Read Eastern Krahn 1 'Korli-chlee-deh: 4 Bible Online

1 'Korli-chlee-deh: 4 - Eastern Krahn bible

1 'Korli-chlee-deh: 4

¹:Yee' :gwlor-nyor⧾ :korn on 'ye 'mor-: 'dekorn: 'on 'bei' :koan: :no-nyor⧾-: :a 'dhu, :ka :a 'dhu-a 'Klae-a' 'bhoi-nynuu-', 'de Nyorsoa po-a 'de or-a' 'slan 'de :a 'kwa.

²Nyor Nyorsoa po-a deh⧾ :daa 'kwa, deh :due' or 'bhorn-a or 'ye-a 'ye 'de or ya, eh-: 'dhu, or 'ye :dhehehn-nyor no.

³:Yee' eh-: :korn dhih :oo', :fano se 'o 'on :gwlii' :ne, 'an zabe 'ye :zi-eh: 'do a ybei'-: 'dekorn: 'do :gwlor-nyor⧾-a' klehkpeh ybei'-:. 'De mor 'on :se-' 'an 'jeh-a' zabe 'i chehn.

⁴'De mor 'an :porluh :se-' 'on zabe :kpon-dih: 'do 'an noo-deh⧾ bo :ke. Jorwor: eh :se-eh' nyor⧾ 'i :to-dih: :eh :mor zabe se 'on kpon. :Gwlor :baa' :due' 'i-a' :due', or-: 'dhu nyor-' :or zi 'an zabe.

⁵:Yee' eh-a' dhih, a-a' :zi-' a 'bei'-a' zabe, 'de ti 'ye 'o nyni. A :fuo: ti :Gwlor :baa'-a mu-a de :yi 'ken. Or mu deh⧾-a' klehkpeh :en 'zile:-a 'de :kule-' 'do zorn-pli-' :ya. :Yee' deh⧾ :en :ne-a 'o :gwlor-nyor⧾-a' :porluh⧾ ken, en mu ken :nyeh. :Mor ti :dao' en nyni 'o, :yee' nyor⧾-a' klehkpeh, an mu dhih bo :po-eh: :eh 'wluh-a 'de Nyorsoa bo, 'de :eh :korn-a 'de on bo 'ye-:.

⁶:Yee' 'an 'Klae :de-di'-boi'-a:, deh⧾ :daa 'an za-a-' 'de a bo, 'do 'mor-: 'dekorn: :Apor'lor-: a-a' dhih bo, 'an za-ih' 'weh, en 'ye 'yi :to-dih-deh no 'do a bo, 'de a 'ye 'o :a-a' 'gor klei' zi. 'De a 'ye-ih' 'chean' 'de :a 'kwa, deh en 'dhu-eh:-', 'de a-a' noo-deh⧾ :ne 'o 'doror' :ne, 'do :yih :en 'chle-eh ken. A-a' 'dhu-:-' 'o nyor :noror', 'de a-a' :vlehn-' :noror' :noror'.

⁷:Or :no-dih: :on deh ken 'kpa-nyor-' 'de :on 'bei' 'nyne-' :eh? Deh 'i-deh: :on 'ble, Nyorsoa :se-' :on 'nyi :eh? :Mor eh 'dhu Nyorsoa-', :or 'nyi-eh :on, :yee' :eh :korn dhih :an 'beh-dih :an-a' 'jeh 'i, :eh gweh-a :ka or se-eh :on 'nyi :eh?

⁸'On yubo-eh', a 'da, deh⧾-a' klehkpeh a 'bhorn-a, a 'ye-ih' :naa. 'De a no bhaan-nyor⧾ :weh. 'De a 'da, a no 'keen-boi' :naa, 'do a-a' 'jeh bo. Jorwor: 'an 'bhorn a 'ye 'keen-boi' no 'jeh ka, 'de a :ne :a mor-: :a 'ye 'keen-boi'-deh :dha :due' :no-dih:.

⁹'Do 'on :gwlii', eh gweh :ka Nyorsoa po-a 'de :a :mor :Yusu'-a'a: dboo-nyor⧾ 'de dubu'-a' :gborluh' bo, :eh gweh-a nyor⧾ on chehn-a wlu 'ken on 'ye-a' 'dba 'do :gwlor :gwea. :A :ne 'o 'bluhba ybei'. 'Enjor-nyor⧾-: 'dekorn: :gwlor-nyor⧾-: an-a' klehkpeh an pobo :a ya.

