Read Eastern Krahn Noo-deh:⧾ 8 Bible Online

Noo-deh:⧾ 8 - Eastern Krahn bible

Noo-deh:⧾ 8

¹:Soror'-a' 'jeh :dao', or 'worn-dih: Timi'-a' 'meheh'-dhih 'weh :ke. :Yee' 'do 'we-eh-a' 'jeh :dao' 'di, nyor⧾ 'kpa 'o 'chore-nyor⧾-a' 'kle 'ye-dih: 'da 'weh 'gabaa, 'de :Julu'slehn. Eh-: no-eh, 'de 'chore-nyor⧾-a' klehkpeh gboba: dih, on gweh :Judi'a-bluhba-: 'dekorn: Sehmeh'la-bluhba ken dih 'dlu. Jorwor: :Yusu'-a'a: dboo-nyor⧾ :due', mo-: :se-' ple, on :se-' dih gboba:.

²:Yee' Nyorsoa-nyor:⧾ :noo' :on 'sleh-a 'i, mo-: nma-dih: Timi' dih, 'de on 'vin, on 'zlu or-a' dhih 'gabaa.

³:Yeh deh⧾ :daa, en mu-a 'dlu bo, :yee' :Soror' vorn or 'ye 'chore ya gba. Or pa 'gbu⧾ 'di dih, or :za 'de :Yusu'-a' dhih 'jeh-' :po-nyor:⧾, 'nynor⧾-kpao'⧾-: 'dekorn: nyor⧾-kpalu⧾-: 'de or 'kla-uh dih, or po-uh :kasue 'di.

⁴:Yee' :Yusu'-a' dhih 'jeh-' :po-nyor:⧾ :on gboba:-a dih, 'de :on mu-a deh⧾-' dih, deh⧾ on :ne-a dih, :yee' an po Nyorsoa-a' tubo-wlu:⧾ 'jeh 'de nyor⧾ bo.

⁵:Yee' Felor' mu 'de Sehmeh'la-bluhba-a' :gwlor :klaba' 'di, 'de or :za Nyorsoa-a' 'taan'-yu-a' dhih-' 'de mor.

⁶:Gwlor-nyor:⧾ :dhulu' :on :ne-a 'de, Felor' :wlu-a 'de bo, on to-or :dou'⧾ bo deh 'jeh. Deh no-eh, nyor⧾ 'i :to-dih-deh:⧾ or no-a, me-: on 'ye.

⁷'Kwla 'ye-dih-deh:⧾, me-: po 'geh⧾, en 'wluh 'o an-a' :dha :dhulu' 'de. 'De 'tiei-a' 'meheh'-nyor:⧾ :dhulu'-: 'dekorn: :nea-nyor:⧾ :dhulu'-: on 'puh.

⁸:Yee' 'do eh-a' dha, :gwlor-nyor⧾-a' klehkpeh :on :ne-a 'o :gwlor :dao' 'di, an no 'mona: 'gabaa.

⁹:Yee' 'do ti :en zi-a 'di, 'yu :due' an 'da-dih-a Samor', :or 'ti-a 'o gwlor-a' 'jeh :dao' 'di, or-: no 'ylaa: 'yla⧾ :dee', 'de or 'ma-dih: 'de nyor⧾ :ne-a 'o 'di dih. :Yee' or 'beh-dih: or-a' 'jeh-: 'i, or 'da-dih or-a' 'jeh nyor :klaba'.

¹⁰:Yee' nyor⧾-a' klehkpeh :on :ne-a 'o gwlor-a' 'jeh :dao' 'di, 'nyne :korn-nyor⧾-: 'dekorn: nyor⧾ :on se-a 'nyne :korn-: an-a' klehkpeh, an to-or :dou'⧾ bo 'gabaa, on 'da, 'Yu :daa, or-: 'dhu Nyorsoa-a' 'kpih an 'da-dih-a 'Kpih :klaba'⧾-'.

¹¹Deh no-eh, 'de on zi-a 'o or klei', eh-: 'dhu, 'ylaa: 'yla⧾ or no-a, me-: 'ma-dih: 'de on 'di dih, 'do ti :dhorno'⧾ 'di.

¹²Jorwor: :yeh Felor' po-a Nyorsoa-a' nyor⧾ wlu 'ken :korn-eh-a' tubo-wlu:⧾ 'jeh, 'de or :za-a :Yusu' 'Klae-a' 'nyne-a' dhih-', :yee' on po-ih' dhih 'jeh. :Yeh on po-ih-a dhih 'jeh-', :yee' 'nynor⧾-kpao'⧾-: 'dekorn: nyor⧾-kpalu⧾-: an-a' klehkpeh, on :po 'ni 'dlu.

