Read Eastern Krahn Noo-deh:⧾ 9 Bible Online

Noo-deh:⧾ 9 - Eastern Krahn bible

Noo-deh:⧾ 9

¹:Yee' :yeh deh⧾ :daa, en mu-a 'dlu bo, :yee' :Soror'-a 'da or mu 'Klae-a' klei' :zi-nyor⧾ 'dba-: :gbor :gbor. 'De or mu 'de Nyorsoa-a' 'slaa: :za-nyor⧾-a' nyor :klaba' bo,

²or 'ye-or 'chlee-deh 'nyi :eh 'ye-eh no, 'de nyor⧾ 'ye-or yubo:, 'de or 'ye 'de :Jueh'-nyor⧾-a' 'di :gweh-dih-sla⧾ 'zorn dih pa, 'de :gwlor an 'da-dih-a :Dama'kor 'di. :Mor or 'ye nyor, :or zi-a 'o :Gwlor :baa'-a' :gwie klei' de mor, or 'ye-or' kpon, or 'ye-or' :Julu'slehn kpa, or 'ye-or' :kasue 'di po, 'nynor⧾-kpao'⧾-: 'dekorn: nyor⧾-kpalu⧾-:.

³:Yee' :Soror' 'kpa 'i :gwie:, 'de or mu. :Yeh or mu-a, 'de or 'koan'-dih-a :Dama'kor dih, 'de or mu-a 'ye-:, :yee' zorn-pli:, me-: 'wluh 'de yai', :en 'si 'de or 'yli dih, :en 'dleh-or.

⁴:Yeh en no :ao', :yee' or 'ga-: dih 'do 'bluhbor. :Yee' or 'worn wlu, mo-: 'da, :Soror', :Soror', :eh :korn dhih :an 'ye-dih 'on 'kle :eh?

⁵'De or 'da, :Gwlor :baa', :an-a' 'nyne :eh? 'De wlu :dao', on :za-eh: de :neheh', on 'da, 'Mor :Yusu' :oo', :an 'ye-dih-a 'kle.

⁶Jorwor: :sorn-', :on 'ye :gwlor-' dih 'si. 'Do :wor deh :on :korn :on 'ye-a' no, an mu-eh :on :gwluhuh' zela-dih:.

⁷:Yeh eh no :ao', :yee' nyor⧾ :on :ne :Soror'-a mu-a :dee', on :nyna dih, on se :wlu-a' 'beh-dih:. On 'worn wlu :daa 'weh, jorwor: an-a' 'worn, an-a' 'ye nyor.

⁸:Yee' :Soror' :sorn-' 'weh, or 'wluh 'o 'bluhbor, 'de or behn-dih: 'yli, jorwor: or-a' 'ye dih. Eh-: no-eh, 'de on kpon or-a' son dih, on kpa-or :Dama'kor.

⁹:Yee' 'do 'we taan 'di, or :se-' dih 'ye. 'De mor or :se-' dii-deh-: 'dekorn: 'ni-: 'na.

¹⁰:Yee' 'de :Dama'kor, 'do :wor :Yusu'-a' klei' :zi-yu :due' an 'da-dih-a 'Anenaya' or :ne. Or-: :korn 'yli-eh 'kpa deh 'i, 'de :Gwlor :baa' :wlu 'de or bo, or 'dae:, 'Anenaya'. 'De 'Anenaya' 'da, :Gwlor :baa', 'mor-: :dhe dih.

¹¹'De :Gwlor :baa' zela-or :gwluhuh', or 'da, :Sorn-', :on 'ye 'kpa an 'da-dih-a 'Yi 'sleh-kpa ken mu, 'de :Juda' 'bli 'gbu. :Mor :on mu, :yee' dhele: 'yu :or 'wluh-a 'Tasor, an 'da-dih-a :Soror', or-a' dhih dih. 'Do :wor or :ne, or wlu 'de Nyorsoa bo.

¹²'De :Yusu' 'da :neheh', :Soror'-a' 'jeh :ke, or-a' 'yli-eh 'kpa deh 'i, 'de or 'ye 'yu an 'da-dih-a 'Anenaya', or 'yle, 'de or tba-or son⧾ ken dih, or 'ye dih 'ye :neheh'.

