Read Eastern Krahn Noo-deh:⧾ 28 Bible Online

Noo-deh:⧾ 28 - Eastern Krahn bible

Noo-deh:⧾ 28

¹:Yee' :yeh :a nyni-a 'o 'kpuhba' 'i :pehleh'peh:, :yee' :a yubo-eh-: 'i :ka yobo'-a' dubeh: :dao', eh-a' 'nyne 'dhu-a 'Morta-'.

²:Yee' nyor⧾ :on 'ti-a 'o 'bluhba-dlu: :dao' ken, on no deh 'jeh 'do :a bo, on kpon :a dih deh 'jeh neh. On dhba neh, 'de on 'da :a-a' klehkpeh, :a 'ye 'wona:. Deh no-eh, 'ni-a: dba, 'de :chehbe'-a no :a-uh.

³:Yee' :Poror'-a 'tehn :name dih, me-: or po :dha :due', 'de or :ya 'de en-' 'pu. 'De or 'dhu-ih 'o 'yli. :Yee' neh-a' :fuun' no-eh, 'de sehn 'dhan 'de en 'di dih, 'de eh nmu-or, eh bhele: 'o or son 'i.

⁴:Yee' :yeh nyor⧾ :on 'ti-a 'o 'bluhba-dlu: :dao' ken, on 'ye-a sehn, 'de eh bhele:-a 'o or son 'i, :yee' an wlu-' 'de an-a' 'jeh 'nyne-', an no, Eh se dhobo-eh :korn. 'Yu :daa, :nyor⧾ 'dba-nyor: 'o. Keen' :mloror' or 'wluh 'o yobo' worn 'weh, or 'puh-'. Jorwor: :a-a' nyorsoa :or no-a 'yi 'sleh-nyorsoa, or :se-' 'worn-: i, or 'ye 'kmo-' :ne.

⁵:Yee' :Poror' 'vuan: or-a' son-: dih, 'de eh 'kpa 'de 'yli. Jorwor: deh sehn nmu-or, eh :se-or' deh-' :no-dih:.

⁶:Yeh eh no :ao', :yee' :mor :gwlor-nyor⧾-a' klehkpeh :taa 'ye :dee', :yee' on 'da, 'bhun-a'-: 'dekorn: 'ga-dih 'meh-: en-' deh :due'-a mu-or :no :dee'. Jorwor: :yeh on pobo-a 'o :poboo: 'do ti :dhorno'⧾ 'di, 'de on 'ye-eh :ka deh se-or no, :yee' an-a' :porluh⧾ 'bili:-'-: dih, 'de on 'da, Or-: nyorsoa :noror' :oo'.

⁷:Yee' gle :klaba', eh-: 'koan'-dih: 'o dha-a' 'jeh :dao' dih, :eh :korn-a 'de 'Porblior bo. 'Porblior: :dao', or no 'kwi :klaba', :or :ne-a 'o nyor⧾-a' klehkpeh 'dlu, 'do 'bluhba-dlu: :dao' ken. Or-: kpon :a dih 'de or 'bli 'gbu 'di. 'De or no :a-a' deh-' dih, 'do 'we taan 'di.

⁸'Yu-a' 'jeh :dao', or :baa', or-: :chehbe'-: 'dekorn: 'klayeh-: en no 'gabaa. Eh-: no-eh, 'de or 'pehn dih. :Yee' :Poror' pa 'de or bo :chuu 'di 'weh, or 'ye-or' 'ye. 'De or :wlu 'de Nyorsoa bo. :Yeh or gweh-a 'de Nyorsoa bo :wlu-eh 'i, :yee' or tba-or son⧾ ken dih, or 'puh-dih-or.

⁹:Yeh :Poror' no-a deh :dao', :yee' puhba-nyor⧾-a' klehkpeh :on :ne-a 'o 'bluhba-dlu: :dao' ken, on yi-: 'de, 'de on 'puh.

¹⁰:Yee' nyor⧾ :dao', on 'dhu 'o :a 'weh 'de :ka :dhulu' 'di. :Yee' :yeh :a 'kpa-a 'de 'ni ken-meheh: :neheh' 'di, :a yi-a mu 'da, :yee' on 'nyi :a deh⧾-a' klehkpeh :a se-a 'ble 'weh.

