Read Eastern Krahn 1 'Korli-chlee-deh: 5 Bible Online

1 'Korli-chlee-deh: 5 - Eastern Krahn bible

1 'Korli-chlee-deh: 5

¹:Yee' keen' 'jeh ka, eh-a' kuna' :yeh-dih: 'on-: ken, :ka 'tmeor:⧾ :korn-eh :ne-a 'de a 'nyne-'. Eh-a' :yeh :ne-a 'de a 'nyne-', eh se 'de nyor⧾ :on se-a Nyorsoa yubo: 'nyne-' :ne-a' 'jeh. 'On 'worn-ih' :ka a-a' nyor :due' :ne or :baa'-a'a: 'nynor-a 'tmo-a.

²:Yee' :kaa eh no 'de a 'beh-dih a-a' 'jeh 'i 'suh :eh? A-a' :porluh⧾ :korn en 'ye 'zorn 'kpa :dee', 'do deh-zon:, nyor :dao' or no-a bo. A :korn a 'ye-or' 'o 'zorn po, or 'ye 'de a 'nyne-' 'wluh :dee'.

³Keen' :mloror' 'an 'jeh 'yor-eh-a' nyior-tu se 'de a bo :ne, jorwor: 'an :porluh⧾-a' klehkpeh :ne 'de a bo 'weh. 'De mor 'on chehn nyor :dao' or-a' zabe 'i see, :eh gweh-a :ka 'on :ne-a 'o.

⁴:Mor a 'kpa :dha :due' 'de :a-a' :Gwlor :baa' :Yusu'-a' 'nyne 'di, 'de 'an :porluh⧾-a' klehkpeh 'ye 'de a bo :ne, 'de :Gwlor :baa' :Yusu'-a' 'kpih 'ye 'de a bo :ne :ke,

⁵:yee' a :za nyor :dao' 'kwla 'de 'ku 'kwa, 'de 'ku 'ye or-a' yau 'kor-dih:. Eh-: mu-eh :no, 'de or 'ye 'o or-a' 'jeh bo yi, 'de :mor :Gwlor :baa' yi de, 'de or-a' :zulu 'ye 'puh.

⁶Eh-a' dhih, eh se 'yi dih :nmor, a 'ye a-a' 'jeh 'i 'beh-dih:. A se-eh yubo: :ka deh⧾ :en 'vu-dih-a 'bhlee, en-' :bhebe' deh⧾-bei:, me-: 'vu-dih 'bhlee: :kpuan'-a' klehkpeh :e?

⁷:Yee' a 'tali: a-a' deh⧾-zon:⧾ :en gweh-a deh⧾ :en 'vu-dih-a 'bhlee dih, 'de a 'ye 'bhlee: :eh se-a 'vuu'-deh⧾ bo :ne gweh. 'De 'on yubo-eh, 'ka-: a :ne 'jeh ka. Deh no-eh, 'Klae :or no-a :a-a' 'Meh-a' :bla-dih: 'dlu-dih-blae'-yu, or 'dhu-dih-eh: gban 'i :weh see, 'do :a bo.

⁸:Yee' 'do eh-a' dha, :a-a' 'dhu-:-' gor :or gweh-a 'bhlee: :eh :ne-a 'vuu'-deh:⧾ soa bo, :en 'dhu-a 'galo: :korn-eh-: 'dekorn: deh⧾-zon:⧾ :no-eh-:. Jorwor: a 'nyi :a 'dhu gor :daa 'de :vlehehn'-' :gweh ka-: 'dekorn: dhih-a' 'yor-eh-: 'di :eh gweh-a :ka 'bhlee: :eh se-a 'vuu'-deh⧾ bo :ne.

⁹'Chlee-deh: 'on 'chle-a a bo :zai', 'on zela: a :gwluhuh' 'weh :eh :mor 'tmeor:⧾ :korn-nyor⧾ :ne a-a' nena:-' bo.

¹⁰Deh 'an za-a-' :naa, 'on :se-' 'kmo bo-nyor⧾ 'da, :on no-a 'tmeor:⧾ :korn-nyor⧾-: deh⧾-a' 'klan :korn-nyor⧾-: 'ylii'-nyor⧾-: 'dekorn: zuu⧾-a' :weheh' :za-nyor⧾-:. :Mor 'on :taa :mloo' 'da :dee', :yee' a :korn a 'ye dha 'kmo bo 'wluh klehkpeh klehkpeh.

¹¹Deh 'an za-dih-a dhih-' dih, eh-: :dhe dih. Nyor :or 'da-dih-a or-a' 'jeh 'Klae-a' klei' :zi-nyor, 'de :or :ne-dih:-a 'tmeor:⧾ :korn-eh-: deh⧾-a' 'klan :korn-eh-: zuu⧾-a' :weheh' :za-eh-: nyor⧾ 'bhun dih :wlu-eh-: nomor 'na-eh-: 'dekorn: 'yli-a'-: 'kmo. Eh-a' nyior-tu: :ne :ao', or :ne a-a' nena:-' bo, 'de on :ne a-a' kpuhba:-' son⧾ ybei' :sloror'.

¹²Deh 'on po 'de dih :eh, 'de 'on 'ye nyor⧾ :on se-a 'noror 'chore-' :ne, an-a' zabe zi :eh? Nyor⧾ :on :ne-a 'noror 'chore-', mo-: :korn zabe: a :korn a 'ye zi.

¹³Nyorsoa-a mu :yuh se-a 'noror 'chore-' :ne, an-a' zabe :zi. :Yee' a :mor 'ye :yuh :ne-a 'de 'chore-', an-a' zabe zi, :ka Nyorsoa-a' 'chlee-deh no-a eh-a' :za-a', eh no-a, A :za 'de deh⧾-zon:⧾ :no-nyor⧾ 'noror a 'nyne-'.