Read Eastern Krahn Wloon-chlee-deh: 1 Bible Online

Wloon-chlee-deh: 1 - Eastern Krahn bible

Wloon-chlee-deh: 1

¹'Mor :Poror' :or no-a :Yusu' 'Klae-a' 'bhoi-yu, 'mor 'ye a :mor 'Wloon-nyor⧾. Nyorsoa 'da 'on 'weh 'on 'ye :Yusu'-a'a: dboo-nyor no, 'de or gan 'on 'weh, 'on 'ye or-a' tubo-wlu:⧾ 'jeh po.

²Tubo-wlu:⧾ 'jeh :daa, or po-ih wlu :dhama'-' 'weh :zai', 'de en :yi-dih: or-a' wele-eh: :po-nyor⧾-', 'de on 'chle-ih 'de or-a' gban 'i :ne-chlee-deh 'di.

³En kor or-a'a: 'Yu 'i, :or no-a :Debe' 'di-a' 'yu, 'de yau: ka 'di.

⁴:Yee' Gban i :ne :Zulu: mo-: :to-dih-eh nyor⧾ 'i, 'de an-a' 'kpih 'di, :ka :a-a' :Gwlor :baa' :Yusu' 'Klae 'dhu-a Nyorsoa-a' 'Yu-', 'do or-a' nma-dih-deh 'di 'wluh-eh bo.

⁵Nyorsoa :yi-dih-or-', 'de or po 'on mla bo, 'on 'ye or-a'a: dboo-nyor no, 'do or-a' dhih bo, 'de eh 'ye-eh' no, nyor⧾ :on 'wluh-a 'bluhba⧾-a' klehkpeh ken dih, on 'ye or-a' dhih dhih 'jeh-' po, 'de on 'ye 'o or-a' 'tele' dih dhe.

⁶'De mor, a :ne 'de nyor⧾ :dao' 'nyne-' 'weh :ke, :yuh Nyorsoa 'da-a, on 'ye-a' 'de :Yusu' 'Klae bo :korn.

⁷'An 'chle deh :daa 'de a-a' klehkpeh :or :ne-a 'de 'kwi :gwlor :klaba' an 'da-dih-a 'Wloon 'di bo, :yuh Nyorsoa :ybeh-a, 'de or 'da-a, :on 'ye-a or-a'a: nyor⧾ no. Mla-: 'dekorn: wlu-' dih 'worn-eh-: 'do a bo, :en 'wluh-a 'de Nyorsoa :or no-a :a :Baa'-: 'dekorn: :Gwlor :baa' :Yusu' 'Klae bo.

⁸:Zai' 'on po 'an Nyorsoa-a' 'zio, 'de :Yusu' 'Klae-a' 'nyne 'di, 'do a-a' klehkpeh-a' dhih bo. Deh no-eh, 'bluhba⧾-a' klehkpeh yobo' po-a 'de :gle 'gbeheh 'di, en 'worn a-a' dhih 'jeh-' :po-eh-a' kuna'⧾ 'weh.

⁹Nyorsoa, :or :korn-a 'bhoi-yu-deh 'an no-a 'do 'an :porluh⧾-a' klehkpeh bo, 'do tubo-wlu:⧾ 'jeh :en kor-a or-a' 'Yu 'i, en-' po-a' bo, or-: no 'an dhih ken dih zela-nyor, :ka 'an po-a 'de a-a' 'nyne, 'do ti-a' klehkpeh bo,

¹⁰:mor 'on :taa 'de or bo wlu. 'De 'an dhele-or dih, or 'ye-eh' ken dih 'worn-dih: or 'ye-eh' no, 'de jorwor: :gwie 'ye 'i kan-dih: 'do 'on bo, 'on 'ye 'de a bo yi :naa.

¹¹Deh-: :korn-a dhih, 'an 'bhorn-a 'on 'ye a 'ye 'gabaa, eh-: 'dhu, 'an 'bhorn :bhorlie'-Nyorsoa-a' :Zulu 'nyi-a 'on, 'on 'ye-eh' no, a 'ye 'for 'ble 'de eh 'di, 'de a 'ye 'kpih ken :ne.

¹²Deh 'an 'da-a, :eh mu-a :a-a' klehkpeh-' :za-dih:, eh-: 'dhu, 'an 'Klae-a' dhih 'jeh-' :po-eh mu-eh :no, 'de a 'ye 'kpih ken :ne, 'de a-a' 'Klae-a' dhih 'jeh-' :po-eh mu-eh :no, 'de 'on 'ye 'kpih ken :ne :ke.

