Read Eastern Krahn Wloon-chlee-deh: 3 Bible Online

Wloon-chlee-deh: 3 - Eastern Krahn bible

Wloon-chlee-deh: 3

¹:Yee' :mor nyor 'dhu :Jueh'-yu-', :yee' deh 'i-deh-kpih: or 'ble nyor :noror' se 'ble :eh? Deh 'i-deh: :bhlororn' 'meh-eh: mu-or 'o :po :eh?

²Keen' 'jeh ka, eh 'nyi-or deh 'de 'for⧾-a' klehkpeh bo. :Zai'-deh: Nyorsoa po 'de or-a' tubo-wlu⧾ 'de on 'kwa.

³:Yee' :mor an-a' nyor⧾ :noo' se-eh dhih 'jeh-' po, eh-: mu Nyorsoa-a' :dhehehn-deh dih :gweh :e?

⁴'Kei o. :Mor eh 'dhu :gwlor-nyor⧾-a' klehkpeh no sih 'tmo-nyor⧾, :yee' :a :mor :mloror', :a yubo-eh', Nyorsoa no dhih 'jeh-' :za-nyor:, :ka eh no-a 'chle-eh 'de or-a' 'chlee-deh 'di, eh no-a, :Gwlor-nyor⧾-a mu-eh 'ye-: :ka or-a' wlu :se-a sih. :Yee' or mu 'gen :korn 'do zabe: :zi 'da.

⁵Nyor⧾ :noo' 'da, :a-a' deh⧾-zon:⧾ :no-eh:, eh-: :to-dih-eh nyor⧾ 'i deh 'jeh, :ka Nyorsoa no-a 'yi 'sleh-nyor 'gabaa. :Yee' :mor eh :ne :ao', :yee' :a mu :ao', Nyorsoa no :bhuli'-nyor: 'do 'kle 'ye-eh: or po-a :a 'dlu :e? ('Ka-: :gwlor-nyor:⧾ :noo'-a no dhobo-eh.)

⁶'Kei o. :Mor eh 'dhu, Nyorsoa no :bhuli'-nyor, :yee' :kaa or mu 'bluhba-a' zabe: :zi-eh :no :eh?

⁷Nyor :noror'-a mu dhobo: 'bla, or mu :ao', :Mor 'an sih 'tmo-eh :to-dih-eh nyor⧾ 'i :ka Nyorsoa no-a 'yi 'sleh-nyor 'jeh ka, 'de eh 'ye-or' dhih-a' 'i 'beh-a' :doru' 'nyi, :yee' dhih Nyorsoa zi 'an zabe, 'de or 'da-dih 'on deh⧾-zon:⧾ :no-nyor 'gboror: :eh?

⁸:Yee' :eh :korn dhih 'da, 'de :a-a' no, A 'nyi :a no deh⧾-zon⧾, 'de deh⧾ 'jeh 'ye 'de en bo 'wluh, :ka nyor⧾ :noo'-a no-a :a-a' deh⧾-zon⧾ 'bhun dih :za-dih-eh-', on no-a, :a :mor 'da :ao'. Jorwor: nyor⧾ :an no-a deh⧾ :dao', Nyorsoa-a mu an-a' zabe 'i :chehn. Deh no-eh, on 'bhorn-eh-: dih.

⁹:Yee' :kaa :a mu 'da-: :naa :eh? :A :mor :Jueh'-nyor:⧾, :a 'kpa deh ken 'gabaa, :eh :zi 'o nyor⧾ :on :se-a :Jueh'-nyor⧾ :e? 'Kei o. 'On zela: a :gwluhuh' 'weh see, :ka :Jueh'-nyor⧾-: 'dekorn: nyor⧾ :on :se-a :Jueh'-nyor⧾-: an-a' klehkpeh, on :ne-a 'o deh⧾-zon⧾-a' 'kpih 'zorn.

¹⁰:Ka eh no-a 'chle-eh 'de Nyorsoa-a' 'chlee-deh 'di, eh no-a, Eh se 'yi 'sleh-nyor :due'-beh :korn.

¹¹Eh se nyor :due'-beh :korn :or 'ye-a' Nyorsoa-' dih 'worn. Eh se nyor :due' :korn :or 'ye-a' Nyorsoa 'kwla⧾-' dih 'bhorn.

¹²Nyor⧾-a' klehkpeh :to Nyorsoa 'kpuh ya. An-a' klehkpeh :po-eh: :dha :due', on se deh-' 'dhu-eh:. Eh se nyor :korn :or 'ye-a' deh 'jeh no. Eh se nyor :due'-beh :korn.

¹³Deh⧾ an za-a-', en ya 'de 'meh-a'. An-a' :meo:, mo-: an no, an bo-dih nyor⧾ dih. On 'ble gu-ni: 'do on :meo ken, :en gweh-a sehn-a' gu-ni 'i.

¹⁴'Jlei-zon:⧾ :ne 'de on 'worn.

¹⁵An 'dhobo buh⧾-', on 'ye nyor⧾ 'dba.

¹⁶:Mor on :zi-dih: dha, :yee' deh⧾-a' 'kor-a'-: 'dekorn: nyor⧾ 'kle 'ye-dih-eh-: me-: :an sie 'o on 'gor bo.