¹¹:Yeh 'chuh⧾ taan zi-a, :yee' :a 'kpa 'de 'ni ken-meheh: :eh 'wluh-a 'Ehlezan'dla-gwlor 'di, :eh fuo-a :chehbe'-a' ti 'ken en 'ye-a' zi, 'do 'bluhba-dlu: :dao' ken, 'de eh 'ye-a' mu. 'De :a 'kpa :gwie 'i 'do yobo' ken. :Yee' nyorsoa⧾ 'sororn' :on :bha-a, :en no-a 'gba-nynuu an 'da-dih-a 'Kator-: 'dekorn: 'Porlor-: me-: on 'dhu 'o eh mlai'.

¹²:Yee' :yeh :a nyni-a 'do :gwlor an 'da-dih-a :Sila'ku 'di, :yee' :a :ne 'o 'weh 'do 'we taan 'di.

¹³:Yeh :a 'wluh-a 'o, :yee' :a mu-' :chio'lo:, 'de :a 'si :gwlor an 'da-dih-a 'Wleyor 'di dih. :Yee' :yeh zorn zen-a, :yee' :pobor' :or 'wluh-dih:-a 'yluh-a' 'kwla 'wluh-dih: 'da-a' kona-for bo, or-: 'yle. :Yee' :yeh zorn :dele' zen-a, :yee' :a 'si :gwlor an 'da-dih-a 'Putio'li-: dih.

¹⁴'Do :wor :a 'ye-dih: 'Klae :de-di'-boi' :noo', :on :za-a :a :gwie 'i, :a 'ye-a 'doror'-dlu :due' no 'do on bo. :Yeh :a 'wluh-a 'o, :yee' :a mu 'Wloon:.

¹⁵:A-a' 'Klae :de-di'-boi' :on :ne-a 'Wloon, on 'worn-ih' :ka :a yi-a 'de. 'De on yi 'Apior-nyor⧾-a' 'doror' :po 'da-: 'dekorn: 'do :dha an 'da-dih-a 'Duhba⧾-gbu⧾ taan-: 'do :wor on yi :a 'yi 'ya-dih: 'da. :Yeh :Poror' 'ye-uh'-a, :yee' or po Nyorsoa-a' 'zio, 'de eh po 'de an-a' 'kpih.

¹⁶:Yeh :a nyni-a 'Wloon, :yee' 'Wloon-nyor⧾-a' 'gomla 'worn-dih-eh ken dih 'weh, or 'ye 'o or-a' 'jeh bo :ne. :Yee' sorye'-yu-a mu-or 'yli-eh bo 'dhu-:, or :ne-' ple.

¹⁷:Yeh 'we taan zi-a, :yee' :Poror' 'da :Jueh'-nyor⧾-a' nyor⧾ :na-dih-nyor⧾-a' klehkpeh 'weh. :Yeh an-a' klehkpeh, on :gweh-a de, :yee' or :wlu-' 'de on bo, or 'dae:, 'An 'de-di'-boi'-a:. 'On :se-' :a-a' nyor⧾ deh-zon 'bhun no. 'De mor 'on :se-' deh-zon no 'do :a 'bli-deh:⧾ :a :bai'-a' :bai' :torne: :a-uh bo. Jorwor: on kpon 'on 'weh 'de :Julu'slehn :chio'lo:, 'de on :za 'on 'kwla 'de 'Wloon-nyor⧾ bo.

¹⁸'De 'Wloon-nyor⧾ 'chleh 'on, 'de an 'bhorn on 'ye 'on dih 'tali:. Deh no-eh, eh-: 'dhu on yubo-eh' :ka 'on se-a deh-zon no, :eh :korn-a dhih 'on 'ye-a 'meh.

¹⁹Jorwor: :Jueh'-nyor⧾ :se-' deh :daa ken dih 'worn-dih:. :Yee' deh :due' 'on :korn 'on 'ye-a' no, eh-: 'dhu, 'on 'ye nyor⧾ dih dhele: on 'ye 'de 'on 'Wloon-nyor⧾-a' 'keen bo dbo, or 'ye 'an zabe zi. Keen' :mloror' 'on se dhih 'ble, 'on 'ye-a 'o 'an 'jeh-a'a: nyor⧾ 'dlu po.

²⁰:Yee' deh :daa, eh-: :korn dhih, 'on 'da a-uh, 'on 'ye 'de a bo :wlu. 'Do nyor 'Ezlea-nyor⧾ dhe-a :gwlii', or-a' dhih :oo', on po 'on 'chen-dubu'⧾ :daa son⧾-'.

²¹:Yeh or 'da :ao', :yee' on :wlu-' 'de or bo, on 'dae:, :A :se-' 'chlee-deh⧾ 'ye, en :se-' :Judi'a-bluhba ken 'wluh, en :se-' :on 'i kor. 'De mor 'de-di'-boi'-a' nyor-beh-nyor-beh: or :se 'de 'wluh, or :se 'de :an-a' kuna'-zon :ya. 'De mor or :se-' :on 'bhun dih :wlu-dih:.

