Read Eastern Krahn 1 'Korli-chlee-deh: 3 Bible Online

1 'Korli-chlee-deh: 3 - Eastern Krahn bible

1 'Korli-chlee-deh: 3

¹:Yee' 'an 'Klae :de-di'-boi'-a:, 'on se 'beh-dih: 'on 'ye 'de a bo :wlu, :ka 'on no-a 'de nyor⧾ :on Nyorsoa-a' :Zulu :ne-a-' bo :wlu-eh. Jorwor: 'on :korn 'on 'ye 'de a bo :wlu :eh gweh-a :ka nyor⧾ wlu-a 'de nyor⧾ :on :ne-a 'de 'kmo bo 'gboror:, 'de :on gweh-a 'nynuu: :bleheh'eh⧾ 'de 'Klae-a' deh 'di.

²Eh-: :korn dhih, deh⧾ 'on :torne: a-uh, eh gweh :ka 'nynor :or 'nyi-a or-a' 'yu nyene-ni. 'On :se-' a dii-deh:⧾ :en :kmu-a 'nyi. 'De mor :kana :naa, a 'see 'o en-' ti ken nyni 'gboror:.

³Deh no-eh, :ka nyor⧾ :on :ne-a 'de 'kmo bo, on no-a 'kmo :ne-eh, 'ka-: a :ne 'gboror:. :Yeh :gwlehehn'-: 'dekorn: jeh-a'-: en :ne-a 'de a 'klu-', :yee' eh po kuna' 'weh, :ka a :ne-a 'de 'kmo bo 'gboror:. 'De mor deh⧾ 'kmo bo-nyor⧾-a no-a, me-: a no :ke.

⁴:Mor a-a' nyor⧾ :noo' 'da, an zi 'o :Poror' klei', 'de :noo' 'ye :ao', an zi 'o :Apor'lor klei', :yee' eh :se deh⧾ 'kmo bo-nyor⧾-a no-a, a se no :e?

⁵Eh-a' 'jeh :daa, :or 'dhu :Apor'lor :eh? 'De mor :or 'dhu :Poror' :eh? :A :mor Nyorsoa-a' 'bhoi-nynuu: 'o 'klein', :a :mor 'o, :or no-eh 'de a po-eh dhih 'jeh-'. :A-a' klehkpeh, :koan: :a-a' :Gwlor :baa' 'nyi :a-uh, :a 'ye-a' no :due' :due', or-: 'o :a no.

⁶'Mor :or 'dhu-a :Poror'-', 'mor-: 'dhu 'dhuu'-deh⧾-a' 'yor. 'De :Apor'lor po-ih 'ni ken. Jorwor: Nyorsoa, or-: no-eh, 'de en ku.

⁷:Yee' 'do eh-a' dha, nyor :yor :or 'dhu-a deh⧾-a' 'yor-: 'dekorn: nyor :yor :or po-ih-a 'ni ken-: on se deh ken 'kpa klehkpeh. Nyorsoa :or no-eh 'de en 'ye-a ku, or-: 'o :or 'kpa deh ken.

⁸Nyor :yor :or 'dhu-a deh-: 'dekorn: :yor :or po-ih-a 'ni ken-: :koan: :ne-a :due' :oo' an no. Jorwor: :ka an no-a :koan-a' no-a', 'ka :wor Nyorsoa-a mu an-a'a: geli' :za-eh :no :due' :due'.

⁹'Mor-: 'dekorn: :Apor'lor-: :a no :koan: :ne-a :due' 'do Nyorsoa bo, 'de or 'bli 'gle. 'De mor a :mor 'dhu or-a'a: gle. 'De a no or-a'a: 'gbu :ke.

¹⁰:Yee' mla Nyorsoa po-a 'on bo, or-: no-eh, 'de 'on po 'gbu glu :eh gweh-a 'sleh :korn-nyor 'i. 'De nyor :noror'-a kpa 'gbu :dao', an-a' po-a' 'dlu bo. Jorwor: 'nyi nyor :or kpa-a 'gbu :dao' an-a' po-a' 'dlu bo, or 'wla :gwluhuh' dih 'do an-a' po-a' bo.

