Read Eastern Krahn Wloon-chlee-deh: 15 Bible Online

Wloon-chlee-deh: 15 - Eastern Krahn bible

Wloon-chlee-deh: 15

¹:Yee' :a :mor :or :korn-a dhih 'jeh-' :po-eh: ku-a dih, :a :korn :a 'ye :yuh :on :korn-a dhih 'jeh-' :po-eh: se-a dih ku bo 'kpa. :A 'bor, :a-a' 'pehn-dih:-' :a-a' :porluh⧾ :due' dih 'klein'.

²:A-a' :due' :due' :korn :a 'ye :a-a' 'Klae :de-di'-a' :porluh dih 'pehn-dih:, eh-a' :yeh :eh mu-or' :za-dih:, 'de eh 'ye-eh' no, or-a' dhih 'jeh-' :po-eh 'ye dih ku.

³Deh no-eh, 'Klae :sloror', or :se-' or-a' 'jeh 'yor-eh-a' :porluh dih 'pehn-dih:. 'De mor eh 'chle-eh 'de Nyorsoa-a' 'chlee-deh 'di, eh 'da, 'Jlei: nyor⧾ :noo' 'jle-dih:-a :on, en 'wla 'on ken dih :ke.

⁴:Yee' deh⧾-a' klehkpeh :en 'chle-eh 'de Nyorsoa-a' 'chlee-deh 'di :zai', en 'chle-eh:-' en 'ye :a deh :torne:, 'de :a :ne-' sea. :Yee' :mor en no-eh, 'de :a 'ye :ao', :a se sea, 'de en 'ye :a 'kpih 'nyi, :yee' :a mu :gwlii' :dhe-deh 'ble-:.

⁵:Yee' 'nyi Nyorsoa :or no-eh 'de nyor⧾-a' sea-a, 'de :or po-uh-a 'kpih bo, 'nyi or no-eh, 'de a 'ye ken dih kpon-dih: 'de a 'klu-', :ka a zi-a 'o :Yusu' 'Klae klei',

⁶'de a 'ye :porluh :due' 'ble, 'de a 'ye wlu :due' 'ble, a 'ye :a-a' :Gwlor :baa' :Yusu' 'Klae :Baa' :or 'dhu-a Nyorsoa-' dhih-a' 'i 'beh-a' 'nyi.

⁷:Yee' 'do eh-a' dha, a kpon a 'bei' dih :due' :due', :ka 'Klae no-a a-a' dih :kpon-eh :ke, eh 'ye-eh' no nyor⧾ 'ye Nyorsoa dhih-a' 'i 'beh-a' 'nyi.

⁸:Yee' 'an zela a :gwluhuh', deh :korn-a dhih 'Klae no-a :Jueh'-nyor⧾-a' 'bhoi-yu, eh-: 'dhu, eh 'ye-eh' no, 'de wlu Nyorsoa po-a :dhama'-' 'de :a :bai'-a' :bai' bo, on 'ye dhih 'jeh-' 'kpa, 'de eh 'ye-eh' nyor⧾ 'i :to-dih: :ka Nyorsoa no-a :dhehehn-nyor.

⁹Or no-eh' :ke, 'de nyor⧾ :on :se-a :Jueh'-nyor:⧾, on 'ye Nyorsoa-a' dhih-a' 'i 'beh-a' 'nyi, 'do or-a' :wehlih: :korn-eh-a' dhih bo, :ka eh no-a 'chle-eh 'de Nyorsoa-a' 'chlee-deh 'di, eh no-a, :Yee' 'do eh-a' dha, 'an mu Nyorsoa-a' 'nyne ya :po, 'de nyor⧾ :on :se-a :Jueh'-nyor⧾ 'klu-'. 'An mu or-a' 'nyne bo :ble-dih:, 'on 'ye-ih' ya po.

¹⁰Nyorsoa-a' 'chlee-deh 'da :neheh', A :mor nyor⧾ :on :se-a :Jueh'-nyor:⧾, a :ne-Nyorsoa-a' nyor⧾ :no-dih: 'mona :dha :due'.

¹¹'De eh 'dae: :neheh' A :mor nyor⧾ :on :se-a :Jueh'-nyor:⧾, a-a' klehkpeh, a po :Gwlor :baa'-a' 'nyne ya. A :mor 'dawor'⧾-dlu⧾-a' klehkpeh, a po or-a' 'nyne ya.

