Read Eastern Krahn 1 'Korli-chlee-deh: 15 Bible Online

1 'Korli-chlee-deh: 15 - Eastern Krahn bible

1 'Korli-chlee-deh: 15

¹:Yee' 'an 'Klae :de-di'-boi'-a:, 'an 'bhorn 'on 'ye-a Nyorsoa-a' tubo-wlu:⧾ 'jeh 'on po-a 'de a bo, en-' dhih a :gwluhuh' bo :po-dih:, :yih a kpon-a dih, 'de a-a' dhih 'jeh-' :po-eh :nyna-a 'o ken dih.

²Tubo-wlu:⧾ 'jeh :daa, me-: no-eh, 'de a 'puh, :mor eh 'dhu a kpa en-' dih :kpon-eh 'dlu bo, :ka 'on no-a en-' po-a' 'de a bo. Jorwor: :mor a se :ao' en-' dih :kpon-eh no, :yee' a-a' dhih 'jeh-' :po-eh no deh 'plo.

³Tubo-wlu⧾-a' :yih :en 'kpa-a deh ken 'gabaa, me-: 'on kpon-dih, 'de 'on :zi-dih-ih 'de a bo, :en 'dhu-a, 'Klae 'meh-' 'do :a-a' deh⧾-zon⧾-a' dhih bo, :ka Nyorsoa-a' 'chlee-deh no-a eh-a' :za-a'.

⁴'De on nma-dih-or dih, 'de or no 'we taan 'de mor. 'De Nyorsoa za-or 'de nma-dih-deh 'di. Deh :eh 'chle-eh 'de Nyorsoa-a' 'chlee-deh 'di, eh-: 'o, :eh 'kpa dhih 'jeh-'.

⁵Or 'wluh-dih: :Piteh' 'i :zai'. 'De or 'wluh-dih: or-a'a: bo :na-nyor:⧾ :on :korn-a :bhue: 'yor :ne-a 'sororn' 'i.

⁶'De or 'wluh-dih: or-a' klei' :zi-nyor:⧾ :noo' 'i, :on zi-a :kehehn' :mm' dih, 'do :dha :due'. An-a' :dha :dhulu' mo-: :ne 'kmo-' :naa, keen' :mloror' an-a' :noo' 'meh.

⁷:Yeh or 'wluh-a 'o :neheh', :yee' or 'wluh-dih: 'Jeen 'i, 'de or 'wluh-dih: or-a'a: dboo-nyor⧾-a' klehkpeh 'i :ke.

⁸:Yee' :yeh 'bor-dih:-a 'o klehkpeh, eh-: 'dhu, or 'wluh-dih: 'an 'jeh 'yor-eh 'i :ke. Keen' :mloror' 'on gweh nyor :or se-a ti 'jeh 'i 'wluh-dih:.

⁹Deh no-eh, 'mor no :Yusu'-a'a: dboo-nyor⧾-a' 'zeehn. 'On se-eh 'i :bleh-dih:, 'on 'ye or-a'a: dboo-nyor 'da-dih-eh: :sloror'. Deh no-eh, 'on 'ye-dih: Nyorsoa-a' 'chore 'kle :zai'.

¹⁰Jorwor: Nyorsoa-a' mla :oo', or-: no-eh, 'de 'on 'dhu-eh: nyor-' 'zean', :eh 'dhu-a :Yusu'-a'a: dboo-nyor-deh: :daa. 'De or-a' mla or po-a 'on bo, or :se-' 'kwla 'wla-eh:. Jorwor: 'on no :koan:, 'on :zi 'o 'on 'bei' dboo-nyor:⧾ :yuh :sie:-a 'o. Keen' :mloror' eh :se 'an 'jeh 'yor-eh-a' 'kpih, jorwor: Nyorsoa-a' mla :oo', or-: :no-dih: 'on :koan bo.

¹¹:Yee' eh-a' :yeh 'dhu 'mor-', 'on po Nyorsoa-a' tubo-wlu:⧾ :daa, 'de mor eh-a' :yeh 'dhu 'on 'bei' dboo-nyor⧾-', tubo-wlu:⧾ :daa :a po-a, me-: a po dhih 'jeh-'.

¹²:Yee' :mor :gwlor-nyor⧾ :taa tubo-wlu⧾ po, :ka Nyorsoa :za-a: 'de 'Klae 'de nma-dih-deh 'di, :yee' :kaa eh no, 'de a-a' :noo' 'da, 'meheh'-nyor⧾ :se-' 'kmo-' bo :yi i :neheh' :eh?

