Read Eastern Krahn Wloon-chlee-deh: 10 Bible Online

Wloon-chlee-deh: 10 - Eastern Krahn bible

Wloon-chlee-deh: 10

¹:Yee' 'an 'Klae :de-di'-boi'-a:, deh 'an :porluh-a 'bhorn-a 'gabaa, 'de 'an wlu-a 'de Nyorsoa bo, 'do 'Ezlea-nyor⧾-a' dhih bo, eh-: 'dhu on 'ye 'puh-a' :korn.

²'On 'beh-dih: an-a' dhih ken dih zela-eh 'weh, :eh :mor an-a' Nyorsoa-a' :weheh' :za :porluh: mo-: 'beh 'i. Jorwor: an-a' Nyorsoa-a' :weheh' :za :porluh: :dao', on se deh-' dih 'worn-eh 'ble.

³'De on se :ka on 'ye-a' no, 'de Nyorsoa 'ye-uh'-a' 'yi 'sleh-nyor⧾ 'da-dih: yubo:. :Yee' 'do eh-a' dha, an no an-a' 'jeh 'yor-eh-a' :gwluhuh', 'de Nyorsoa 'ye-uh' 'yi 'sleh-nyor⧾ 'da-dih:. :Yee' :ka nyor ne-a 'de Nyorsoa 'da-dih-or 'yi 'sleh-nyor, on :se-eh' 'worn-dih:.

⁴Jorwor: 'Klae, or-: jla :Mose'-a' 'tele' :daa 'dlu. Eh-a' dhih, nyor⧾-a' klehkpeh :on po-or dhih 'jeh-', mo-: Nyorsoa-a mu 'yi 'sleh-nyor⧾ 'da-dih:.

⁵:Yee' :Mose' za-eh' 'weh 'de or-a'a: 'chlee-deh 'di :ka Nyorsoa-a no-a nyor⧾ 'yi 'sleh-nyor⧾ 'da-dih-eh :mor on dhe 'o 'tele' :daa Nyorsoa 'nyi-uh-a dih, or 'da, Nyor :or dhe-a 'o 'tele' :daa, eh-a' klehkpeh dih, :yee' or-: mu 'kmo-' :ne.

⁶Jorwor: :yuh :on :korn-a dhih 'jeh-' :po-eh no-eh, 'de Nyorsoa 'da-dih-a 'yi 'sleh-nyor⧾, on se 'beh-dih: on 'ye :wlu 'do on :porluh⧾ ken, on 'ye :ao', :Or mu 'de Nyorsoa 'bli yai' :mu :eh? (:Eh 'dhu-a, :or mu 'de Nyorsoa 'bli yai' :mu, :or 'ye 'de 'Klae 'noror :a bo 'zorn :ya :eh?)

⁷'De mor, an-a' no, :Or mu 'de :gwlebo :mu :eh? (:Eh 'dhu-a, :or mu 'de 'Klae 'de nma-dih-deh 'di :za :eh?)

⁸Deh an mu-a-' :za, eh-: 'dhu, Nyorsoa-a' tubo-wlu⧾ :ne 'o a bo 'weh. En :ne 'de :on 'worn-: 'dekorn: 'do :on :porluh ken-:. Nyorsoa-a' tubo-wlu:⧾ :daa, me-: 'o :a po, :en kor-a dhih 'jeh-' :po-eh 'i.

⁹:Yee' eh-a' dhih, :mor :on 'worn-dih-eh 'de :on 'worn, :ka :Yusu' 'dhu-a :Gwlor :baa'-', 'de :on 'ye-eh' dhih 'jeh-' po, 'do :an-a' :porluh⧾-a' klehkpeh bo, :ka Nyorsoa za-or 'de nma-dih-deh 'di, :yee' :an mu 'puh-:.

¹⁰Deh no-eh, :a-a' dhih 'jeh-' :po-eh: :eh 'wluh-a 'o :a :porluh⧾ ken, eh-: 'o :eh no-eh, 'de Nyorsoa-a 'da-dih :a 'yi 'sleh-nyor⧾. 'De mor :a-a' 'jeh 'yor-eh-a' worn :oo', :or za-eh' :ke, 'de :a 'puh.

¹¹:Ka Nyorsoa-a' 'chlee-deh no-a eh-a' :za-a', eh no-a, Nyor-beh-nyor-beh: :or :kpa-dih-or 'kpuh, or :se-' 'bluhbor 'bor-dih: i.

