Read Eastern Krahn 1 'Korli-chlee-deh: 9 Bible Online

1 'Korli-chlee-deh: 9 - Eastern Krahn bible

1 'Korli-chlee-deh: 9

¹:Yee' 'an 'jeh :daa, 'on se-eh 'i :bleh-dih: 'on 'ye deh 'an 'bhorn-a, 'on 'ye-a' no, 'on 'ye-eh' no :e? :Ae' 'on se :Yusu'-a'a: dboo-nyor: ke? :Ae' 'on :se-' :a-a' :Gwlor :baa' :Yusu' 'ye? Eh :se :koan: 'on no-a, or-: se-eh no, 'de a se :Gwlor :baa'-a' dhih dhih 'jeh-' po :e?

²Keen' :mloror' nyor⧾ :noo' :se-' 'on :Yusu'-a'a: dboo-nyor 'da-dih:. Jorwor: a :mor :mloror', 'mor :Yusu'-a'a: dboo-nyor: 'o 'do a bo. Deh no-eh, a :mor no 'yi :to-dih-deh 'do :gwlor-nyor⧾ ybei', :ka 'on 'dhu-a :Gwlor :baa'-a' dboo-nyor-'.

³:Mor nyor⧾ :za-dih: 'on dhih-zon⧾ 'bhun dih, :yee' 'ka-: 'an no :aa 'an 'jeh dhih ken :za-eh.

⁴'Mor :or 'dhu-a :Yusu'-a'a: dboo-nyor-', 'on se-eh 'i :bleh-dih:, 'on 'ye :koan: :daa 'an no-a, 'on 'ye-or dii-deh-: 'dekorn: 'naa'-ni-: 'di 'ye :e?

⁵'An 'jeh :daa, 'on se-eh 'i :bleh-dih:, 'on 'ye 'Klae-a' dhih 'jeh-' :po-nynor :korn, 'on 'ye-or :gwele kpa, :ka 'on 'bei' dboo-nyor⧾-: :Gwlor :baa'-a' dei'-boi'-: 'dekorn: :Piteh'-: an no-a :e?

⁶'Mor-: 'dekorn: :Bana'ba-: :a :due' 'klein', :or 'ye Nyorsoa-a' :koan no, 'de :or 'ye :koan: 'sluh no 'do 'for 'i, 'de :or 'ye 'o 'or-a' 'jeh bo dih pobo: :e?

⁷:Or no sorye'-yu 'de :or :za or-a' 'jeh geli' :eh? Dha nyor 'wluh :or no gle, 'de dii-deh:⧾ :en 'wluh-a 'de eh 'di, 'de or :se-' en-' deh-beh worn 'dhen :eh? :Or no 'blae'⧾-a' 'yli-eh bo 'dhu-nyor, 'de :or-a' 'na en-' nyene-ni :eh?

⁸Deh⧾ :daa 'an za-a-', eh :se :gwlor-nyor⧾-a' :porluh⧾-a' :gwluhuh' dih :na-dih-deh :due' :oo' :deh. Eh :se deh⧾ :Mose' 'chle-a 'de or-a' 'tele'-chlee-deh 'di :ke :e?

⁹Eh 'chle-eh:-' 'de or-a' 'tele'-chlee-deh 'di, :eh no-a, A 'bor :blii'-a' worn :san-eh, :mor eh :taa deh⧾-yor sonor 'do a bo. :Yeh :daa :naa, :mor a :taa 'ye, :yee' a 'da :blii' 'jeh neh-a' dhih :oo', Nyorsoa zi :e?

¹⁰Eh :se :a :mor :gwlor-nyor:⧾, or se 'da :e? Keen' 'jeh ka, deh :daa, eh 'chle-eh:-' 'do :a-a' dhih bo. Deh no-eh, nyor :or 'beleh-a gle-: 'dekorn: :yor :or sonor-a :koo-: :on 'wluh-a 'de gle :dao' 'di-: mo-: :on :ne-a 'sororn', on :korn on 'ye-eh' :gwlii' dhe, :ka an mu-a :koan: :dao' deh 'di 'ye-:.

