Read Eastern Krahn Wloon-chlee-deh: 14 Bible Online

Wloon-chlee-deh: 14 - Eastern Krahn bible

Wloon-chlee-deh: 14

¹:Yee' 'Klae-a' nyor :or :korn-a dhih 'jeh-' :po-eh se-a dih ku, a kpon-or dih, jorwor: or :ne a-a' dhobo:-' 'do deh⧾ or na-dih-a :gwluhuh' dih, :en :ne a-a' ne se-a :gwie :due' kpa, en-' dhih bo.

²Nyor⧾ :noo' :on no-a 'Klae-a' nyor⧾, an-a' dhih 'jeh-' :po-eh no-eh, 'de an di deh⧾-a' klehkpeh, jorwor: nyor⧾ :noo' :on :korn-a dhih 'jeh-' :po-eh se-a dih ku, an di 'dhuu'-deh⧾ :due' 'suh 'klein'.

³'Klae-a' nyor⧾ :yuh :an di-a deh⧾-a' klehkpeh, an-a' :vlehn-' :yuh :an-a' di-ih-a. :Yee' nyor⧾ :yuh :an-a' di-a deh⧾-a' klehkpeh, an-a' :chehn-' :yuh :an di-a deh⧾-a' klehkpeh-a' zabe 'i :ke. Deh no-eh, Nyorsoa kpon-uh-: dih.

⁴Nyor :on 'dhu-eh:-' :eh, 'de :an chehn nyor :noror'-a'a: 'bhoi-yu-a' zabe 'i :eh? Or-a' 'jeh 'yor-eh-a'a: Nyor :Klaba', or-: :korn 'de eh bo, :mor or-a' :yeh :nyna dih, :mor or-a' :yeh 'ga dih. Keen', or mu dih :nyna. Deh no-eh, :Gwlor :baa' 'ble 'kpih, or 'ye-eh' no, 'de or 'ye dih :nyna.

⁵Nyor⧾ :noo' 'duo: zorn-we-eh :due'-', eh 'ye deh ken 'kpa, eh 'ye 'o 'we-eh: :neheh' :zi. :Yee' nyor⧾ :noo', mo-: 'duo: 'we-a' klehkpeh-' en 'ye goor-dih:. Nyor⧾-a' klehkpeh :korn on 'ye deh on po-a dhih 'jeh-' dih 'worn deh 'jeh, 'do on :porluh⧾ ken, 'do 'we-eh-deh: :daa, eh-a' dhih bo.

⁶Nyor⧾ :on 'duo-a zorn-we-eh :due', eh 'ye-a' deh ken 'kpa, on 'duo-eh' 'weh 'do :Gwlor :baa'-a' deh-' 'ye-eh bo. Nyor⧾ :an di-a nimi, an di-eh 'do :Gwlor :baa'-a' deh-' 'ye-eh bo. Deh no-eh, on po Nyorsoa-a' 'zio 'do dii-deh: :dao' bo. :Yee' :yuh :an-a' di-a nimi, an no-eh 'do :Gwlor :baa'-a' deh-' 'ye-eh bo, 'de on po Nyorsoa-a' 'zio 'do deh an di-a bo :ke.

⁷:Mor :a-a' :yeh :ne 'kmo, 'de mor :a-a' :yeh 'meh, Nyorsoa-a' dhih :oo' :a no-eh, eh :se :a-a' 'jeh-a' dhih.

⁸:Mor :a :ne 'kmo-', :yee' :a :ne-' 'kmo 'do :Gwlor :baa'-a' deh-' 'ye-eh dhih bo. :Mor :a 'meh, :yee' :a 'meh-' 'do or-a' deh-' 'ye-eh dhih bo :ke. :Yee' 'do eh-a' dha, :a-a' :yeh :ne 'kmo, 'de mor :a-a' :yeh 'meh, :a :korn 'de :Gwlor :baa' bo.

⁹:Yee' eh-a' dhih :oo', 'Klae 'meh, 'de or 'wluh 'de nma-dih-deh 'di, 'de or :ne 'kmo, or 'ye :Gwlor :baa' no 'do 'meheh'-nyor⧾-: 'dekorn: 'kmo :ne-nyor⧾-: bo.

¹⁰:Yee' :eh :korn dhih, 'de :an chehn :an-a' 'Klae :de-di'-a' zabe 'i :eh? :Yee' :eh :korn dhih, 'de :an vlehn-or :eh? En-' klehkpeh :daa, :a-a' klehkpeh, :a mu dih :nyna, 'do Nyorsoa-a' zabe: :zi :kpala' ybei',

¹¹:ka eh no-a 'chle-eh 'de Nyorsoa-a' 'chlee-deh 'di, eh no-a, :Gwlor :baa' 'da, :Ka 'on :ne-a 'kmo, nyor⧾-a' klehkpeh, an mu 'koor-dlu⧾ 'yi glu :bla 'do 'on ybei'. :Yee' :meo⧾-a' klehkpeh mu-eh-' :za :ka 'on 'dhu-a Nyorsoa-'.