¹³:Yee' 'an 'Klae :de-di'-boi'-a:, 'an 'bhorn a 'ye-eh' 'i yubo:, :ka 'an 'bhorn-a, 'on 'ye-a 'de a bo yi 'do ti :dhulu' 'di, jorwor: deh⧾ :nee', me-: :kpan-dih: 'on :chio'lo:, 'de eh :yeh-dih: ti :daa ken. 'An 'bhorn 'on 'ye 'de a bo yi, a :mor :or :se-a :Jueh'-nyor:⧾, 'de 'on 'ye-eh' no, 'de nyor⧾ 'ye 'Klae-a' dhih dhih 'jeh-' po 'de a 'klu-', :ka 'on no-a eh-a' no-a', 'de nyor⧾ po-a 'Klae-a' dhih dhih 'jeh-', 'de nyor⧾ :on :se-a :Jueh'-nyor:⧾, an-a' :noo' 'klu-' :ke.

¹⁴'On :korn 'on 'ye Nyorsoa-a' tubo-wlu:⧾ 'jeh po :gbor :gbor, 'de nyor⧾ :on yubo:-a 'kwi deh 'i bo-: 'dekorn: :yuh :on se-a 'kwi deh 'i yubo: bo-: :korn mor :yuh :on yubo:-a 'chlee-deh-: 'dekorn: :yuh :on se-a 'chlee-deh yubo:-:.

¹⁵Eh-: :korn dhih, 'an :porluh-a sin, 'on 'ye tubo-wlu:⧾ 'jeh :daa po, 'de a :mor nyor⧾ :on :ne-a 'de 'Wloon bo :ke.

¹⁶:Yee' Nyorsoa-a' tubo-wlu:⧾ 'jeh :daa 'an po-a, en-' :no-dih: 'on dhen, deh no-eh, me-: no Nyorsoa-a' 'kpih, me-: 'puh-dih: nyor⧾-a' klehkpeh :on po-ih-a dhih 'jeh-'. En :korn 'de :Jueh'-nyor⧾ bo :zai', 'de jorwor: en :korn 'de nyor⧾ :on :se-a :Jueh'-nyor⧾ bo :ke.

¹⁷Deh no-eh, en to-dih :a 'i, :ka Nyorsoa no-a nyor⧾ 'yi 'sleh-nyor⧾ 'da-dih-eh 'do or-a' 'jeh ybei'. Nyorsoa-a' nyor⧾ 'yi 'sleh-nyor:⧾ 'da-dih-deh: :daa, eh 'wluh 'de dhih 'jeh-' :po-eh bo 'klein'. Deh :neheh' se 'o :ne. :Ka eh no-a 'chle-eh 'de Nyorsoa-a' 'chlee-deh 'di, eh no-a, Nyor Nyorsoa 'da-dih-a 'yi 'sleh-nyor, 'do or-a' dhih 'jeh-' :po-eh bo, :yee' or-: mu 'kmo-' :ne.

¹⁸:Yee' Nyorsoa 'kpa-' 'chehn 'de or 'bli yai', 'do :gwlor-nyor⧾-a' deh⧾-zon:⧾ :no-eh-: 'dekorn: 'kulu-kplen-a' klehkpeh-: bo. 'De or to-dih-eh :a 'i :naa. Nyor⧾ :dao', an-a' 'kulu-kplen: me-: no-eh, 'de nyor⧾ se dhih-a' 'yor-eh: :en kor-a Nyorsoa 'i yubo:.

¹⁹Nyorsoa 'kpa-dih-uh 'chehn, deh no-eh, deh⧾ :en kor-a Nyorsoa 'i, on 'ye-a' yubo:, en :florn ken dih 'do on bo, deh no-eh, Nyorsoa-a' 'yor-eh: :florn-dih-eh ken dih.

²⁰:Eh 'wluh-a 'o ti Nyorsoa :no-dih:-a 'bluhba, Nyorsoa-a' deh⧾ nyor⧾-a' 'ye-a, :en 'dhu-a or-a' 'kmo :sie-kpih-: 'dekorn: or-a' Nyorsoa-tu-: me-: zela-eh ken dih, nyor⧾-a 'ye-ih' 'de deh⧾ or no-a 'di. Eh-: :korn dhih, 'de :gwlor-nyor⧾ se 'o deh :neheh' 'ble on 'ye 'o :za-dih:.

²¹Keen' :mloror', on yubo: Nyorsoa 'weh, jorwor: an-a' 'nyi-or dhih-a' 'i 'beh-a' :ka nyor⧾ 'ye-a or-a' dhih-a' 'i 'beh-a' 'nyi-a' no, 'de mor an-a' po or-a' 'zio. Eh-: no-eh, 'de an-a' 'dlu 'di dih :na-dih-deh no deh :forbuh, 'de an-a' :bobo: :porluh⧾ :ne 'de :kule-'.