¹³:Yee' 'Anenaya' 'dae:, :Gwlor :baa'. Nyor⧾ :dhulu', mo-: zela: 'on, 'kulu-deh:⧾ :dhulu' or no-a :an-a'a: nyor⧾ 'yi dih, 'de :Julu'slehn en-' dhih, 'on :gwluhuh'.

¹⁴'De mor deh :korn-a dhih or yi-a dha :Dama'kor, eh-: :dhe dih, Nyorsoa-a' 'slaa: :za-nyor:⧾ :klaba'⧾ 'nyi-or 'tele' or 'ye nyor⧾ :an mu-a :an-a' :weheh' :za kpon.

¹⁵:Yeh or 'da :ao', :yee' :Gwlor :baa' 'dae:, Mu. 'On gan-or', or 'ye 'an-a: 'bhoi-yu no, or 'ye-eh' no, 'de nyor⧾ :on :se-a :Jueh'-nyor⧾-: 'keen-boi'-: 'dekorn: 'Ezlea-nyor⧾-: on 'ye 'an 'nyne yubo:.

¹⁶'An 'jeh 'yor-eh:, 'an mu-or deh⧾-a' klehkpeh :gwluhuh' zela: :ka or mu-a 'kle 'ye-: 'do 'an dhih bo.

¹⁷:Yeh or 'da :ao', :yee' 'Anenaya' mu-', 'de or pa 'de 'gbu :on :korn-a 'di :Soror' :ne-a. 'De or tba-or son⧾ ken dih, or :wlu, or 'da, 'An 'de-di' :Soror', :Gwlor :baa' :Yusu' :or 'wluh-dih:-a :on 'i 'do :gwie 'i, ti :an yi-a 'de, or-: dbo 'on 'noror :on bo, :on 'ye dih 'ye :neheh', 'de Gban 'i :ne :Zulu 'ye :on-' dih 'yi-dih:.

¹⁸:Yee' 'do :dha :due' :dao', deh⧾ :en gweh-a zimi-a' 'kon⧾, me-: 'wluh 'de :Soror' 'yli, 'de or 'ye dih :neheh'. 'De or :sorn-', 'de 'Anenaya' po-or 'ni 'dlu.

¹⁹'De :Soror' di deh. :Yee' or-a' 'kpih yi 'o or 'bhun-: de :neheh'. :Yee' :Soror' :ne 'o :Yusu'-a' klei' :zi-nyor⧾ bo 'weh 'do 'we-bei 'di, 'de :Dama'kor.

²⁰:Yeh eh 'wluh-a 'o, :yee' 'do :dha :due' :dao', or mu :Jueh'-nyor⧾-a' 'di :gweh-dih-sla⧾ 'zorn dih, 'de or 'kpa tubo-wlu:⧾ :po-eh ken 'de mor, :ka :Yusu' 'dhu-a Nyorsoa-a' 'Yu-'.

²¹:Yeh or no :ao', :yee' eh :florn-dih: nyor⧾-a' klehkpeh :on 'worn-a or-a' wlu-: worn, 'de an no, Eh :se 'yu :or :ne-a :Julu'slehn, :or 'ye-dih-a nyor⧾ :an 'da-a :Yusu'-a' 'nyne 'kle 'gabaa :e? Eh :se nyor⧾-a' 'jeh :dao', an-a' dhih, or :se 'de yi, or 'ye-uh kpon, or 'ye-uh 'de Nyorsoa-a' 'slaa: :za-nyor:⧾ :klaba'⧾ bo kpa :e?

²²Jorwor: :Soror'-a' Nyorsoa-a' tubo-wlu:⧾ :po-eh 'kpa-: ken, 'de en :ne 'kpih ken. :Yee' :Jueh'-nyor:⧾ :on 'ti-a :Dama'kor, on se :wlu-a' 'beh-dih:. Deh no-eh, tubo-wlu:⧾ :Soror' po-a, en za-eh: gbor :ka :Yusu' 'dhu-a Nyorsoa-a' 'taan'-yu-'.

