Read Eastern Krahn Wloon-chlee-deh: 9 Bible Online

Wloon-chlee-deh: 9 - Eastern Krahn bible

Wloon-chlee-deh: 9

¹:Yee' 'mor 'Klae-a' klei' :zi-nyor: 'o. 'An :porluh: Gban 'i :ne :Zulu :korn-a wlu 'ken, on zela-eh ken dih 'weh 'noror 'on bo, :ka 'an za-a dhih-a' 'yor-eh-', 'on se-a sih 'tmo.

²'On 'ble :porluh-a' dih 'neneh-eh: 'gabaa, 'de 'on 'ble 'pa, :or-a' 'bor, 'do 'an :porluh ken,

³'do 'an 'de-di'-boi'-a' deh bo, :on no-a 'Ezlea-nyor⧾, :on :ne 'on 'ble-a yau :due'. 'An 'bhorn :dee' Nyorsoa 'ye 'on 'chlo bo po, 'de 'mor-: 'Klae-: :a 'ye 'i cheehn-dih: 'de 'an 'de-di'-boi' 'ye 'o 'an 'gor bo 'kpa.

⁴Nyor⧾ :dao', Nyorsoa gan-uh' on 'ye or-a'a: 'nynuu no, 'de on 'ble 'for 'de or-a' dhih-a' 'i 'beh-a' 'di, 'de or :ne on po kuo. Or 'nyi-uh 'tele', or :torne-uh :ka on 'ye-a or-a' :weheh' :za-eh no, 'de or 'nyi-uh deh⧾ :korn-a wlu⧾ or po-a :dhama'-'.

⁵'Ezlea-nyor⧾ no 'nynuu: 'do :a :bai'-a' :bai' bo. 'Klae no an-a' nyor :due' :ke, 'de yau: ka 'di, :or no-a Nyorsoa :or :ne-a 'o deh⧾-a' klehkpeh 'dlu bo. A 'nyi :a po or-a' 'nyne ya, :ka ti-a mu-a 'dlu-' :tehn. 'Ka-: eh 'ye :ne.

⁶Eh :se deh Nyorsoa :za-a-', or :se-eh' no :deh. Eh :se nyor⧾-a' klehkpeh :on 'wluh-a 'de 'Ezlea 'di, mo-: no Nyorsoa-a' gaan-nyor⧾ :deh.

⁷'De mor eh :se nyor⧾-a' klehkpeh :on 'wluh-a 'de 'Eble'hehn 'di, mo-: Nyorsoa 'da-dih 'Eble'hehn-a'a: 'nynuu :deh. Jorwor: Nyorsoa zela: 'Eble'hehn-: :gwluhuh', or 'da, Ase' 'di :due', mo-: :an mu 'Eble'hehn 'di 'da-dih-eh:.

⁸:Yee' 'de :ka :noror' 'di, deh :daa, eh :bleh-dih: 'i, eh :se 'Eble'hehn-a' 'di-a' klehkpeh, mo-: no Nyorsoa-a' 'nynuu :deh. Jorwor: :yuh :korn-a wlu Nyorsoa po-a :dhama'-', mo-: :zlo-dih-eh: 'Eble'hehn-a'a: 'nynuu deh 'jeh neh.

⁹:Ka Nyorsoa-a' :dhama'-' :po-wlu 'da-a, eh-: :dhe dih, on 'da, :Mor ti :taa dha :dha :daa na-dih, zon :an yi-a 'de, :yee' 'an mu deka :yi, 'de :Selor' 'ye nyor-kpalu-yu 'wluh.

¹⁰:Yee' eh :se eh :due'. :Wlibehkor'-a'a: nyor⧾-kpalu⧾-nynuu: :on :ne-a 'sororn', on 'ble :baa' :due', :or 'dhu-a :a :bai'-a' :baa' Ase'-'.

¹¹Jorwor: ti 'gba-nynuu: :dao', on 'see-a 'wluh, 'de mor on 'see-a deh 'jeh-: deh-zon-: no, :yee' Nyorsoa gan an-a' nyor :due'. Eh-: :torne-eh :a-uh :ka deh or 'bhorn-a or 'ye-a' no, eh-: 'o or no.