¹²:Yee' eh-a' dhih, :a-a' :due' :due'-a mu deh⧾ :a no-a, en-' dhih bo zela: 'do Nyorsoa ybei'.

¹³:Yee' eh-a' dhih, a 'nyi, :a 'bor :a 'bei'-a' zabe 'i :chehn-eh 'suh. Jorwor: a :korn a 'ye-eh' :gwluhuh' dih :na-dih:, 'de a :ne 'o deh 'do a-a' 'Klae :de-di'-a' :gwie 'i po, 'de or :ne-eh' 'gbele:.

¹⁴:Ka 'on 'dhu-a nyor :or :korn-a 'de :Gwlor :baa' :Yusu' bo, 'on yubo-eh' 'jeh ka, dii-deh⧾-a' klehkpeh :nmor-: 'yi, 'do di-a' bo. Jorwor: :mor nyor 'da dii-deh: :yeh :daa, eh se 'yi dih :nmor 'do di-a' bo, :yee' 'do or bo :oo', eh se 'yi dih :nmor-dih:.

¹⁵:Mor eh 'tuh :an-a' 'Klae :de-di' dih, 'do deh :an di-a, eh-a' dhih bo, :yee' eh se 'de or-a' :ybeh-dih: ka 'di :ne :neheh'. :An-a' dii-deh:⧾-a' :no-eh', 'de en-' 'kor-dih:-' :an-a' 'Klae :de-di', :or :korn-a dhih 'Klae 'meh-a.

¹⁶:Yee' deh a 'da-dih-a deh 'jeh neh, a-a' :no-eh' nyor⧾-a' 'da-dih:-eh' deh-zon.

¹⁷Deh no-eh, Nyorsoa-a' nyor⧾ wlu 'ken :korn-eh se deh :di-eh-: 'dekorn: 'na-a'-: deh 'i kor. Jorwor: eh kor 'yi 'sleh-eh-: ken dih :kpon-dih-eh-: 'dekorn: 'mona-: :en 'wluh-a 'de Gban 'i :ne :Zulu bo 'i.

¹⁸Deh no-eh, nyor :or za-a 'Klae-a' :weheh' deh :dao', :yee' or-: 'pehn-dih: Nyorsoa-a' :porluh dih, 'de :gwlor-nyor⧾ 'worn-dih: or-a' dhih ken dih.

¹⁹:Yee' eh-a' dhih, a 'nyi :a vorn, :a 'ye deh no, :eh 'ye-a 'de ken dih :kpon-dih-eh :ya, 'de :eh 'ye-a :a-a' dhih 'jeh-' :po-eh dih :ku-dih:, 'do :a-a' :due' :due' bo.

²⁰A-a' 'kor-dih:-' Nyorsoa-a' :koan, dii-deh⧾-a' dhih. Dii-deh⧾-a' klehkpeh, en :nmor-: 'yi 'do di-a' bo. Jorwor: eh :nyni-: 'yi 'de nyor 'ye deh di, eh 'ye-eh' no, 'de or 'be 'Klae-a' nyor 'ye 'gbele:.

²¹Eh :nmor-: 'yi, :on 'ye nimi :di-eh-: nomor 'na-eh-: 'bor, 'de :an-a' :no-' deh-beh-deh-beh: :eh mu-a :an-a' 'Klae :de-di' dih 'ga-:.

²²:Yee' eh-a' dhih, deh :korn-a dhih :on po-a dhih 'jeh-' 'do deh⧾ :daa bo, 'nyi eh no 'slan, 'do mor-: Nyorsoa-: 'nyne bo. :Bhorlie' 'do nyor :or :korn-a :porluh: se-or dhih :yeh-dih:, 'do deh or po-a dhih 'jeh-', eh 'sleh-a 'i 'do or bo, :eh kor-a dii-deh-deh 'i, eh-a' dhih bo.

²³Jorwor: :mor nyor :taa deh di, 'de or-a' :porluh 'ye dhobo:, :yee' or :kpon-dih: or-a' 'jeh zabe:. Deh no-eh, :porluh: or di-dih-a deh, on :se 'de dhih 'jeh-' :po-eh bo 'wluh. 'De mor, deh⧾-a' klehkpeh :en :se-a 'de dhih 'jeh-' :po-eh bo 'wluh, en no deh⧾-zon:⧾.