Read Eastern Krahn 1 'Korli-chlee-deh: 6 Bible Online

1 'Korli-chlee-deh: 6 - Eastern Krahn bible

1 'Korli-chlee-deh: 6

¹:Eh :za a :fano :gwlii', 'de :mor a-a' nyor 'ble zabe 'do or 'be 'Klae-a' nyor 'bhun, 'de or kpa-ih 'de nyor⧾ :on se-a Nyorsoa deh-' 'ye bo 'koti-' :eh? 'De or-a' kpa-ih 'de Nyorsoa-nyor⧾ bo :eh?

²A se-eh yubo: :ka eh 'dhu-a Nyorsoa-nyor⧾-' an mu-a 'bluhba-a' zabe :zi :e? :Yee' :mor a mu 'bluhba-a' zabe :zi, :yee' a :mor se zabe: :nyene' :daa, en-' zi-a' 'beh-dih: :e?

³A se-eh yubo: :ka :a mu-a 'enjor-nyor⧾-a' zabe :zi :e? :Yee' a yi :zaa-dhih: :nyene' :en :ne-a dha 'kmo bo 'ye.

⁴:Yee' eh-a' dhih, :mor a 'ble :zaa-dhih: :en :ne :ao', en 'bei' 'noror a 'nyne-', a-a' :kpa-ih' 'de nyor⧾ :on se-a 'noror 'chore-' :ne bo.

⁵Deh⧾ a no-a, en :korn en 'ye a dhen-' dih po. Eh-: :korn dhih 'an za-ih'. Nyor se 'de a 'nyne-' :ne :or 'ye-a :toror' :korn deh 'jeh, 'de :or 'ye-a zabe: :en :ne :ao', 'Klae-a' nyor⧾ 'nyne-' zi :e?

⁶Jorwor: a :to :mleheh' 'kpuh ya, 'de a kpa a 'bei' 'koti-' dih, 'do nyor⧾ :on se-a 'Klae-a' dhih dhih 'jeh-' po ybei'.

⁷:Yee' :mor a :taa deh⧾ :daa no, :yee' eh-: :to-dih-eh nyor⧾ 'i, :ka a-a' dhih 'jeh-' :po-eh no-a deh 'plo. Eh mu 'yi dih :nmor, :mor nyor no :on deh-zon-', :on 'ye :porluh dih kpon, :eh :zi 'o :on 'ye kpa :za. Eh mu 'yi dih :nmor, :mor nyor :di-dih: :on :kleheh' :kleheh' dih, :on 'ye :porluh dih kpon, :eh :zi 'o :on 'ye kpa :za.

⁸Jorwor: a :sea-dih: :mleheh' no-a' 'weh, 'de a-a' 'jeh 'yor-eh di-dih nyor⧾ :kleheh' :kleheh' dih, 'de a no nyor⧾ deh⧾-zon⧾ bo dih. Eh :se nyor⧾ 'sluh⧾ a-a' no-ih'. Nyor⧾ :on :ne a zi-a 'o :Yusu' klei', mo-: 'o a no-ih'.

⁹A se-eh yubo: :ka nyor⧾ :an no-a deh⧾-zon⧾, on se-a 'beh-dih: on 'ye-a 'de Nyorsoa-a' nyor⧾ wlu 'ken :korn-eh 'zorn pa :e? A 'bor, a-a' :bo-dih:-' a-a' 'jeh dih. Nyor⧾ :an korn-a 'tmeor⧾-: :yuh :an za zuu⧾-a' :weheh'-: :yuh :an no-a 'nyne :zaan'-: nyor⧾-kpalu:⧾ :an no-dih-a an-a' 'jeh 'nynor⧾-' 'wlii-dhih-: 'dekorn: nyor⧾-kpalu:⧾ :an po-a on 'bei'-nyor⧾-kpalu⧾ 'nynor⧾-: eh-a' nyor⧾-tu: :dao', on :se 'de Nyorsoa-a' nyor⧾ wlu 'ken :korn-eh 'zorn :pa i.

