Read Eastern Krahn 1 'Korli-chlee-deh: 7 Bible Online

1 'Korli-chlee-deh: 7 - Eastern Krahn bible

1 'Korli-chlee-deh: 7

¹:Yee' :kana :naa, deh a 'chle-a 'on bo, eh-: :korn dhih 'an mu ken dih :wlu-dih:. Eh mu 'yi dih :nmor :dee', :mor nyor-kpalu se 'nynor :korn.

²Jorwor: deh no-eh, 'tmeor:⧾ :korn-eh :ne-a 'de eh 'di, eh-: :korn dhih :oo', nyor-kpalu :korn or 'ye or-a' 'jeh 'yor-eh-a' 'nynor 'i :glehn, 'de mor 'nynor-kpao' :korn or 'ye or-a' 'jeh 'yor-eh-a' yibeor 'i :glehn :ke.

³:Yee' nyor-kpalu se :korn or 'ye 'o or-a'a: 'nynor dih dhe. 'De mor :ke 'nynor-kpao' se :korn or 'ye 'o or-a'a: yibeor dih dhe. 'Nyi mo-: :ne-a 'sororn', on 'pehn-dih: on 'bei'-a' :porluh dih.

⁴Deh no-eh, 'nynor-kpao' se or-a' 'jeh-a' 'yor-eh-a' yau wlu 'ken :korn. Jorwor: or-a'a: yibeor: 'o, or-: :korn yau: :dao' wlu 'ken. 'De :ka :ne-a :due' 'di :ke, nyor-kpalu se or-a' 'jeh-a' 'yor-eh-a' yau wlu 'ken :korn. Jorwor: or-a'a: 'nynor :oo', or-: :korn yau: :dao' wlu 'ken.

⁵'Nynor-a' 'tonor:-' or-a' 'jeh ken 'do or-a'a: yibeor bo. 'De mor yibeor-a' 'tonor:-' or-a' 'jeh ken 'do or-a'a: 'nynor bo. :Mor eh 'dhu a :mor :ne-a 'sororn', a 'worn-dih-eh ken dih, 'de a 'ye-eh' no, :yee' a no-eh 'do ti-kpor-bei 'di, 'de a 'ye a-a' ti-a' klehkpeh-' 'duo: 'do Nyorsoa bo :wlu 'da. :Yee' :mor eh :jla 'dlu-', :yee' a 'kpa :dha :due' :dele' ka, 'de 'ku :ne-' a dih 'dhen, :mor a se a-a' 'jeh wlu 'ken :korn-eh 'beh-dih:.

⁶'An po 'o Nyorsoa bo :wlu-deh: :daa 'do a ybei'-: dih, 'de deh a 'ye-a' no, 'de a 'ye-eh' yubo:. Jorwor: eh :se 'tele', 'on :se-' po.

⁷:Mor 'on :ne :due' :dee', :yee' 'on 'da :ka 'on :ne-a, 'on se-a 'nynor 'ble, 'ka-: :gwlor-nyor⧾-a' klehkpeh 'ye :ne :dee'. Jorwor: :a :mor Nyorsoa no-a :a se goor-dih:, 'de or 'nyi :a 'nyii'-deh:⧾ 'doror: 'dor.

⁸A :mor :yuh se-a nyina 'ti-: :yuh se-a 'nynor⧾ :korn-: 'dekorn: :dhoba: 'nynor⧾-: deh 'an 'bhorn-a, a 'ye-a' no, eh-: :dhe dih. Eh mu 'yi dih :nmor :mor a se 'bli 'ti-dih:. 'De :ka 'on :ne-a, a 'ye :ao' :ne.

⁹Jorwor: :mor nyor-kpalu-deh-: 'dekorn: 'nynor-deh-: eh 'yi 'o 'do a :porluh⧾ ken 'gabaa, 'de a 'ye :ao', a se a-a' 'jeh-a' wlu 'ken :korn-eh 'beh-dih:, :yee' 'nyi nyor-kpalu 'ble or-a' 'jeh-a'a: 'nynor, 'de 'nynor 'ye or-a' 'jeh-a'a: yibeor 'ble :ke. Deh no-eh, eh mu 'yi dih :nmor a 'ye 'bli 'ti-dih:, :eh :zi 'o a-a' :porluh⧾ 'ye sin, :dha :due' 'pehn-dih-dhih.

¹⁰Nyor⧾ :on 'ti-dih:-a 'bli, an-a'a: 'tele' :wor :dhe dih. Eh :se 'mor-: :or :se-eh' po. Jorwor: :Gwlor :baa' :oo', or-: po-eh. 'Nynor se :korn or 'ye or-a'a: yibeor dih 'tali:.