¹²:Yee' Nyorsoa-a' wele-eh: :po-nyor: :Azaya' 'dae:, 'Jehsi: 'di-a' nyor :due'-a mu 'de :yi. Or-: Nyorsoa-a mu ya-' 'duo:, or 'ye nyor⧾ :on :se-a :Jueh'-nyor⧾ wlu 'ken :korn. :Yee' or-: an mu :gwlii' :dhe.

¹³:Yee' 'nyi Nyorsoa :or 'nyi-a nyor⧾ deh :gwlii' :dhe-eh, or 'nyi a 'mona: :doru'-: 'dekorn: wlu-' dih 'worn-eh: :dhulu'-: :ka a po-or dhih 'jeh-', 'de a-a' deh :gwlii' :dhe-eh-a' dih :ku-eh 'ye 'dlu bo mu, :eh :yi-dih:-a Gban 'i :ne :Zulu-a' 'kpih-'.

¹⁴:Yee' 'an 'Klae :de-di'-boi'-a:, 'an 'jeh 'yor-eh:, 'on po-eh dhih 'jeh, :ka a 'yi-dih:-a noo-deh:⧾ 'jeh ne-' dih, 'de a yubo:-a deh⧾-a' klehkpeh a :korn-a, a 'ye-a' no, 'de a 'beh-dih:-a a 'ye-a a 'bei' deh :torne: :due' :due'.

¹⁵'An 'chle a bo, 'de :gwluhuh' :ku ka 'di, 'do deh⧾ :nee'-a' dhih bo, en 'ye a dhih :gwluhuh' bo :po-dih: :dele' ka. 'An no deh :daa 'weh, deh no-eh, Nyorsoa po 'on mla bo,

¹⁶'on 'ye :Yusu' 'Klae-a' 'bhoi-yu no, 'de nyor⧾ :on :se-a :Jueh'-nyor⧾ 'klu-'. 'De 'an :koan: :no-eh: :daa, eh gweh :ka Nyorsoa-a' 'slaa: :za-nyor :ne-a. 'An po or-a' tubo-wlu:⧾ 'jeh, 'de Gban 'i :ne :Zulu 'ye-eh no, 'de nyor⧾ :on :se-a :Jueh'-nyor:⧾, on 'ye 'slaa: :za-dih-deh no, :eh :dhe-dih-eh 'for 'i, 'do or bo, :eh or mu-a ken dih 'worn-dih:.

¹⁷:Yee' 'do eh-a' dha, 'on 'beh-dih: 'on 'ye 'an 'jeh 'i 'beh-dih: 'do deh⧾ :Yusu' 'Klae no-a :en :yi-dih:-a 'on-', 'de Nyorsoa-a' :koan 'di, en-' dhih bo.

¹⁸Deh :due' :eh :korn-a dhih 'on 'beh-dih:-a 'on 'ye-a' :za, eh-: 'dhu, deh 'Klae no-a, 'de :eh :yi-dih:-a 'on-', 'de 'on no-eh, 'de nyor⧾ :on :se-a :Jueh'-nyor:⧾, on :dhe-a 'o or-a' 'tele' dih, 'do deh 'on :za-a-'-: 'dekorn: deh 'on no-a-: bo.

¹⁹Or 'nyi 'on 'kpih, 'do deh⧾ :daa, en-' no-a' bo, 'on 'ye nyor⧾ 'i :to-dih-deh⧾-: 'dekorn: nyor⧾ 'di dih 'ma-dih-deh⧾-: no, 'de or 'nyi Nyorsoa-a' :Zulu-a' 'kpih 'on :ke. Eh-: no-eh, 'de 'on po Nyorsoa-a' tubo-wlu:⧾ 'jeh-a' klehkpeh, :en kor-a 'Klae 'i, :eh 'wluh-a :Julu'slehn :chio'lo:, 'de :eh mu-a :Ili'ka-bluhba ken.

²⁰'An po 'de 'kpih, 'do ti-a' klehkpeh bo, 'on 'ye tubo-wlu:⧾ 'jeh :daa po, 'do :dha nyor⧾ se-a 'Klae-a' 'nyne 'da-dih: :zai'. 'Do :dha nyor⧾ :no-dih:-a :koan :zai', 'de 'on :ne 'o :koan :no-dih: :ke.

²¹Jorwor: :ka eh no-a 'chle-eh 'de Nyorsoa-a' 'chlee-deh 'di, eh no-a, :Yuh nyor-beh-nyor-beh se-a :gwluhuh' zela:, or-a' dhih, mo-: :an mu-or yubo:. 'De :yuh :on se-a or-a' dhih 'worn, mo-: :an mu or-a' dhih-' dih 'worn-:.

