Read Eastern Krahn 1 'Korli-chlee-deh: 11 Bible Online

1 'Korli-chlee-deh: 11 - Eastern Krahn bible

1 'Korli-chlee-deh: 11

¹A zi 'o 'an 'gor klei', :ka 'on no-a 'o 'Klae-a' 'gor klei' :zi-eh :ke.

²'On po a dhih bo 'do 'an dhih-a' :gwluhuh' bo :po-dih-eh bo, 'do deh⧾-a' klehkpeh 'on :torne: a-uh, en-' dih :kpon-eh bo. :Ka 'on no-a en-' :zi-dih-eh 'de a bo, 'ka-: a no en-' dih kpon-a'.

³:Yee' 'an 'bhorn a 'ye deh :daa dih 'worn, :ka 'Klae no-a nyor :klaba' 'do nyor⧾-kpalu⧾-a' klehkpeh 'dlu. 'Ka :wor nyor-kpalu no :ke, 'de or no nyor :klaba' 'do 'nynor-kpao' 'dlu bo. 'De Nyorsoa no nyor :klaba' 'do 'Klae 'dlu bo :ke.

⁴:Yee' nyor-kpalu-a' :yor :or mu-a 'de Nyorsoa bo :wlu 'de 'chore-', :eh beh or po Nyorsoa-a' wele-eh-: 'de or 'ye deh 'dlu 'dhu, :yee' or :se-' 'Klae :or :ne-a 'o or 'dlu bo deh-' 'ye.

⁵'De mor 'nynor-a' :yor :or mu-a 'de Nyorsoa bo :wlu, :eh beh or po Nyorsoa-a' wele-eh-: 'de 'chore-', 'de or 'ye :ao', or se deh 'dlu bla, :yee' or :se-' or-a'a: yibeor: :or :ne-a 'o or 'dlu bo deh-' 'ye. :Yee' or gweh 'nynor :or :korn-a 'dlu on 'kploror:-a, eh 'ye-or' dhen dih po.

⁶:Mor eh 'dhu 'nynor se deh 'dlu bla, :yee' 'nyi or chehn or-a' 'dlu :dueh'leh:. :Mor eh no dhen-deh 'nynor 'ye or-a' 'dlu chehn, 'de or 'ye or-a' 'dlu 'kploror:, :yee' 'nyi or bla deh 'dlu 'da.

⁷Nyor-kpalu se :korn or 'ye deh 'dlu 'dhu 'de 'chore-'. Deh no-eh, nyor-kpalu :ne 'de Nyorsoa-a' tu-', 'de or :to-dih: Nyorsoa-a' dhih-a' 'i 'beh-a' nyor⧾ 'i. Jorwor: 'nynor, or-: :to-dih: nyor-kpalu-a' dhih-a' 'i 'beh-a' nyor⧾ 'i.

⁸Deh no-eh, eh :se 'o 'nynor-kpao' 'bhun Nyorsoa :se-' deh :za, 'de or :se-' nyor-kpalu no. Jorwor: 'do nyor-kpalu 'bhun :oo', or :za deh, 'de or no 'nynor-kpao'.

⁹'De mor eh :se 'nynor-kpao'-a' dhih nyor-kpalu :se-' :no-eh:. Jorwor: nyor-kpalu-a' dhih :oo', 'nynor-kpao' :no-eh:.

¹⁰Eh-: :korn dhih 'nynor-kpao' :korn or 'ye deh 'dlu bla, 'enjor-nyor⧾-a' dhih, 'de eh 'ye-eh' nyor⧾ 'i :to-dih: :ka or-a'a: yibeor :ne-a 'o or 'dlu.

¹¹Jorwor: 'de :Gwlor :baa'-a' deh 'di, 'nynor-kpao' se 'beh-dih: or 'ye 'o or 'bli dih :nyna, 'de mor nyor-kpalu se 'beh-dih: or 'ye 'o or 'bli dih :nyna :ke.