¹¹Deh no-eh, :Yusu' 'Klae, or-: 'dhu 'gbu :dao', an-a' glu 'dhu 'da. 'De mor 'gbu-a' 'jeh :dao', an-a' glu 'dhu 'da :noror' se 'o 'for 'i :ne.

¹²:Mor nyor-beh kpa 'gbu :on 'dhu-eh glu, an-a' po-a' 'dlu bo, 'de or 'ye 'goo-: 'sebla-: sobu'⧾ :en 'kpa-a deh ken-: tu⧾-: :peli'-: 'dekorn: :koo: :kpalu⧾-: no, 'de or 'ye-uh' po,

¹³:yee' :koan: or no-a, Nyorsoa-a mu-or nyor⧾ 'i :to-dih: :ka or :ne-a. Deh no-eh, 'we-eh: :Yusu'-a mu-a 'de :ya, or mu :koan: :dao' 'do zorn-pli-' :ya. 'Do 'we-eh: :dao' 'di, neh eh-: or mu :no, 'de or 'ye :koan-a' klehkpeh nyor⧾ no-a 'dhen, 'de Nyorsoa 'ye-or' bo dih yubo:.

¹⁴:Mor eh 'dhu 'gbu or po-a, on se sin, :yee' Nyorsoa-a mu-or geli' :za-dih-deh 'nyi-:.

¹⁵Jorwor: :mor on sin, :yee' or-a' :koan-a' klehkpeh 'kpa 'nior:. Nyor-a' 'jeh :dao', or mu 'puh-:, :eh gweh-a :ka nyor ple-a, 'de or 'wluh-a 'de neh 'klu-', :or 'puh-a, 'de or-a' deh⧾-a' klehkpeh sin-a.

¹⁶A se-eh yubo: ke :e, :ka a 'dhu-a Nyorsoa-a' 'sla-' :e? 'De mor :ka Nyorsoa-a' :Zulu :ne-a a-uh' :e?

¹⁷:Mor nyor-beh-nyor-beh gba Nyorsoa-a' 'sla :daa ya, :yee' Nyorsoa-a mu-eh :no, nyor :dao', or 'ye gbe :zie: :ke. Deh no-eh, Nyorsoa-a' 'sla :ne 'i gban, 'de mor a :mor 'dhu 'sla :dao'.

¹⁸A 'bor a-a' 'jeh-a' dih :bo-dih-eh. :Mor eh 'dhu a-a' nyor-beh-nyor-beh 'da or :korn :toror' :or 'kmo bo-nyor⧾-a 'da-dih-a :toror', :yee' 'nyi or no :bobo-nyor :eh 'kmo bo-nyor⧾-a 'da-dih-a :bobo-a'. :Mor or no-eh, :yee' or mu nyor Nyorsoa 'da-dih-a :toror' :korn-nyor⧾ :no.

¹⁹Deh no-eh, :toror' :korn-eh: :eh :ne-a dha 'kmo bo, eh no :bobo-deh: 'do Nyorsoa ybei', :ka eh no-a 'chle-eh 'de or-a' 'chlee-deh 'di, eh no-a, :Toror' :korn-nyor⧾-a' :toror' :dao', or-: Nyorsoa no, 'de or ya-uh 'kle 'ye-eh bo.

²⁰'De eh 'da :neheh', :Gwlor :baa' yubo: :ka deh⧾ :en :ne-a 'o :toror' :korn-nyor⧾ :gwlii', en se-a deh-beh 'di :ne 'weh.

²¹:Yee' eh-a' dhih, nyor-a' 'beh-dih:-' or-a' 'jeh 'i, 'do :gwlor-nyor⧾-a' noo-deh⧾ bo. Deh no-eh, deh⧾-a' klehkpeh-: 'dekorn: nyor⧾-a' klehkpeh-: on :korn 'de a bo.

²²:Eh :mor :Poror' o, :Apor'lor o, :Piteh' o, dha yao zorn o, :febeh' o, 'meh-a' o, ti :a :ne-a ken :kana o, 'dekorn: ti :yih :en mu-a 'de :yi o, an-a' klehkpeh :korn 'de a bo.

²³'De a :korn 'de 'Klae bo, 'de mor 'Klae :korn 'de Nyorsoa bo :ke.