²²An 'da-dih an-a' 'jeh :toror' :korn-nyor:⧾, jorwor: on no :bobo-nyor:⧾.

²³An-a' 'nyi Nyorsoa dhih-a' 'i 'beh-a' :or :se-a 'meheh'-Nyorsoa. Jorwor: an 'nyi-eh' zuu⧾ :en gweh-a :gwlor-nyor: :or mu-a 'meh-: 'de an 'nyi-eh neme-: 'dekorn: nimi⧾-:.

²⁴Eh-: :korn dhih 'de Nyorsoa 'tali-uh dih, on 'ye :vlehehn'-deh:⧾ an-a' :porluh⧾-a sin-a on 'ye-a' no, on 'ye-ih' no. An no dhen-deh:⧾, 'do an-a' yau 'bhun, 'de an-a' 'jeh 'klu-'.

²⁵On 'bor dhih-a' 'yor-eh: :en kor-a Nyorsoa 'i, en-' dhih 'jeh-' :po-eh 'weh, jorwor: deh⧾ :en 'dhu-a sih-', me-: an po dhih 'jeh-'. An-a' :za Nyorsoa :or no-a deh⧾-a' klehkpeh-a' :weheh', jorwor: deh⧾ or no-a, me-: :korn :weheh' an za. Dhih-a' 'i 'beh-a' :korn 'de or bo :ka ti-a mu-a 'dlu-' :tehn. 'Ka-: eh 'ye :ne.

²⁶Eh-: :korn dhih :oo', 'de Nyorsoa 'tali-uh dih, on 'ye an-a' 'bhororn'-deh:⧾, an-a' :porluh⧾-a sin-dih-a bo :en no-a dhen-deh⧾, on 'ye-ih' no. An-a' 'nynor⧾-kpao'⧾ :sloror' :za-dih: kplen :gwliin', 'de an no :yih :en se-a 'de on bo :korn. An 'pehn on 'bei' 'nynor⧾-kpao'⧾ bo.

²⁷Eh-: nyor⧾-kpalu⧾-a no :ke. On 'tali: an-a' kplen on :korn on 'ye-a' no 'do an-a'a: 'nynor⧾ bo-: dih, 'de an-a' :porluh⧾-a sin, on 'ye on 'bei' nyor⧾-kpalu⧾ bo 'pehn. 'De an no dhen-deh⧾ 'do on 'bei' bo. 'De gu-kplen: :dao', on no-a, eh-: no-eh, 'de on :ya an-a' 'jeh 'kle 'ye-eh: on :korn on 'ye-a 'ye 'dlu.

²⁸:Yee' :ka on se-a 'bhorn, on 'ye-a Nyorsoa-a' deh-' dih 'worn 'do an-a' :porluh⧾ ken, :yee' or 'tali-uh-: dih, on 'ye an-a' 'dlu⧾ 'di dih :na-dih-deh:⧾ :en se-a 'o :gwie 'i :ne no, 'de on 'ye deh⧾ on se-a :korn on 'ye-a' no, on 'ye-ih' no.

²⁹:Yee' on 'yi-dih: kplen-zon:⧾ 'doror: 'dor dih, 'kulu-deh⧾-: deh⧾-a' klehkpeh-a' 'klan :korn-eh-: 'dekorn: gu-kplen-:. On 'yi-dih: :gwlehehn'-: nyor⧾ 'dba-eh-: :wlu-a'-: nyor⧾ dih :bo-dih-eh-: 'dekorn: 'galo: :korn-eh-:. 'De an chehn nyor⧾,

³⁰'de an za-dih nyor⧾ deh⧾-zon⧾ 'bhun dih. On 'nyeh Nyorsoa-' 'weh, an po nyor⧾ yaa'e, an 'beh-dih an-a' 'jeh 'i, an po an-a' 'jeh dhih bo, an chehn 'di-ji: on 'ye deh⧾-zon⧾ no, an-a' dhe 'o on 'de-: 'dekorn: on :baa'-: an-a' wlu dih.

³¹On se :gwluhuh' dih :na-dih-dhih :korn, deh on :za-a-', an-a' no-eh, on se nyor-a' :ybeh-eh 'ble, on se :wehlih :korn.

³²Keen' :mloror' on yubo-eh' :ka Nyorsoa-a' 'tele' no-a, nyor⧾ :an mu-a deh⧾ :daa :no, on :bleh-dih-eh 'i, on 'ye-a' 'meh, jorwor: an no deh⧾-a' 'jeh :daa 'weh :chio'lo:, 'de mor an po nyor⧾ :an no-ih-a dhih bo :ke.