Read Eastern Krahn Wloon-chlee-deh: 13 Bible Online

Wloon-chlee-deh: 13 - Eastern Krahn bible

Wloon-chlee-deh: 13

¹:Yee' 'nyi nyor⧾-a' klehkpeh :ya an-a' 'jeh ya 'do 'gomla-nyor:⧾ :on :ne-a 'o on 'dlu, 'zorn. Deh no-eh, eh se 'gomla :korn-Nyorsoa 'ye :ao', or se-a 'o kpala' 'i po. Nyorsoa :oo', or-: 'nyi on 'kpih, 'de on no nyor⧾ :klaba'⧾ 'do :a 'dlu.

²:Yee' 'do eh-a' dha, nyor-beh-nyor-beh: :or :bla-dih:-a 'gomla worn, :yee' deh Nyorsoa po-a 'o, eh-: 'o or :bla-dih: worn. Nyor :or no-eh, :yee' or :ya or-a' 'jeh 'kle 'ye-eh 'dlu.

³:Mor eh 'dhu, :on :taa 'yi 'sleh-deh⧾ no, :yee' :on se :korn :on 'ye nyor⧾ wlu 'ken :korn-nyor⧾-a' :fano ple. Jorwor: :mor eh 'dhu, :on :taa kplen-zon⧾ no, :yee' :on :korn :on 'ye an-a' :fano ple. :An 'bhorn :on 'ye 'kmo-' :ne, 'de :on 'ye :an-a'a: 'gomla-a' :fano-a' ple-a' 'bor :e? :Yee' :mor :an 'bhorn :on 'ye :ao' :ne, :yee' no 'yi 'sleh-deh⧾, 'de :an-a'a: 'gomla 'ye :on dhih bo po.

⁴Deh no-eh, 'gomla no Nyorsoa-a' 'bhoi-yu: 'do :an-a' dhih bo. Jorwor: :mor eh 'dhu, :on no kplen-zon⧾, :yee' ple :fano, deh no-eh, 'gomla se 'dhun 'ble yaa'e. On no Nyorsoa-a' 'bhoi-nynuu:, an za or-a' 'chehn dha yao 'zorn, 'do nyor⧾ :an no-a kplen-zon⧾ bo.

⁵:Yee' 'do eh-a' dha, a :korn a 'ye a-a' 'jeh ya :ya 'do 'gomla-nyor⧾ 'zorn. Eh :se Nyorsoa-a' 'chehn-a' kpa an za-a, eh-a' dhih :due' a :korn a 'ye-eh' no :deh, jorwor: deh no-eh, a-a' :porluh⧾ me-: zela: a :gwluhuh' a 'ye-eh' no.

⁶Eh-: :korn dhih :oo', a za 'taa-deh⧾ :ke, deh no-eh, 'gomla-nyor⧾ no Nyorsoa-a' 'bhoi-nynuu:, :an no-a an-a'a: :koan, on :korn on 'ye-a' no.

⁷Deh⧾-a' klehkpeh, a 'ble-a 'do on bo, a 'nyi-uh. :Mor a 'ble 'gomla-a' 'taa-deh:⧾ 'doror: 'dor, :yee' 'nyi a za-ih. :Mor eh 'dhu, an-a' deh-' 'ye-eh, :yee' 'nyi a 'ye-uh deh-'. :Mor eh 'dhu 'o, an-a' 'dhu-a', :yee' 'nyi, a 'dhu-uh 'o.

⁸:Yee' nyor-a' kpa-a' :sie: 'o a ken. Deh :due' a 'ye-a' no, eh-: 'dhu, a :ybeh-dih: 'do ti-a' klehkpeh bo. Deh no-eh, nyor :or :ybeh-a or 'be :gwlor-nyor-', :yee' or no :Mose'-a' 'tele'⧾-a' klehkpeh or 'da-a 'weh.

⁹'Tele'⧾-a' klehkpeh :daa, :en no-a, Nyor-a' :no-' 'nyne :zaan', nyor-a' 'dba-:-' nyor, nyor-a' 'yli-:-', :gwlehehn' :sin-dih:-' a 'di dih, 'dekorn: 'tele'⧾ :nee' :en :sie:-a 'o, en-' klehkpeh en :ne 'noror 'tele' :due' :daa 'di, :eh no-a, :Ybeh nyor⧾ :on :ne 'ti-a :dha :due'-', :ka :on no-a :an-a' 'jeh-a' :ybeh-a'.

¹⁰:Mor :on :ybeh :an-a' :dha :due' 'ti-nyor-', :yee' :on :se-or' deh-zon 'bhun :no-dih: i. :Yee' eh-a' dhih, :mor :on 'ble :ybeh-dih-eh, :yee' :Mose'-a' 'tele'⧾-a' klehkpeh or 'da-a, me-: 'o :an no.

¹¹:Yee' eh-: a 'ye no, :ka a yubo:-a ti a :ne-a ken :naa. Ti nyni 'o 'weh, a 'ye 'nyinor-' 'wluh. Deh no-eh, ti :a mu-a 'puh-: klehkpeh klehkpeh, en 'koan'-: bo :naa, :eh :zi 'o, ti :a po-a :Yusu' 'Klae-a' dhih dhih 'jeh-' :zai'.

¹²Eh :sie: 'o deh-beh:, glu 'ye 'dlu-' :jla. :Yee' zorn 'koan'-: bo :naa. Eh-a' dhih, a 'bor deh⧾ nyor⧾-a no-a 'de :kule-', en-' no-a'. Jorwor: a 'nyi a 'dhu zorn-pli-a' ta-tiei-' dih.

¹³A 'nyi :a :ne-dih: kplen 'jeh ne 'kmo deh 'jeh, :ka nyor⧾ :on :ne-a 'noror zorn-pli-', on :ne-a. A-a' 'dhu-:-' 'nynor⧾ :zi-eh-a' gor, a-a' :ne-dih:-' nomor 'na-eh-a' 'kmo. A-a' :korn-' 'tmeor⧾-: 'dekorn: 'pebe' 'i 'kpa-eh-:. A-a' :ne-dih:-' jeh-a'-: :gwlehehn'-: 'kmo.

¹⁴Jorwor: a 'duo: :a-a' :Gwlor :baa' :Yusu' 'Klae-', a 'ye-or' pa, 'de a-a' :na-dih:-' :gwluhuh' dih, :ka a 'ye-a' no, 'de a 'ye-a' a-a' :porluh⧾ dih 'pehn-dih: 'do a-a' :gwlor-nyor-tu-a' 'bhororn'-deh⧾-zon⧾ bo.