Read Eastern Krahn Wloon-chlee-deh: 16 Bible Online

Wloon-chlee-deh: 16 - Eastern Krahn bible

Wloon-chlee-deh: 16

¹:Yee' 'an 'bhorn a 'ye :a-a' 'Klae :de-di'-nynor-kpao' :or 'dhu-a 'Fibi-' yubo:. Or no nyor 'jeh, 'de or no :koan: :no-nyor 'do 'chore :eh :ne-a 'de 'Sehkia-gwlor 'di bo.

²A kpon-or dih, :ka Nyorsoa-nyor⧾ :korn-a on 'ye-a' nyor⧾ dih :kpon-eh no, deh no-eh, or :korn 'de :Gwlor :baa' bo. :Mor or-a' son :gweh, :yee' a :za-dih-or'. Deh no-eh, or :za-dih: nyor⧾ :dhulu'-: 'dekorn: 'an 'jeh 'yor-eh-: :ke.

³'Mor 'ye :Plosi'la-: 'dekorn: or-a'a: yibeor: :Akwi'la-: :on no-a 'on 'bei' :koan: :no-nyor⧾ 'do :Yusu' 'Klae-a' dhih bo.

⁴On :na 'de 'meh-a' 'worn dih, 'an dhih. Eh :se 'on :due' :se-uh' 'zio po, jorwor: nyor⧾ :on :se-a :Jueh'-nyor⧾, an-a' 'chore-nyor⧾-a' klehkpeh, an po-uh 'zio 'weh :ke.

⁵'Mor 'ye 'chore :eh 'gbon-dih-a 'de on 'bli 'gbu. 'Mor 'ye 'an :dhih :kma-nyor: 'Ehpehni'tor, :or no-a :zai'-nyor :or 'bili-a-' dih 'de 'Klae bo, 'do 'Esea-bluhba ken.

⁶'Mor 'ye :Mehle' :or no-a 'yi :kma :koan 'gabaa, 'do a bo.

⁷'Mor 'ye 'Andlorni'kor-: 'dekorn: :Junia'-: :on no-a 'on 'bei' :Jueh'-nyor⧾, :on :ne 'on :po-dih-eh :kasue 'di :dha :due'. On no 'nyne :korn-nyor:⧾, 'de :Yusu'-a'a: dboo-nyor⧾ 'klu-', 'de on yubo-or :zai', 'do 'on ken.

⁸'Mor 'ye 'Aplia'ta, :or no-a 'an :ybeh-dih-nyor 'de :Gwlor :baa'-a' deh 'di.

⁹'Mor 'ye :Orba'nor :or no-a :a 'be :koan: :no-nyor 'do 'Klae-a' dhih bo, 'dekorn: 'an :dhih :kma-nyor: :Sita'kor:.

¹⁰'Mor 'ye :Apeh'lor, :or :korn-a 'Klae-a' dhih 'jeh-' :po-eh :to-dih-eh nyor⧾ 'i deh 'jeh. 'Mor 'ye nyor⧾ :on :ne-a 'de 'Alitor'bior 'bli 'gbu.

¹¹'Mor 'ye :Hehlo'nior, :or no-a 'on 'be :Jueh'-yu. 'Mor 'ye :yuh :on :ne-a 'de :Nase'sa 'bli 'gbu, :on yubo:-a :Gwlor :baa'.

¹²'Mor 'ye :Tlifi'na-: 'dekorn: :Tlofo'sa-: 'nynor⧾-kpao'⧾ :dao', :on no-a 'yi :kma :koan 'gabaa, 'do :Gwlor :baa'-a' dhih bo. 'Mor 'ye 'an :dhih :kma-nyor: 'Pehsor, :or no-a 'nynor :noror' :ke :or no-a 'yi :kma :koan 'gabaa 'do :Gwlor :baa'-a' dhih bo.

¹³'Mor 'ye 'Wlufor, :or no-a nyor 'de :Gwlor :baa'-a' deh 'di, 'dekorn: or 'de :or pobo-a 'o 'on bo dih, :eh gweh-a 'on-de :ke.

¹⁴'Mor 'ye :Asin'klitor-: 'Flehgorn-: 'Hormi-: :Patloba'-: 'Horma-: 'dekorn: 'Klae :de-di'-boi' :noo' :on :ne-a 'de on bo :ke.

¹⁵'Mor 'ye 'Filolo'gor-: :Julia'-: :Nilior'-: 'dekorn: or-a'a: 'de-di'-nynor-kpao'-: 'dekorn: :Olinpa'-: 'dekorn: Nyorsoa-nyor⧾-a' klehkpeh :on :ne-a 'de on bo-:.