¹¹Jorwor: :mor eh 'dhu or no-eh, :yee' or 'bor nyina: 'ti-eh 'klein'. :Mor or se-eh 'worn 'i 'beh-dih:, :yee' or mu 'de or-a'a: yibeor bo de, on 'ye wlu-' dih 'woorn-dih:, or 'ye de 'gbu mu. 'De :ka :ne-a :due' 'di, nyor-kpalu se :korn or 'ye or-a'a: 'nynor 'kwla :za.

¹²:Yee' deh :neheh', 'an yi-a :za 'da, 'de :yuh :sie:-a 'o bo, eh-: :dhe dih. Eh se :Gwlor :baa' zela: 'on :gwluhuh' :deh. Jorwor: eh 'wluh 'o 'an 'jeh :porluh ken. :Mor eh 'dhu 'Klae-a' dhih 'jeh-' :po-nyor 'ble 'nynor :or se-a 'Klae-a' dhih dhih 'jeh-' po, 'de 'nynor-a' 'jeh :dao' or 'ye-eh ken dih 'worn-dih: 'gboror: or :ne or 'ye 'bli 'ti-dih:, :yee' or 'bor 'nynor :dao' 'kwla :za-eh.

¹³'De :ka :ne-a :due' 'di :ke, :mor 'Klae-a' dhih 'jeh-' :po-nynor 'ti nyor-kpalu: :or se-a 'Klae-a' dhih dhih 'jeh-' po 'bli :dee' see, 'de nyor-kpalu-a' 'jeh :dao', or 'ye-eh ken dih 'worn-dih: 'gboror: or :ne 'nynor :dao' 'ye 'bli 'ti-dih:, :yee' or 'bor nyor-kpalu: :dao', or-a' dih 'tali-eh:.

¹⁴Deh no-eh, nyor-kpalu: :or se-a 'Klae-a' dhih dhih 'jeh-' po, or-a'a: 'nynor-a' dhih 'jeh-' :po-dhih: 'o, eh-: no-eh, 'de or gweh nyor :or :korn-a dhih Nyorsoa 'worn-dih:-a ken dih. 'De :ka :ne-a :due' 'di, 'nynor :or se-a 'Klae-a' dhih dhih 'jeh-' po, or-a'a: yibeor-a' dhih 'jeh-' :po-dhih: 'o, eh-: no-eh, 'de or gweh 'nynor :or :korn-a dhih Nyorsoa 'worn-dih:-a ken dih :ke. :Mor eh se-eh :mor :dee', :yee' a-a'a: 'nynuu :se-' Nyorsoa-nyor⧾ :gweh i :dee'. Jorwor: :yeh eh :ne-a :naa, Nyorsoa 'worn-dih: a-a'a: 'nynuu-a' dhih 'weh :naa.

¹⁵Jorwor: nyor :or se-a 'Klae-a' dhih dhih 'jeh-' po, :mor or 'bhorn or 'ye nyor :or po-a 'Klae-a' dhih dhih 'jeh-' dih 'tali:, :yee' 'nyi or no-eh. 'Klae-a' dhih dhih 'jeh-' :po-nyor-kpalu-: 'dekorn: 'nynor-kpao'-: nyor :se-uh' :san-dih: 'do :yeh :dao' :mleheh' bo. Deh no-eh, Nyorsoa 'da :a 'weh, wlu-' dih 'worn-eh: 'ye 'o 'nynor-: 'dekorn: yibeor-: 'nyne bo :ne.

¹⁶:Mor :or 'dhu-a 'nynor-', :kaa :on no eh-a' yubo-eh, :eh :mor :an mu :an-a'a: yibeor-' dih 'bili: 'noror 'Klae bo :eh? 'De mor :mor 'dhu-a yibeor-' :ke, :kaa :on no eh-a' yubo-eh, :eh :mor :an mu :an-a'a: 'nynor-' dih 'bili: 'noror 'Klae bo :eh?

¹⁷:Yee' deh :korn-a dhih :Gwlor :baa' 'da-a nyor⧾-a' klehkpeh on 'ye-a' 'kmo-' :ne-dih:, ti or 'da-uh'-a, on 'ye-a or-a' klei' :zi-nyor⧾ no, :yee' 'nyi on :ne-dih-eh 'kmo. Eh-: no 'tele' 'an torne 'chore-nyor⧾-a' klehkpeh.

¹⁸:Mor nyor-kpalu 'meh :bhlororn' 'de Nyorsoa 'ye-or 'da, :yee' 'ka-: eh 'ye :sie:. 'De mor :mor nyor-kpalu se :bhlororn' 'meh, 'de Nyorsoa 'ye-or 'da, :yee' 'ka-: or 'ye :ne, or 'ye 'de yi.

¹⁹Deh no-eh, :bhlororn' 'meh-eh-: 'dekorn: se :bhlororn' 'meh-: :mlee' se :kma. Deh :due' :eh 'dhu-a :kmaa-deh-', eh-: 'dhu Nyorsoa-a' 'tele' dih :dhe-eh-'.

