Read Eastern Krahn 1 'Korli-chlee-deh: 2 Bible Online

1 'Korli-chlee-deh: 2 - Eastern Krahn bible

1 'Korli-chlee-deh: 2

¹:Yee' 'an 'Klae :de-di'-boi'-a:, ti 'on yi-a 'de a bo, 'de 'on 'ye-a' Nyorsoa-a' 'slan-a' dhih-' :za, 'on :se-' worn dih :nmor :manua bla, 'de mor eh :se 'an deh 'i yubo-eh: :ke, 'on :se 'de :ya.

²Ti 'on :ne-a 'de a bo, deh :due' 'on :na-dih:-a :gwluhuh' dih, 'on 'ye-a' no, eh-: 'dhu, 'on 'ye deh⧾-a' klehkpeh 'for 'i :po-dih:, 'de 'on 'ye :Yusu' 'Klae-a' tu 'i 'meh-dih-dhih-a' tubo-wlu⧾ :due' ken 'neh.

³Ti 'on yi-a 'de a bo, :yee' 'an 'kpih-a: chehn, 'de 'an 'tiei-a tleh, 'de :fano: :ple-eh 'di.

⁴'An nyor⧾ deh :torne-eh-: 'dekorn: 'an Nyorsoa tubo-wlu:⧾ :po-eh 'di-: 'on :se 'de wlu⧾ :klaba'⧾-: 'dekorn: worn :nmor-wlu⧾-: 'di dih :wlu-dih:. Jorwor: Nyorsoa-a' :Zulu-a' 'kpih, me-: za-eh gbor :ka dhih 'an za-a-', 'de en no-a dhih-a' 'yor-eh,

⁵'de a-a' dhih 'jeh-' :po-eh :ne-' :gwlor-nyor⧾-a' :toror' :gwluhuh' :kpa-dih:. Jorwor: Nyorsoa-a' 'kpih, me-: no-eh, 'de a po-eh dhih 'jeh-'.

⁶Jorwor: tubo-wlu:⧾ :en :ne-a :toror' 'di, me-: :a po 'de nyor⧾ :on ku-a dih, 'de Nyorsoa-deh 'di bo. Jorwor: :toror' :daa, eh :se 'kmo-a' :toror', 'de mor eh :se :yor :or 'kmo-a nyor⧾ wlu 'ken :korn-nyor⧾ 'ble-a, 'de :or yi-a 'worn :gweh 'da :naa.

⁷:Toror' :or :korn-a dhih 'an za-a-', or no Nyorsoa-a' 'slan :or 'zile-eh :gwlor-nyor⧾ dih. Jorwor: :toror'-a' 'jeh :dao', or :dhe-dih-or 'for 'i :dee' see, 'do :a-a' dhih-a' 'i 'beh-a' bo, 'de jorwor: 'bluhba-a mu :no-eh.

⁸Eh se nyor :korn :or 'ye-a 'kmo-a' nyor⧾ wlu 'ken :korn-nyor⧾ no, :or 'ye-a :toror' :daa dih 'worn. Deh no-eh, :mor eh 'dhu, on 'worn-eh dih :dee', :yee' on :se-' :Gwlor :baa' :or :korn-a dhih 'beh-a' 'i 'do tu 'i :kor-dih: i :dee'.

⁹:Ka Nyorsoa-a' 'chlee-deh no-a eh-a' :za-a', eh no-a, Deh Nyorsoa-a dhe-a dih, 'do nyor⧾ :on ybeh-or' bo, 'yli-eh 'see-eh 'ye, 'de :dou'⧾ 'see-eh 'worn, 'de nyor-beh 'see-eh :gwluhuh' dih na-dih :eh :mor eh mu :no-eh:.

¹⁰Jorwor: Nyorsoa-a' :Zulu za-eh-: gbor 'de :a bo. :Zulu-a' 'jeh :dao', mo-: 'worn deh⧾-a' klehkpeh-' dih, 'de mor :korn :yih :en 'zile-eh 'de Nyorsoa bo.

¹¹Nyor :yoror :or 'beh-dih: :or 'ye dhih :en :ne-a 'de nyor 'di yubo: :eh? Eh :se or-a' 'jeh 'yor-eh-a' :porluh:, mo-: se :mleheh' no-a' 'beh-dih: :e? 'De :ka :ne-a :due' 'di, nyor se dhih :en :ne-a 'de Nyorsoa 'di yubo:. Or-a' :Zulu :due', mo-: yubo-ih.

¹²:Zulu: :on :ne-a, :a :mor 'Klae-a' nyor⧾-', on :se 'kmo-a' :no. Jorwor: :Zulu: :on :ne-a :a-uh, on 'wluh 'de Nyorsoa bo. :Zulu-a' 'jeh :dao', mo-: no-eh, 'de :a 'worn deh⧾-a' klehkpeh Nyorsoa 'nyi :a-uh yaa'e dih.

¹³:Yee' eh-a' dhih, eh-: :korn dhih, 'de deh⧾ :a za-a-' 'de a bo, en se :gwlor-nyor⧾-a' :toror' :or no-a 'cheaan'-deh dha 'bluhba ken. Jorwor: deh⧾ :a zela-a a :gwluhuh', Nyorsoa-a' :Zulu:, mo-: :an torne :a-uh. :A zela or-a' :Zulu-a' 'yi 'sleh-deh⧾-a' dhih ken dih, 'de :yuh or-a' :Zulu: :dao', on :ne-a-' bo.

¹⁴Nyor :or Nyorsoa-a' :Zulu se-a-' :ne, or se 'beh-dih: or 'ye deh :eh 'wluh-a 'de Nyorsoa-a' :Zulu bo dhih 'jeh-' po. Deh no-eh, eh no :bobo-deh: 'do or bo. 'De mor or se 'beh-dih: or 'ye-eh'-' dih 'worn. Deh no-eh, nyor Nyorsoa-a' :Zulu :ne-a-', or-: 'worn-ih' dih.

¹⁵Nyor :or Nyorsoa-a' :Zulu :ne-a-', or 'beh-dih: or 'ye deh⧾-a' klehkpeh bo dih zela:, :en no-a deh⧾ 'jeh-: deh⧾-zon⧾-:. Jorwor: :yor :Zulu se-a-' :ne, or se 'beh-dih: or 'ye :yor on :ne-a-', or-a' zabe zi.

¹⁶:Ka Nyorsoa-a' 'chlee-deh no-a eh-a' :za-a', eh no-a, :Or yubo: deh :Gwlor :baa'-a na-dih-a :gwluhuh' dih :eh? :Or 'beh-dih: or 'ye-or' 'slen 'dhu :eh? Jorwor: :a :mor :mloror', :ka 'Klae-a no-a deh :gwluhuh' dih :na-dih-eh, 'ka-: :a no eh-a' :gwluhuh' dih :na-dih-eh :ke.