¹²Deh no-eh, :ka 'nynor 'wluh-a 'o nyor-kpalu 'bhun, 'de or :no-eh, 'ka-: 'nynor-kpao' no, 'de or 'wluh nyor-kpalu :ke. 'De deh⧾-a' klehkpeh 'wluh 'de Nyorsoa bo.

¹³A :na-dih-eh :gwluhuh' dih 'do a-a' 'jeh-a' :porluh⧾ ken. Eh :nmor-: 'yi 'nynor-kpao' 'ye :ao' or se deh 'dlu bla, 'de or 'ye 'de Nyorsoa bo :wlu 'do :gwlor-nyor⧾ ybei' :e?

¹⁴Eh :se :ka Nyorsoa no-a :gwlor-nyor-buo no-a' 'de or-a' 'kmo-' 'di, eh-: se a deh :torne: :eh :mor, :mor nyor-kpalu 'ble 'mii: :dhorno'⧾, :yee' eh no dhen-deh :e?

¹⁵Jorwor: :mor 'nynor-kpao' 'ble 'mii: :dhorno'⧾, :yee' eh no or-a' 'yi dih :nmor-eh:. Deh no-eh, Nyorsoa 'nyi-or 'mii: :dao' 'weh, or 'ye or-a' 'dlu 'zile:.

¹⁶:Yee' :mor eh 'dhu deh 'on :za-a-', nyor se-eh ken dih 'worn-dih:, :yee' :a mor-: 'dekorn: Nyorsoa-a' 'chore-nyor⧾-: :a se deh :neheh' 'ble :a 'ye 'o :no-dih:.

¹⁷:Yee' deh 'an yi-a-' :za 'da, 'on :se-' a dhih bo :po i. Deh no-eh, a-a' 'gbon-dih-eh: a 'gbon-dih-a, 'de a za-a :Gwlor :baa' :weheh', eh-a' 'worn, eh-a' :za-dih: a-uh', jorwor: eh 'kor-dih a-uh 'weh.

¹⁸Deh no-eh, :zai'-deh:, :mor a 'gbon-dih: 'do 'chore bo, :yee' 'on 'worn-ih' :ka deh-' :gble-eh :ne-a 'de a 'nyne-'. 'On yubo-eh' en-' klehkpeh :se sih.

¹⁹:Yee' 'on yubo-eh' deh-' :gble-eh :korn eh 'ye 'de a 'nyne-' :ne, nyor⧾ :on no-a :dhehehn-nyor⧾ 'de a 'nyne-', 'de nyor⧾ 'ye-uh' yubo:.

²⁰:Mor a 'gbon-dih: :dha :due', :yee' :Gwlor :baa'-a' gban 'i :ne-dii-deh:, a 'da, a di-a, a-a' di-eh, 'de :ka 'jeh nor 'di.

²¹Deh no-eh, :mor a :taa-eh di, a-a' :fuo: a 'bei' ken. :Yee' :noo'-a' 'ye dii-deh. 'De :noo' 'na, 'de nomor-a no-uh.

²²Eh :korn dhih :oo' :eh? A se a-a' 'jeh-a'a: 'gbu⧾ 'ble a 'ye-a' deh 'di :di-dih: :e? 'De mor a 'ye-a' 'di 'na-dih: :e? :Yee' a vlehn Nyorsoa-a' 'chore 'weh :e? A 'bhorn a 'ye nyor⧾ :on se-a deh-a' :za-da 'ble dhen :no-dih: :e? :Yee' :kaa 'on 'ye 'da 'de a bo :eh? 'On po a dhih bo :e? 'On se-eh 'beh-dih:.

²³:Yee' nyor⧾ deh :torne-eh: 'on :za-a: 'de :Gwlor :baa' bo, :eh 'on :torne: a-uh :ke, eh-: :dhe dih. 'Do glu-we-eh: on :plo-dih-or 'di, 'do :wor or 'duo-dih: 'bhlee-'.