¹²Or :torne-eh :a 'weh 'do :Wlibehkor'-a' :gwluhuh' zela-eh bo, or 'da, :Klaba' nor-a mu 'zeehn nor-a' 'bhoi-yu :no. :Yee' eh-a' dhih, Nyorsoa-a mu nyor⧾ or 'bhorn-a 'duo: :chio'lo:. Eh se deh⧾ nyor⧾-a no-a :deh, jorwor: eh :sie: 'de or bo, nyor or 'bhorn-a, or-: 'o or mu 'da-:.

¹³:Ka eh no-a 'chle-eh 'de Nyorsoa-a' 'chlee-deh 'di, Nyorsoa no-a, 'Jekor:, or-: 'on :ybeh-', jorwor: 'Isor:, or-: 'on 'nyeh-'.

¹⁴:Yee' :kaa :a mu 'da-: :naa :eh? :A mu :ao', Nyorsoa no :bhuli'-nyor: :e? 'Kei o.

¹⁵Deh no-eh, or :wlu-' 'de :Mose' bo, or 'da, Nyor 'an 'bhorn-a, 'on 'ye-a' :wehlih 'ye, or-: 'an mu :wehlih 'ye-:. :Yee' nyor 'an 'bhorn-a, 'on 'ye-a' :gwluhuh' :nmor-dih:, or-: 'o 'an mu :gwluhuh' :nmor-dih:.

¹⁶:Yee' 'do eh-a' dha, eh :se 'de nyor⧾-a' 'bhororn'-deh⧾ bo 'wluh, 'de mor eh :se 'de 'kpih on po-a 'de :deh, jorwor: Nyorsoa-a' nyor⧾ :wehlih 'ye-eh: 'o.

¹⁷'Ka-: Nyorsoa 'da :ke, 'de or-a' 'chlee-deh 'di, or :wlu-' 'de 'Iye-nyor⧾-a' 'keen bo, or 'da, 'Mor 'duo: :on ya-' :on 'ye 'keen no, 'do deh :daa dhih bo. Eh-: 'dhu, 'on 'ye 'an 'kpih nyor⧾ 'i :to-dih: 'de :on 'di, 'de eh 'ye-eh' no, 'an 'nyne 'ye 'bluhba-a' klehkpeh 'dlu gweh dha yao zorn.

¹⁸:Yee' eh-a' dhih, nyor Nyorsoa 'bhorn-a, or 'ye-a' :wehlih 'ye, or-: 'o or 'ye :wehlih. 'De nyor or 'bhorn-a, :or 'ye-a' worn 'i ku, or mu-eh :no, or 'ye worn 'i ku.

¹⁹:Yee' a-a' nyor :due' mu :aa 'da-:, 'de 'on bo, :Eh :korn dhih 'da, 'de Nyorsoa po :gwlor-nyor dhih 'dlu :chio'lo: :eh, :mor :a se Nyorsoa-a' 'ton :korn-deh 'i :kan-eh 'beh-dih:?

²⁰Jorwor: :gwlor-nyor: :mor :daa, nyor :on 'dhu-eh:-', 'de :an kpon Nyorsoa wlu 'worn :eh? :Yabo' :or :ma-eh, or se 'beh-dih: or 'ye :wlu 'de nyor :or ma-or bo, or 'ye :ao', :Eh :korn dhih 'de :on no :ao', 'an ma-a' :eh?

²¹Maa-nyor :korn 'kpih or 'ye meh :kpuan' :due'-' 'duo:, or 'ye :yabo' :or 'kpa-a deh ken ma, 'de or 'ye meh :kpuan' :ne-a :due' :dao', or-a' 'for-' 'duo: :neheh', or 'ye :yabo' :or se-a deh ken 'kpa ma.

²²'De deh :ne-a :due' 'di, :mor Nyorsoa :taa 'bhorn, or 'ye or-a' 'chehn nyor⧾ 'i :to-dih: :dee', 'de on 'ye or-a' 'kpih yubo:, :yee' or 'beh-dih: or 'ye-eh' no :dee'. Jorwor: or kpon :porluh dih 'gabaa, 'do nyor⧾ :dao' or 'kpa-dih:-a 'chehn-' bo, :on :korn-a :on 'ye-a' gbe :zie: :dee'.

