Read Eastern Krahn 1 'Korli-chlee-deh: 12 Bible Online

1 'Korli-chlee-deh: 12 - Eastern Krahn bible

1 'Korli-chlee-deh: 12

¹:Yee' 'do Nyorsoa-a' :Zulu-a' 'nyii'-deh⧾ 'bhun, 'an 'Klae :de-di'-boi'-a:, 'on :se-' 'bhorn en 'ye 'de a 'di dih :kpe-dih:.

²A yubo-eh', ti a se-a Nyorsoa yubo: :zai', :yee' a :bo-dih-eh: dih, 'de :ka :dhulu' 'di, 'de a za zuu:⧾ :en se-a :febeh' 'ble en-' :weheh'.

³:Yee' eh-a' dhih, 'an 'bhorn a 'ye-eh' yubo:, nyor :or Nyorsoa-a' :Zulu-a na-dih-a, or se 'beh-dih: or 'ye :Yusu' 'chlo bo po. Nyor Gban 'i :ne :Zulu-a na-dih-a, or :due', or-: 'beh-dih: :or 'ye-eh' :za 'de or 'worn :ka :Yusu' 'dhu-a :Gwlor :baa'-'.

⁴Nyorsoa-a' :Zulu-a' 'nyii'-deh⧾ :ne 'doror: 'dor. Jorwor: Nyorsoa-a' :Zulu: :ne-a :due' mo-: 'o 'gboror:.

⁵Nyorsoa-a' :koan-a' no-a' :ne 'doror: 'dor. Jorwor: :Gwlor :baa' :ne-a :due' :oo' 'gboror:.

⁶Nyor⧾-a' klehkpeh, on 'ble 'kpih 'doror: 'dor 'do Nyorsoa-a' :koan: :no-eh bo. Jorwor: Nyorsoa :ne-a :due', or-: 'o, :or 'nyi nyor⧾-a' klehkpeh 'kpih 'doror: 'dor, 'do an-a' :koan: :no-eh bo.

⁷Nyorsoa 'nyi nyor⧾-a' klehkpeh or-a' :Zulu-a' 'nyii'-deh:⧾ :due' :due', eh 'ye-eh' no, eh 'ye 'chore-a' klehkpeh-' :za-dih:.

⁸Nyorsoa-a' :Zulu-a 'nyi nyor :noror' tubo-wlu:⧾ :en :ne-a :toror' 'di. 'De mo-: :ne-a :due' an 'nyi :noror' tubo-wlu:⧾ :en 'ble-a deh-' dih 'worn-eh: 'de en 'di.

⁹:Zulu: :ne-a :due', mo-: :an 'nyi nyor :noror' dhih 'jeh-' :po-eh: 'de or no nyor⧾ 'di dih 'ma-dih-deh⧾. 'De mo-: :ne-a :due' :neheh', an 'nyi :noror' 'kpih :en 'puh-dih-a puhba-nyor⧾.

¹⁰:Zulu: :ne-a :due', mo-: :an 'nyi nyor :noror' 'kpih or 'ye nyor⧾ 'di dih 'ma-dih-deh⧾ no. 'De an 'nyi nyor :noror' Nyorsoa-a' wele-eh: :po-eh. 'De an 'nyi :noror' 'kpih or 'ye deh⧾ :en 'wluh-a 'de on bo-: 'dekorn: :yih :en se-a 'de 'wluh-: or 'ye-ih' dih zela:. An 'nyi nyor :noror' 'kpih or 'ye wlu⧾ 'doror: 'dor po :en Gban 'i :ne :Zulu 'nyi-or, or 'ye-a' po. 'De an 'nyi nyor :noror' 'kpih or 'ye wlu⧾ :dao' gbor :za.

¹¹Nyorsoa-a' :Zulu: :ne-a :due' mo-: 'o :an no deh⧾-a' klehkpeh :daa. :Ka an 'bhorn-a 'ka-: 'o on no nyor⧾ 'nyii'-deh:⧾ 'doror: 'dor :daa en-' 'nyi-a' :due' :due'.

¹²'Klae gweh yau: :on 'ble-a deh⧾ :doru' 'do on 'bhun. Jorwor: on no deh :due'. Keen' :mloror' deh⧾ :doru', me-: 'dhu-dih-uh 'i.

¹³:Yee' 'de :ka :ne-a :due' 'di, :Jueh'-nyor⧾-: :yuh :on :se-a :Jueh'-nyor⧾-: 'ge-nynuu-: :yuh :on :se-a 'ge-nynuu-: 'de Nyorsoa-a' :Zulu :due' 'di :oo', 'do :wor :a-a' klehkpeh :a :po-dih-eh: 'ni 'dlu, 'de :a-a' klehkpeh, :a no yau :due', 'de Nyorsoa 'nyi :a-a' klehkpeh or-a' :Zulu: :ne-a :due' 'do :a-a' :porluh⧾ ken.

¹⁴Deh no-eh, eh :se deh :due' :eh :se-' yau no. Jorwor: deh⧾ :dhulu' me-: :po-eh: :dha :due' me-: no yau.

¹⁵:Yee' :mor eh 'dhu buh 'da, :Ka 'on :se-a son, :yee' 'on :se yau-a' deh, :mleheh' :se-uh' yau-deh-' :zai' 'gboror:.

