Read Eastern Krahn Wloon-chlee-deh: 12 Bible Online

Wloon-chlee-deh: 12 - Eastern Krahn bible

Wloon-chlee-deh: 12

¹:Yee' 'do eh-a' dha, 'an 'Klae :de-di'-boi'-a:, 'an bale a 'weh, :ka Nyorsoa 'ye-a a :wehlih, :yee' a :za a-a' yau 'kwla 'de or bo, :eh gweh-a :ka nyor⧾-a za-dih-a 'kmo :ne-deh: :eh :dhe-dih-eh 'for 'i 'slaa, 'do or-a' :koan-a' no-a' bo, 'de :eh 'pehn-dih:-a or-a' :porluh dih. Eh-: 'dhu or-a' :weheh' :za-eh: 'jeh neh-' 'de or-a' deh 'di.

²:Yee' deh⧾ 'kmo bo-nyor⧾-a ne-dih-a 'kmo, a-a' :ne-dih:-' 'kmo :ke. Jorwor: a 'nyi Nyorsoa 'nyi a 'dlu 'di dih :na-dih-deh: :dele', :eh mu-a a-a' :gwlor-nyor-tu-a' klehkpeh-' dih 'bili: 'de a 'di. :Yee' :mor eh no :ao', :yee' a mu deh :eh :korn-a Nyorsoa 'ton yubo:, :eh 'dhu-a deh 'jeh-: deh :eh 'pehn-dih:-a or-a' :porluh dih-: 'dekorn: deh :eh gweh-a 'kwla-:.

³:Yee' Nyorsoa po 'on mla bo. Eh-a' dhih, 'an zela a-a' klehkpeh :gwluhuh', A-a' 'ye-:-' a-a' 'jeh deh-' 'gabaa, eh-a' :zi 'o ken dih, 'de a-a' 'jeh 'yli 'de. Dhih 'jeh-' :po-eh: or 'nyi a-uh, eh-: a 'ye no, a 'ye a-a' 'jeh :yba-dih:, 'de :toror' :korn ka 'di.

⁴:A-a' klehkpeh, :a 'ble yau :due' :due', :on 'ble-a deh⧾ :dhulu' 'do on 'bhun. Jorwor: en-' klehkpeh :dao', en se :koan :due' 'ble.

⁵:Yee' 'de deh :ne-a :due' 'di, :a :mor :or :dhie:-a 'o, 'de :or :ne-a 'Klae-', :a no yau :due'. :Yee' :a 'dhu-dih-eh: 'i, :ka yau-a' deh⧾ :en :ne-a 'o on 'bhun, en no-a 'i 'dhu-dih-eh :ke.

⁶:Ka Nyorsoa no-a :a-a' mla bo :po-eh, 'ka-: :a no 'nyii'-deh:⧾ 'doror: 'dor 'ye-a'. :Yee' :mor Nyorsoa 'nyi nyor wele-eh: :po-eh, :yee' 'nyi or po or-a' wele-eh. 'Nyi eh :ne or-a' dhih 'jeh-' :po-eh kpa :gwie :due'.

⁷:Mor or-a' 'nyii'-deh no 'bhoi-yu-deh 'do nyor bo, :yee' 'nyi or no-eh. :Mor or-a' 'nyii'-deh no nyor⧾ deh :torne-eh, :yee' 'nyi or :torne: nyor⧾ deh.

⁸:Mor or-a' 'nyii'-deh 'dhu 'de nyor⧾-a' 'kpih :po-deh-' 'do nyor bo, :yee' 'nyi or po 'de nyor⧾-a' 'kpih. :Mor or-a' 'nyii'-deh 'dhu, 'nyi nyor⧾ deh yaa'e-deh-', :yee' 'nyi or no-eh, or 'bor 'kwa dih :kmu-eh. :Mor or-a' 'nyii'-deh no, nyor⧾ :na-dih-eh, :yee' 'nyi or :na-dih: nyor⧾ deh 'jeh neh. :Mor or-a' 'nyii'-deh no nyor⧾ :wehlih 'ye-eh, :yee' 'nyi or no-eh, 'de 'mona: ka 'di.