¹³:Yee' :mor eh 'dhu dhih 'jeh-', 'meheh'-nyor⧾ :se-' 'kmo-' bo :yi i :neheh', :yee' Nyorsoa :se 'de 'Klae 'de nma-dih-deh 'di :za 'da.

¹⁴'De mor :mor Nyorsoa se 'de 'Klae 'de nma-dih-deh 'di :za :dee', :yee' tubo-wlu:⧾ :a po-a, en se deh-' 'dhu-eh: :dee'. :Yee' :a-a' dhih 'jeh-' :po-eh se deh 'di :ne :ke.

¹⁵:Yee' 'do 'de :neheh', :a 'dhu-dih: Nyorsoa dhih ken dih. Deh no-eh, :a 'da :a dhe-eh ken dih 'weh, Nyorsoa :za 'de 'Klae 'de nma-dih-deh 'di 'weh. Jorwor: :mor eh 'dhu dhih 'jeh-', :ka 'meheh'-nyor⧾ :se-a' 'kmo-' bo :yi i :neheh', :yee' Nyorsoa :se 'de 'Klae 'de nma-dih-deh 'di :za 'da.

¹⁶Deh no-eh, :mor eh 'dhu 'meheh'-nyor⧾ :se-' 'kmo-' bo :yi i :neheh', :yee' Nyorsoa :se 'de 'Klae 'de nma-dih-deh 'di :za 'da.

¹⁷:Mor eh 'dhu Nyorsoa se 'de 'Klae 'de nma-dih-deh 'di :za, :yee' a-a' 'Klae-a' dhih 'jeh-' :po-eh se deh 'di :ne, 'de a-a' deh⧾-zon⧾-a' dhih 'see bo 'ma-dih-eh 'gboror:.

¹⁸:Yee' :mor Nyorsoa se 'de 'Klae :za, :yee' or-a' dhih 'jeh-' :po-nyor:⧾ :on 'kpa-a 'nyinor: :klaba'⧾-', on :zie: gbe :weh see.

¹⁹Deh :gwlii' :dhe-eh: :a 'ble-a, :mor eh 'dhu 'Klae 'ye :a 'puh-dih: dha yao 'zorn :due' 'klein', :yee' :a-a' dhih :korn en 'ye :wehlih :ne, eh 'ye 'o nyor⧾-a' klehkpeh-' :zi.

²⁰Jorwor: eh no dhih-a' 'yor-eh:, Nyorsoa :za 'de 'Klae 'de nma-dih-deh 'di 'weh. Or-: no :zai'-nyor, :or 'meh, 'de Nyorsoa :za-a: 'de nma-dih-deh 'di.

²¹:Yee' :ka nyor-kpalu :due' no-eh 'de :gwlor-nyor⧾-a 'meh-a, 'ka-: eh no :ke, 'de nyor-kpalu :due' :noror' no-eh, 'de 'meheh'-nyor⧾-a mu 'kmo-' bo :yi :neheh'.

²²:A-a' 'Adan 'i :kor-eh: eh-: :ya 'de 'meh-a' 'do :a-a' klehkpeh bo. :Yee' 'ka-: eh :ne :ke, :a-a' 'Klae-a' :ne-a', eh-: mu-eh :no, 'de :a-a' klehkpeh, :a 'ye 'kmo-' :ne :dele' ka.

²³Jorwor: :gwlor-nyor⧾-a' 'kmo-' bo :yi-eh mu 'o :dhororn' 'i :ne. Nyorsoa :za 'de 'Klae 'de nma-dih-deh 'di 'weh :zai' see. :Yee' :mor 'Klae :taa 'de yi, :yee' :yuh :on :korn-a 'de or bo, mo-: kor 'o dih.

²⁴:Yee' :mor or no :ao', :yee' 'bluhba-a' 'dlu-' :jla-ti nyni 'o 'weh. 'Klae-a mu 'ku-: 'kwla 'ye-dih-deh⧾-: 'dekorn: nyor⧾ wlu 'ken :korn-nyor:⧾ :on se-a Nyorsoa-a' dhih 'worn-dih:-: or mu an-a' klehkpeh :du, 'de or 'ye or-a' nyor⧾ wlu 'ken :korn-eh Nyorsoa 'nyi, :or 'dhu-a or :Baa'-'.

