Read Eastern Krahn Wloon-chlee-deh: 8 Bible Online

Wloon-chlee-deh: 8 - Eastern Krahn bible

Wloon-chlee-deh: 8

¹:Yee' 'do eh-a' dha, :yuh :on :ne-a :Yusu' 'Klae-', Nyorsoa :se-uh' 'kle 'ye-eh 'dlu :po i.

²Deh no-eh, :Yusu' 'Klae, or-: no-eh, 'de Nyorsoa-a' :Zulu: :an 'nyi-a :a :febeh', an-a' 'kpih zelie :a-uh 'do deh⧾-zon⧾-: 'dekorn: 'meh-a'-: en-' 'kpih 'zorn.

³:Mose'-a' 'tele' se eh-a' no-a' 'beh-dih:, deh no-eh, :gwlor-nyor⧾-a' nyior-tu: mo-: no-eh, 'de 'tele' :dao', eh se 'kpih ken :ne. Jorwor: Nyorsoa no-eh', ti or dbo-a or-a' 'jeh 'yor-eh-a' 'Yu, 'de or :yi-dih:-a :gwlor-nyor-tu-', :on 'yi-dih:-a deh⧾-zon⧾-' dih, or 'ye gban 'i 'dhu-dih-deh no 'do :a-a' deh⧾-zon⧾-a' dhih bo. :Yee' eh-: no-eh, 'de Nyorsoa :za deh⧾-zon⧾ 'kpih ken, 'de :gwlor-nyor-tu: :dao' 'Klae :yi-dih:-a 'de 'di.

⁴Nyorsoa no deh :daa 'weh, 'de :a 'ye 'yi 'sleh-deh⧾-a' klehkpeh :Mose'-a' 'tele'-a 'bhorn-a :a 'ye-a' no, :a 'ye en-' klehkpeh no, :a :mor :yuh :or no-a deh⧾ Nyorsoa-a' :Zulu-a 'bhorn-a :a 'ye-a' no, 'de :or-a' no-a deh⧾ :a-a' nyior-tu-a 'bhorn-a.

⁵Nyor⧾ :an no-a deh⧾ nyor⧾-a' nyior-tu-a 'bhorn-a on 'ye-a' no, en :due', me-: an na-dih :gwluhuh' dih. Jorwor: nyor⧾ :yuh :an no-a deh⧾ Nyorsoa-a' :Zulu-a 'bhorn-a on 'ye-a' no, en :due', me-: an na-dih :gwluhuh' dih.

⁶Deh⧾-zon:⧾ nyor⧾-a na-dih-a :gwluhuh' dih, :yih an-a' nyior-tu-a 'bhorn-a on 'ye-a' no, en ya-uh 'meh-a' bo. Jorwor: nyor⧾ :an na-dih-a Nyorsoa-a' :Zulu-a' 'bhororn'-deh⧾ :gwluhuh' dih, en ya-uh 'kmo :sie: :febeh'-: 'dekorn: :porluh-a' dih 'pehn-eh-: bo.

⁷:Yee' nyor⧾ :an na-dih-a deh⧾ an-a' nyior-tu-a 'bhorn-a, on 'ye-a' no, :gwluhuh' dih, on no nyor⧾ :on 'nyeh-a Nyorsoa-'. Deh no-eh, an-a' :ya an-a' 'jeh ya 'do Nyorsoa-a' 'tele' 'zorn, 'de mor on se eh-a' no-a' 'beh-dih:.

⁸Nyor⧾ :yuh an-a' nyior-tu :korn-a wlu 'ken, on se Nyorsoa-a' :porluh-a' dih 'pehn-dih-eh 'beh-dih:.

⁹Jorwor: :mor Nyorsoa-a' :Zulu :ne a-uh', :yee' a-a' nyior-tu se a wlu 'ken :korn, jorwor: Nyorsoa-a' :Zulu:, mo-: :korn a wlu 'ken. :Mor nyor se 'Klae-a' :Zulu 'ble, :yee' or se 'de or bo :korn.