¹⁶'De mor :mor :dou' 'da, :ka 'on :se-a 'yli-eh:, :yee' 'on :se yau-a' deh, :mleheh' :se-uh' yau-a' deh-' :zai' :ke.

¹⁷:Yee' :mor yau-a' klehkpeh 'dhu 'yli-eh-' :dee', :yee' :kaa an mu :no, 'de on 'ye dih 'worn :eh? 'De mor :mor an-a' klehkpeh 'dhu :dou'-', :yee' :kaa an mu :no 'de on 'ye deh⧾-a' 'no 'worn :eh?

¹⁸Jorwor: :ka on :ne-a :naa, Nyorsoa po-uh deh⧾ 'doror: 'dor 'bhun dih, :ka or 'bhorn-a on 'ye-a' :ne.

¹⁹:Mor yau-a' klehkpeh no 'kplo :due' :dee', :yee' yau :se-' :ne i :dee'.

²⁰Jorwor: :ka on :ne-a :naa, deh⧾ :doru' me-: 'dhu-eh: 'o on 'bhun, jorwor: yau :due' :oo'.

²¹:Yee' eh-a' dhih, 'yli-eh se 'beh-dih: eh 'ye :ao', Son, 'on se :korn 'on 'ye :on 'ble. 'De mor, 'dlu se 'beh-dih: on 'ye :ao' 'da :ke 'de buh⧾ bo.

²²Keen', yau-a' 'for :on :a no-a on se 'kpih ken :ne, an-a' 'jeh :dao', mo-: :a :korn :a 'ye 'ble :gbor :gbor.

²³:Yee' yau-a' 'for⧾-' :yih :a no-a en se deh-' 'dhu-eh: deh 'jeh, en-' 'jeh :dao', me-: :a 'ye deh-' deh 'jeh. 'De yau-a' 'for⧾-' :yih :a se-a 'o :gwlor :gwea :to-eh 'beh-dih:, me-: :a pa-dih 'wla⧾-' deh 'jeh.

²⁴Jorwor: yau-a' 'for⧾-' :yih :a to-a 'o :gwlor :gwea, :a se :korn :a 'ye-a 'o en-' bo dih pobo-eh no deh :dao'. Nyorsoa-a' 'jeh 'yor-eh: po yau :dha :due' 'de :ka :noror' 'di, 'de deh-' 'ye-eh: :klaba' 'ye 'for⧾-' :yih nyor⧾ se-a zlo 'nyi-eh:.

²⁵Nyorsoa no deh :daa 'weh, 'de deh-' :gble-eh :ne 'o yau 'bhun :ne. An-a' 'for⧾-a' klehkpeh 'ye en 'bei'-a' deh bo :korn.

²⁶:Mor yau-a' 'for :taa 'kle 'ye, :yee' :yih :en :sie:-a 'o, en 'ye 'kle :ke. :Mor 'for :due' :po-eh: dhih bo, :yee' 'for⧾ :yih :sie:-a 'o, en gble or-a' 'mona: :dao' 'weh :ke.

²⁷:Yee' a-a' klehkpeh a no 'Klae-a' yau:, 'de a no an-a' 'for⧾ :due' :due'.

²⁸:Yee' 'de 'chore :ke, Nyorsoa 'dhu deh⧾-a' klehkpeh :dhe-da:. :Tehn 'i-deh:, or po 'o :Yusu'-a'a: dboo-nyor:⧾, :yee' 'sororn' :neh, or-a' wele-eh: :po-nyor:⧾, taan :neh, nyor⧾ deh :torne-nyor:⧾. :Yee' nyor⧾ :on 'kpih 'nyi-eh :on 'ye-a deh⧾ :kolu'⧾ :kolu'⧾ no, nyor⧾ :on 'kpih 'nyi-eh :on 'ye-a puhba-nyor⧾ 'puh-dih:, mo-: kor 'o dih, :korn nyor⧾ :an za-dih-a nyor⧾-: :korn nyor⧾ :on yubo:-a 'o deh bo dih pobo-eh-: 'dekorn: :yuh :an po-a wlu⧾ 'doror: 'dor Gban 'i :ne :Zulu 'nyi-uh-a, on 'ye-a' po.

²⁹An-a' klehkpeh, an-a' no :koan :due'. Eh :se an-a' klehkpeh, mo-: :an no :koan :Yusu'-a'a: dboo-nyor⧾-a no-a :deh, :korn mor Nyorsoa-a' wele-eh: :po-eh-: nyor⧾ deh :torne-eh-:. 'De mor eh :se nyor⧾-a' klehkpeh, mo-: 'ble 'kpih :en no-a deh⧾ :kolu'⧾ :kolu'⧾ :deh.

³⁰Eh :se nyor⧾-a' klehkpeh on se 'kpih :en 'puh-dih-a puhba-nyor⧾ 'ble, :korn mor wlu⧾ 'doror: 'dor :po-eh-: :en Gban 'i :ne :Zulu 'nyi-uh-a, on 'ye-a' po. 'De mor eh :se nyor⧾-a' klehkpeh, mo-: yubo: en-' gbor :za-eh :ke :deh.

³¹'Nyii'-deh:⧾ :en no-a 'nyii'-deh⧾ :en 'kpa-a deh ken, 'do :wor a 'ye a-a' :porluh⧾ po. Jorwor: en-' :gwie: :eh 'sleh-a 'i, 'de :eh :zi-a 'o deh⧾-a' klehkpeh, 'an mu-eh a :torne:.