Read Eastern Krahn Wloon-chlee-deh: 5 Bible Online

Wloon-chlee-deh: 5 - Eastern Krahn bible

Wloon-chlee-deh: 5

¹:Yee' 'do eh-a' dha, :ka :a-a' dhih 'jeh :po-eh no-eh, 'de Nyorsoa 'da-dih-a :a 'yi 'sleh-nyor⧾, :yee' :a-a' :Gwlor :baa' :Yusu' 'Klae :oo', or-: no-eh, 'de :a :mor-: Nyorsoa-: :a 'worn-eh: wlu-' dih.

²:A-a' dhih 'jeh-' :po-eh no-eh, 'de :Yusu' :za :gwie 'do :a bo, :a 'ye Nyorsoa-a' mla :a :ne-a 'de 'di :naa 'ye. 'Mona-a: no :a-uh, :ka :a pobo-a 'de :gwie 'i, :a 'ye-a 'for 'ble, 'de Nyorsoa-a' dhih-a' 'i 'beh-a' 'di.

³:Yee' eh :se eh :due', jorwor: :a no 'mona 'weh, 'de :a-a' 'kle 'ye-eh 'di :ke. Deh no-eh, :a yubo-eh', 'kle 'ye-eh: no-eh, 'de :a-a' sea.

⁴:Yee' :mor :a se sea-a' 'ble, :yee' eh-: no-eh, 'de :a 'ble kplen 'jeh ne. 'De kplen 'jeh ne-a' no-a', eh-: ya 'de deh :gwlii' :dhe-eh.

⁵'De deh :gwlii' :dhe-eh-a' :no-dih: :a dhen. Deh no-eh, Nyorsoa 'nyi :a or-a' Gban 'i :ne :Zulu:, :on po-a 'o or-a' :ybeh-a' 'do :a-a' :porluh⧾ ken.

⁶'Do ti 'jeh 'i :oo', 'Klae 'meh-dih:, ti :a se-a :a-a' 'jeh-a' :za-dih-eh 'beh-dih:, 'do :a :mor :or se-a Nyorsoa deh-' 'ye-eh 'nyi, :a-a' dhih bo.

⁷Eh no 'yi :kma-deh: nyor 'ye 'meh 'do 'yi 'sleh-nyor-a' dha. Jorwor: nyor :noror'-a mu :gwluhuh' ku 'bla, or 'ye 'meh 'do nyor 'jeh-a' dha.

⁸Jorwor: 'Klae 'meh-' 'do :a-a' dhih bo, ti :a 'si-a 'o deh⧾-zon⧾-a' no 'da. 'Ka-: 'o Nyorsoa no :a-a' :torne-eh :ka or :ybeh :a-uh' 'gabaa.

⁹:Yee' :ka :Yusu' 'Klae-a' 'meh-a' no-eh :naa, 'de Nyorsoa-a 'da-dih-a :a 'yi 'sleh-nyor⧾, :yee' :a yubo-eh' deh 'jeh, :ka :Yusu'-a mu-a 'o :a Nyorsoa-a' 'chehn-yuba 'zorn :za.

¹⁰:Yee' Nyorsoa :a 'nyeh-a :dee', or-a' 'Yu-a' 'meheh'-deh:, eh-: no-eh, 'de :a :ne or 'woorn-dih: wlu-' dih :naa. :Yee' :mor eh :ne :ao', :yee' :a yubo-eh' deh 'jeh, :ka or-a' 'Yu-a' 'kmo :ne-eh mu-eh :no, :a 'ye-a' 'puh.

¹¹Jorwor: eh :se en-' klehkpeh. Nyorsoa :yi-dih: :a-a' :Gwlor :baa' :Yusu' 'Klae-', 'de :a no 'mona. Deh no-eh, or-: no-eh, 'de :a :ne-Nyorsoa 'worn-eh: wlu-' dih :naa.

¹²:Yee' nyor :due', or-: :ya 'de deh⧾-zon⧾ 'noror yao 'zorn, 'de deh⧾-zon⧾ :ya 'de 'meh-a'. Eh-: no-eh, 'de 'meh-a' :yeh-dih: :gwlor-nyor⧾-a' klehkpeh ken 'noror yao 'zorn. Deh no-eh, an-a' klehkpeh no deh⧾-zon⧾ 'weh.

¹³Dhih 'jeh, deh⧾-zon⧾ :ne 'noror yao 'zorn 'weh :zai', 'de jorwor: Nyorsoa 'nyi :a :Mose'-a' 'tele'. Jorwor: deh⧾-zon⧾-a' :zlo-eh: :dha 'tele' se-a :ne.

