Read Eastern Krahn Wloon-chlee-deh: 4 Bible Online

Wloon-chlee-deh: 4 - Eastern Krahn bible

Wloon-chlee-deh: 4

¹:Yee' :kaa :a mu 'da-: 'do 'Eble'hehn: :or no-a :a :bai'-a' :baa', dhih bo :eh? Deh or 'ye 'de dhih :daa 'di :eh?

²:Mor eh 'dhu, deh⧾ 'Eble'hehn-a' 'jeh 'yor-eh no-a, en-' dhih-', 'de Nyorsoa 'ye-or' 'yi 'sleh-nyor 'da-dih:, :yee' or 'ble deh :eh 'ye-a or-a' buh⧾ 'i 'beh-dih: :dee'. Jorwor: eh :se 'o Nyorsoa ybei' :ka.

³:Yee' :kaa Nyorsoa-a' 'chlee-deh 'da :eh? Eh 'da, 'Eble'hehn po Nyorsoa-a' dhih dhih 'jeh, 'de or-a' dhih 'jeh-' :po-eh no-eh, 'de Nyorsoa 'da-dih-or 'yi 'sleh-nyor.

⁴:Yee' :mor nyor no :koan, or-a' geli' :za-dih-deh:, :an-a' :zlo-dih-eh:-' 'nyii'-deh, jorwor: :zlo-dih-eh or-a' :kororn-deh, deh no-eh, or no eh-a' :koan 'weh.

⁵Jorwor: nyor :or se-a or-a' 'jeh 'yor-eh-a' noo-deh⧾ :gwlii' dhe, 'de :or dhe-a Nyorsoa :or no-eh 'de deh⧾-zon:⧾ :no-nyor⧾-a no-a 'yi 'sleh-nyor⧾ :gwlii', eh :bo-nyor: :dao', or-a' dhih 'jeh-' :po-eh no-eh, 'de Nyorsoa 'da-dih-or 'yi 'sleh-nyor.

⁶:Debe' :za deh :due' :dao' 'weh :ke, ti or 'ye-a nyor Nyorsoa 'da-dih-a 'yi 'sleh-nyor, or-a' :bhorlie'-a' dhih-' :za, :eh se-a :koan: or no-a 'i kor, ti or no-a,

⁷:Bhorlie' 'do nyor⧾ :dao' bo, :on :korn-a 'kulu-kplen-a' dhih Nyorsoa 'ma-dih:-a bo, :on :korn-a deh⧾-zon⧾ Nyorsoa :za 'o :gwie 'i.

⁸:Bhorlie' 'do nyor :dao' bo :or :korn-a deh⧾-zon:⧾ :Gwlor :baa' :se-a' :zlo i 'do or 'dlu :neheh'.

⁹:Yee' :bhorlie' :daa, eh :korn 'de :bhlororn' 'meh-nyor⧾ :due' bo :e? 'Kei o. Eh :korn 'de nyor⧾ :on se-a :bhlororn' 'meh bo :ke. :A za-eh' 'weh, :a 'da, 'Eble'hehn-a' dhih 'jeh-' :po-eh: no-eh, 'de Nyorsoa 'da-dih-or 'yi 'sleh-nyor.

¹⁰Ti :yihih :eh Nyorsoa 'da-dih-or 'yi 'sleh-nyor :eh? Ti or 'meh-a :bhlororn' :e? :Ae' ti or 'see-a :bhlororn' 'meh ke? Eh :se ti or 'meh-a :bhlororn', jorwor: ti or 'see-a :bhlororn' 'meh-dih :oo'.

¹¹:Yee' 'Eble'hehn-a' :bhlororn' 'meh-deh no nyor⧾ 'i :to-dih-deh: :ka Nyorsoa 'da-dih-or 'yi 'sleh-nyor, 'do or-a' Nyorsoa-a' dhih 'jeh-' :po-eh bo, ti or 'see-a :bhlororn' 'meh. :Yee' eh-a' dhih, or-: no :baa' 'do nyor⧾-a' klehkpeh :on Nyorsoa-a 'da-dih-a 'yi 'sleh-nyor⧾, 'do an-a' dhih 'jeh-' :po-eh bo, keen' :mloror' on :se-' :bhlororn' 'meh.

¹²'De or no :baa' 'do :bhlororn' 'meh-nyor⧾ bo :ke, :on kpa-a dhih 'jeh-' :po-eh-a' :gwie: :eh 'Eble'hehn kpa-a, 'de or mu-a :bhlororn' 'meh-:.

¹³Eh :se 'Eble'hehn-a' dhe 'o :Mose'-a' 'tele' dih-dhih: Nyorsoa :se-' or-a' wlu :dhama'-' po, 'do or-: or-a'a: 'nynuu-a' 'nynuu-: bo, 'bluhba⧾-a' klehkpeh 'ye 'de on bo :korn. Jorwor: deh no-eh or po Nyorsoa-a' dhih-' dhih 'jeh, 'de Nyorsoa 'da-dih-or 'yi 'sleh-nyor, eh-: no-eh, 'de Nyorsoa po or-a' wlu :dhama'-' 'do or bo.

