Read Eastern Krahn 2 'Korli-chlee-deh: 1 Bible Online

2 'Korli-chlee-deh: 1 - Eastern Krahn bible

2 'Korli-chlee-deh: 1

¹'Mor :Poror' :oo', :or Nyorsoa 'da-a :or 'ye-a :Yusu' 'Klae-a'a: dboo-nyor no, 'de or-a' 'ton :korn ka 'di. 'Mor-: 'dekorn: :a-a' 'Klae :de-di' an 'da-dih-a :Timehte'-: :a :mor 'ye a-uh, a :mor :or 'dhu-a Nyorsoa-a' 'chore :eh :ne-a 'Korli-gwlor-: 'dekorn: Nyorsoa-nyor⧾-a' klehkpeh :on :ne-a :Ehki'a-bluhba ken bo-:.

²Mla-: 'dekorn: wlu-' dih 'worn-eh-: 'do a bo :en 'wluh-a 'de Nyorsoa :or no-a :a :Baa'-: 'dekorn: :Gwlor :baa' :Yusu' 'Klae-: bo.

³:Yee' :a po Nyorsoa-a' 'zio :or no-a :a-a' :Gwlor :baa' :Yusu' 'Klae :Baa', 'de :or no-a :a :Baa' :or :korn-a :wehlih, 'de :or :korn-a bo nyor⧾ :porluh⧾ 'di dih :dhe-eh-a' klehkpeh 'wluh-a.

⁴Nyorsoa, or-: dhe :a :porluh⧾ 'di dih 'do 'kle 'ye-eh-a' klehkpeh bo, 'de :a 'ye 'kpih 'ye, :a 'ye nyor⧾ :an 'ye-a 'kle :porluh⧾ 'di dih dhe :ke.

⁵:Yee' 'Klae 'ye 'kle, 'de :a-a' 'jeh :ke, :a 'ye 'kle :ka or no-a 'kle 'ye-eh:. :Yee' :ka Nyorsoa no-a, 'de or dhe-or :porluh 'di dih, 'ka-: eh no :ke, 'de Nyorsoa :yi-dih-or-' 'de or dhe :a :porluh⧾ 'di dih.

⁶:Yee' :mor eh 'dhu :a 'ye 'kle, :yee' a 'ye :porluh⧾ 'di dih :dhe-eh:, a 'ye 'puh :dhih 'o. :Yee' :mor Nyorsoa dhe :a :porluh⧾ 'di dih, :yee' a-a' 'jeh :ke, a mu :porluh⧾ 'di dih :dhe-eh: :ke, 'de a 'ye 'kpih :en se-a sea-a' :korn 'nyi-eh: 'de :porluh-a' dih :kpon-eh 'di, :eh no-a 'kle 'ye-eh: :a-a' 'jeh :ke, :a :yi-dih:-a 'de 'di.

⁷:Yee' :gwlii' :dhe-eh: :a 'ble-a 'do a bo, eh ku-: dih. Deh no-eh, :a yubo-eh' 'kle :a 'ye-a, eh-: :korn 'be a 'ye :ke. 'De :porluh 'di dih :dhe-eh: :a 'ye-a, eh-: a 'ye :ke.

⁸:Yee' :a 'bhorn a 'ye eh-a' deh 'i yubo:, 'Klae :de-di'-boi'-a:, 'do 'kle :a 'ye-a 'de 'Esea-bluhba ken, eh-a' dhih. 'Kle :a 'ye-dih:-a 'de, eh :dhie: 'i. Eh-: no-eh, 'de :a :se-eh' :gwlii' dhe :dee', :ka :a mu-a 'kmo-' :ne.

⁹:A-a' :porluh⧾ zela: :a :gwluhuh', :eh gweh-a :a :chehn-eh wlu 'ken :a 'ye-a' 'meh. Jorwor: eh :no-eh:-' 'de :a :ne-' :a-a' 'jeh :gwluhuh' :kpa-dih:. Jorwor: Nyorsoa, :or za-a 'de 'meheh'-nyor⧾ 'de nma-dih-deh 'di, or-: :a 'ye :gwluhuh' :kpa-dih:.

¹⁰Or :za 'de :a ji-a' 'worn. 'De mor or mu :a zelie: 'de ybei'. :A dhe-or-: :gwlii' or 'ye :a zelie: :neheh',

¹¹:mor eh 'dhu a 'kpa :a bo, 'do Nyorsoa-a' bo :wlu-eh bo 'do :a-a' dhih bo. :Yee' eh mu-eh :no, 'de nyor⧾ :dhulu' 'ye Nyorsoa-a' 'zio po 'do :a-a' dhih bo. Deh no-eh, or 'worn bale-wlu:⧾ :dhulu' nyor⧾-a bale-a 'do :a-a' dha 'weh, 'de or po :a :bhorlie' bo.

