Read Eastern Krahn Wloon-chlee-deh: 6 Bible Online

Wloon-chlee-deh: 6 - Eastern Krahn bible

Wloon-chlee-deh: 6

¹:Yee' :kaa :a mu 'da-: :naa :eh? :A kpa deh⧾-zon:⧾ :no-eh 'dlu bo, 'de Nyorsoa-a' mla 'ye ken dih 'kpuhba: :e?

²'Kei o. :Mor eh 'dhu :a 'wluh 'o deh⧾-zon⧾-a' 'kpih 'zorn, :yee' :kaa eh no, 'de :a 'ye 'de en 'di :ne 'gboror: :eh?

³:Ae' a se-eh yubo: :ka :a-a' klehkpeh :or :po-eh 'ni 'dlu, :a mor-: :Yusu' 'Klae-: :a no-a deh :due', 'de mor :a-a' 'ni 'dlu :po-eh gweh :ka or :ne :a 'meh-dih:-a :dha :due' :e?

⁴:Yee' :a-a' 'ni 'dlu :po-eh gweh :ka :a 'meh-a, 'de :a mor-: :Yusu' 'Klae-: :a nma-dih-eh: dih :dha :due'. :Yee' :ka Nyorsoa :or 'dhu-a :a :Baa', or-a' dhih-a' 'i 'beh-a' no-eh, 'de 'Klae 'wluh-a 'de nma-dih-deh 'di, :yee' 'ka-: :a mu :no :ke, 'de :a 'ye 'kmo-' :dele' :ne.

⁵:Mor eh 'dhu, or :ne :a no deh :due', :eh gweh-a :ka or :ne :a 'meh-dih:-a :dha :due', :yee' dhih 'jeh, or :ne :a mu 'de nma-dih-deh 'di :dha :due' 'wluh-dih:.

⁶:A yubo-eh', deh⧾ :a-a' 'yor-eh :ne-dih:-a 'kmo :zai', en :ne or :kor-dih-eh: 'o tu 'i, 'de :a-a' yau: :daa :on 'yi-dih:-a deh⧾-zon⧾ dih, an-a' 'kpih 'ye gbe :zie:, 'de deh⧾-zon⧾ :ne-' :a dih kpon :neheh' :ka nyor kpon-a 'ge-yu dih.

⁷Deh no-eh, nyor :or 'meh-a, :yee' or 'wluh 'o deh⧾-zon⧾-a' 'kpih 'zorn 'weh.

⁸:Yee' :mor eh 'dhu, eh gweh :a :ne 'Klae 'meh-dih: :dha :due', :yee' :a po-eh dhih 'jeh :eh :mor or :ne :a mu :dha :due' 'kmo-' :ne-dih: :ke.

⁹:A yubo-eh' :ka Nyorsoa :za-a: 'de 'Klae 'de nma-dih-deh 'di, 'de or :se-a' 'meh-: i :neheh'. 'Meh-a' se-or wlu 'ken :korn :dele' ka.

¹⁰'Meh-a' or 'meh-a, or 'meh-' kpor :due' 'klein', deh⧾-zon⧾ :se-or' wlu 'ken :korn i, 'de 'kmo or :ne-a, or :ne-' 'kmo 'do Nyorsoa bo.

¹¹'Do deh :ne-a :due' 'di, a :zlo-dih: a-a' 'jeh deh⧾-zon⧾-a' 'kpih 'zorn 'wluh-nyor⧾, 'de a :ne 'kmo 'do Nyorsoa bo, :eh :yi-dih:-a :Yusu' 'Klae-'.

¹²:Yee' eh-a' dhih, a-a' 'worn-:-' deh⧾-zon⧾-a' :korn-' a-a' yau: :an mu-a 'meh-: wlu 'ken, 'de a :ne 'o an-a' 'bhororn'-deh⧾-zon⧾-a' 'tele' dih dhe.

¹³A-a' :za-' a-a' yau-a' 'for⧾ 'kwla 'de deh⧾-zon⧾-a' no-a' bo. Jorwor: a :za a-a' 'jeh 'kwla 'de Nyorsoa bo, :eh gweh-a :ka a 'wluh-a 'meh 'da, 'de a :ne-a 'kmo :naa. :Yee' a :za a-a' yau-a' 'for⧾-a' klehkpeh 'kwla 'do 'yi 'sleh-deh⧾-a' no-a' bo.