¹⁴Jorwor: 'meh-a' :korn nyor⧾ wlu 'ken 'gboror:, :eh 'wluh-a 'de 'Adan-a' ti bo, 'de :eh :yeh-dih:-a :Mose'-a' ti ken. 'Meh-a' :korn :yuh-a' 'jeh :on se-a deh⧾-zon⧾ no, wlu 'ken :ke, :on se-a Nyorsoa-a' 'tele' wa, :ka 'Adan no-a. :Yee' :Yusu' :or mu-a 'de :yi, or-: 'o 'Adan gweh.

¹⁵Jorwor: Nyorsoa-a' 'nyii'-deh :ne 'Adan-a' deh-zon se goor-dih:. Nyor :due'-a' deh-zon: no-eh, 'de nyor⧾ :dhulu' 'meh. Jorwor: Nyorsoa-a' mla or 'nyi-a nyor⧾ :dhulu' yaa'e, :or :yi-dih:-a :Yusu' 'Klae :due'-', or-a' dhih 'beh-: 'i.

¹⁶:Yee' :dele' ka, Nyorsoa-a' 'nyii'-deh :ne nyor :due' :dao'-a' deh-zon-a' geli' :za-dih-deh se goor-dih:. Deh-zon :due' or no-a, eh-: :ya 'de Nyorsoa-a' zabe: :zi-eh, 'de zabe kpon :gwlor-nyor⧾-a' klehkpeh. Keen' :mloror' nyor⧾ no deh⧾-zon:⧾ :dhulu' 'weh, jorwor: Nyorsoa-a' 'nyii'-deh: :a se-a 'sor, eh-: no-eh, 'de zabe :se-' :a kpon.

¹⁷:Yee' nyor :due' :dao'-a' deh-zon: no-eh, 'de 'meh-a' :korn :a wlu 'ken. Jorwor: deh nyor :due' :or 'dhu-a :Yusu' 'Klae, or no-a, eh :zi 'o ken dih 'gabaa. Nyor⧾-a' klehkpeh Nyorsoa po-a mla :dhulu' bo, 'de or 'da-dih-a 'yi 'sleh-nyor⧾ :eh :yi-dih:-a :Yusu'-', mo-: :an mu 'kmo-' :ne, 'de on 'ye nyor⧾ wlu 'ken :korn.

¹⁸:Yee' :ka nyor :due'-a' deh-zon-a' geli' :za-eh :kpon-dih:-a :gwlor-nyor⧾-a' klehkpeh zabe, :yee' 'ka-: nyor :due'-a' 'yi 'sleh-deh-a' geli' :za-eh no-eh :ke, 'de Nyorsoa 'da-dih: :a 'yi 'sleh-nyor⧾ 'do or ybei', :eh :ya-a: 'de 'kmo :sie: :febeh' 'do :gwlor-nyor⧾-a' klehkpeh bo.

¹⁹:Yee' :ka nyor :due'-a' Nyorsoa-a' 'tele'-a' wa-a' no-eh, 'de :gwlor-nyor:⧾ :dhulu' no-a deh⧾-zon:⧾ :no-nyor⧾, :yee' 'ka-: nyor :due'-a' Nyorsoa-a' 'tele' dih :dhe-eh mu-eh :no :ke, 'de :gwlor-nyor:⧾ :dhulu' 'ye 'yi 'sleh-nyor⧾ no 'do Nyorsoa ybei'.

²⁰Ti :Mose'-a' 'tele' yi-a 'de, 'do :wor :gwlor-nyor⧾ yubo: deh⧾-zon:⧾ :dhulu' an no-a 'i. Jorwor: :dha deh⧾-zon⧾-a 'kpuhba-a ken dih, 'do :wor Nyorsoa-a' mla-a 'kpuhba ken dih :ke, 'de or 'wla 'zorn.

²¹:Yee' :ka deh⧾-zon⧾-a' nyor⧾ wlu 'ken :korn-eh :ya-a: 'de 'meh-a', :yee' 'ka-: Nyorsoa-a' mla no :a-a' wlu ken :korn-eh, :a 'ye 'yi 'sleh-nyor⧾ 'da-dih-eh: 'de :a 'ye 'kmo :sie: :febeh' 'ble, :eh :yi-dih:-a :a-a' :Gwlor :baa' :Yusu' 'Klae-'.