¹⁷Deh on 'ye-a' no, 'de nyor⧾ 'ye-a' wlu-' dih 'worn-eh 'ble, on se-eh yubo:.

¹⁸Nyorsoa-a' :fano: :ple-eh :se 'de on 'di :ne.

¹⁹:Yee' :a yubo-eh', deh⧾-a' klehkpeh :Mose'-a' 'tele' 'da-a, en :korn 'de nyor⧾ :on :ne-a 'o eh 'zorn bo, 'de nyor-beh :ne 'o :bhor, 'de Nyorsoa-a' zabe 'ye nyor⧾-a' klehkpeh :on :ne-a dha yao 'zorn kpon.

²⁰:Yee' Nyorsoa :se-' nyor 'yi 'sleh-nyor 'da-dih: i 'do or ybei', 'do :Mose'-a' 'tele'-a' dih :dhe-eh bo. Jorwor: 'tele' :daa, eh-: no-eh 'de :a yubo: deh⧾-zon⧾ bo dih.

²¹Jorwor: :kana :naa, :ka Nyorsoa-a no-a nyor⧾ 'yi 'sleh-nyor⧾ 'da-dih-eh, eh-: or :to-dih: :a 'i. 'De mor, eh se :Mose'-a' 'tele' 'i kor. 'Yi 'sleh-deh: :daa, :Mose'-a' 'tele'-: 'dekorn: Nyorsoa-a' wele-eh: :po-nyor⧾-: on :za eh-a' dhih-' 'weh.

²²:Yusu' 'Klae-a' dhih 'jeh-' :po-eh:, eh-: no-eh, 'de Nyorsoa 'da-dih nyor⧾ 'yi 'sleh-nyor⧾. Nyorsoa-a' :za :gwie-for :due'.

²³Deh no-eh, nyor⧾-a' klehkpeh, on no deh⧾-zon⧾ 'weh, 'de on :tehn-dih: Nyorsoa-a' dhih-a' 'i 'beh-a' bo dih.

²⁴Jorwor: Nyorsoa-a' mla or po-a :a bo yaa'e, or-: no-eh 'de Nyorsoa 'da-dih-uh 'yi 'sleh-nyor⧾, :or :yi-dih:-a :Yusu' 'Klae-' :or zelie-uh-a.

²⁵Nyorsoa :to 'o :Yusu' or 'ye 'meh, eh 'ye Nyorsoa gban 'i 'dhu, 'de :mor nyor po :Yusu'-a' dhih dhih 'jeh-', or-a' deh⧾-zon⧾-a' dhih 'ye bo 'ma-dih-eh:. Or no deh :daa 'weh, nyor⧾ 'ye-eh yubo: :ka or 'sleh-a 'i. Or kpon :porluh dih :zai', 'do :tehn 'i-nyor⧾ bo, 'de or :se-uh' 'kle 'ye-eh 'dlu po, an-a' deh⧾-zon⧾-a' dhih.

²⁶Jorwor: :kana :naa, or 'da-dih nyor⧾-a' klehkpeh :on po-a :Yusu'-a' dhih dhih 'jeh-' 'yi 'sleh-nyor:⧾. Eh-: :to-dih: :a 'i, :ka or-a' 'jeh 'yor-eh 'dhu-a 'yi 'sleh-nyor-'.

²⁷:Yee' :eh :korn dhih :a 'beh-dih: :a-a' 'jeh 'i :naa :eh? Eh se 'nyne :korn. :Eh :korn dhih :oo' :eh? 'Do :Mose'-a' 'tele'-a' dih :dhe-eh: :e? 'Kei o. 'Klae-a' dhih 'jeh-' :po-eh: 'o.

²⁸Eh-a' dhih, :a yubo-eh' :ka nyor :or po-ih-a dhih 'jeh-', Nyorsoa 'da-dih-or 'yi 'sleh-nyor, eh :se 'o :Mose'-a' 'tele'-a' dih :dhe-eh:.

²⁹Nyorsoa :daa, or no :Jueh'-nyor⧾-a' Nyorsoa 'klein' :e? Or :se nyor⧾ :on :se-a :Jueh'-nyor⧾-a' Nyorsoa :ke :e? 'Kei o. Or no nyor⧾ :on :se-a :Jueh'-nyor⧾-a' Nyorsoa 'weh :ke o.

³⁰Deh no-eh, Nyorsoa :due' 'klein'. Or-a' 'jeh :dao', or mu nyor⧾ :on 'meh-a :bhlororn', 'yi 'sleh-nyor⧾ 'da-dih:, 'do an-a' dhih 'jeh-' :po-eh bo, 'de or 'ye nyor⧾ :on se-a :bhlororn' 'meh, 'yi 'sleh-nyor⧾ 'da-dih: :ke, 'do dhih 'jeh-' :po-eh: :ne-a :due' bo.

³¹:Yee' :a 'duo: dhih 'jeh-' :po-eh: :daa 'weh, eh 'ye :Mose'-a' 'tele' dih gweh :e? 'Kei o. Jorwor: :a-a' dhih 'jeh-' :po-eh:, eh-: 'ye :Mose'-a' 'tele' dih :ku-dih:.