¹¹:A po Nyorsoa-a' tubo-wlu:⧾ 'de a bo, :eh gweh-a :ka nyor tba-a deh⧾-yor: :en no-a Nyorsoa-a' :Zulu-a' 'yor. :Yee' :a :korn :a 'ye 'o deh 'ye 'de :a 'ye 'kmo :ne :ke. Eh se-eh 'i :bleh-dih: :a 'ye deh 'ye, 'de a 'kwa :e?

¹²:Mor nyor⧾ :noo' :bleh-dih-eh 'i on 'ye-eh' :gwlii' dhe, a 'ye-uh' :za-dih:, :yee' :a :mor :mloror', :a-a' neh se 'o ken dih :zi ke :e? Jorwor: :a :se-eh' no, 'de eh :yeh-dih: ti :daa ken. Jorwor: :a ku 'di dih :chio'lo: 'do deh⧾-a' klehkpeh bo. Deh no-eh, :a :se-' 'bhorn, :a 'ye deh no, 'de eh :ne-' tubo-wlu:⧾ 'jeh :en kor-a 'Klae 'i, en-' :gwie 'i kan.

¹³A se-eh yubo: :ka nyor⧾ :an no-dih-a 'de Nyorsoa-a' 'sla 'zorn :koan, eh 'dhu-a 'de mor-' an-a' dii-deh⧾-a 'wluh-a :e? 'De mor :yuh :an no-dih-a 'o deh an za-dih-a 'slaa ken :koan, deh nyor⧾-a ya-a 'o eh ken, an za-dih-a 'slaa, eh :se-eh :mor, an se 'o 'kplo za, an se-uh 'nyi, eh-: :se an-a'a: dii-deh: ke :e?

¹⁴:Yee' 'de :ka :ne-a :due' 'di, :Gwlor :baa' 'nyi :a 'tele', or 'dae:, Nyor⧾ :an po-a Nyorsoa-a' tubo-wlu:⧾ 'jeh, tubo-wlu:⧾ 'jeh :daa an po-a, 'do :wor an-a'a: dii-deh mu 'wluh-:.

¹⁵Jorwor: deh⧾ :daa 'on :bleh-dih:-a 'i, 'on 'ye-a' no, 'on 'see en-' deh-beh no :chio'lo:, 'de eh :yeh-dih: ti :daa ken. 'De mor eh :se 'on dhe-eh :gwlii' a mu deh :daa :no 'do 'on bo, eh-: :korn dhih 'an 'chle a bo :deh. :Mor eh 'dhu :mleheh', :yee' 'nyi 'on 'meh, :eh :zi 'o nyor 'ye 'on deh 'nyi, 'de eh 'ye 'an 'jeh 'i 'beh-dih-deh: :daa 'on 'kwa :za.

¹⁶:Mor 'on :taa tubo-wlu:⧾ 'jeh :daa po, 'on se-eh 'i :bleh-dih:, 'on 'ye 'an 'jeh 'i 'beh-dih:. Deh no-eh, 'on :korn 'on 'ye-eh' no :gbor :gbor. 'Chlo 'do 'on bo, :mor 'on se-ih po.

¹⁷:Mor 'an :porluh 'worn-dih-eh ken dih, 'on 'ye-ih' po, 'an mu eh-a' geli' :za-dih-deh 'ye-:. :Mor 'an 'jeh se-eh ken dih 'worn-dih:, 'an mu-eh :no :gbor :gbor. Deh no-eh, Nyorsoa, or-: po-ih 'de 'on 'kwa, 'on 'ye-ih' po.

¹⁸:A 'ye geli' :za-dih-deh: 'an 'ye-a' 'o 'dee. 'An-a: geli' :za-dih-deh :wor 'dhu, 'on 'ye tubo-wlu:⧾ 'jeh :daa po, :eh :se-a 'wlii-eh-deh:. Deh 'on :bleh-dih:-a 'i, :mor 'on :taa-ih po, 'on 'ye-a' no, 'an-a' 'worn, 'an-a' no-eh.

¹⁹'On :se 'ge-yu:. 'De mor 'on se 'de nyor bo :korn. Jorwor: 'on no-eh' 'de 'on no 'ge-yu 'do :gwlor-nyor⧾-a' klehkpeh bo, 'on 'ye ka 'ye, 'on 'ye nyor⧾ :dhulu' 'on 'beh-dih:-a 'on 'ye-a dih 'bili: 'noror 'Klae bo, 'on 'ye-uh' dih 'bili:.