¹³Samor'-a' 'jeh 'yor-eh po-ih' dhih 'jeh :ke, 'de or :po 'ni 'dlu. :Yee' :dha klehkpeh Felor'-a mu-a :mu, :yee' or zi 'o or klei' 'weh. Or-a' :porluh 'ma-', 'do nyor⧾ 'i :to-dih-deh:⧾ :klaba'⧾-: 'dekorn: deh⧾ :kolu'⧾-: :en :no-eh bo.

¹⁴:Yee' :yeh :Yusu'-a'a: dboo-nyor:⧾ :on :ne-a :Julu'slehn, on 'worn-ih'-a :ka nyor⧾ :on :ne-a Sehmeh'la, on kpon-a Nyorsoa-a' wlu dih, :yee' on dbo :Piteh'-: 'dekorn: :Jororn'-: 'weh 'de on bo.

¹⁵:Yeh on 'si-a dih, :yee' on :wlu 'de Nyorsoa bo 'weh 'do an-a' dhih bo, on 'ye Gban 'i :ne :Zulu 'ye.

¹⁶Deh no-eh, Gban 'i :ne :Zulu 'see 'o an-a' nyor :due' ken yi. 'De :Gwlor :baa' :Yusu'-a' 'nyne 'di, 'do :wor on :po-dih: 'ni 'dlu 'klein'.

¹⁷:Yee' :Piteh'-: 'dekorn: :Jororn'-: on tba-uh son⧾ ken dih. 'De nyor⧾ :dao', on 'ye Gban 'i :ne :Zulu.

¹⁸:Yee' :yeh Samor' 'ye-a nyor⧾, 'de an 'ye-a Nyorsoa-a' :Zulu, ti dboo-nyor:⧾ :dao', on tba-uh-a son⧾ ken dih, :yee' or 'nyi-uh 'wlii:, or 'da,

¹⁹A 'nyi 'on 'kpih :dao' :ke, 'de :mor 'on tba nyor son⧾ ken dih, 'de or 'ye Gban 'i :ne :Zulu 'ye :ke.

²⁰:Yeh or 'da :ao', :yee' :Piteh' :wlu-' 'de or bo, or 'dae:, 'Nyi mor-: 'dekorn: :an-a'a: 'wlii-: a mu 'de 'ku 'bli neh-'. Deh no-eh, :mor :on :taa 'ye :dee', :yee' :on 'da :an mu Nyorsoa-a' 'nyii'-deh 'wlii :dhen-dih: :e?

²¹:On se deh-: 'dekorn: 'for-: 'ble 'noror :a-a'a: :koan: :daa 'di. Deh no-eh, :an-a' :porluh se 'i 'sleh 'do Nyorsoa ybei'.

²²'Tali: :an-a' kplen-zon⧾ dih, 'de :on 'ye 'de :Gwlor :baa' bo :wlu. Or mu deh-zon: :eh :ne-a 'o :an-a' :porluh ken, en-' dhih bo 'ma-dih: 'bla.

²³'An 'ye :gwlehehn'-zon:⧾ :ne-a 'de :on 'di 'weh. 'De :on :ne 'o deh⧾-zon⧾-a' 'gegeye 'zorn.

²⁴:Yee' Samor' :wlu-' 'de :Piteh'-: 'dekorn: :Jororn'-: bo, or 'dae:, A :korn 'gen. A :wlu 'de :Gwlor :baa' bo, 'de deh⧾ :daa a 'da-a, en-' deh-beh-deh-beh :ne 'o 'on bo yi.

²⁵:Yee' :yeh :Piteh'-: 'dekorn: :Jororn'-: on zela:-a :Gwlor :baa'-a' dhih ken dih, 'de on po-a tubo-wlu:⧾ :en kor-or 'i, :yee' on mu :Julu'slehn de. :Yeh an mu-a de, :yee' an po Nyorsoa-a' tubo-wlu:⧾ 'jeh 'de Sehmeh'la-bluhba-a' :gwlor⧾ :nyene' :dhulu' 'di dih, 'do :gwie 'i.

²⁶:Yee' :Gwlor :baa'-a' 'enjor :due', or-: :wlu 'de Felor' bo, or 'dae:, :Sorn-', :on 'ye :gwie: :eh mu-a 'de 'yluh-a' 'kwla 'wluh-dih: 'da-a' kona-for bo kpa, :eh 'wluh-a :Julu'slehn, 'de :eh :yi-dih:-a 'de :bhehneh'-bluhba ken, :eh mu-a :gwlor an 'da-dih-a 'Geza, :on 'ye-eh kpa.

²⁷:Yee' Felor' 'kpa 'o 'weh. :Yeh or mu-a, :yee' 'Itio'pa-nyor⧾-a' 'kwi :klaba', :or :korn-a 'de 'keen-nynor-kpao' :or :ne-a 'Itio'pa-bluhba ken, or-a'a: 'wlii-a' klehkpeh-a' dih :dhe 'da wlu bo, or-: :ne 'o :gwie: :dao' 'i. Or 'wluh Nyorsoa :weheh' :za 'da 'de :Julu'slehn, 'de or mu or 'bli de.