²²:Yee' eh-a' dhih, 'an-a: :koan: :daa, or-: kpan-dih 'on, 'de 'on 'see 'de a bo yi, 'do ti :dhulu' 'di.

²³:Yee' 'on se :koan 'ble :neheh' dha 'bluhba-a' 'for :daa bo. 'Do zon⧾ :dhulu' 'di, 'an 'bhorn 'on 'ye 'de a bo yi.

²⁴'Do eh-a' dha, 'an 'bhorn, 'on 'ye-eh' no, ti 'an mu-a 'Smee-bluhba ken :mu. 'On dhe-eh :gwlii' 'weh, 'on 'ye 'de a bo :yi-dih:, 'de :a 'ye 'ton-' dih zela:, 'de 'on 'ye 'Smee mu. :Yee' :mor :a zela: 'ton-' dih 'do ti-kpor-bei 'di, :yee' 'on dhe-eh :gwlii' :ke, :ka a mu-a 'on son 'nyi-:, 'do 'Smee: :gwie: 'an mu-a :kpa bo.

²⁵Jorwor: :kana :naa, 'an mu :Julu'slehn:, 'on 'ye Nyorsoa-nyor:⧾ :on :ne-a 'de bo 'kpa.

²⁶Deh no-eh, 'chore-nyor:⧾ :on :ne-a 'Masordo'nia-bluhba ken-: 'dekorn: :Ehki'a-bluhba ken-: en-' :porluh⧾ 'pehn-: dih, en 'ye 'wlii :za, 'do se deh-a' :za-da 'ble-nyor:⧾ :on :ne-a 'de Nyorsoa-nyor⧾ 'nyne-' 'de :Julu'slehn bo.

²⁷Nyor⧾ :daa, :on se-a :Jueh'-nyor:⧾, an-a' :porluh⧾ 'pehn-: dih, on 'ye-eh' no. Dhih 'jeh, on 'ble eh-a' kpa 'do :Jueh'-nyor⧾ bo. Deh no-eh, :ka :Jueh'-nyor⧾ gble-a Nyorsoa-a' :bhorlie'-', :eh no-eh, 'de nyor⧾-a yubo-or, 'de nyor⧾ :on :se-a :Jueh'-nyor⧾ bo, :yee' nyor⧾ :on :se-a :Jueh'-nyor:⧾, on 'ble eh-a' kpa, on :ne :Jueh'-nyor⧾ 'ye an-a'a: :kororn-deh⧾-a' :bhorlie'-' gble :ke.

²⁸:Yee' :mor eh 'dhu, 'on gweh :koan: :daa 'i, 'de 'on 'ye-eh' yubo: :ka on 'ye-a 'wlii: :dao', :yee' :mor 'on :taa 'Smee mu, 'de 'on 'ye 'o a bo :pa-dih:.

²⁹'On yubo-eh', :mor 'on :taa 'de a bo yi, 'an mu 'de 'Klae-a' :bhorlie' :dhulu' 'de a bo :ya.

³⁰:Yee' 'an 'Klae :de-di'-boi'-a:, 'an bale a 'weh, 'do :a-a' :Gwlor :baa' :Yusu' 'Klae-a' dhih-: 'dekorn: :ybeh-dih-eh: Nyorsoa-a' :Zulu: 'nyi :a-uh, eh-a' dhih-: a 'ye 'on bo 'kpa, a 'ye 'de Nyorsoa bo :wlu 'do 'yi :kma :koan: 'an no-a bo.

³¹A bale: Nyorsoa, 'de 'on :ne 'de se dhih 'jeh-' :po-nyor:⧾ :on :ne-a 'de :Judi'a-bluhba ken 'kwa 'kpa. A bale-or, 'de Nyorsoa-nyor:⧾ :on :ne-a :Julu'slehn, on 'ye 'nyii'-deh:⧾ 'an kpa-uh-a dih kpon.

³²:Yee' a bale-or, 'de 'on 'ye 'de a bo yi, 'de or-a' 'ton :korn ka 'di, 'de 'mona: ka 'di, 'de 'on 'ye :forn 'de a 'nyne-'.

³³A 'nyi Nyorsoa :or 'nyi-a :a wlu-' dih 'worn-eh, :ne 'o a-a' klehkpeh bo. 'Ka-: eh 'ye :ne.