: ya.

⁴²:Yee' sorye' :on :ne-a 'de 'ni ken-meheh: :dao' 'di, on polo-eh', on 'ye :kasue-nyor:⧾ :dao' 'dba, 'de on :ne-' 'nior 'kpa, on :ne-' :dle, on :ne-' ple.

⁴³Jorwor: sorye'-a' nyor :klaba' :dao', or 'bhorn or 'ye :Poror' 'puh-dih:. Eh-: :korn dhih or po sorye' 'borboa' 'i, deh an 'bhorn-a on 'ye-a' no, on :ne-eh' no. :Yee' or zela: nyor⧾-a' klehkpeh :on yubo:-a :dle-a' :gwluhuh', on 'ye 'nior 'kpa :zai', on 'ye :dle, on 'ye 'o 'kpuhba' 'i mu.

⁴⁴:Yee' :yuh :on :sie:-a 'o, or zela-uh-: :gwluhuh' :ke, on 'ye tu⧾ 'for⧾-: 'dekorn: 'meheh-a' 'for⧾ :en :wa-a-: on 'ye-ih' 'duo:, on 'ye 'o en ken 'kpa, on 'ye 'o 'kpuhba' 'i mu. :Yee' 'ka-: :a no, 'de :a-a' klehkpeh, :a nyni 'o 'kpuhba' 'i :pehleh'peh:.