¹⁰Jorwor: :mor 'Klae :ne a-uh', keen' :mloror' a-a' yau-a mu 'meh-: 'do a-a' deh⧾-zon⧾-a' dhih bo, jorwor: Nyorsoa-a' :Zulu-a mu-eh :no, a 'ye 'kmo-' :ne, deh no-eh, Nyorsoa 'da-dih a 'yi 'sleh-nyor:⧾.

¹¹:Yee' :mor eh 'dhu, Nyorsoa-a' :Zulu: :on :za-a: 'de 'Klae 'de nma-dih-deh 'di, on :ne a-uh', :yee' Nyorsoa :or za-or 'de nma-dih-deh 'di, or mu or-a' :Zulu: :on :ne a-uh' :yi-dih:, 'de or 'ye a-a' yau: :an mu-a 'meh-:, 'kmo :sie: :febeh' 'nyi.

¹²:Yee' 'an 'Klae :de-di'-boi'-a:, :a 'ble deh, eh-: :a :korn :a 'ye no. Jorwor: eh :se deh⧾ :a-a' nyior-tu-a 'bhorn-a, me-: :a 'ye 'kmo-' :ne-dih: :deh.

¹³:Mor eh 'dhu, a :ne-dih: deh⧾ a-a' nyior-tu-a 'bhorn-a 'kmo-', :yee' a mu 'meh-:. Jorwor: :mor eh 'dhu, Nyorsoa-a' :Zulu 'kpa a bo, 'de a 'ye deh⧾-zon:⧾ a-a' yau-a no-a, en-' no-a' 'bor klehkpeh, :yee' a mu 'kmo-' :ne.

¹⁴Deh no-eh, :yuh Nyorsoa-a' :Zulu-a na-dih-a, on no or-a' 'nynuu:.

¹⁵:Yee' Nyorsoa :se-' a or-a' :Zulu a-uh 'nyi, on 'ye a 'ge-nynuu-' :no-dih:, 'de eh 'ye-eh' no, 'de :fano 'ye a no. Jorwor: mo-: no-eh, 'de a no Nyorsoa-a' 'nynuu. 'De an-a' 'kpih, me-: no-eh, 'de :mor :a :taa Nyorsoa 'da, :a no, 'On-ba:, 'On-ba:.

¹⁶Nyorsoa-a' :Zulu-a' 'jeh 'yor-eh zela-eh ken dih 'weh, 'do :a :porluh⧾ ken, :ka :a 'dhu-a or-a' 'nynuu-'.

¹⁷:Yee' :ka :a 'dhu-a or-a' 'nynuu-', :yee' :a mor-: 'dekorn: 'Klae-: :a :mor mu :bhorlie' :eh :korn-a wlu Nyorsoa po-a :dhama'-' 'do or-a'a: 'nynuu bo 'ye-:. :Yee' :mor 'Klae :ne :a 'ye-dih: 'kle :dha :due', :yee' :a mu 'for 'ble-: 'de or-a' dhih-a' 'i 'beh-a' 'di :ke.

¹⁸:Yee' :mor 'on :na-dih: 'kle 'ye-eh: :a 'ye-a :naa, eh-a' dhih :gwluhuh' dih, eh se deh 'do 'on bo, deh no-eh, dhih-a' 'i 'beh-a' Nyorsoa-a mu-a :a 'nyi-:, or 'beh-: 'i 'gabaa, or zi-eh'.

¹⁹'Bluhba-a' klehkpeh Nyorsoa no-a-: 'dekorn: deh⧾ :en :ne-a 'de or 'di-: en :nyna buh⧾ ken :naa 'gabaa, en fuo ti Nyorsoa-a mu-ih-a or-a'a: 'nynuu 'i :to-dih:.

