Read Eastern Krahn 1 'Korli-chlee-deh: 13 Bible Online

1 'Korli-chlee-deh: 13 - Eastern Krahn bible

1 'Korli-chlee-deh: 13

¹:Yee' :mor eh 'dhu 'on po :gwlor-nyor-wlu, :korn mor 'enjor-a' wlu, jorwor: :mor 'on se :ybeh-dih-eh 'ble, :yee' dhih 'an za-a-', en gweh :ka nyor bla 'kpole-eh-: 'dekorn: 'gea-: :en po-a :dhlumeh' :dhulu', 'de dhih en za-a-', nyor-a' 'worn-ih'-a' dih.

²'An :yeh 'ble 'kpih, 'on 'ye Nyorsoa-a' wele-eh po, 'an :yeh 'ble deh-' dih 'worn-eh-a' klehkpeh, 'de 'on 'ye 'slan⧾-a' klehkpeh-' dih 'worn, 'de 'on 'ye dhih 'jeh-' :po-eh-a' klehkpeh :eh :korn-a :eh 'ye-a tluh :gwliin' :za-dih: 'ble, jorwor: :mor 'on se :ybeh-dih-eh 'ble, :yee' 'on se deh-' 'dhu-eh:.

³'De mor :mor 'on 'nyi 'an-a: deh⧾-a' klehkpeh 'on 'ble-a se deh-a' :za-da 'ble-nyor⧾, 'de 'on 'ye 'an yau-a' klehkpeh 'kwla :za on 'ye 'yli :po-eh:, :mor 'on se :ybeh-dih-eh 'ble, en-' klehkpeh :se 'o 'on deh po 'gboror:.

⁴:Porluh-a' dih :kpon-eh-: an-a' 'yi dih :nmor-eh-: me-: 'dhu :ybeh-dih-eh. :Ybeh-dih-eh se :gwlehehn'-: :an-a' 'jeh dhih bo :po-eh-: 'dekorn: 'jeh 'i 'beh-dih-eh-: 'ble.

⁵:Ybeh-dih-eh-a' po nyor⧾ yaa'e dih. Eh-a' zi eh-a' 'jeh 'yor-eh-a' :due'-a' dhih. Eh-a' 'dhobo:, eh-a' 'kpa 'chehn-'. Eh-a' 'ble-dih: dhih 'di dih.

⁶Nyor⧾ :on 'ble-a :ybeh-dih-eh, an-a' no 'mona :mor nyor no deh-zon. Jorwor: dhih-a' 'yor-eh:, me-: :korn dhih an no 'mona.

⁷:Ybeh-dih-eh 'ble 'di dih :ku-eh: 'do nyor⧾ bo. Eh 'ble nyor⧾-a' dhih 'jeh-' :po-eh-: an-a' :gwlii' :dhe-eh-: 'dekorn: :porluh-a' dih :kpon-eh-: 'do on bo.

⁸:Ybeh-dih-eh se 'dlu-' :jla 'da :korn. Jorwor: Nyorsoa-a' wele-eh: :po-eh mu dih :gweh. Wlu⧾ 'doror: 'dor :po-eh: :en Gban 'i :ne :Zulu 'nyi-a nyor⧾, on 'ye-a' po, en mu dih :gweh. Deh 'i yubo-eh: :eh no-a 'nyii'-deh: Nyorsoa 'nyi :a-uh, eh mu dih :gweh.

⁹Deh no-eh, deh 'i yubo-eh: :eh no-a 'nyii'-deh: Nyorsoa 'nyi :a-uh, :a se eh-a' klehkpeh 'zorn gweh, 'de mor :a se 'nyii'-deh: :eh no-a tubo-wlu:⧾ :en Nyorsoa 'nyi :a-uh, en-' wele-eh: :po-eh-a' klehkpeh 'zorn gweh :ke.

¹⁰Jorwor: :mor ti deh :eh gweh-a :vlehehn'-', eh mu-a 'de :yi, :yee' :yih :en se-a 'de :gweh, en mu :zi.

¹¹:Yee' ti 'on no-a 'yu-yu, :yee' :ka 'yu-yu-a no-a :wlu-a', 'ka-: 'an no :wlu-a'. :Ka 'yu-yu-a no-a :gwluhuh' dih :na-dih-eh, 'ka-: 'an no :ke. :Ka or no-a deh-' dih 'worn-eh, 'ka-: 'an no. Jorwor: :yeh 'on no-a nyor-kpalu :naa, :yee' 'on 'tali: 'yu-yu-deh⧾-a' klehkpeh-: dih.

¹²:Yee' :kana :naa, deh⧾ :a 'worn-a dih 'de Nyorsoa-deh 'di :naa, en gweh :ka nyor :or pobo-a 'de 'ni :eh se-a 'yli zelie: bo. Jorwor: or :ne :a mor-: :a mu ybei' dih dhele: 'de ybei'. :Kana :naa 'on 'see Nyorsoa-a' yubo-eh 'zorn gweh. Jorwor: 'de ybei', 'an mu-or dih 'worn-: deh 'jeh, :ka or no-a 'an dhih-' dih 'worn-eh deh 'jeh :naa.

¹³:Yee' deh⧾ taan :daa, en :se-' dih :gweh i, dhih 'jeh-' :po-eh-: deh :gwlii' :dhe-eh-: 'dekorn: :ybeh-dih-eh-:. Jorwor: :ybeh-dih-eh:, eh-: no en-' klehkpeh-a' 'dlu.