²⁸Or :dhe dih 'do deh :eh 'ble-a buh⧾ :nyieh, 'de :soo'o⧾-a jli-a ken, 'de or mu or 'bli, or zlo Nyorsoa-a' wele-eh: :po-nyor: :Azaya'-a' 'chlee-deh or 'chle-a.

²⁹:Yee' Nyorsoa-a' :Zulu zela: Felor' :gwluhuh', on 'dae:, Mu 'de deh :dao', 'yu :dao' or :ne-a 'de 'di bo, :on 'ye-eh' 'worn dih :na-dih:.

³⁰:Yee' Felor' ple-', or mu 'de 'weh, 'de or 'worn 'yu :dao', or-a' wlu, or zlo Nyorsoa-a' wele-eh: :po-nyor: :Azaya'-a' 'chlee-deh: or 'chle-a. 'De Felor' dhele-or dih, or 'da, Deh :an zlo-a, :an 'worn-eh dih :naa :e?

³¹'De or 'da, :Kaa 'an mu eh-a' dih 'worn-eh :no :eh? :Mor eh 'dhu nyor zela-eh ken dih 'noror 'on bo, 'de 'on 'ye-eh dih 'worn. :Yeh or 'da :ao', :yee' or 'da Felor' 'weh, 'de or bo deh 'di.

³²:Yee' deh or zlo-a 'de Nyorsoa-a' 'chlee-deh: :dao' 'di, eh-: :dhe dih, eh 'da, Or gweh 'blae' an kpa-a 'dba 'da. 'De or gweh 'blae'-yu: :eh-a' 'worn-a, :eh-a' :wlu-a, :mor on :taa 'o eh-a' 'pibi chehn. 'Ka-: or :ne :ke, or :se-' :wlu.

³³On :no-dih-or dhen, 'de on zi or-a' zabe 'de :bhuli' ka 'di. Or se 'nynuu-a' 'nynuu 'ble, :on :korn-a dhih nyor⧾ 'ye-a' :za. Deh no-eh, or-a' :febeh' :jla-' 'dlu, dha yao 'zorn.

³⁴:Yeh or gweh-a deh :dao', eh-a' zlo-a' 'i, :yee' or dhele: Felor'-: dih, or 'dae:, Zela: 'on :gwluhuh', or-a' 'nyne Nyorsoa-a' wele-eh: :po-nyor: :daa, or 'da :eh? Or-a' 'jeh 'yor-eh :e? :Ae' nyor :noror' :oo' ke?

³⁵'De Felor' tba 'de Nyorsoa-a' 'chlee-deh: :dao' bo dih, 'de or po tubo-wlu:⧾ 'jeh :en kor-a :Yusu' 'i 'de or bo.

³⁶:Yeh an mu-a, 'de deh :dao', eh kpa-uh-a, :yee' on :yeh-dih: 'ni ken. 'De 'kwi :klaba' :dao', or :wlu 'de Felor' bo, or 'dae:, 'Ni :wor :dhe dih. :Eh 'ye 'on 'yi kan 'do 'ni 'dlu :po-eh bo :eh? [

³⁷'De Felor' 'da, :Mor :on po-eh dhih 'jeh-', 'do :an-a' :porluh⧾-a' klehkpeh bo, :yee' eh-: 'o. :Yee' :an mu 'ni 'dlu :po-eh:. 'De 'yu :dao', or :wlu, or 'dae:, 'On po-eh-' dhih 'jeh, :ka :Yusu' 'Klae 'dhu-a Nyorsoa-a' 'yu-'.]

³⁸:Yee' 'kwi :klaba' :dao', or zela: 'yu :or na-dih-a deh on :ne-a 'de 'di :gwluhuh', or 'ye-eh' dih :nyna-dih:. 'De or :nyna-dih-eh dih. :Yee' Felor'-: 'dekorn: 'kwi :dao'-: on 'si-: 'zorn, on mu 'o 'nior. 'De Felor' po-or 'ni 'dlu 'do 'nior.

³⁹:Yeh on 'wluh-a 'o 'nior, :yee' 'yli :a bla-a 'i, :Gwlor :baa'-a' :Zulu 'duo: Felor' 'weh, 'de on kpa-or. 'Kwi :klaba' :dao', or :se-' Felor' 'ye :neheh'. :Yee' or 'kpa or-a'a: :gwie-: 'i :ke, 'de or mu or 'bli, or no 'mona.

⁴⁰:Yee' :yeh on no :ao', 'de Felor'-a mu-a or-a' 'jeh 'ye-:, :yee' or :ne :Azo'ta:, 'de or na, or po Nyorsoa-a' tubo-wlu:⧾ 'jeh gwlor⧾-a' klehkpeh 'di dih. Eh-: or no :noo:, 'de or 'si 'Sehsali'a dih.