²⁰Deh no-eh, deh⧾-a' klehkpeh Nyorsoa no-a, deh en :korn en 'ye-a' no, en se eh-a' no-a' 'beh-dih:. Eh :se en-' 'jeh 'yor-eh:, en :se-eh' 'bhorn en 'ye :ao' :ne. Jorwor: Nyorsoa, or-: 'worn-dih-eh ken dih, 'de en :ne :ao'. Jorwor: en dhe-eh :gwlii' 'gboror:,

²¹:ka Nyorsoa-a mu-ih-a zelie: 'de 'gegeye, en :ne-a' 'zorn :neheh', 'de en 'ye zelie-eh: :eh 'ble-a dhih-a' 'i 'beh-a' 'ye, :ka Nyorsoa-a' 'nynuu :ne-a.

²²:A yubo-eh' :chio'lo:, :eh :yeh-dih:-a ti :daa ken, deh⧾-a' klehkpeh Nyorsoa no-a, en kehn-', 'de en 'ye en-' 'jeh worn, :eh gweh-a :ka 'nynor :or 'bhorn-a :gbano: :za-eh.

²³Eh :se en :due', en :se-' :kehn. Jorwor: :a-a' 'jeh 'yor-eh: :ke, :or 'ble-a Nyorsoa-a' :Zulu :on no-a 'nyii'-deh: or 'nyi :a-uh :zai', :a kehn-' 'de :a 'di :ke, 'de :a fuo Nyorsoa 'ken, 'de 'mona: ka 'di, :a 'ye or-a'a: 'nynuu no, 'de :a-a' yau 'ye zelie-eh:.

²⁴Deh :gwlii' :dhe-eh:, eh-: 'puh-dih: :a-uh. :Gwlii' :dhe-deh:, :a-a' 'yli-eh 'ye-a, eh :se :gwlii' :dhe-deh: :neheh', deh no-eh, :a 'ye-eh' :weh. :Or 'ye deh, 'de :or dhe-eh :gwlii' :chio'lo: :eh?

²⁵Jorwor: :mor eh 'dhu, :a dhe deh :a 'see-a 'ye :gwlii' :chio'lo:, :yee' :a fuo-eh 'de :porluh-a' dih :kpon ka 'di.

²⁶:Yee' 'de :ka :ne-a :due' 'di, Nyorsoa-a' :Zulu-a 'kpa :a bo, :mor :a-a' 'kpih :taa chehn. Deh no-eh, :a se :ka :a 'ye-a' 'de Nyorsoa bo :wlu-eh no yubo:. Jorwor: Nyorsoa-a' :Zulu-a' 'jeh 'yor-eh:, mo-: :an wlu 'de Nyorsoa bo, 'do :a-a' dhih bo, 'de 'viin' ka 'di, 'de nyor⧾ se an-a' wlu-a' ken dih zela-eh 'beh-dih: 'de :gwlor-nyor-wlu 'di.

²⁷Nyorsoa :or pobo-a 'o :a-a' :porluh⧾ ken, or yubo: deh or-a' :Zulu-a za-a-' 'weh, deh no-eh, or-a' :Zulu: :dao', mo-: :an wlu 'de or-a' 'jeh 'yor-eh bo, 'do or-a'a: nyor⧾-a' dhih bo, :ka eh no-a or-a' 'ton :korn-eh.

²⁸:Yee' :a yubo-eh', 'de deh⧾-a' klehkpeh 'di, Nyorsoa-a 'kpa :a :mor ybeh-or' bo 'weh, 'de deh⧾ 'jeh ne 'ye 'de en 'di 'wluh, :a :mor or 'da-a, :ka or no-a eh-a' 'dhu-a'.

²⁹:Yee' :yuh Nyorsoa gan-a see, mo-: or :dhe-dih: 'for 'i, on :ne or-a'a: 'Yu 'ye goor-dih:, 'de or-a'a: 'Yu 'ye :zai'-nyor no, 'de 'de-di'-boi' :dhulu' 'klu-'.

