Read Eastern Krahn Noo-deh:⧾ 6 Bible Online

Noo-deh:⧾ 6 - Eastern Krahn bible

Noo-deh:⧾ 6

¹:Yee' 'do ti :dao' 'di, :yeh :Yusu'-a' klei' :zi-nyor⧾-a 'kpuhba-a ken dih, :yee' :Jueh'-nyor⧾-a' :yuh :an po-a 'Glii-wlu, mo-: :an wlu-dih :Jueh'-nyor⧾-a' :yuh :an po-a :Hiblu'-wlu 'bhun dih, on 'dae:, :Mor on :taa :dhoba: 'nynor⧾-a'a: dii-deh⧾-' gble, zorn 'o zorn, :yee' an-a' no-a' 'ye deh on :korn on 'ye-a' 'ye.

²:Yee' :Yusu'-a'a: dboo-nyor:⧾ :on :korn-a :bhue: 'yor :ne-a 'sororn', on 'da :Yusu'-a' klei' :zi-nyor⧾-a' klehkpeh :dha :due', 'de on :wlu 'de on bo, on 'dae:, Eh se 'yi dih :nmor, :a 'ye Nyorsoa-a' tubo-wlu:⧾ :po-eh 'kpuh ya :to, 'de :a 'ye dii-deh⧾-' gble.

³:Yee' :ka eh :ne :ao', :a-a' 'Klae :de-di'-boi'-a:, a :za 'de a 'nyne-' nyor⧾-kpalu⧾ :meheh' 'sorn, :yuh a yubo:-a :on :korn-a :toror', 'de :on 'yi-dih:-a Nyorsoa-a' :Zulu-' dih, :on :korn-a 'de 'kwa, :a 'ye-a deh⧾-a' klehkpeh :daa po.

⁴:Yee' :mor eh :ne :ao', :yee' :a 'beh-dih: :a 'ye :a-a' ti-a' klehkpeh-' 'duo: 'de Nyorsoa bo :wlu-eh bo-: 'dekorn: or-a' tubo-wlu:⧾ :po-eh bo-:.

⁵:Yeh :Yusu'-a'a: dboo-nyor⧾ :za-a deh :dao', :yee' eh 'pehn-dih: or-a' dhih 'jeh-' :po-nyor⧾-a' klehkpeh-a' :porluh⧾-: dih, 'de on :za Timi' :or po-a :Yusu'-a' dhih dhih 'jeh-' 'gabaa, 'de :or 'yi-dih:-a Gban 'i :ne :Zulu dih. 'De on :za Felor'-: 'Plorkior-: 'Nikanor-: :Timor'-: :Pame'na-: 'dekorn: 'Nakorlor-: :or 'wluh-a :gwlor an 'da-dih-a 'Antior 'di, 'de :or 'kpa-a :Jueh'-nyor⧾-a' Nyorsoa-deh-'.

⁶'De on kpa nyor⧾-kpalu⧾ :meheh' 'sorn :dao' on :za-a, 'de :Yusu'-a'a: dboo-nyor⧾ bo. 'De dboo-nyor:⧾ :dao', on tba-uh son⧾ ken dih, 'de on :wlu 'de Nyorsoa bo, 'do an-a' dhih bo.

⁷:Eh 'wluh-a 'o ti :dao' 'di, :yee' Nyorsoa-a' wlu-a mu 'dlu bo 'weh :chio'lo:. :Yee' :Yusu'-a' klei' :zi-nyor:⧾ :on :ne-a :Julu'slehn, an 'kpuhba ken dih, :bhuh :bhuh. 'De mor Nyorsoa-a' 'slaa: :za-nyor:⧾ :dhulu', mo-: po :Yusu'-a' dhih dhih 'jeh-' :ke.

⁸:Yee' Nyorsoa po Timi' mla :dhulu' bo. Eh-: no-eh, 'de or 'yi-dih: 'kpih-' dih, or no nyor⧾ 'di dih 'ma-dih-deh:⧾ :klaba'⧾-: 'dekorn: nyor⧾ 'i :to-dih-deh:⧾ :klaba'⧾-: 'de nyor⧾ 'klu-'.

⁹:Yee' nyor⧾-kpalu:⧾ :noo' :on no-a :Jueh'-nyor⧾-a' kpor :on 'wluh-a 'de 'di :gweh-dih-sla: an 'da-dih-a Nyor⧾ :on se-a 'de 'gegeye :ne :neheh' 'di, 'de :on no-a :Jueh'-nyor:⧾ :on 'wluh-a :gwlor⧾ an 'da-dih-a :Sali'na-: 'dekorn: 'Ehlezan'dla-: 'de :on :korn-a :noo' 'wluh-a :Sele'sia-bluhba-: 'dekorn: 'Esea-bluhba-: ken, mo-: 'kpa 'o Timi' bo dhobo: 'da.

¹⁰Jorwor: Nyorsoa-a' :Zulu 'nyi Timi' :toror' :yor :mor or :wlu-a, :yee' nyor se-or 'i :nyna-eh 'beh-dih:.

¹¹:Yeh eh no :ao', :yee' on :pa-dih: nyor⧾ 'zorn dih, on 'nyi-uh 'wlii:, on 'ye sih 'tmo, on 'ye :ao', :A 'worn-ih' :ka Timi' :wlu-dih:-a :Mose'-a' 'tele'-: 'dekorn: Nyorsoa-: 'bhun dih 'gabaa.

¹²Deh on :za-a-', eh-: no-eh, 'de nyor⧾ 'bili: 'de Timi' ya, :korn mor 'bluhba: :korn-nyor⧾-: 'dekorn: nyor⧾ 'tele' :torne-nyor⧾-:. 'De on kpon Timi', on kpa-or 'o :Jueh'-nyor⧾-a' zabe: :zi-nyor⧾ ybei'.

¹³:Yee' on :ya 'de nyor⧾ :noo', mo-: 'tmo-dih: Timi' sih ken dih, on 'da, 'Yu :daa, 'do ti-a' klehkpeh bo, or wlu-dih Nyorsoa-a' gban 'i :ne-sla: :daa-: 'dekorn: :Mose'-a' 'tele'-: 'bhun dih.

¹⁴:Yee' on :wlu-' :neheh', on 'dae:, :A 'worn or-a' wlu, or 'dae:, :Yusu' :dao' :or 'ti-a 'Nazla :dee', or mu Nyorsoa-a' 'sla :daa ya :gba. 'De mor or mu :a 'bli-deh⧾-a' klehkpeh dih :gweh, :en :Mose' 'nyi :a-uh.

¹⁵:Yeh nyor⧾ :dao', on :za-a deh⧾ :dao', :yee' nyor⧾-a' klehkpeh :on :dhe-a dih 'de :Jueh'-nyor⧾-a' zabe: :zi-gbu 'zorn, an-a' 'yli-a' klehkpeh, en :ne 'de Timi' ya. :Yeh an pobo-or ya 'dhuan, :yee' or-a' 'yuba gweh 'enjor-a' 'yuba:, 'de on 'yli-e.