Read Eastern Krahn 1 'Korli-chlee-deh: 16 Bible Online

1 'Korli-chlee-deh: 16 - Eastern Krahn bible

1 'Korli-chlee-deh: 16

¹:Yee' 'an 'bhorn 'on 'ye 'wlii: a mu-a :za 'do Nyorsoa-nyor:⧾ :on :ne-a :Judi'a-bluhba ken bo, en-' dhih a-uh :gwluhuh' zela:. Deh 'on zela:-a 'chore-nyor:⧾ :on :ne-a :Gale'tia-bluhba ken :gwluhuh', on 'ye-a' no, eh-: a 'ye no :ke.

²:Yee' 'do 'doror' :zai'-we-eh 'di, a-a' :due' :due' :za 'o 'nyii'-deh a 'ye 'for 'i :dhe-dih: 'de a 'bli 'gbu⧾ 'di dih. :Ka a no-a deh⧾-a' 'ye-a', 'ka-: a 'ye 'nyi-a' no. :Yee' :mor 'on 'yle, :yee' 'wlii :za-eh se :korn eh 'ye :ne :neheh'.

³:Yee' :mor 'on 'si dih, :yee' nyor⧾-kpalu:⧾ a dhe-a :gwlii', 'an mu-uh 'chlee-deh:⧾ :en :mor nyor⧾ 'ye-ih'-a, 'de on 'ye-uh'-a yubo: 'nyi-:, 'de 'on 'ye-uh' :Julu'slehn dbo, on 'ye 'wlii: a :za-a kpa.

⁴:Mor eh :nmor 'yi dih, on :ne 'on 'ye mu :ke, :yee' on-: 'mor-: :a mu :dha :due' :mu-dih:.

⁵:Yee' :mor 'on :yi-dih: 'Masordo'nia-bluhba ken, :yee' 'an mu a 'ye 'da :yi. Deh no-eh, 'do :wor 'an mu :yi-dih:.

⁶:Yee' nyor se yubo:, 'an mu ti-kpor-bei :zi 'do a bo 'bla, :eh beh 'an mu 'o a bo :ne 'de :chehbe'-a' ti 'ye zi-:, 'de a 'ye 'on bo 'kpa, 'de :dha :noror' 'an mu-a :mu :neheh', 'on 'ye 'o mu.

⁷'On :se-' 'bhorn, 'on 'ye 'de a bo yi :naa, 'de 'on 'ye 'o :dhie' chehn 'suh. Deh no-eh, 'on dhe-eh :gwlii', 'on 'ye 'o a bo ti :dhulu' zi, :mor :Gwlor :baa' 'worn-dih-eh ken dih.

⁸Jorwor: 'an mu dha 'Ehfesor :ne, 'de eh 'ye 'Pehnti'kor-we-eh no.

⁹Deh no-eh, :kpaa' 'wluh 'o 'weh, 'de or 'beh 'worn dih, 'on 'ye :koan: 'jeh :or mu-a deh 'i 'si-: no dha mor, keen' :mloror' nyor⧾ :doru', mo-: :an vorn 'on bo.

¹⁰:Yee' :mor :Timehte' 'si 'o a bo dih, a no-eh or 'ye dih van-dih: 'de a 'nyne-'. Deh no-eh, or no :Gwlor :baa'-a' :koan:, :ka 'an no-a :ke.

¹¹A-a' 'worn-:-' nyor-a' :vlehn-or'. A :za-dih-or, or 'ye or-a' :gwie 'dlu bo kpa 'de :porluh-a' dih 'pehn ka 'di, 'de or 'ye deka yi 'noror 'on bo. Deh no-eh, 'on dhe-eh :gwlii', :mor or :taa de yi, or :ne :a-a' :koan: :no-de-di'-boi' :noo' 'ye 'de :yi-dih:.

¹²Jorwor: :a-a' 'Klae :de-di' :Apor'lor :mloror', 'on bale-or 'gabaa, or :ne :a-a' 'Klae :de-di'-boi' :noo' 'ye a 'ye 'da yi. Jorwor: or 'see-eh ken dih 'worn-dih kele'a:. :Yee' :mor or 'ye ti, :yee' or mu 'de :yi.

¹³:Yee' a 'dhu :gbeheh'. A :nyna dih deh 'jeh 'de a-a' 'Klae-a' dhih 'jeh-' :po-eh 'di. A ku :gwluhuh', a 'ye :kmu.

¹⁴Deh⧾-a' klehkpeh a mu-a :no, a no-ih 'de :ybeh-dih-eh 'di.

¹⁵:Yee' 'an 'Klae :de-di'-boi'-a:, a yubo-eh' nyor⧾ :on :ne-a 'de :Tehfa'nor 'bli 'gbu, mo-: no :zai'-nyor⧾ :on 'bili:-' dih, 'de :on no 'Klae-a' nyor⧾ 'de :Ehki'a-bluhba ken. 'De on :no-dih: an-a' 'kpih-a' klehkpeh :koan 'do Nyorsoa-nyor⧾ bo. :Yee' 'an bale a 'weh,

¹⁶a :ya a-a' 'jeh ya 'do eh :bo-nyor:⧾ :dao' 'zorn, :korn mor nyor⧾-a' klehkpeh :an mu-uh-a bo 'kpa-: on 'ye-a' :koan: 'jeh :dao' 'dlu bo kpa.

¹⁷:Yee' :yeh :Tehfa'nor-: 'Fortuna'tor-: 'dekorn: :Aki'kor-: on yi-a 'noror 'on bo, :yee' 'mona-: no 'on. Deh a se-a 'beh-dih: a 'ye-a' no 'do 'on bo, eh-: on no.

¹⁸Deh no-eh, on dhe 'on :porluh 'di dih, :ka on no-a a-a' dhih :ke. :Yee' eh-a' dhih, a :to eh :bo-nyor:⧾ :dao' :dou'⧾ bo.

¹⁹'Chore-nyor:⧾ :on :ne-a 'de 'Esea-bluhba ken, on 'da, mo-: 'ye a-uh. :Akwi'la-: :Plosi'la-: 'dekorn: 'chore :eh 'gbon-dih-a 'de on 'bli 'gbu-: on 'da, mo-: 'ye a-uh 'gabaa :ke, 'de :Gwlor :baa'-a' 'nyne 'di.

²⁰:A-a' 'Klae :de-di'-boi'-a' klehkpeh 'da, mo-: 'ye a-uh. A kpa 'de a 'bei' :bhluun'⧾-' :due' :due', a 'ye-uh' :gble-dih: 'de :porluh⧾-a' :vlehehn'-' :gweh ka 'di.

²¹'Mor :or 'dhu-a :Poror'-', 'an 'jeh 'yor-eh-a' son, mo-: 'on no, 'de 'on 'chle a 'yee'-wlu:⧾ :daa bo, 'mor 'ye a-uh.

²²:Yee' :mor nyor se :a-a' :Gwlor :baa'-' :ybeh, 'nyi Nyorsoa po-or 'chlo bo. :Yee' 'nyi :a-a' :Gwlor :baa' 'yle.

²³'Nyi :Gwlor :baa' :Yusu'-a' mla :ne 'o a bo o.

²⁴A yubo-eh' :ka 'on :ybeh-a a-a' klehkpeh 'de :Yusu' 'Klae-a' deh 'di. 'Ka-: eh 'ye :ne.