¹²:Yee' deh-a' :gble-eh se 'o :Jueh'-nyor⧾-: 'dekorn: nyor⧾ :on :se-a :Jueh'-nyor⧾-: 'nyne bo :ne. Deh no-eh, :Gwlor :baa' :ne-a :due', or-: no :a-a' klehkpeh-a' :Gwlor :baa'. 'De or 'nyi nyor⧾-a' klehkpeh :bhorlie' :dhulu' :an 'da-or or 'ye-a' :za-dih:.

¹³:Ka Nyorsoa-a' 'chlee-deh no-a eh-a' :za-a', eh no-a, Nyor⧾-a' klehkpeh :an 'da-a :Gwlor :baa'-a' 'nyne, or 'ye-a' :za-dih:, mo-: :an mu 'puh-:.

¹⁴:Yee' :kaa an mu nyor on se-a dhih 'jeh-' po, or-a' 'da-a' :no :eh? :Yee' :kaa an mu nyor :or :korn-a 'nyne on se-a 'worn, or-a' dhih dhih 'jeh-' :po-eh :no :eh? :Yee' :mor nyor se or-a' dhih on :gwluhuh' zela:, :yee' :kaa an mu or-a' 'nyne-a' 'worn-a' :no :eh?

¹⁵:Yee' :mor nyor⧾ se-uh dbo, :yee' :kaa an mu or-a' dhih-a' :za-a' :no :eh? :Ka eh no-a 'chle-eh 'de Nyorsoa-a' 'chlee-deh 'di, eh no-a, Nyor⧾ :an ya-a 'de tubo-wlu:⧾ 'jeh, an-a' :naa-buh⧾ :nmor-: 'yi.

¹⁶Jorwor: eh :se nyor⧾-a' klehkpeh :on no-a 'Ezlea-nyor⧾, on :se-' tubo-wlu:⧾ 'jeh :daa dih kpon. Deh no-eh, :Azaya' 'dae:, :Gwlor :baa', nyor :yoror :or po :an-a' tubo-wlu:⧾ :daa :a po-a, dhih 'jeh-' :eh?

¹⁷:Yee' nyor se 'beh-dih: or 'ye dhih 'jeh-' :po-eh 'ble, :mor or se tubo-wlu:⧾ :en kor-a 'Klae 'i 'worn.

¹⁸Jorwor: 'an dhele a dih, 'Ezlea-nyor⧾ :se-' tubo-wlu:⧾ :daa 'worn :e? Keen', on 'worn-ih', :ka Nyorsoa-a' 'chlee-deh no-a eh-a' :za-a', eh no-a, Tubo-wlu:⧾ :daa, en :po-eh:-' dha 'bluhba-a' klehkpeh ken. En-' wele-eh :po-eh:-' 'de 'bluhba⧾-a' klehkpeh yobo' po-a 'de :gle 'gbeheh 'di ken dih 'weh.

¹⁹:Yee' 'an dhele-eh-: dih :neheh', 'Ezlea-nyor⧾ :se-eh' dih 'worn :e? :Mose', or-: 'chle-eh :zai', :ka Nyorsoa 'da-a, or no-a, 'An mu 'bluhba-dlu: :daa nyor⧾ se-a zlo-' 'duo:, eh 'ye a :gwlehehn' 'di po. 'An mu 'bluhba-dlu: nyor⧾-a 'da-dih-a :bobo-nyor⧾-' 'duo:, eh 'ye a 'chehn 'di po.

²⁰:Yee' Nyorsoa-a' wele-eh: :po-nyor: :Azaya' ku :gwluhuh', or 'da, Nyorsoa 'dae:, :Yuh :on :se-a 'on 'kwla⧾-' dih 'bhorn, mo-: 'ye 'on. :Yuh :on :se-a 'an dhih dih dhele:, mo-: 'on :to-dih: 'an 'jeh 'i.

²¹Jorwor: 'do 'Ezlea-nyor⧾-a' dhih bo, or 'dae:. 'Do zorn-we-a' klehkpeh bo, 'an slo 'an son⧾ 'do nyor⧾, :an-a' dhe-a 'o 'an 'tele' dih bo, 'de :on :korn-a 'dlu⧾ :kmu-a'.