⁹:Yee' a :ybeh nyor⧾-' 'de :porluh⧾-a' :vlehehn'-' :gweh ka 'di. A 'nyeh deh⧾-zon⧾-', 'de a 'ye :yih :en no-a deh⧾ 'jeh ne dih kpon :glii:.

¹⁰A :ybeh a 'bei' 'Klae-a' nyor⧾-', :ka a no-a a-a' 'de-di'-boi'-a' :ybeh-eh. A 'ye nyor⧾ deh-', eh 'ye 'o a-a' 'jeh 'yor-eh-' :zi.

¹¹A 'nyi a-a' :porluh: :en mu-a :koan :no, en 'beh 'i. A :ne neh ken 'do :Gwlor :baa'-a' :weheh' :za 'da.

¹²'Nyi deh :gwlii' :dhe-eh no-eh, a 'ye 'mona no. :Mor a :taa 'kle 'ye, :yee' a kpon :porluh⧾ dih. A :wlu 'de Nyorsoa bo, 'do ti-a' klehkpeh bo.

¹³Nyorsoa-a' nyor⧾ :on :korn-a son⧾ se-a 'o nyni, a 'nyi-uh deh. :Yee' a :za a-a'a: 'gbu⧾ 'kwla 'do 'Klae :de-di'-boi' :on no-a 'duhba⧾ bo.

¹⁴:Yee' a po nyor⧾ :an 'ye-dih-a a 'kle, :bhorlie' bo. A-a' :po-uh' 'chlo bo, a po-uh :bhorlie' bo.

¹⁵Nyor⧾ :an no-a 'mona, a 'kpa-uh bo, a 'ye 'mona no. :Yee' nyor⧾ :an 'zlu-a, a 'kpa-uh bo, a 'ye 'zlu :ke.

¹⁶A kpon-dih: ken dih 'de a 'nyne-'. A-a' 'beh-dih:-' a-a' 'jeh 'i, jorwor: a 'worn-dih-eh ken dih, a :ne nyor⧾ :on :se-a deh ken 'kpa, a 'ye bo nena:. A-a' :na-' :toror' :korn-deh.

¹⁷Nyor :or no-a deh-zon 'do a bo, a-a' :za-dih-or' deh-zon kpa-'. A 'wla :gwluhuh' dih, a 'ye deh⧾ 'jeh ne no, 'do :gwlor-nyor⧾-a' klehkpeh ybei'.

¹⁸A no deh⧾-a' klehkpeh a 'beh-dih:-a a 'ye-a' no, :en mu-eh :no, 'de a :ne nyor⧾-a' klehkpeh 'ye-a ken dih kpon-dih:.

¹⁹:Yee' :a 'bli-nyor⧾-a:, :mor nyor no deh-zon 'do a bo, nyor-a' :za-' kpa, jorwor: 'nyi Nyorsoa-a' 'jeh-a' 'yor-eh no-eh. Deh no-eh, eh 'chle-eh:-' 'de or-a' 'chlee-deh 'di, eh 'da, :A-a' :Gwlor :baa' 'da, 'Mor :korn :or 'ye kpa :za. 'An mu nyor⧾ :an no-a deh⧾-zon⧾ 'do on 'bei' bo, 'kle 'ye-eh 'dlu :po.

²⁰:Yee' or-a' 'chlee-deh 'da :neheh', :Mor 'moeh :taa nyor :or 'nyeh-a :on-' no, :yee' 'nyi-or dii-deh. :Mor 'ni 'na-ton :taa-or no, :yee' 'nyi-or 'ni or 'ye 'na. :Mor :on :taa :ao' no, :yee' eh mu-or dhen-' dih :po 'gabaa.

²¹:Yee', eh-a' dhih, :an-a' 'worn-:-' deh⧾-zon⧾-a' du :on, jorwor: du deh⧾-zon⧾ 'do deh⧾ 'jeh-a' no-a' bo.