²⁴:Yee' :yeh or gweh-a Nyorsoa-a' 'zio :po-eh 'i, :yee' or :chehn-dih-eh-: dih, 'de or 'kwa, or 'da, 'Bhlee: :daa, 'an yau: :on :za-dih-eh 'slaa 'do a-a' dhih bo, mo-: 'o. A di-eh, 'do 'an dhih-a' :gwluhuh' bo :po-dih-eh bo.

²⁵'De :ka :ne-a :due' 'di, :yeh on gweh-a 'gwie-deh: :daa, eh-a' di-a' 'i, :yee' or 'duo: 'korbuh :on 'yi-a 'glee-nomor 'di 'weh, or 'da, 'Korbuh :daa, on no kuo :dele', 'do a mor-: 'dekorn: Nyorsoa-: 'nyne bo, kuo 'an nyomor no-eh, 'de :or :ne-a 'kpih ken. :Yee' ti-a' klehkpeh bo, a mu-or 'na-:, a no-eh, 'do 'an dhih-a' :gwluhuh' bo :po-dih-eh bo.

²⁶:Yee' :Poror' kpa or-a' wlu 'dlu bo, or 'da, Ti-a' klehkpeh bo, a mu-a 'bhlee: :daa :di, 'de a 'ye-a nomor :ne-a 'noror 'korbuh :daa 'di 'na, :yee' :Gwlor :baa'-a' 'meheh'-wele-eh: 'o a po :chio'lo:, eh 'ye or-a' de :yi-ti ken :yeh-dih:.

²⁷:Yee' eh-a' dhih, nyor :yor :or mu-a :Gwlor :baa'-a' 'bhlee: :daa :di, 'de :or 'ye-a nomor :or :ne-a 'noror 'korbuh :daa 'di 'na, 'de se or-a' deh-' 'ye ka 'di, :yee' or no deh-zon: 'do :Gwlor :baa'-a' yau-: 'dekorn: or-a' nyomor-: bo.

²⁸:Yee' :mor nyor 'ye 'bhlee: :daa di, 'de or 'ye 'korbuh :daa 'di 'na-dih:, :yee' 'nyi nyor :dao' or pobo: 'do or-a' 'jeh :porluh ken deh 'jeh, :mor deh-zon se 'o :ne :weh, 'de or 'ye-ih' 'duo:.

²⁹Deh no-eh, nyor :or mu-a 'bhlee: :daa :di, 'de :or 'ye-a' 'korbuh :daa 'di 'na-dih:, 'de :or 'ye :ao' :or se-a deh :Gwlor :baa'-a' yau :bleh-dih:-a 'i yubo:, :yee' or :ya 'de Nyorsoa-a' zabe: :zi-eh: 'do or-a' 'jeh bo.

³⁰Eh-: :korn dhih, 'de a-a' :dha :dhulu'-a kormu, 'de an-a' 'kpih-a chehn, 'de :noo' 'meh.

³¹Jorwor: :mor :a pobo 'o :a-a' 'jeh :porluh ken :zai', :mor deh-zon se 'o :ne, :yee' Nyorsoa-a' zabe :se-' :a :kpon i.

³²Jorwor: :mor :Gwlor :baa' zi :a-a' zabe, :yee' or 'dhu-dih: :a kplen 'jeh. Deh no-eh, or :se-' 'bhorn :mor or :taa 'kmo-a' zabe 'i chehn, 'de or :ne-' :a :dha :due' po.

³³:Yee' 'do eh-a' dha, 'an 'Klae :de-di'-boi'-a:, :mor a 'gbon-dih: 'do :Gwlor :baa'-a' gban 'i :ne-dii-deh-a' di 'da, :yee' a :fuo: a 'bei' ken.

³⁴:Mor 'moeh :taa a-a' nyor no, :yee' 'nyi or di deh 'de or 'bli 'gbu, 'de or :ne 'o Nyorsoa-a' zabe: :zi-eh 'zorn pa, 'do a-a' 'gbon-dih: 'da. :Yih :en :sie:-a 'o, :mor 'on 'yle, :yee' 'an mu-ih 'kpa :po.