²⁰:Mor 'on :ne 'de :Jueh'-nyor⧾ 'nyne-', :yee' 'an na :Jueh'-nyor⧾-a' deh, eh 'ye-eh' no, 'on 'ye-uh dih 'bili: 'noror 'Klae bo. :Mor 'on :yeh-dih: nyor⧾ :on :ne-a 'o :Mose'-a' 'tele' 'zorn ken, :yee' :ka an no-a na-a', 'ka-: 'an no na-a' :ke, keen' :mloror' 'on se 'o :Mose'-a' 'tele' 'zorn :ne. Jorwor: 'an no-eh' 'suh, 'on 'ye nyor⧾ :on :ne-a 'o :Mose'-a' 'tele' 'zorn dih 'bili: 'noror 'Klae bo.

²¹:Mor 'on :yeh-dih: nyor⧾ :on se-a :Mose'-a' 'tele' 'ble ken :ke, :yee' :ka an no-a na-a', 'ka-: 'an no na-a' :ke, eh 'ye-eh' no, 'de 'on 'ye nyor⧾ :on se-a :Mose'-a' 'tele' 'ble, dih 'bili: 'noror 'Klae bo, keen' :mloror' 'on :ne 'o 'Klae-a' 'tele' 'zorn 'weh, jorwor: 'on se 'o Nyorsoa-a' 'tele' 'zorn 'wluh 'gboror:.

²²:Mor 'on :yeh-dih: nyor⧾ :on :korn-a 'Klae-a' dhih 'jeh-' :po-eh se-a dih ku ken, :yee' :ka an no-a na-a', 'ka-: 'an no na-a' :ke, eh 'ye-eh' no, 'de 'on 'ye-uh dih 'bili: 'noror 'Klae bo deh 'jeh. Nyor :yor 'on mu 'o bo, :yee' :ka or :ne-a, 'ka-: 'on :ne, 'de :ka :yor 'on 'beh-dih:-a, 'on 'ye-a' no, 'de 'on 'ye-eh' no, 'on 'ye an-a' :noo' dih 'bili: 'noror 'Klae bo deh 'jeh.

²³Nyorsoa-a' tubo-wlu:⧾ 'jeh-a' dhih :oo', 'an no deh⧾-a' klehkpeh :daa, 'de 'on 'ye :bhorlie' :eh :ne-a 'de eh 'di 'ye :ke.

²⁴A se-eh yubo: :ka nyor⧾-a' klehkpeh :an dhobo-a dih 'do ple-a' bo, :mor an-a' klehkpeh ple, :yee' nyor :due' 'wluh-a 'de on 'nyne-', or du-uh-a, 'de or 'ye-a geli' :za-dih-deh :e? A-a' ple-a' a mu-a :ple, a ple deh 'jeh neh, 'de a 'ye geli' :za-dih-deh 'ye.

²⁵Nyor⧾ :an dhobo-a dih, 'do deh-a' dhih bo, an torne-uh deh 'weh deh 'jeh, on 'ye an-a' 'jeh wlu 'ken :korn. An no-eh', 'de on 'ye :gale' :kornu:⧾ :gblaa' 'ye, :or :se-a' 'o :gwle i, :or 'ye-a' 'kor. Jorwor: :a-a' :neh :mleheh', :a no-eh', :a 'ye 'kmo :sie: :gblaa' 'ye.

²⁶:Yee' 'do eh-a' dha, 'an-a' 'worn, 'an-a' ple :eh gweh-a :ka nyor :or ple-a dih zeh zeh. 'An-a' 'worn, 'an-a' vorn :eh gweh-a :ka nyor :or vorn-a 'gbu :gwlii' :zulu bo.

²⁷Jorwor: 'on 'ye-dih: 'an 'jeh-a' yau 'kle, 'de mor 'on korn-uh wlu 'ken :ke. Deh no-eh, :mor 'on gweh Nyorsoa-a' tubo-wlu⧾-a' po-a' 'i 'de nyor⧾ bo, 'de or :ne-' 'on 'zorn sie, 'do 'an-a: geli' :za-dih-deh bo.