Read Eastern Krahn Wloon-chlee-deh: 2 Bible Online

Wloon-chlee-deh: 2 - Eastern Krahn bible

Wloon-chlee-deh: 2

¹:Yee' 'do eh-a' dha, :mor :mloror', :on :se 'o :bhor, :mor :or chehn-a nyor :noror'-a' zabe 'i 'suh. Deh no-eh, :ka :an no-a on 'bei'-a' zabe-a' 'i chehn-a', :yee' zabe kpon :on 'weh :ke. Deh no-eh, :mor :or chehn-a :on 'be-a' zabe 'i deh :dao', :an-a' 'jeh 'yor-eh no deh :ne-a :due' 'weh :ke.

²:A yubo-eh', nyor⧾ :an no-a deh⧾ :daa :en :ne :ao', Nyorsoa zi an-a' zabe 'weh, 'de 'yi 'sleh ka 'di.

³:Mor :gwlor-nyor: :daa, :or chehn-a nyor⧾ :an no-a deh⧾ :daa, an-a' zabe 'i, jorwor: :an-a' 'jeh-a no-ih' :ke, :yee' :mor :on :taa 'ye, :yee' :an mu 'o dih :sie: 'do Nyorsoa-a' zabe: :zi-eh bo :e?

⁴:Ae' :on :vlehn Nyorsoa-a' :porluh-a' 'yi dih :nmor-eh: :doru' 'weh ke, :or-a' 'dhobo:-a or-a' chehn-a nyor⧾-a' zabe 'i, 'de :or kpon-a :porluh dih 'gabaa? 'De mor :on se-eh yubo: :ka Nyorsoa-a' :porluh-a' 'yi dih :nmor-eh: :daa, eh jli-a :on, :on 'ye-a' dih 'bili: 'de :on 'ye-a' :an-a' deh⧾-zon⧾ dih 'tali: :e?

⁵Jorwor: :an-a' 'dlu-a' :kmu-a'-: 'dekorn: :an-a' :porluh se dih 'bili-eh :korn-:, me-: mu-eh :no, 'de Nyorsoa 'ye :on 'kle 'ye-eh: 'dlu po, eh 'ye 'o ken dih :zi, 'do zorn or mu-a or-a' 'chehn-yuba nyor⧾ 'i :to-dih:, 'de or 'ye-a or-a' 'yi 'sleh-zabe zi, 'do 'we-eh: :dao' 'di.

⁶Or mu nyor⧾-a' klehkpeh geli' :za :due' :due' 'do an-a' noo-deh⧾ on no-a bo.

⁷Nyor⧾ :on se-a sea-a' :korn 'do deh⧾ 'jeh ne-a' no-a' bo, an 'bhorn dhih-a' 'i 'beh-a'-: deh-' 'ye-eh-: 'dekorn: 'kmo :sie: :febeh' 'kwla⧾-' dih, an-a' 'jeh :dao', mo-: Nyorsoa-a mu 'kmo :sie: :febeh' 'nyi-:.

⁸Jorwor: nyor⧾ :an zi-a on :due'-a' dhih, 'de :on po-a dhih-a' 'yor-eh dih, 'de :an zi-a 'o deh⧾-zon⧾ klei', mo-: Nyorsoa-a mu 'chehn-' 'kpa-dih:, or 'ye an-a' zabe zi 'gabaa.

⁹:Gwlor-nyor⧾-a' klehkpeh 'tene' :kpeen:, :an no-a deh⧾-zon⧾, an mu 'kle 'ye-eh-: 'dekorn: 'worn dih 'beh-eh-: 'ye-:. :Jueh'-nyor:⧾, mo-: :an mu :zai'-nyor⧾ :no, 'de :yuh :on :se-a :Jueh'-nyor:⧾, on 'ye 'o 'kpa :ke.

¹⁰Jorwor: nyor⧾-a' klehkpeh :an no-a deh⧾ 'jeh ne, an mu dhih-a' 'i 'beh-a'-: deh-' 'ye-eh-: 'dekorn: :porluh-a' dih 'pehn-eh-: 'ye-:. :Jueh'-nyor:⧾, mo-: :an mu :zai'-nyor⧾ :no, 'de :yuh :on :se-a :Jueh'-nyor:⧾, on 'ye 'o 'kpa :ke.

¹¹Deh no-eh, Nyorsoa-a' :za :gwie-for :due'.

¹²Nyor⧾-a' klehkpeh :on se-a :Mose'-a' 'tele' 'ble, 'de :an no-a deh⧾-zon⧾, an mu gbe :zie: 'gboror:. :Yee' :Jueh'-nyor:⧾ :on 'ble-a :Mose'-a' 'tele', 'de :an no-a deh⧾-zon⧾, an-a' zabe-a mu :zi-eh: :ka 'tele' no-a mu-a'.

¹³Deh no-eh, eh :se nyor⧾ :on 'worn-a 'tele' :daa, mo-: 'dhu 'yi 'sleh-nyor⧾-' 'do Nyorsoa ybei' :deh, jorwor: :yuh :on dhe-eh 'o dih, mo-: Nyorsoa-a mu 'yi 'sleh-nyor⧾ 'da-dih:.

¹⁴:Mor eh 'dhu, nyor⧾ :on :se-a :Jueh'-nyor:⧾ :on se-a :Mose'-a' 'tele' 'ble, 'de deh⧾ an no-a, :en 'wluh-a 'o an-a' 'jeh-a' :porluh⧾ ken, en 'ye deh⧾ 'tele' 'da-a gweh, :yee' on 'ble 'tele' 'weh 'gboror:.