¹⁰Keen' :mloror' :gwlor-nyor⧾-a 'ye :a :bobo: ka 'do 'Klae-a' dhih bo. Jorwor: a :mor :mloror' a 'da a :korn :toror' 'de 'Klae-a' deh 'di. :Ao. :A 'worn-', :a :mor :korn 'kpih-a: chehn. 'De a no :kmuu-nyor⧾. A :mor an 'dhu 'o, 'de an po :a yaa'e :neheh' :e?

¹¹:Eh 'wluh-a 'de eh-a' glu 'dhu 'da, 'de :eh :yeh-dih:-a ti :daa ken, 'moeh-: 'dekorn: 'ni 'na-ton-: me-: no :a-uh. Keen', :a se deh-a' :za-da 'ble, 'de :a pa 'wla⧾-zon⧾-' :naa, 'de nyor⧾-a bla :a-uh 'gabaa, 'de :a se :dhe-da 'ble.

¹²:A no :a-a' son⧾-a' 'kpih, 'de :a pobo-' :a-a' 'jeh bo dih. :Mor nyor⧾ 'jle-dih: :a-uh, :yee' :a po-uh :bhorlie' bo. An 'ye-dih :a 'kle, 'ka :wor eh :ne :chio'lo:, 'de :a nyna-eh 'i.

¹³:Mor nyor⧾ 'jle-dih: :a-uh, 'ka-: :a 'pehn dih wlu dih :chio'lo: 'de on bo. :Eh yi-a 'de :chio'lo:, 'de :eh :yeh-dih:-a 'zean'-we-eh: :daa ken, nyor⧾ 'duo: :a-' 'weh :a 'ye 'kuo-: :gbehne: nyor⧾-a po-a 'kwla-: 'dekorn: 'zororn'-deh-: gweh.

¹⁴'On :se-' a deh⧾ :daa bo 'chle en 'ye a dhen-' dih po. Jorwor: 'on no-eh', eh 'ye a 'slen 'dhu, :eh gweh-a :ka nyor :or 'dhu-a or-a' 'di :za-nynuu 'slen.

¹⁵:Mor a-a' :yeh 'ble nyor⧾-a' 'wlu :bhue on :taa deh torne 'do :Yusu' 'Klae-a' klei' :zi-eh bo, a se :bai' :dhulu' 'ble 'gboror:. Deh no-eh, Nyorsoa-a' tubo-wlu:⧾ 'jeh 'on po-a, me-: no-eh, 'de 'on 'dhu a :baa' 'de :Yusu' 'Klae-a' deh 'di.

¹⁶:Yee' eh-a' dhih, 'an bale a 'weh, a 'ye 'o 'an 'gor klei' zi.

¹⁷Eh-: :korn dhih :oo', 'an dbo :Timehte' :or no-a 'an-a: :dhih :kma-yu-: 'dekorn: :dhehehn-nyor-: 'de :Gwlor :baa'-a' deh 'di. Or-: mu 'an noo-deh⧾-a' klehkpeh a-uh :gwluhuh' bo :po-dih: 'de :Yusu' 'Klae-a' deh 'di. Eh :due' :dao', eh-: 'on :torne: 'chore-a' klehkpeh :eh :ne-a deh⧾-' dih.

¹⁸A-a' nyor⧾ :noo', mo-: :an 'beh-dih an-a' 'jeh 'i, :mor on :taa 'ye :dee', :yee' on 'da 'on :se 'de a bo :yi i.

¹⁹Jorwor: :mor eh 'dhu :Gwlor :baa' 'worn-dih-eh ken dih, :yee' 'on :se 'o :gwle i, 'on 'ye 'de a bo yi. :Mor 'on 'yle, :yee' deh⧾ a-a' :noo'-a za-a-' :en :korn-a dhih an 'beh-dih-a an-a' 'jeh 'i, eh :se en :due'-a' dhih 'on :se 'de :yi i, jorwor: 'kpih on 'ble-a, me-: :korn dhih 'an mu 'de :yi :ke, 'on 'ye-ih 'ye.

²⁰Nyorsoa-a' nyor⧾ wlu 'ken :korn-eh se wlu-a' 'i kor. Jorwor: eh kor or-a' 'kpih 'i.

²¹Deh a 'bhorn 'on 'ye no :naa :eh? 'On 'ble sene'eh kwa, 'on 'ye 'de a bo yi :e? :Ae' 'on 'yle 'de nyor⧾-' :ybeh ka-: 'dekorn: 'yi :kpoehn: ka-: 'di?