¹⁰'De mor 'ylii'-nyor⧾-: deh⧾-a' 'klan :korn-nyor⧾-: nomor 'na-nyor⧾-: nyor⧾ :an wlu-dih-a on 'bei' 'bhun dih-: 'dekorn: nyor⧾ :an 'yli-a on 'bei' ken-:. An-a' nyor-beh:, or-: :se 'de Nyorsoa-a' nyor⧾ wlu 'ken :korn-eh 'zorn :pa i :ke.

¹¹A-a' nyor⧾ :noo' :noo', mo-: :ne :ao' :zai'. Jorwor: :Gwlor :baa' :Yusu' 'Klae-: 'dekorn: :a-a' Nyorsoa-a' :Zulu-: mo-: worlor: a-a' deh⧾-zon⧾-a' klehkpeh, 'de a :dhe-dih-eh 'for 'i 'do Nyorsoa bo, 'de or 'da-dih a 'yi 'sleh-nyor⧾.

¹²A-a' nyor⧾ :noo'-a mu :ao', 'on :bleh-dih-eh: 'i, 'on 'ye deh⧾-a' klehkpeh no. Keen' :mloror', jorwor: eh :se deh⧾-a' klehkpeh, me-: :nmor 'yi dih 'do a bo :deh. 'De 'on :se-eh' ken dih 'worn-dih: i deh 'ye 'on 'ge-yu-' no.

¹³Nyor⧾ :noo'-a mu :ao', Dii-deh :korn 'de 'kwli 'di, 'de 'kwli :korn 'de dii-deh bo :ke. Keen'. Jorwor: Nyorsoa-a mu en-' klehkpeh :daa 'borboa' 'i :po. Nyorsoa :se-' :a yau: :daa 'nyi, :a 'ye-uh 'tmeor:⧾ :korn-dih:. Jorwor: or 'nyi-uh' :a 'weh, :a 'ye :Gwlor :baa' :weheh' :za-dih:. 'De mor :Gwlor :baa'-a' 'jeh :dao', or-: :korn 'de :a-a' yau-a' deh bo.

¹⁴Nyorsoa :or :za-a: 'de :Gwlor :baa' 'de nma-dih-deh 'di, or mu or-a' 'kpih :due' :dao' :no, or 'ye 'de :a nma-dih-deh 'di :za :ke.

¹⁵A se-eh yubo: :ka a-a' yau 'dhu-a 'Klae-a' yau-a' 'for-' ke :e? 'On 'beh-dih: 'on 'ye 'Klae-a' 'for 'duo:, 'on 'ye-uh :bhaa'-nynor 'nyi :e? 'Kei:. Eh se-eh 'beh-dih:.

¹⁶A se-eh yubo: :ka nyor-kpalu: :or :ne :bhaa'-nynor: :dao' 'tmo-a, :yee' or :ne or 'gba-a yau :due' :e? 'Ka :wor Nyorsoa-a' 'chlee-deh no eh-a' :za-a', eh 'da, Mo-: :on :ne-a 'sororn', an mu nyor :due' :no.

¹⁷Jorwor: nyor :or 'nyi-a or-a' 'jeh :Gwlor :baa', :yee' or-: :Gwlor :baa'-: on 'ble :porluh :due'.

¹⁸A :tehn-dih: 'tmeor:⧾ :korn-eh bo dih. Deh⧾-zon⧾-a' klehkpeh nyor⧾-a no-a, :en :sie:-a 'o, en se 'o yau 'bhun :ne. Jorwor: :mor eh 'dhu :on :taa 'tmeor⧾ :korn, :yee' :an-a' 'jeh 'yor-eh-a' yau :oo' :an no deh-zon 'bhun.

¹⁹A se-eh yubo: ke :e, :ka a-a' yau 'dhu-a Gban 'i :ne :Zulu-a' 'sla-' :e, or 'nyi-a a-uh, :on :ne-a a-uh'? A se 'de a-a' 'jeh bo :korn, jorwor: a :korn 'de Nyorsoa bo.

²⁰Deh no-eh, Nyorsoa :po-dih: :Yusu' 'Klae-a' nyomor 'pehluh', 'de or dhen a-uh. :Yee' eh-: :korn dhih :oo', a 'ye a-a' yau no, a 'ye Nyorsoa dhih-a' 'i 'beh-a' 'nyi.