¹⁵Deh no-eh, an-a' kplen :to-dih: :a 'i, :ka deh⧾ :Mose'-a' 'tele'-a 'da-a, en 'chle-eh 'do an-a' :porluh⧾ ken. An-a' :porluh⧾-a' 'jeh, me-: :to-dih-eh :a, 'i :ka en 'dhu-a dhih 'jeh-' :ke. Deh no-eh, an-a' :porluh⧾-a zela-uh :gwluhuh', :mor on no deh-zon, 'de :porluh:⧾ :ne-a :due', me-: :an zela-uh :gwluhuh' :mor on no deh 'jeh.

¹⁶:Yee' tubo-wlu:⧾ 'jeh 'an po-a, en 'dae:, Deh⧾ :daa en mu :no-eh: 'do 'we-eh: Nyorsoa-a mu-a :Yusu' 'Klae-' :yi-dih:, 'de or 'ye-a' deh⧾ :gwlor-nyor⧾ 'zile:-a 'do on :porluh⧾ ken, en-' zabe zi.

¹⁷:Yee' :mor :mloror' :an 'da-dih :an-a' 'jeh :Jueh'-yu:, 'de :on dhe :Mose'-a' 'tele' :gwlii'. :An 'beh-dih :an-a' 'jeh 'i, :ka :on :korn-a 'de Nyorsoa bo.

¹⁸:Mose'-a' 'tele' :torne: :on Nyorsoa-a' 'ton :korn-deh-: 'dekorn: deh 'jeh neh-a' gan-a'-: 'weh.

¹⁹:An 'da-dih :an-a' 'jeh 'doror'-nyor⧾-a' :na-dih-nyor:, 'de :on 'da :on no zorn-pli 'do :yuh :on :ne-a 'de :kule-' bo.

²⁰:An 'da-dih :an-a' 'jeh se :toror' :korn-nyor⧾-a' deh :torne-nyor, 'de :on 'da :on no 'nynuu: :nyene' :on 'see-a deh 'chean', an-a' deh :torne-nyor. Deh no-eh, :on 'da, :Mose'-a' 'tele' :daa, eh 'yi-dih: :toror'-: 'dekorn: dhih-a' 'yor-eh-: dih.

²¹:Yee' :mor :yor no-a, :or torne-a nyor⧾ :noo' deh, :eh :korn dhih, 'de :an-a' :torne: :an-a' 'jeh deh :ke :eh? :Mor :yor zela-a nyor⧾ :gwluhuh' on :ne-a' 'yli, :eh :korn dhih, 'de :an 'yli :ke :eh?

²²:Mor :yor no-a nyor⧾-a' :no-' 'nyne :zaan', :eh :korn dhih, 'de :an no 'nyne :zaan' :ke :eh? :Mor :yor wlu-dih-a zuu⧾ 'bhun dih, :eh :korn dhih, 'de :an 'yli 'de zuu⧾-a' 'sla⧾ 'zorn :ke :eh?

²³:Mor :yor 'beh-dih-a :an-a' 'jeh 'i :ka :on 'ble-a Nyorsoa-a' 'tele', :eh :korn dhih, :an ya Nyorsoa-a' 'nyne dhen bo, 'do or-a' 'tele'-a' wa 'da :ke :eh?

²⁴Eh 'chle-eh:-' 'de Nyorsoa-a' 'chlee-deh 'di, eh 'da, A :mor :Jueh'-nyor:⧾, a :mor no-eh, 'de nyor⧾ :on :se-a :Jueh'-nyor⧾, an wlu-dih Nyorsoa-a' 'nyne 'bhun dih, 'de on 'klu-'.

²⁵:Mor :on dhe 'o :Mose'-a' 'tele' dih, :yee' :an-a' :bhlororn' 'meh-eh 'kpa deh ken. Jorwor: :mor :on wa 'tele', :yee' :on gweh se :bhlororn' 'meh-nyor:.

²⁶:Mor eh 'dhu nyor :or se-a :bhlororn' 'meh, 'de or 'ye 'o :Mose'-a' 'tele' dih dhe, :yee' Nyorsoa :se-or' :bhlororn' 'meh-nyor⧾ :zlo-dih: i :e?

²⁷:Yee' :yor :or se-a :bhlororn' 'meh, 'de :or dhe-a 'o :Mose'-a' 'tele' dih, or mu :mor :yor 'ble-a 'tele' :daa :eh 'chle-eh, 'de :or 'meh-a :bhlororn', 'de :or wa-a :Mose'-a' 'tele' 'gboror:, :an-a' zabe 'i :chehn.

²⁸:Mor eh 'dhu nyor no :Jueh'-yu, 'do or-a' yau ken :due', :yee' or :se :Jueh'-yu: 'jeh :nor, 'de mor :bhlororn' 'meh-eh: :eh :ne-a 'o yau ken :due', eh :se :bhlororn' 'meh-eh: 'jeh :neh :ke.

²⁹Jorwor: nyor :or 'dhu-a :Jueh'-yu-' 'de or 'di, or-: 'dhu :Jueh'-yu: 'jeh nor-', 'de :bhlororn' 'meh-eh: 'jeh neh no :bhlororn' 'meh-eh 'do :porluh ken, :eh 'wluh-a 'de Nyorsoa-a' :Zulu bo, :eh :se-a 'de :Mose'-a' 'tele' :eh 'chle-eh bo 'wluh. Eh :bo-nyor: :dao', or-a' dhih bo :po-eh se 'de :gwlor-nyor⧾ bo 'wluh, jorwor: eh 'wluh 'de Nyorsoa-a' 'jeh 'yor-eh bo.