²³:Yeh 'we :dhulu' :zi-dih:-a 'o ken dih, :yee' :Jueh'-nyor⧾ 'dhu dhih, on 'ye-or 'dba.

²⁴Jorwor: :yee' or yubo-eh 'i :ka on 'dhu-a dhih, on 'ye-or 'dba. 'Gwie-: :glaa'e-: an fuo-or 'ken 'do gwlor-a' gba-dih-gba worn 'i, on 'ye-or 'dba.

²⁵:Yee' 'gwie-we-eh :due', :yee' or-a'a: bo :na-nyor⧾ po-or 'de :too' 'di, 'de on :ya-dih-or gba-dih-gba 'dlu, on 'si-dih-or dih.

²⁶:Yee' :Soror' mu :Julu'slehn:, 'de or 'bhorn :ka or 'ye-a' no, 'de or 'ye-a 'de :Yusu'-a' klei' :zi-nyor⧾ 'nyne-' 'kpa. Jorwor: an-a' klehkpeh, an ple-or'. On :se-eh' dhih 'jeh-' po :ka or 'dhu-a :Yusu'-a' klei' :zi-nyor 'jeh ka.

²⁷:Yeh eh :ne :ao', :yee' 'yu :due' an 'da-dih-a :Bana'ba, or-: kpa-or 'de :Yusu'-a'a: dboo-nyor⧾ bo. 'De or zela-uh :gwluhuh' :ka :Soror' 'ye-a :Gwlor :baa' 'do :gwie 'i, 'de :Gwlor :baa' :wlu-a 'de or bo, 'dekorn: :ka or po-a Nyorsoa-a' tubo-wlu:⧾ 'de :Yusu'-a' 'nyne 'di, 'de :Dama'kor, 'de :gwluhuh' :ku ka 'di.

²⁸:Yee' :Soror' :ne 'o on bo 'weh 'de :Julu'slehn. 'De or 'kpa-uh bo, an na :Julu'slehn-gwlor ken dih, an po Nyorsoa-a' tubo-wlu:⧾ 'de :gwluhuh' :ku ka 'di, 'de :Gwlor :baa'-a' 'nyne 'di.

²⁹:Yee' :Soror'-a wlu 'de :Jueh'-nyor⧾-a' :yuh :an po-a 'Glii-wlu bo, 'de on :ne or dhobo. Jorwor: nyor⧾ :dao', an vorn-' on 'ye-or' 'dba.

³⁰Jorwor: :yeh or-a' 'Klae :de-di'-boi' 'worn-a deh :daa, :yee' on za-or 'o :gwlor-' 'weh, 'de on kpa-or 'Sehsali'a, on dbo-or 'Tasor.

³¹:Yeh on za-or 'o :gwlor-', :yee' 'chore-nyor:⧾ :on :ne-a :Judi'a-: :Galali'i-: 'dekorn: Sehmeh'la-: nyor⧾ 'bor an-' 'kle 'ye-dih-eh 'weh. 'De on 'ble :Gwlor :baa'-a' :fano: :ple-eh. Gban 'i :ne :Zulu: mo-: 'nyi-uh 'kpih, 'de an 'kpuhba ken dih.

³²:Yee' :yeh :Piteh'-a mu-a deh⧾-' dih, :yee' or kpa 'we 'de Nyorsoa-nyor:⧾ :on :ne-a :gwlor an 'da-dih-a 'Leda bo,

³³'do :wor or 'ye-dih: nyor-kpalu :due' an 'da-dih-a :Ehni'a, :or :korn-a 'tiei 'meh-a, 'de :or zi-a 'o 'bluhbor-zon⧾ :meheh' na.

³⁴:Yee' :yeh :Piteh' 'ye-or, :yee' or :wlu-' 'de or bo, or 'dae:, :Ehni'a:, :Yusu' 'Klae 'puh-dih: :on 'weh. :Sorn-', :on 'ye :an-a'a: :sleheh' 'fean'. :Yee' 'do :dha :due' :dao', :Ehni'a :sorn-' 'weh.