²⁰:Ka nyor :ne-a 'de Nyorsoa 'ye-or 'da, 'ka-: or 'ye :ne :chio'lo:.

²¹:Mor eh 'dhu :on no 'ge-yu, 'de Nyorsoa 'ye :on 'da, :mleheh' 'beh-dih:-' :an-a' :porluh 'worn dih. :Dhe 'de eh 'di dih. Jorwor: :mor eh 'dhu, :on 'ye ti :on 'ye 'ge-deh 'wluh, :yee' no-eh.

²²:Mor eh 'dhu nyor no 'ge-yu, 'de :Gwlor :baa' 'ye-or 'da, :yee' or 'wluh 'de 'gegeye 'weh 'do :Gwlor :baa' bo ka. 'De deh :ne-a :due' 'di, nyor :or se-a 'ge-yu no, 'de or 'ye-a' 'da, :yee' or-: 'Klae-a' 'ge-yu: 'o.

²³Nyorsoa no 'Klae-a' nyomor, 'de or po a-a' 'pehluh', or dhen a-uh. :Yee' eh-a' dhih, nyor-a' 'worn-:-', nyor-a' :no-dih:-' a 'ge-yu 'do deh⧾-zon:⧾ :gwlor-nyor⧾-a 'bhorn-a a 'ye-a' no bo.

²⁴:Yee' 'an 'Klae :de-di'-boi'-a:, 'nyi a :za Nyorsoa-a' :weheh' :ka a :ne-a :chio'lo: 'de or mu-a a-a' :due' :due' 'da-:.

²⁵:Yee' 'nynor-kpao'-: 'dekorn: nyor-kpalu-: :on 'see-a 'bli 'ti-dih, :on 'see-eh 'ye, 'on :se-' 'tele' 'ye, eh :se 'de :Gwlor :baa' bo 'wluh, 'do an-a' dhih bo. Jorwor: deh :daa, 'an mu-a-' :za, eh 'wluh 'o 'an 'jeh :porluh ken, 'mor :or :Gwlor :baa'-a' :wehlih: :korn-eh no-eh, 'de nyor⧾ 'beh-dih:-a on 'ye-a :gwlii' dhe.

²⁶'Kle 'ye-eh: :daa :a :ne-a ken :naa, eh-a' dhih, eh-: :korn dhih 'on 'da eh :nmor-: 'yi, a 'ye 'o :dha a :ne-a dih kpon.

²⁷:Mor :korn 'nynor, :yee' 'bor or-a' 'kwla :za-eh-a' :gwie⧾-a' :za-a'. :Mor se 'nynor :korn, :yee' 'bor 'nynor :korn-eh-a' :gwie:⧾ :za-eh.

²⁸Jorwor: :mor :on 'da :an mu 'nynor :korn :gbor :gbor, eh se deh-zon:. 'De mor :mor 'nynor-kpao'-yu 'ti nyina, eh :se deh-zon: or :se-' no :ke. Jorwor: deh :due' 'an 'ye-a 'de eh 'di, eh-: 'dhu, nyor⧾ :on 'ti-dih:-a 'bli, an mu 'kle 'ye-eh: :dhulu' 'ye-: 'de an-a' 'kmo :ne-eh 'di. 'De 'an 'bhorn 'on 'ye a zelie: 'do eh 'zorn.

²⁹:Yee' 'an 'Klae :de-di'-boi'-a:, deh 'an za-dih-a dhih-' 'de a bo, eh-: :dhe dih. Ti :en :sie:-a 'o, 'de ti 'ye-a' 'dlu-' :jla, en se 'i :tehn. :Yee' 'do eh-a' dha, :eh 'wluh-a dha :dha :daa :naa, 'de :eh mu-a 'dlu bo, nyor⧾-kpalu:⧾ :on :korn-a 'nynor⧾, 'nyi an-a' 'kmo :ne-eh gweh :ka nyor⧾ se-a 'nynor⧾ :korn, an-a' :dhe-' 'nynor⧾ :korn-deh :due'-a' 'dlu yai' 'suh.

³⁰:Yee' nyor⧾ :an 'vin-a, an-a' :dhe-' 'viin'-deh-a' 'dlu yai', nyor⧾ 'mona-a no-a :naa, an-a' :dhe-' 'mona: :no-eh-a' 'dlu yai'. Nyor⧾ :an dhen-a deh⧾, an-a' :dhe-' en-' :kororn-deh-a' 'dlu yai'.

³¹Nyor⧾ :an 'ye-a 'kmo bo-deh⧾ deh 'i, an-a' :dhe-' eh-a' 'dlu yai'. Deh no-eh, 'kmo-a gweh 'de :a 'kwa-: dih, :yeh on :ne-a ken :naa.