²⁵Deh no-eh, 'Klae :korn or 'ye nyor⧾ wlu 'ken :korn :chio'lo:, 'de or 'ye nyor⧾ :on 'nyeh-or' ya :ya, 'de or 'ye-uh' ken dih :na.

²⁶'Mo 'nyeh-eh-dih-nyor: :or mu-a 'o 'bor-dih:, :or 'ye-a gbe :zie:, or-: 'dhu 'meh-a' 'kpih-'.

²⁷Eh 'chle-eh:-' 'de Nyorsoa-a' 'chlee-deh 'di, eh 'da, Nyorsoa po 'o deh⧾-a' klehkpeh 'do or :buhbuh⧾ 'zorn. Eh 'worn-eh-'-: dih :mloror', jorwor: :mor eh 'da, deh⧾-a' klehkpeh, :yee' Nyorsoa :se 'o 'kpa. :Eh :korn dhih :oo' :eh? Nyorsoa :oo', :or po 'o deh⧾-a' klehkpeh 'do 'Klae :buhbuh⧾ 'zorn.

²⁸:Yee' ti Nyorsoa-a mu-a 'o deh⧾-a' klehkpeh 'do 'Klae 'zorn :po, or 'ye-ih'-a wlu 'ken :korn, :yee' 'Klae-a' 'yor-eh: :or 'dhu-a or-a' 'Yu-', or mu or-a' 'jeh 'do Nyorsoa 'zorn :po, :or po-a 'o deh⧾-a' klehkpeh 'do or 'zorn :zai'. 'De Nyorsoa 'ye deh⧾-a' klehkpeh wlu 'ken :korn 'tene' :kpeen:.

²⁹:Mor eh 'dhu deh-', :yee' a 'nyi :a :na-dih: nyor⧾ :an po-a 'ni 'dlu 'do 'meheh'-nyor⧾-a' 'gor bo,[1] an-a' dhih :gwluhuh' dih. Deh on dhe :gwlii' an mu 'ye-: :eh? :Yee' :mor 'meheh'-nyor⧾ :se-' 'kmo-' bo :yi i :neheh' klehkpeh, :yee' deh on dhe :gwlii' 'de an po 'ni 'dlu 'do 'meheh'-nyor⧾-a' 'gor bo :eh?

³⁰:Yee' :mor 'meheh'-nyor⧾ :se-' 'kmo-' bo :yi i :neheh', :yee' :eh :korn dhih, 'de :a :mor :mloror', :a na 'de 'meh-a' 'worn dih 'do ti-a' klehkpeh bo :eh?

³¹'An 'Klae :de-di'-boi'-a:, 'mor-: 'dekorn: 'meh-a'-: :a pobo 'yli 'de dih, zorn 'o zorn. 'An buh⧾ a 'beh-dih:-a 'i, 'de :a-a' :Gwlor :baa' :Yusu' 'Klae-a' deh 'di, eh-: no-eh, 'de 'an za deh :daa-'.

³²'On vorn 'Ehfesor-nyor⧾ bo, :ka nyor-a vorn-a kpoon-nimi⧾ bo. :Mor 'on se-eh :gwlii' dhe, 'de 'an vorn-a' :dao' 'di, :eh :mor, :mor 'on 'meh, 'an mu 'kmo bo :yi :neheh', :yee' deh 'on 'ye 'o :eh? :Yee' :mor 'meheh'-nyor⧾ :se-' 'kmo-' bo :yi :neheh', :yee' :a 'beh-dih: :a 'ye :ao', A 'nyi :a di deh, :a 'ye 'na. Deh no-eh, :glaa'e :a mu 'meh-:, :ka nyor⧾ :noo'-a 'da-a.

³³A-a' 'worn-:-' nyor-a' :bo-dih:-' a dih. Nyor⧾-zon⧾-: 'dekorn: nyor⧾ 'jeh-: an-a' bo nena-eh :gwle 'o, nyor⧾ 'jeh no-a' 'kor-dih: 'da.

³⁴:Yee' a yi a-a' 'jeh bo. A 'bor deh⧾-zon:⧾ :no-eh. Nyor⧾ :noo', mo-: :ne 'de a 'nyne-', mo-: se Nyorsoa yubo: deh 'jeh. Deh :daa, eh :korn eh 'ye a dhen :no-dih:.