¹⁴Jorwor: deh⧾-zon⧾-a' :korn-' a wlu 'ken, deh no-eh, a se 'o :Mose'-a' 'tele' 'zorn :ne, jorwor: a :ne 'o Nyorsoa-a' mla 'zorn.

¹⁵:Yee' :kaa :a mu 'da-: :naa :eh? :Ka :a se-a 'o :Mose'-a' 'tele' 'zorn :ne, 'de :a :ne-a 'o Nyorsoa-a' mla 'zorn, :yee' :a :korn :a 'ye deh⧾-zon⧾ no :e? 'Kei o.

¹⁶A se-eh yubo:, :ka :mor a :za a-a' 'jeh 'kwla 'do nyor bo, 'de a 'ye 'o or-a' wlu dih dhe, :ka 'ge-yu-a no-a, :yee' a no-a 'ge-yu 'do nyor :dao' :or :korn-a wlu a dhe-a 'o dih bo :e? :Mor a 'dhu deh⧾-zon⧾-a' 'ge-yu-', :yee' a mu 'meh-:. :Mor a dhe 'o Nyorsoa-a' wlu dih, :yee' eh-: mu-eh :no, 'de a 'ye 'yi 'sleh-nyor⧾ no 'do or ybei'.

¹⁷'On po Nyorsoa-a' 'zio, a :mor :or no-a deh⧾-zon⧾-a' 'ge-nynuu :dee', 'de a 'ye 'o deh⧾ 'on :torne: a-uh, en-' 'tele' dih dhe :naa, 'do a-a' :porluh⧾-a' klehkpeh bo.

¹⁸:Yee' a zelie-eh:-' 'do deh⧾-zon⧾-a' 'kpih 'zorn, 'de a no 'ge-nynuu 'do 'yi 'sleh-deh-a' dhih bo.

¹⁹(Deh 'an wlu-a :naa, 'an wlu-' :ka :gwlor-nyor wlu-a 'de or 'be :gwlor-nyor bo. Deh no-eh, a :mor :gwlor-nyor:⧾ 'o, 'de a-a' deh-' dih 'worn-eh: :kma 'i.) :Ka a :za-a a-a' yau 'kwla :zai', a 'ye-a' 'ge-nynuu no 'do deh⧾ :en se-a :vlehehn'-' :gweh, en-' no 'da-: 'dekorn: 'kulu-deh⧾-a' ken dih 'kpuhba-eh-: 'ka-: a 'ye a-a' yau-a' 'kwla :za-eh: no :naa :ke, a 'ye 'ge-nynuu no 'do 'yi 'sleh-deh-a' dhih bo, a 'ye 'for 'i :dhe-dih-eh: 'do Nyorsoa bo.

²⁰Ti a no-a 'ge-nynuu 'do deh⧾-zon⧾ bo, :yee' 'yi 'sleh-deh se a wlu 'ken :korn.

²¹:Yee' deh⧾ :dao' :en no-dih-a a dhen :naa, deh en po-a a 'o 'do ti :dao' bo :eh? Deh⧾ :dao' en ya 'de 'meh-a'.

²²Jorwor: :kana :naa, :ka Nyorsoa zelie:-a a-uh 'do deh⧾-zon⧾-a' 'kpih 'zorn, 'de a no-a 'ge-nynuu 'do Nyorsoa bo, :yee' deh eh po 'o a-uh, eh-: 'dhu, a :dhe-dih-eh: 'for 'i 'do or bo. :Yee' eh-a' geli' :za-dih-deh:, eh-: 'dhu 'kmo :sie: :febeh'.

²³Deh⧾-zon⧾-a' geli' :za-dih-deh :wor 'dhu 'meh-a', jorwor: Nyorsoa-a' 'nyii'-deh:, eh-: 'dhu 'kmo :sie: :febeh'-' :eh :yi-dih:-a :a-a' :Gwlor :baa' :Yusu' 'Klae-'.