Read Eastern Krahn 1 'Korli-chlee-deh: 1 Bible Online

1 'Korli-chlee-deh: 1 - Eastern Krahn bible

1 'Korli-chlee-deh: 1

¹'Mor :Poror' :or Nyorsoa 'da-a, :or 'ye-a :Yusu' 'Klae-a'a: dboo-nyor no, 'de or-a' 'ton :korn ka 'di. 'Mor-: 'dekorn: :a-a' 'Klae :de-di' an 'da-dih-a 'Sortehneh-: :a :mor 'ye a-uh,

²a :mor :or 'dhu-a Nyorsoa-a' 'chore :eh :ne-a 'Korli-gwlor-', :yuh Nyorsoa 'da-a, :on 'ye-a or-a' 'jeh 'yor-eh-a' nyor⧾ no, :eh :yi-dih:-a :Yusu' 'Klae-', 'dekorn: nyor⧾-a' klehkpeh :on yobo' po-a 'de :gle 'gbeheh 'di, :on :ne :a mor-: :a za-a :a-a' :Gwlor :baa' :Yusu' 'Klae-a' :weheh', 'de :ka :ne-a :due' 'di.

³Mla-: 'dekorn: wlu-' dih 'worn-eh-: 'do a bo, :en 'wluh-a 'de Nyorsoa :or no-a :a :Baa'-: 'dekorn: :Gwlor :baa' :Yusu' 'Klae-: bo.

⁴'Do ti-a' klehkpeh bo, 'ka-: 'an po 'an Nyorsoa-a' 'zio, 'do a-a' dhih bo, 'do mla or po a bo, :or :yi-dih:-a :Yusu' 'Klae-' or-a' dhih.

⁵Deh no-eh, 'do a-a' :Yusu'-a' klei' :zi-eh bo, a :korn mla 'de deh⧾-a' klehkpeh 'di, :en no-a :ka a no-a :wlu-a'-: 'dekorn: a-a' deh-' dih 'worn-eh-:.

⁶Tubo-wlu:⧾ :a po-a 'de a bo, :en kor-a 'Klae 'i, me-: a kpon dih :glii:.

⁷:Yee' eh-a' dhih, a se Nyorsoa-a' :Zulu-a' :bhorlie'-a' deh-beh-deh-beh bo dih :tehn-dih:, :ka a fuo-a ti Nyorsoa-a mu-a :a-a' :Gwlor :baa' :Yusu' 'Klae :a 'i :to-dih:,

⁸:or mu-a a-a' dhih 'jeh-' :po-eh dih :ku-dih: :chio'lo: :eh mu-a ti-a' 'dlu-' :jla 'da. 'De Nyorsoa :ne-' a dhih 'bhun 'ye-dih:, 'do 'we-eh: :a-a' :Gwlor :baa' :Yusu'-a mu-a 'de :ya 'di.

⁹Nyorsoa :or 'da-a a-uh, 'de a :ne or-a' 'Yu :Yusu' 'Klae :or no-a :a-a' :Gwlor :baa', a 'ye-a' :dha :due' :na-dih:, or no :dhehehn-nyor:.

¹⁰:Yee' 'an 'Klae :de-di'-boi'-a:, 'an bale a-uh 'weh, 'de :a-a' :Gwlor :baa' :Yusu' 'Klae-a' 'nyne 'di, 'de a-a' klehkpeh, a 'ye deh :due' ken dih 'worn-dih:, 'de deh-' :gble-eh :ne 'de a 'nyne-' 'kpa. A kpon-dih: ken dih deh 'jeh, 'de deh a polo:-a 'do a :gwlii', a 'ye-eh' no.

¹¹:Yee' a :mor no-a 'an 'Klae :de-di'-boi', nyor⧾ :noo' :on 'wluh-a 'de 'Kloa 'bli 'gbu, mo-: po 'on kuna', on 'dae:, A jeh-' 'de a-a' 'jeh 'nyne-'.

¹²Deh 'an za-a-', eh-: 'dhu, A-a' nyor⧾ :noo' 'da, an zi 'o :Poror' klei'. 'De :noo' 'da, an zi 'o :Apor'lor klei'. 'De :noo' 'da, an zi 'o :Piteh' klei'. 'De :noo' 'da :neheh', an zi 'o 'Klae klei'.

