Read Eastern Krahn Wloon-chlee-deh: 7 Bible Online

Wloon-chlee-deh: 7 - Eastern Krahn bible

Wloon-chlee-deh: 7

¹:Yee' 'an 'Klae :de-di'-boi'-a:, 'an wlu-' 'de a :mor :or yubo:-a :gwlor-nyor⧾-a' 'tele' bo. A se-eh yubo:, :ka 'tele' :korn-a :gwlor-nyor wlu 'ken 'do ti or :ne-a 'kmo-' 'klein' :e?

²Eh gweh :ka 'nynor :or 'ti-a nyina, 'de :or :ne-a 'o nyina: 'ti-tele' 'zorn, 'do or-a'a: yibeor bo, ti or-a'a: yibeor :ne-a 'kmo. Jorwor: :mor or-a'a: yibeor 'meh, :yee' or se 'o 'tele' :dao' :eh san-or dih :dee', 'do or 'zorn :ne :neheh' :dele' ka.

³:Yee' :mor eh 'dhu, or 'ti nyor :noror' 'bli, 'de or-a'a: yibeor 'ye 'kmo :ne 'gboror:, :yee' an mu-or 'nyne :zaan' :no-nynor 'da-dih:. Jorwor: :mor or-a'a: yibeor 'meh, :yee' or se 'o 'tele' :dao' 'zorn :ne :neheh' klehkpeh klehkpeh. Or :se 'nyne :zaan' :no-nynor:, keen' :mloror' or 'ti nyor-kpalu: 'sluh 'bli.

⁴:Yee' 'do deh :ne-a :due' 'di, 'an 'Klae :de-di'-boi'-a:, 'Klae-a' 'meh-a' no-eh, 'de a gweh 'meheh'-nyor⧾ 'do :Mose'-a' 'tele' bo :ke, a se 'o eh-a' 'kpih 'zorn :ne :neheh', 'de a 'ye 'de nyor :noror' bo :korn, :or Nyorsoa :za-a: 'de nma-dih-deh 'di, 'de :a 'ye 'bi 'jeh ne :tlo 'do Nyorsoa bo.

⁵Ti :a :ne-dih:-a deh⧾ :a-a' :gwlor-nyor-tu-a 'bhorn-a 'kmo-', :yee' :Mose'-a' 'tele', eh-: no-eh, 'de :a-a' :porluh⧾-a sin, :a 'ye deh⧾-zon:⧾ :a-a' yau-a 'bhorn-a no. Me-: :ya 'de 'meh-a'.

⁶Jorwor: :kana :naa, :a zelie-eh:-' 'do 'tele' :dao' 'zorn, deh no-eh, :a gweh 'meheh'-nyor⧾ 'do eh bo. :Ka :Mose'-a' 'tele' :dao', :eh 'chle-eh, eh 'da-a, :a 'ye-a Nyorsoa-a' :weheh' :za-eh no, :a-a' no-eh :neheh'. Jorwor: :weheh' :za-eh: :dele', Nyorsoa-a' :Zulu 'da-a, eh-: :a no.

⁷:Yee' :kaa :a mu 'da-: :naa :eh? :Mose'-a' 'tele' :daa, deh-zon: 'o :e? 'Kei o. Jorwor: :mor eh se :ne :dee', :yee' 'on se deh-zon yubo:. :Mor eh :se-' :ao', :a-a' :korn-' :gwlehehn' :dee', :yee' 'on se deh :eh 'dhu-a :gwlehehn' deh 'i yubo: i :dee' 'jeh ka.

⁸Deh⧾-zon⧾ 'duo: en-' 'jeh-a' ti-', :ka 'tele' no-a 'o :kpaa' :za-eh, eh-: no-eh, 'de 'bhororn'-deh⧾-zon:⧾ 'doror: 'dor 'yi-dih: 'on dih. Jorwor: :mor 'tele' se :ne, :yee' deh⧾-zon⧾ se deh-' 'dhu-eh:.

⁹:Zai' ti 'on se-a :Mose'-a' 'tele' yubo:, :yee' 'on :ne 'kmo. Jorwor: :yeh 'tele' yi-a 'de, :yee' 'on yubo: deh⧾-zon⧾ 'weh, 'de 'an 'bhorn 'on 'ye-ih' no,

¹⁰'de 'tele' chehn 'on wlu ken, 'on 'ye 'meh. :Yee' 'tele' :daa :eh :korn-a :eh 'ye-a' 'de :febeh' :ya :dee', 'do 'on bo, eh-: no-eh, 'de 'on 'meh.