³⁵:Yee' nyor :noror'-a mu eh-a' dih dhele: 'bla, or mu :ao', :Kaa Nyorsoa-a mu 'meheh'-nyor⧾-a' 'kmo bo :ya-eh :no :eh? Yau-a' :yor-eh an mu 'ble-: :eh?

³⁶A :mor :daa, :or 'ble-a :porluh :due'. :Koo-yor-eh: :on tba-a 'de glu, :mor eh 'meh :weh, 'de eh me.

³⁷'De :mor :on tba deh⧾-yor, eh :se en-' tu-a' :kpalu: :an mu-a :me, :on :se-' tba, jorwor: deh-a' 'yor-eh :due' :oo' :on tba. Eh 'beh-dih: eh 'ye :koo-yor-: 'dekorn: deh⧾-yor: :nee' no 'bla.

³⁸Yau: Nyorsoa gan-a 'do deh⧾-yor: :dao' bo, me-: or 'nyi-ih. Yau: :on :korn-a 'de en bo :due' :due', me-: or 'nyi-ih.

³⁹:Yee' eh :se 'kmo :ne deh⧾-a' klehkpeh, me-: :korn yau: goor-dih: :deh. :Gwlor-nyor⧾-a' yau :ne 'o 'dor. 'De nimi-a' yau :ne 'o 'dor. 'De neme-a' ne :ne 'o 'dor :ke. 'De zimi-a' ne :ne 'o 'dor.

⁴⁰'De deh⧾ :en :ne-a 'de yao en-' yau-tu :ne 'o :weh, 'de :yih :en :ne-a dha yao 'zorn, en-' yau-tu :ne 'o :ke. 'Yi dih :nmor-eh: :eh :korn-a 'de :yih :en :ne-a 'de yao bo, eh :ne 'o 'dor. 'De 'yi dih :nmor-eh: :eh :korn-a 'de :yih :en :ne-a dha yao 'zorn bo, eh :ne 'o 'dor.

⁴¹'Yluh 'ble an-a' 'jeh-a' 'yi dih :nmor-eh:. 'Chuh 'ble 'yi dih :nmor-eh: 'dor. 'De 'chuh :dhlaen: 'ble en-' 'yi dih :nmor-eh: 'dor :ke. 'De mor 'de 'chuh :dhlaen-a' 'jeh 'nyne-', en 'ble 'yi dih :nmor-eh: 'dor :dor 'dor :ke.

⁴²:Yee' 'ka-: eh mu :ne :ke, ti Nyorsoa-a mu-a 'de 'meheh'-nyor⧾ 'de nma-dih-deh 'di :za. :Mor yau nma-dih-eh: dih, :yee' on no deh 'meh-a' :korn-a wlu 'ken, 'de :eh mu-a 'zorn-:. Jorwor: :mor Nyorsoa za-uh 'de nma-dih-deh 'di, :yee' on no deh :eh :se-a' 'zorn-: i, 'de :eh :se-a' 'meh-: i :neheh'.

⁴³:Mor on nma-dih-eh: dih, :yee' on nyni-: 'yi, 'de on se 'kpih 'ble. Jorwor: ti Nyorsoa-a mu-uh-a 'de nma-dih-deh 'di :za, :yee' an mu 'yi dih :nmor, 'de on 'ye :kmu.

⁴⁴:Yee' :mor on nma-dih-eh: dih, :yee' on no yau: :on :ne-a dha yao 'zorn 'gboror:. Jorwor: :mor Nyorsoa za-uh 'de nma-dih-deh 'di, :yee' on no yau: :on Nyorsoa-a' :Zulu 'nyi-a :febeh'. :Mor eh 'dhu yao 'zorn-yau :ne, :yee' yau: Nyorsoa-a' :Zulu 'nyi-a :febeh' :ne :ke.

⁴⁵:Yee' eh 'chle-eh:-' 'de Nyorsoa-a' 'chlee-deh 'di, eh 'da, :Tehn 'i-nyor-kpalu: Nyorsoa no-a :or 'dhu-a 'Adan-', or :no-eh or 'ye 'kmo :ne-nyor no. Jorwor: 'Adan :or 'bor-dih:-a 'o, or-: 'dhu :Zulu: :an 'nyi-a nyor⧾ :febeh'-'.