³²'On :se-' 'bhorn :porluh-a' 'worn dih 'beh-eh 'ye 'o a bo yi. Deh no-eh, nyor-kpalu: :or se-a 'nynor :korn, deh :due' or na-dih-a :gwluhuh' dih, eh-: 'dhu, :Gwlor :baa'-a' dhih-', :ka or 'ye-a no, 'de or 'ye-a or-a' :porluh dih 'pehn-dih:.

³³Jorwor: nyor-kpalu: :or :korn-a 'nynor, deh :due' or na-dih-a :gwluhuh' dih, eh-: 'dhu, 'kmo bo-deh⧾-' :ka or 'ye-a' no, 'de or 'ye-a or-a'a: 'nynor-a' :porluh dih 'pehn-dih:.

³⁴:Yee' nyor-kpalu: :dao', or-a' :gwluhuh' :gble-eh:-' 'weh, 'do deh⧾ 'sororn' 'nyne bo. :Yee' 'nynor :or se-a nyina 'ti-: :eh mor 'nynor-kpao'-yu: :or se-a nyor-kpalu-dhih yubo:-: deh :due' or na-dih-a :gwluhuh' dih, eh-: 'dhu, :Gwlor :baa'-a' dhih-'. Deh :due' or 'bhorn or 'ye-a' no, eh-: 'dhu, or-a' yau-: 'dekorn: or-a' :porluh⧾-a' klehkpeh-: en 'ye 'de :Gwlor :baa' bo :korn. Jorwor: 'nynor :or 'ti-a nyina, deh :due' or na-dih-a :gwluhuh' dih, eh-: 'dhu 'kmo bo-deh⧾-', :ka or 'ye-a' no, 'de or 'ye-a or-a'a: yibeor-a' :porluh dih 'pehn-dih:.

³⁵A-a' 'jeh 'yor-eh-a' dhih :oo', 'an za dhih :daa-'. Eh :se 'tele' :oo', 'an vorn 'on 'ye po 'do a bo :deh. Jorwor: 'an 'bhorn a 'ye 'kmo 'jeh no 'kmo-' :ne-dih:, 'de a-a' :porluh⧾ :ne-' :gble-eh:, 'de a 'ye a-a' ti-a' klehkpeh zi 'de :Gwlor :baa' bo.

³⁶:Mor nyor yubo-eh 'i 'do or-a' 'jeh bo, :eh :mor deh⧾ or no-a 'do 'nynor-kpao'-yu: or 'dhu-a 'sehn 'dlu bo, 'de en 'ye :ao', en se 'o :gwie 'i :ne, 'de mor or-a' :porluh 'ye sin, or :ne or 'ye dih 'pehn, 'de noo :ka :noror' 'ye :ao', or se :ne, 'de or 'bhorn or :ne or mor-: on 'ye 'bli 'ti-dih:, :yee' a :ya or-a'a: 'nynor nyina, or 'ye-or' :korn. Deh-zon se 'de eh 'di :ne.

³⁷Jorwor: nyor-kpalu: :or polo-eh 'do or-a' 'jeh 'yor-eh :gwlii', 'de nyor se-a 'dlu 'tun-dih:, 'de or :korn-a or-a' 'jeh 'yor-eh-a' wlu 'ken, 'de or polo-eh 'do or-a' 'jeh :gwlii' :eh :mor or :se-a' 'nynor-kpao'-yu: :dao' or 'dhu-a 'sehn 'dlu :korn i, nyor-kpalu-a' 'jeh :dao', or no deh 'jeh :neh :ke.

³⁸:Yee' 'do eh-a' dha, :mor nyor-kpalu 'da, or mu 'nynor or-a' 'jeh 'yor-eh 'dhu-a 'sehn 'dlu, :korn, or no deh 'jeh :neh. Jorwor: :mor or 'da, or :se-or' :korn i, :yee' or no deh 'jeh :neh, :eh :zi 'o or 'ye-or' :korn.

³⁹'Nynor :or 'ti-a nyina, or se :korn or 'ye or-a'a: yibeor dih 'tali: :ka eh mu-a 'dlu-' :tehn, or :ne-a 'kmo. Jorwor: :mor eh 'dhu or-a'a: yibeor 'meh, :yee' or :florn ken dih, or 'ye nyor or 'bhorn-a 'bli 'ti. Jorwor: nyor or mu-a 'bli 'ti-:, 'nyi or no :Gwlor :baa'-a' dhih 'jeh-' :po-nyor :gbor.

⁴⁰Jorwor: :ka 'on no-a eh-a' 'ye-a', or mu 'mona dih 'yi-dih: :mor or se nyina 'ti :neheh'. Eh gweh Nyorsoa-a' :Zulu: 'o, on po 'o 'on deh :daa :gwlii' 'bla.