²²Jorwor: :a 'bhorn :a 'ye :an-a' 'jeh 'yor-eh-a' wlu 'worn. Deh no-eh, :a yubo-eh' :ka :gwlor-nyor⧾-a' klehkpeh, an wlu-dih-a deh :dele' :daa a :ne-a 'de 'di 'bhun dih, deh⧾-a' klehkpeh-' dih.

²³:Yee' mo-: :Poror'-: on polo-eh', on 'ye 'gbon-dih: 'we-eh :due'. :Yeh 'we-eh: :dao', eh nyni-a 'o, :yee' :gwlor-nyor:⧾ :dhulu' yi 'o :dha or 'ti-a. :Eh 'wluh-a zorn bo-mlai' 'bli, 'de :eh :yeh-dih:-a 'gwie-yluh bo ken, :Poror' po Nyorsoa-a' nyor⧾ wlu 'ken :korn-eh-a' tubo-wlu:⧾ 'de on bo, 'de or zela-eh ken dih. :Yee' 'de :Mose'-a' 'tele'-chlee-deh 'di-: 'dekorn: Nyorsoa-a' wele-eh: :po-nyor⧾-a' 'chlee-deh⧾ 'di-:, 'do :wor or :za wlu, or vorn or 'ye an-a' :porluh⧾ dih 'bili: 'noror :Yusu' bo.

²⁴An-a' :noo', mo-: :korn :porluh:⧾ 'bili:-' dih, 'do deh or :za-a-' bo. Jorwor: nyor⧾ :noo' :se-eh' dhih 'jeh-' po.

²⁵:Yee' wlu-' dih 'worn-eh: :se 'de on 'klu-' :ne. 'De on 'kpa 'o, on mu, ti :Poror' gweh-a deh :daa, eh-a' :za-a' 'i, or no-a, Gban 'i :ne :Zulu :se-eh' 'i zi 'do deh on zela:-a a :bai'-a' :bai' :gwluhuh' :dee' see, :eh :yi-dih:-a Nyorsoa-a' wele-eh: :po-nyor :Azaya'-',

²⁶or no-a, Mu 'de nyor⧾ :daa bo, :on 'ye-uh :gwluhuh' zela:, :on 'dae:, A mu :dou'⧾ :to :too:, jorwor: a 'se 'ba deh-' dih 'worn, 'de a mu dih pobo: :poboo:, jorwor: a 'se 'ba dih 'ye.

²⁷Deh no-eh, nyor⧾ :daa, an-a' 'dlu⧾ 'sun-', 'de on :se-' 'bhorn on 'ye :dou'⧾ :to, 'de on kan 'yli, 'de on :ne-' dih 'ye, 'de on :ne-' dih 'worn, 'de on :ne-' deh-' dih 'worn 'do an-a' :porluh⧾ ken, 'de on :ne-' dih 'bili:, 'de Nyorsoa :ne-uh' 'puh-dih:.

²⁸:Yee' :Poror'-a kpa or-a' wlu 'dlu bo, or 'da, :Yee' 'do eh-a' dha, 'an 'bhorn a 'ye-eh' yubo: :ka Nyorsoa-a' nyor⧾ 'puh-dih-eh-a' tubo-wlu⧾ :dbo-eh: 'noror nyor⧾ :on :se-a :Jueh'-nyor⧾ bo. 'De eh 'dhu-a on mor-', :an mu-ih-a :dou'⧾ bo :to. [

²⁹:Yeh :Poror' :za-a deh :daa-', :yee' :Jueh'-nyor⧾ mu-'. :Yeh an mu-a, :yee' an jeh-' 'de an-a' 'jeh 'nyne-' 'gabaa.]

³⁰'Do zon⧾ 'sororn' 'di, :Poror' :ne 'de 'gbu or kpon-a dih 'do or-a' 'jeh bo 'di. 'De nyor⧾-a' klehkpeh :on yi-or 'ye 'da, or kpon-uh dih.

³¹:Yee' 'de :gwluhuh' :ku ka 'di, or po Nyorsoa-a' nyor⧾ wlu 'ken :korn-eh-a' tubo-wlu:⧾ 'de nyor⧾ bo. 'De or torne-uh :Gwlor :baa' :Yusu' 'Klae-a' dhih. 'De nyor-beh :se-or' 'borboa' 'i po, 'do en-' :za 'da :ke.