³⁵:Yee' nyor⧾-a' klehkpeh :on 'ti-a 'Leda-: 'dekorn: :dha an 'da-dih-a 'Sehlor-: :or 'beh-dih:-a :gwluhuh', :yeh on 'ye-a deh :eh :no-eh, :yee' on 'bili:-'-: dih, 'noror :Gwlor :baa' bo.

³⁶:Yee' 'de :gwlor an 'da-dih-a 'Japa 'di, 'do :wor 'nynor :due' :ne :or zi-a 'o :Yusu' klei'. Or-a' 'nyne :wor :Tabi'ta:. ('De mor or-a' 'Glii-nyne :wor 'Dorkor:, :eh :bleh-dih:-a 'i kweh.) 'Nynor :dao', or no deh⧾ 'jeh :ne 'do ti-a' klehkpeh bo, 'de or 'kpa nyor⧾ :on se-a deh-a' :za-da 'ble bo.

³⁷:Yee' 'do ti-a' 'jeh :dao' 'di, 'do :wor 'o, or kormu-dih:, 'de or 'meh. :Yeh or 'meh-a, :yee' on :dle or-a' 'ku 'weh, 'de on 'pehn-dih-uh dih 'de :chuu: :on :ne-a 'de 'gbu-a' yai' 'di.

³⁸:Yee' 'Leda-gwlor se 'Japa-gwlor bo dih :tehn-dih:. :Yee' :yeh :Yusu'-a' klei' :zi-nyor:⧾ :on :ne-a 'Japa, on 'worn-ih'-a :ka :Piteh' :ne-a 'Leda, :yee' on dbo nyor⧾-kpalu⧾ 'sororn' 'de or bo, on 'dhu-uh tubo-wlu⧾ worn, on 'dae:, :Piteh', :on :korn 'gen. 'Dhobo:, yi 'noror :a bo.

³⁹:Yeh nyor⧾ 'sororn' :dao' on dbo-a, on zela:-a :Piteh' :gwluhuh', :yee' or :ne on mu-'. :Yeh or 'si-a :gwlor-' dih, :yee' on kpa-or 'de :chuu: :dao' :on :ne-a 'de 'gbu-a' yai' 'di. :Yee' :dhoba: 'nynor⧾-a' klehkpeh, on :nyna dih 'do or 'bhun, 'de an 'vin. 'De an torne-or 'wla⧾-: 'dekorn: paa-tiei: :nee'-: or tba-a 'do on bo, ti or :ne-a 'kmo.

⁴⁰:Yee' :Piteh' po 'o an-a' klehkpeh 'zorn 'weh, 'de or bla 'koor-dlu⧾ 'yi glu, or :wlu 'de Nyorsoa bo. 'De or 'bili: 'de 'nynor-a' 'ku bo, or 'dae:, :Tabi'ta:, :sorn-'. :Yeh or 'da :ao', :yee' :Tabi'ta behn-dih: 'yli 'weh. :Yeh or 'ye-a :Piteh', :yee' or :dhe dih.

⁴¹'De :Piteh' 'kpa-or bo, or kpon or-a' son dih, 'de or 'duo-or ya-', or 'ye dih :nyna. :Yeh or no :ao', :yee' or 'da dhih 'jeh-' :po-nyor⧾-a' klehkpeh-: 'dekorn: :dhoba: 'nynor⧾-: 'weh, 'de or :ne 'kmo, or za-or 'kwla 'de on bo.

⁴²:Yee' deh :daa :eh :no-eh, eh-a' 'nyne gweh 'Japa-gwlor-a' klehkpeh 'dlu. Eh-: no-eh, 'de nyor⧾ :dhulu' po :Gwlor :baa'-a' dhih dhih 'jeh-'.

⁴³:Yee' :yeh eh zi-a, :yee' :Piteh' zi 'Japa 'we :dhulu', 'de 'yu an 'da-dih-a Samor', 'de or 'bli 'gbu, :or no-a deh⧾-ku⧾-a' :koan.