³⁰:Yee' :yuh or :dhe-dih:-a 'for 'i, :on :ne or-a'a: 'Yu 'ye-a' goor-dih:, mo-: or 'da :on 'ye or-a'a: 'nynuu no. :Yee' :yuh or 'da-a :on 'ye-a' or-a'a: 'nynuu no, mo-: or 'da-dih: 'yi 'sleh-nyor⧾ 'do or ybei'. :Yee' :yuh or 'da-dih:-a 'yi 'sleh-nyor⧾-', mo-: or 'nyi dhih-a' 'i 'beh-a' :ke.

³¹:Yee' :kaa :a mu 'da-: :naa :eh? :Mor Nyorsoa :ne 'de :a-a' 'for bo, :yee' :or 'beh-dih: :or 'ye :a bo vorn :eh?

³²Nyorsoa :or 'worn-dih:-a or-a' 'jeh 'yor-eh-a'a: 'Yu-a' dhih ken dih, 'de or 'nyi-or nyor⧾ or 'ye-a' 'meh, 'do :a-a' dhih bo, :yee' or-: se :a deh⧾-a' klehkpeh 'nyi-eh: 'beh-dih: yaa'e :ke :e?

³³:Or 'beh-dih: nyor⧾ Nyorsoa gan-a, an-a' dhih 'dlu :po :eh? Eh se nyor :korn. Deh no-eh, Nyorsoa-a' 'yor-eh:, or-: 'da, zabe :se-uh' kpon.

³⁴:Or mu :a-a' zabe 'i :chehn :eh? Eh se nyor :korn. Deh no-eh, :Yusu' 'Klae 'meh-' 'do :a-a' dhih bo. Jorwor: Nyorsoa za-or 'de nma-dih-deh 'di 'weh. 'De or :ne 'de Nyorsoa-a' :dila-son bo, or wlu 'de or bo 'do :a-a' dhih bo.

³⁵:Eh 'beh-dih: :eh 'ye-eh' no, 'de :ybeh-dih-eh: :eh :ne-a 'o :a mor-: 'dekorn: 'Klae-: 'nyne bo 'i cheehn-dih: :eh? 'Worn dih 'beh-eh :e? :Ae' 'kle 'ye-eh:? :Ae' nyor⧾ 'ye-dih: :on 'kle :e? :Ae' 'moeh: :eh 'kpa-a Ji Kou'-moeh ke :e? :Ae' se paa-deh 'ble :e? :Ae' 'de 'meh-a' 'worn-dih :na-eh: :e? :Ae' :bhla 'jlehn 'i 'dba-dih-eh: :e? Eh se deh :korn, :eh 'ye-eh' no.

³⁶:Ka eh no-a 'chle-eh 'de Nyorsoa-a' 'chlee-deh 'di, eh no-a, :An-a' dhih, :a :ne 'meh-a' pobo 'yli dih, 'do 'we-a' klehkpeh bo. :A :zlo-dih-eh: 'blae'⧾ :en :gweh-a 'dba-a'.

³⁷Jorwor: 'Klae :or :ybeh :a-uh', or-: 'nyi :a nyor :du-kpih, 'de :a kpa :glaa' deh 'jeh, 'do deh⧾-a' klehkpeh :daa :a :yi-dih:-a 'de 'di bo.

³⁸'On po-eh' dhih 'jeh, eh beh :se 'meh-a', 'de mor eh :se :febeh', eh beh :se 'enjor-nyor:⧾, 'de mor eh :se 'kwla 'ye-dih-deh:⧾, eh beh :se :kana :ti, 'de mor eh :se ti :en mu-a 'de :yi, 'de mor eh :se deh⧾ :nee'-a' 'kpih,

³⁹eh beh :se deh⧾ :en :ne-a 'de yai', 'de mor eh :se :yih :en :ne-a 'de 'bluh 'zorn, eh beh :se deh⧾-a' klehkpeh :en :no-eh, me-: 'beh-dih: :en 'ye :a mor-: Nyorsoa-: :a-a' :ybeh-dih-eh 'i cheehn-dih: :deh, :eh :yi-dih:-a :a-a' :Gwlor :baa' :Yusu' 'Klae-'.