¹⁴:Mor eh 'dhu, deh :korn-a wlu Nyorsoa po-a :dhama'-', 'de or 'ye-eh' nyor⧾ :on :ne-a 'o :Mose'-a' 'tele' 'zorn 'nyi, :yee' dhih 'jeh-' :po-eh se deh-' 'dhu-eh:, 'de deh se 'de Nyorsoa-a' :dhama'-a' :po-wlu: :dao' 'di :ne.

¹⁵:Mose'-a' 'tele' :daa, eh-: :ya 'de Nyorsoa-a' 'chehn-yuba. Jorwor: :dha 'tele' :se-a :ne, 'tele'-a' wa-a' se 'o :ne.

¹⁶:Yee' Nyorsoa-a' wlu-a' :dhama'-' :po-eh 'wluh 'de dhih 'jeh-' :po-eh bo, 'de deh⧾-a' klehkpeh 'ye 'de or-a' mla bo 'wluh. Eh :se 'Eble'hehn-a' 'nynuu-a' 'nynuu: :on :ne-a 'o :Mose'-a' 'tele' 'zorn :due', mo-: Nyorsoa-a' :dhama'-' :po-wlu :korn 'de bo :deh, jorwor: an-a' klehkpeh :on po-eh dhih 'jeh-' :ka 'Eble'hehn no-a :ke, mo-: on :korn 'de bo :ke. Deh no-eh, or no :a-a' klehkpeh :baa'.

¹⁷:Ka eh no-a 'chle-eh: 'de Nyorsoa-a' 'chlee-deh 'di, or no-a, 'Mor no :on 'dawor'⧾-dlu:⧾ :dhulu' :baa'. :Yee' 'Eble'hehn no :a :baa' 'do Nyorsoa ybei'. Or po Nyorsoa :daa, or-a' dhih dhih 'jeh :or 'nyi-a 'meheh'-nyor⧾ :febeh', 'de :mor or 'da, 'Nyi deh :daa, eh :ne, :yee' eh :ne-a.

¹⁸Nyorsoa po 'nynuu-a' 'nynuu: :dhulu'-a' wlu :dhama'-' 'de 'Eble'hehn bo. Keen' :mloror' nyor se-eh :gwlii' :dhe-eh 'beh-dih:, 'de 'Eble'hehn po-eh dhih 'jeh-' 'gboror:. Eh-: no-eh, 'de or no :baa' 'do 'dawor'⧾-dlu:⧾ :dhulu' bo.

¹⁹:Yee' 'Eble'hehn-a' dhih 'jeh-' :po-eh ku-: dih 'gboror: keen' :mloror' or 'beh-dih: or 'ye zon⧾-a' :kehehn' :due' 'ble, 'de or yubo-eh :ka or ne-a, 'de or :se-a 'yu 'wluh-nyor :neheh', 'de or yubo-eh :ke, :ka :Selor' :sie:-a :zlama, 'de or-a' :gbano: :za-ti zi-a :ke.

²⁰Jorwor: or po-ih dhih 'jeh 'gboror:, 'de or-a' :porluh :se-' dhobo: 'do Nyorsoa-a' :dhama'-' :po-wlu bo, jorwor: or-a' dhih 'jeh-' :po-eh :ku-dih-or-: dih. 'De or 'nyi Nyorsoa dhih-a' 'i 'beh-a'.

²¹Deh no-eh, or yubo-eh' deh 'jeh, :ka Nyorsoa 'ble-a 'kpih or 'ye-a' deh :korn-a wlu or po-a :dhama'-' no.

²²Eh-: :korn dhih :oo', 'de or-a' dhih 'jeh-' :po-eh no-eh, 'de Nyorsoa 'da-dih-or 'yi 'sleh-nyor.

²³Nyorsoa-a' wlu⧾ :daa, :en 'chle-eh, 'de :en 'da-dih:-a 'Eble'hehn 'yi 'sleh-nyor, en se 'de or :due' bo :korn.

²⁴Jorwor: en :korn 'de :a bo :ke, :a :mor Nyorsoa-a mu-a 'yi 'sleh-nyor⧾ :zlo-dih:, 'de :or po-a or-a' dhih dhih 'jeh, Nyorsoa :or :za-a: 'de :a-a' :Gwlor :baa' :Yusu' 'de nma-dih-deh 'di.

²⁵Nyorsoa :za :Yusu' 'kwla 'weh or 'ye 'meh, 'do :a-a' deh⧾-zon⧾-a' dhih bo. 'De or za-or 'de nma-dih-deh 'di, 'de :a 'ye 'yi 'sleh-nyor⧾ 'da-dih-eh: 'do Nyorsoa ybei'.