¹³'Klae-a' 'jeh :daa, or :gble-eh:-' 'weh ke :e? 'Mor :or 'dhu-a :Poror'-', 'mor-: 'o, :or :kor-dih-eh: 'o tu 'i 'do a-a' dhih bo :e? :Ae' 'de 'an 'nyne 'di :oo', a :po-dih-eh: 'ni 'dlu ke?

¹⁴'On po Nyorsoa-a' 'zio, :ka 'on 'see-a a-a' nyor-beh 'ni 'dlu po, 'on :za 'o 'Klepor-: 'dekorn: 'Geyeh-: 'on po-a 'ni 'dlu, an-a' dheh.

¹⁵'De a-a' nyor-beh :sor no-a, 'de 'an 'nyne 'di :oo' or :po-dih-eh: 'ni 'dlu.

¹⁶A 'bor, eh 'kpa 'on :gwlii' 'weh :naa, 'on po :Tehfa'nor-: 'dekorn: nyor⧾ :on :ne-a 'de or 'bli 'gbu-: 'ni 'dlu 'weh :ke. Jorwor: :mor 'on po nyor :noror' 'ni 'dlu 'do 'for 'i, :yee' 'on se 'beh-dih: 'on 'ye-eh' :gwluhuh' bo :po-dih: :naa.

¹⁷'Klae :se-' 'on dbo, 'on 'ye nyor⧾ 'ni 'dlu po. Jorwor: or dbo 'on 'weh, 'on 'ye Nyorsoa-a' tubo-wlu:⧾ 'jeh po. Or :se-' 'on dbo, 'on 'ye 'an 'jeh 'yor-eh-a' :toror' no, 'on 'ye tubo-wlu:⧾ 'jeh :daa po. :Mor 'on no-eh, :yee' 'Klae-a' 'klorse tu 'i 'meh-dih-eh no deh :forbuh:, 'do nyor⧾ :an mu-a 'on :dou'⧾ bo :to bo.

¹⁸:Yee' nyor⧾ :on :ne-a 'o gbe :zi-eh-a' :gwie 'i, :mor on 'worn 'Klae-a' tu 'i 'meh-dih-tubo-wlu⧾, :yee' en se deh-' 'dhu-eh:, en no :bobo-deh:⧾ 'do on bo. Jorwor: :a :mor :yor 'puh-a, tubo-wlu:⧾ :daa, en :to-dih: :a 'i, :ka Nyorsoa 'ble-a 'kpih.

¹⁹:Ka eh no-a 'chle-eh 'de Nyorsoa-a' 'chlee-deh 'di, or no-a, 'An mu nyor⧾ :on dhe-a an-a' 'jeh 'yor-eh-a' :toror' :korn-eh :gwlii', an-a' :toror' ya :gba, 'de or 'ye 'o on :gwlii' dih 'ma-dih:. 'De 'an mu-eh :no, 'de 'chlee-deh yubo-nyor⧾-a' deh-' dih 'worn-eh 'ye :ao', eh se deh-' 'dhu-eh:.

²⁰Dha :toror' :korn-nyor⧾ :ne :naa :eh? Dha 'chlee-deh yubo-nyor⧾ :ne :naa :eh? Dha nyor⧾ :an dhobo-a nyor⧾ bo dha 'bluhba ken, on :ne :naa :eh? Eh :se Nyorsoa, or-: se-eh :a 'i :to-dih: :ka :toror' :korn-eh: :eh :ne-a dha 'bluhba ken, 'de eh 'dhu-a :bobo-deh⧾-' :e?

²¹'De Nyorsoa-a' :toror' :korn-eh 'di, or no-eh', 'de nyor⧾ :on :ne-a dha yao 'zorn, on se 'beh-dih: on 'ye-or 'i yubo: 'de an-a' 'jeh 'yor-eh-a' :toror' :korn-eh 'di. Jorwor: Nyorsoa-a' :porluh 'pehn-: dih 'do tubo-wlu:⧾ 'jeh :a po-a 'de nyor⧾ bo, :yih nyor⧾ :noo' :an zi-a 'o 'kmo bo-noo-deh⧾ klei', an 'da-dih-a :bobo-deh⧾, 'de or 'ye-eh' no, 'de nyor⧾ :on po-ih-a dhih 'jeh-', on 'ye 'puh.