²³Or no deh :daa 'weh, or 'ye or-a' dhih-a' 'i 'beh-a' :doru' :daa, nyor⧾ 'i :to-dih:, :eh or 'nyi-a nyor⧾ or 'ye-a :wehlih, :yuh or po-a 'kpa :dee' see, :on 'ye-a or-a' dhih-a' 'i 'beh-a' 'ye.

²⁴:Yee' :a :mor 'o, :or 'dhu nyor⧾ :dao', Nyorsoa 'da-a 'noror or bo. Eh :se 'de :Jueh'-nyor⧾ :due' 'nyne-', or :se-' nyor⧾ 'da-dih:, jorwor: or 'da nyor⧾ 'weh, 'de nyor⧾ :on :se-a :Jueh'-nyor⧾ 'nyne-' :ke.

²⁵:Ka Nyorsoa-a' wele-eh: :po-nyor: :Ozea' no-a eh-a' :za-a', or no-a, Nyorsoa 'dae:, Nyor⧾ :on :se-a 'an nyor⧾, mo-: 'an mu 'an-a: nyor⧾ 'da-dih:. 'Bluhba-dlu: 'on se-a-' :ybeh :dee', mo-: 'an mu 'an-a: :ybeh-dih-nyor⧾ 'da-dih:.

²⁶'De Nyorsoa 'da :neheh', :Yee' 'do :dha 'on :za-dih-eh-', 'on no-a, A :se 'an-a: nyor⧾, :yee' 'do dha-a' 'jeh :dao', 'do :wor an mu 'kmo :ne-Nyorsoa-a' 'nynuu 'da-dih-eh.

²⁷:Yee' Nyorsoa-a' wele-eh: :po-nyor: :Azaya' po 'wele-eh:, :eh :korn-a 'de 'Ezlea-nyor⧾ bo, or 'da, :Ka yobo'-a' :bhehneh' :dhie:-a, 'ka-: 'Ezlea-nyor⧾ :dhie:. Jorwor: an-a' 'yor-bei:, mo-: :an mu 'puh-:.

²⁸Deh no-eh, 'kle 'ye-eh: :Gwlor :baa' 'da-a or mu-a 'o 'bluhba-a' klehkpeh 'dlu :po, or mu 'dhobo: or 'ye-eh' no :gbor :gbor.

²⁹Eh gweh :ka :Azaya' no-a eh-a' :za-a' see, or 'da, :Mor eh 'dhu, :a-a' :Gwlor :baa' :or 'ble-a 'kpih-a' klehkpeh kwa, or se 'o :a-a' 'nynuu-a' 'nynuu-a' :noo' sie :dee', :yee' :a mu 'Salor-gwlor-: 'dekorn: :Gormor'la-gwlor-: :gweh :dee'.

³⁰:Yee' :kaa :a mu 'da-: :naa eh? :Ka :a mu-a 'da-:, eh-: :dhe dih. Nyor⧾ :on :se-a :Jueh'-nyor:⧾, :an-a' 'worn-a, :an-a' po-a 'de 'kpih, 'do 'yi 'sleh-deh⧾-a' no-a' bo :dee', 'do Nyorsoa ybei', nyor⧾-a' 'jeh :dao', mo-: no 'yi 'sleh-nyor⧾ :naa 'do dhih 'jeh-' :po-eh bo.

³¹Jorwor: 'Ezlea-nyor:⧾, :an po-a 'de 'kpih :on 'ye-a' 'yi 'sleh-nyor⧾ no, 'do :Mose'-a' 'tele'-a' dih :dhe-eh bo, mo-: :se-eh' no.

³²:Eh :korn dhih :oo' :eh? Deh no-eh, an-a' 'kpih :po-eh :se 'de an-a' dhih 'jeh-' :po-eh bo 'wluh, jorwor: eh 'wluh 'de :koan: an no-a bo. An 'gbele sobu' :daa :an 'gbele-a nyor⧾.

³³:Ka eh no-a 'chle-eh 'de Nyorsoa-a' 'chlee-deh 'di, Nyorsoa no-a, A :gbee'e:. 'An po tu glu 'de 'Zayorn-gwlor 'di, :an mu-eh :no, 'de nyor⧾ 'ye-a' 'gbele:, 'de on 'ye-a' dih 'ga. Nyor :or :kpa-dih-or 'kpuh, or :se-' 'bluhbor 'bor-dih: i.