¹²:Yee' deh :eh 'beh-dih-a :a-a' buh⧾ 'i, eh-: :dhe dih. :A-a' :porluh⧾ zela :a :gwluhuh' 'weh, :ka 'kmo :a :ne-dih:-a 'kmo, on :gweh-a :vlehehn'-', 'de eh tba-a 'de :a 'di dih, :ka Nyorsoa no-ih-a :a-a' 'nyi-a', :yeh :a no-a 'jeh ka, eh-: 'dhu, ti :a :ne-a 'o a bo. Eh :se 'kmo-a' :toror', or-a' :na-dih: :a-uh. Jorwor: Nyorsoa-a' mla :oo'.

¹³:Yee' :a :se-' deh⧾ a se-a zlo-a' 'beh-dih:-: 'dekorn: deh⧾ a se-a-' dih 'worn-eh: 'beh-dih:-: bo 'chle. 'On dhe-eh :gwlii',

¹⁴:mor a 'worn deh⧾ :a no-a, en-' deh-beh dih :naa, :yee' eh mu ti :korn a mu :yih :en :sie:-a 'o dih 'worn-:, 'de eh 'ye a-a' buh⧾ 'i 'beh-dih: 'do :a-a' dhih bo. 'Ka-: :a mu :no :ke, eh 'ye :a-a' buh⧾ 'i 'beh-dih: 'do a-a' dhih bo :ke, 'do 'we-eh: :Gwlor :baa' :Yusu'-a mu-a nyor⧾-a' klehkpeh-a' zabe :zi-dih: 'di.

¹⁵'On yubo-eh' deh 'jeh, :ka a mu-a deh⧾ :daa dih 'worn-:, eh-: :korn dhih 'on 'dhu-eh' 'do 'on :gwlii' :dee', 'on 'ye 'de a bo yi :zai', 'de a 'ye 'o deh 'ye-eh kpor⧾ 'sororn' no.

¹⁶'On 'dhu-ih' 'on 'ye 'o a bo :pa-dih: :dee', :mor 'on :taa 'Masordo'nia-bluhba ken mu. :Yee' :mor 'on 'wluh 'Masordo'nia, 'de 'on 'ye 'o a bo yi :neheh' :ke, 'de a 'ye 'on son 'nyi, 'on 'ye :Judi'a-bluhba ken mu.

¹⁷:Yee' deh⧾ :daa 'on 'dhu-a, 'on gweh pehn-meo: 'ble-nyor :e? :Ae' :ka 'kmo bo-nyor⧾-a no-a, 'ka-: 'an no ke? 'De worn :ne-a :due' 'di, on no-a, Keen', keen'. :Yee' 'do :wor an no-dih, 'On :se-eh' :no i.

¹⁸:Yee' :ka Nyorsoa no-a :dhehehn-nyor 'jeh ka, 'ka-: 'on no :ke. :Mor 'on no, Keen', :yee' 'an-a' 'wluh 'o, 'an-a' no, 'Kei: :neheh'.

¹⁹Deh no-eh, Nyorsoa-a' 'Yu :Yusu' 'Klae :or :korn-a tubo-wlu:⧾ 'mor-: :Salor'-: 'dekorn: :Timehte'-: :a po-a 'de a bo, or se pehn-meo 'ble. Or-: Nyorsoa :yi-dih: 'de or-a' keen'-a no keen' 'do ti-a' klehkpeh bo.

²⁰'De mor deh⧾-a' klehkpeh :en :korn-a wlu Nyorsoa po-a :dhama'-', en 'kpa-' dhih 'jeh 'de :Yusu' 'Klae-'. Eh-: :korn dhih :a 'da, 'ka-: eh 'ye :ne, 'de or-a' 'nyne 'di, 'de eh 'ye Nyorsoa-a' 'nyne dhih-a' 'i 'beh-a' 'nyi.

²¹Nyorsoa-a' 'jeh 'yor-eh: or-: no-eh, 'de a mor-: 'dekorn: :a mor-: 'de :a :nyna dih deh 'jeh 'de 'Klae-a' deh 'di. Or-: :ne-a :due', or-: 'o :or gan :a-uh,

²²:a 'ye 'de or bo :korn. 'De or po or-a' :Zulu 'do :a :porluh⧾ ken, eh 'ye :a 'i :to-dih: :ka deh⧾-a' klehkpeh or 'ble-a 'do :a bo, or mu-ih-a :a 'nyi-:.

²³:Yee' Nyorsoa, or-: no 'an dhih ken dih zela-nyor. Deh :korn-a dhih 'on se-a 'Korli yi, eh-: 'dhu, 'on :se-' 'bhorn, 'on 'ye-eh' no 'de a-a' :porluh⧾ 'ye 'zorn 'kpa.

²⁴Eh :se :a 'ye a 'kpih :kpa-dih:, 'do deh a 'ye-a dhih 'jeh-' po, eh-a' dhih :deh. Jorwor: a :ne :a no-dih :koan :dha :due', 'de eh 'ye a 'mona-' dih 'yi-dih:. Deh no-eh, :a yubo-eh', a ku-: dih 'de a-a' dhih 'jeh-' :po-eh 'di.