¹⁶A 'kpa 'de a 'bei' :bhluun'⧾-' :due' :due', a 'ye-uh' :gble-dih: 'de :porluh⧾-a' :vlehehn'-' :gweh ka 'di. 'Klae-a' 'chore-nyor⧾-a' klehkpeh 'da, mo-: 'ye a-uh.

¹⁷:Yee' 'an 'Klae :de-di'-boi'-a:, 'an bale a 'weh, a 'dhu a-a' 'jeh :dhororn', 'do :yuh :an ya-a 'de nyor⧾-' :gble-eh, :an vorn-a deh⧾ 'on :torne: a-uh bo, 'de :an no-eh, 'de nyor⧾-a 'tali:-a 'Klae-a' dhih 'jeh-' :po-eh dih. A :tehn-dih: nyor⧾ :dao' bo dih.

¹⁸Deh no-eh, nyor⧾ :on :ne :ao', eh :se :a-a' :Gwlor :baa' 'Klae-a' 'bhoi-yu-deh:, on :se-' no. Jorwor: an-a' 'jeh 'yor-eh-a' 'bhororn'-deh:⧾ 'o an no. Worn :nmor-wlu⧾-: 'dekorn: nyor⧾ 'sleh dih :po-dih-eh-: me-: an no, 'de an bo-dih nyor⧾ dih :on :korn-a :porluh:⧾ :se-a dih ku.

¹⁹Nyor⧾-a' klehkpeh yubo-eh', :ka a dhe-a 'o Nyorsoa-a' wlu dih. Eh-: no-eh, 'de 'on 'yi-dih: 'mona-' dih, 'do a-a' dhih bo. Jorwor: 'an 'bhorn a 'ye :toror' :korn-nyor⧾ no, 'do deh 'jeh neh bo. 'De 'on :se-' 'bhorn deh⧾-zon⧾ 'ye a dih :bo-dih:, 'de a 'ye-ih' no.

²⁰Nyorsoa :or 'nyi-a :a wlu-' dih 'worn-eh, or :se 'o :gwle i, or 'ye-eh' no, a 'ye 'ku dih :wa-dih: 'de a-a' :buhbuh⧾ 'zorn. 'Nyi :a-a' :Gwlor :baa' :Yusu'-a' mla :ne 'o a bo.

²¹:Timehte' :or no-a 'on 'be :koan: :no-nyor, or 'da, or-: 'ye a-uh, 'dekorn: 'Lusior-: 'Jesorn-: :korn :Sosepa'tor-: :on no-a 'on 'bei' :Jueh'-nyor⧾.

²²'Torsior: :or 'chle-a 'chlee-deh: :daa 'do 'on bo, or 'da, or-: 'ye a-uh, 'de :Gwlor :baa'-a' 'nyne 'di.

²³'Geyeh: :or :korn-a 'bli 'gbu 'di, 'on :dhe-a dih, 'de 'chore-a' klehkpeh 'gbon-dih-a 'de, or 'da, or-: 'ye a-uh. :Ila'tor: :or no-a 'kwi :gwlor :daa, or-a' 'wlii-a' dih :dhe-nyor, 'dekorn: :a-a' 'Klae :de-di'-nyor-kpalu: 'Kwator-: on 'da, mo-: 'ye a-uh :ke o. [

²⁴'Nyi :a-a' :Gwlor :baa' :Yusu' 'Klae-a' mla :ne 'o a-a' klehkpeh bo o. 'Ka-: eh 'ye :ne.]

²⁵A 'nyi :a 'nyi Nyorsoa dhih-a' 'i 'beh-a', :or 'beh-dih-eh :or 'ye-eh' no, 'de a 'ye-a' dih :nyna deh 'jeh, 'do tubo-wlu:⧾ 'jeh 'on po-a bo, :en kor-a :Yusu' 'Klae 'i. Tubo-wlu:⧾ 'jeh :daa, me-: no 'slan :or 'zile:-a :dee' see, 'de :or :to-dih-eh: :a 'i :naa.

²⁶:Kana :naa eh :to-dih-eh: :a 'i, 'de Nyorsoa-a' wele-eh: :po-nyor⧾-a' 'chlee-deh⧾ 'di. 'De mor 'kmo :sie: Nyorsoa 'nyi 'tele', 'de 'dawor'⧾-dlu⧾-a' klehkpeh 'ye-eh' yubo:, 'de on 'ye or-a' dhih dhih 'jeh-' po, 'de on 'ye 'o or-a' 'tele' dih dhe.

²⁷A 'nyi :a 'nyi :a-a' :toror' :korn-Nyorsoa :due' :daa, dhih-a' 'i 'beh-a', :eh :yi-dih:-a :Yusu' 'Klae-', :ka ti-a mu-a 'dlu-' :tehn. 'Ka-: eh 'ye :ne.