¹¹Deh no-eh, deh⧾-zon⧾ 'duo: en-' 'jeh-a' ti-', :ka 'tele' no-a 'o :kpaa' :za-eh, 'de en :bo-dih: 'on dih, en :yi-dih: 'tele'-', en chehn 'on wlu ken, 'on 'ye 'meh.

¹²:Yee' :Mose'-a' 'tele' :daa, eh :ne 'i gban, 'de deh⧾ 'tele' 'da-a, en :ne gban 'i, en 'sleh 'i, 'de en no deh⧾ 'jeh ne.

¹³:Yee' deh :eh :nmor-a 'yi dih, eh-: chehn 'on wlu ken, 'on 'ye 'meh :e? 'Kei o. Jorwor: deh⧾-zon⧾ :yi-dih: deh :eh :nmor-a 'yi dih, 'de en 'dba 'on, eh 'ye nyor⧾ 'i :to-dih:, :ka en :ne-a. :Yee' 'tele' :daa, eh-: no-eh, 'de :a yubo-eh, :ka deh⧾-zon⧾ 'dhu-a 'yi dih :nyni-deh⧾-' 'gabaa.

¹⁴:Yee' :a yubo-eh' :ka :Mose'-a' 'tele' kor-a Nyorsoa-deh 'i. Jorwor: 'on no :gwlor-nyor:, :or no-a 'ge-yu: :or :plo-eh 'de deh⧾-zon⧾ bo.

¹⁵'On se 'an 'jeh-a' noo-deh⧾ bo dih yubo:. Deh no-eh, deh⧾ 'an 'bhorn 'on 'ye-a' no, me-: 'an-a' 'worn-dih: noo-dhih. Jorwor: deh⧾ 'on 'nyeh-a, me-: 'an no.

¹⁶:Yee' :mor 'on no deh 'on se-a no-a' 'bhorn, :yee' 'on 'worn-dih-eh ken dih 'weh, :ka :Mose'-a' 'tele' 'sleh-a 'i.

¹⁷:Yee' eh :se 'an 'jeh 'yor-eh:, :or-a' no deh⧾ :daa. Jorwor: deh⧾-zon:⧾ :en :ne-a 'on-', me-: no-ih.

¹⁸'On yubo-eh' :eh :mor dhih 'jeh ne se 'o 'on :ne. :Mor 'on 'da :ao', :yee' 'de 'an :gwlor-nyor-tu 'di :oo', 'an 'da. Deh no-eh, 'an 'bhorn 'on 'ye deh⧾ 'jeh ne no, jorwor: 'on se en-' no-a' 'beh-dih:.

¹⁹:Yee' deh⧾ 'an no-a, eh :se deh⧾ 'jeh 'an 'bhorn-a 'on 'ye-a' no. Jorwor: deh⧾-zon:⧾ 'on se-a 'bhorn 'on 'ye-a' no, me-: 'an no.

²⁰:Yee' :mor eh 'dhu, 'on no deh⧾ 'on se-a no-a' 'bhorn, :yee' eh :se 'an 'jeh 'yor-eh: :or-a' no-eh :neheh'. Jorwor: deh⧾-zon:⧾ :en :ne-a 'on-', me-: 'o :en no-eh.

²¹:Yee' deh 'on yubo:-a 'i, :eh no-eh 'do 'on bo, eh-: :dhe dih. :Mor 'an 'bhorn 'on 'ye deh⧾ 'jeh ne no, :yee' deh⧾-zon⧾-a' no-a' :due', me-: 'on 'beh-dih:.

²²Nyorsoa-a' 'tele' 'yi-dih: 'an :porluh⧾-a' klehkpeh 'mona-' dih.

²³Jorwor: 'on 'ye 'tele' :neheh', eh-: no :koan 'de 'an yau 'di, eh-: vorn 'tele' 'an :porluh 'worn-dih-a ken dih bo. 'De eh no 'on :kasue-nyor-', 'do deh⧾-zon⧾-a' 'tele' :en :korn-a 'an yau wlu 'ken bo.

²⁴Deh 'i-deh: :porluh-a' dih 'neneh-nyor: 'o, 'on 'dhu-eh:-' :eh? Deh 'i-deh-nyor: :or mu 'on yau: :daa, :an 'bhorn-a 'an 'dba-a', 'kwa :za :eh? 'Wee'.

²⁵'On po Nyorsoa-a' 'zio, :or no-eh, 'de eh :yi-dih:-a :a-a' :Gwlor :baa' :Yusu' 'Klae-'. :Yee' eh-a' dhih, 'do 'an 'jeh 'yor-eh-a' :porluh ken, 'on no 'ge-yu 'do Nyorsoa-a' 'tele' bo. Jorwor: 'do 'an :gwlor-nyor-tu bo, 'on no 'ge-yu 'do deh⧾-zon⧾-a' 'tele' bo.