²²:Jueh'-nyor⧾ 'da, an 'bhorn nyor⧾ 'i :to-dih-deh:⧾. 'De nyor⧾ :on :se-a :Jueh'-nyor:⧾, on 'da, an 'bhorn :toror' 'de deh :daa 'di.

²³Jorwor: :a :mor :mloror', :a za-a-' 'Klae-a' tu 'i 'meh-dih-dhih: :en no-a :zolo' :or 'gbele-a :Jueh'-nyor⧾, 'de :en no-a :bobo-dhih 'de nyor⧾ :on :se-a :Jueh'-nyor⧾ 'yli 'de.

²⁴Jorwor: nyor⧾ Nyorsoa 'da-a, :on 'ye-a or-a' nyor⧾ no, :Jueh'-nyor⧾-: 'dekorn: nyor⧾ :on :se-a :Jueh'-nyor⧾-: on po-eh-' dhih 'jeh :ka 'Klae 'dhu-a Nyorsoa-a' 'kpih-: 'dekorn: or-a' :toror'-:-'.

²⁵Deh no-eh, :mor Nyorsoa gweh :bobo-nyor 'de :gwlor-nyor⧾ 'yli 'de, :yee' or-a' :bobo-a' :dao', or :ne :toror' 'di, or :zi 'o :gwlor-nyor⧾-a' :noror'-' 'weh. 'De mor, :mor Nyorsoa gweh 'kpih-a' :chehehn-nyor 'de :gwlor-nyor⧾ 'yli 'de, :yee' or-a' 'kpih-a' :chehn-a' :dao', or :zi 'o :gwlor-nyor⧾-a' 'kpih-' :ne-eh 'weh.

²⁶:Yee' 'an 'Klae :de-di'-boi'-a:, a :gbee'e:. A :na-dih: a-a' :tehn 'i-deh :gwluhuh' dih, ti Nyorsoa 'ye a 'da, a 'ye-a or-a' nyor⧾ no. 'Do ti :dao' 'i, :yee' 'kmo bo nyor⧾-a 'da-dih a-a' :dha :dhulu' se :gwluhuh' dih :florn-nyor:⧾ :dee'. 'De mor a-a' :dha :dhulu' se 'kpih 'ble-nyor:⧾. 'De mor a-a' :dha :dhulu' :se 'nyne :korn-nyor:⧾ :ke.

²⁷Jorwor: Nyorsoa 'duo: nyor⧾ 'kmo-a 'da-dih-a :bobo-nyor⧾-' 'weh, eh 'ye :gwluhuh' dih :florn-nyor⧾ dhen-' dih po. 'De mor Nyorsoa 'duo: nyor⧾ 'kmo-a 'da-dih-a 'kpih-a' :chehehn-nyor⧾-' 'weh, eh 'ye :kmuu-nyor⧾ dhen-' dih po.

²⁸Nyorsoa 'duo: nyor⧾ 'kmo-a 'da-dih-a se deh ken 'kpa-nyor⧾-: nyor⧾ :yuh nyor⧾-a vlehn-a-: 'dekorn: nyor⧾ :yuh 'kmo no-a, :on se deh-' 'dhu-eh-: or 'duo-uh' 'weh, eh 'ye-eh' no, 'de or 'ye nyor⧾ 'kmo-a 'da-dih-a deh ken 'kpa-nyor⧾, on 'ye :ao', on se deh-' 'dhu-eh:.

²⁹:Yee' eh-: mu-eh :no, 'de nyor-beh-nyor-beh :se-' or-a' 'jeh 'i 'beh-dih: i 'do Nyorsoa ybei'.

³⁰Nyorsoa :oo', or-: po a mor-: 'dekorn: :Yusu' 'Klae-: :dha :due'. :Yusu' or-: Nyorsoa :yi-dih:-', 'de or :no-dih: :a :toror' :korn-nyor⧾-: 'yi 'sleh-nyor⧾-: 'dekorn: :vlehehn'-' :gweh-nyor⧾-:. 'De or zelie: :a-uh.

³¹:Yee' eh-a' dhih, :ka eh no-a 'chle-eh 'de Nyorsoa-a' 'chlee-deh 'di, eh no-a, Nyor :or mu-a or-a' 'jeh 'i 'beh-dih:, 'nyi or 'beh-dih: or-a' 'jeh 'i, 'do deh :Gwlor :baa' no-a, eh-a' dhih bo.