⁴⁶Eh :se yau: :yuh Nyorsoa-a' :Zulu 'nyi-a :febeh', on :se 'de yi :zai'. Jorwor: :yuh :on :ne-a dha yao 'zorn, mo-: 'o :on 'yle :zai', 'de jorwor: :yuh or-a' :Zulu 'nyi-a :febeh' 'de an mu 'de :yi, :on 'kpa-a deh ken.

⁴⁷'Bluh :on :ne-a dha yao 'zorn, mo-: Nyorsoa no, 'de or no :tehn 'i 'Adan. Jorwor: 'Adan: :yor :or no-a 'sororn' nor, or 'wluh 'de Nyorsoa 'bli yai'.

⁴⁸:Yee' nyor⧾ :on :korn-a dha yao 'zorn bo, on gweh :yor Nyorsoa :no-dih:-a 'bluh. Jorwor: :yuh :on :korn-a 'de Nyorsoa 'bli yai' bo, on gweh nyor :or 'wluh-a 'de Nyorsoa 'bli yai'.

⁴⁹:Ka :a gweh-a nyor Nyorsoa :no-dih:-a 'bluh, 'ka-: :a mu nyor :or 'wluh-a 'de Nyorsoa 'bli yai' or-a' gweh-a' :no :ke.

⁵⁰'Nyi 'on zela: a :gwluhuh', 'an 'Klae :de-di'-boi'-a:. Deh :eh 'ble-a nyomor-: 'dekorn: 'pla⧾-: eh se 'beh-dih: eh 'ye Nyorsoa-a' nyor⧾ wlu 'ken :korn-eh 'ye. 'De mor yau: :an mu-a 'meh-:, on se 'beh-dih: on 'ye :dhe-da 'ye 'de :dha nyor⧾ :se-a' 'meh-dih: i.

⁵¹A :gbee'e:. 'An mu a deh :eh no-a 'slan a-uh :gwluhuh' zela:. Eh :se :a-a' klehkpeh, :a :se-' 'meh-: i. Jorwor: :a-a' klehkpeh, :a-a' yau-a mu :za-dih:,

⁵²'yli :a bla-a 'i, ti :de 'bor-dih: :gamu-a mu-a :wlu. :Yee' :mor on :wlu, :yee' Nyorsoa-a mu nyor⧾ :on 'meh-a 'noror 'kmo bo de :ya. :Yee' on :se-' 'meh-: i :neheh'. :Yee' :a-a' klehkpeh, :a-a' yau-a mu :za-dih: :ke.

⁵³:Yee' :a-a' yau: :an mu-a 'meh-:, an mu :yuh :on :se-a' 'meh-: i :za-dih:. 'De yau: :an mu-a 'zorn-:, an mu :yuh :on :se-a' 'zorn-: i :za-dih: :ke.

⁵⁴:Yee' :mor yau: :an mu-a 'zorn-:, on :za-dih: yau: :on :se-a' 'zorn-: i, 'de :yuh :an mu-a 'meh-:, on 'ye :yuh :on :se-a' 'meh-: i :za-dih:, :yee' Nyorsoa-a' wlu-a mu dhih 'jeh-' 'kpa-: :eh no-a, 'Meh-a' :za-eh: :gla.

⁵⁵'Meh-a', dha :an-a' nyor :du-kpih :ne :naa :eh? Dha :an-a' 'kpih :en puhba-a nyor⧾ dih, en :ne :eh?

⁵⁶:Yee' 'kpih 'meh-a' 'ble-a, 'de :en puhba-a nyor⧾ dih, en 'wluh 'de deh-zon bo. 'De deh-zon :za 'de eh-a' 'kpih :en 'dba-a nyor⧾ 'de :Mose'-a' 'tele' bo.

⁵⁷Jorwor: 'zio :korn 'de Nyorsoa bo :or 'nyi-a :a 'kpih, 'de :a du-a 'meh-a', :eh :yi-dih:-a :a-a' :Gwlor :baa' :Yusu' 'Klae-'.

⁵⁸:Yee' eh-a' dhih, 'an 'Klae :de-di'-boi'-a:, :on :korn-a dhih 'on :kma-a, a :nyna dih deh 'jeh. A-a' 'wluh-dih:-' :gwliin'. A po 'de 'kpih a 'ye :Gwlor :baa'-a' :koan no 'do ti-a' klehkpeh bo, :ka a yubo-eh, :eh :mor :koan: a no-a 'de or-a' deh 'di, or :se-a 'plo.