Read Eastern Krahn 2 'Korli-chlee-deh: 11 Bible Online

2 'Korli-chlee-deh: 11 - Eastern Krahn bible

2 'Korli-chlee-deh: 11

¹:Yee' 'an 'bhorn a 'ye a-a' :porluh⧾ dih kpon :weh-beh:, 'do :bobo-dhih: 'an yi-a :za 'da bo. A :korn 'gen, 'an 'bhorn a 'ye-eh' no.

²'An no :gwlehehn' a-a' dhih, :ka Nyorsoa-a no-a. A gweh 'nynor-kpao'-yu: :or se-a nyor-kpalu-dhih yubo:, 'de :or :gweh-a :vlehehn'-', :or :korn-a wlu 'on po-a :dhama'-' :or 'ye-a nyor-kpalu :due' 'bli 'ti, an 'da-dih-a 'Klae.

³Jorwor: :fano-a: no 'on, deh :eh :no-eh 'do 'Ii bo, eh :ne-' :no-eh: 'do a bo. Sehn po :bhuli' 'de eh :bo-dih-or dih, 'de or no deh-zon. 'De :ka :ne-a :due' 'di, a-a' 'dlu⧾ 'beh-dih: en 'ye 'o :gwie 'i 'wluh 'weh, :eh 'ye-eh' no 'de a-a' 'Klae-a' :ybeh-a' :eh tba-a 'de a 'di dih, :eh :gweh-a :vlehehn'-', eh 'ye 'kor :ke.

⁴Deh no-eh, :mor nyor :noror' yi 'o a bo, 'de or 'ye tubo-wlu:⧾ :en kor-a :Yusu' :noror' 'i po, :or :se-a :yor :or :korn-a tubo-wlu:⧾ :a po-a 'de a bo. 'De mor a 'ye :zulu: :noo' 'ye, :on :se-a Nyorsoa-a' :Zulu: :yuh a 'ye-a :zai', 'de a 'ye tubo-wlu:⧾ :nee' :nee' dih kpon, :eh :se-a :yih a kpon-a dih :zai', :yee' eh-: 'o, a 'worn-dih ken dih.

⁵:Yee' 'on yubo-eh' :Yusu'-a'a: dboo-nyor:⧾ :daa, a 'da-dih-a dhih-a' 'i 'beh-nyor:⧾ :on :zi-a 'o nyor⧾-a' klehkpeh-', :ka on no-a, on 'kpa-a deh ken, 'ka-: 'on no, 'on 'kpa deh ken 'de deh⧾-a' klehkpeh 'di.

⁶Eh gweh 'on :se-' dha deh 'chean'-dih: 'do :wlu-a' bo 'bla, jorwor: 'on 'ble deh-' dih 'worn-eh: 'gboror:. :A :florn-dih-eh ken dih 'weh, deh 'jeh, 'de a bo :zai'.

⁷'On po Nyorsoa-a' tubo-wlu:⧾ 'jeh 'weh 'de a bo, 'de 'on :se-' a geli' :za-dih-deh dih dhele:. 'On :ya 'an 'jeh ya 'weh 'de a bo, 'de eh 'ye a ya-' 'duo:. :Mor 'on :taa :ao' no, :yee' deh-zon: 'o, 'on no 'de Nyorsoa bo :e?

⁸'Chore-nyor:⧾ :noo' 'nyi 'on 'wlii:, 'de 'on 'ye-ih :koan :no-dih: 'de a 'nyne-'. :Mor 'on :taa 'ye, :yee' 'an 'yli nyor⧾ :an 'nyi-a 'on 'wlii: :dao' 'weh, 'do a-a' :za-dih-eh bo.

⁹:Yee' ti 'on :ne-a 'de a bo, 'de 'an son :gweh-a, 'on :se-' a-a' nyor 'worn dih 'beh-dih:. Deh no-eh, 'Klae :de-di'-boi' :on 'wluh-a 'Masordo'nia-bluhba ken, mo-: :ya 'on deh⧾-a' klehkpeh 'on se-a 'ble. :Yee' :ka 'on no-a, 'de 'on se-a a 'worn dih 'beh-dih:, 'ka-: 'an mu :no, 'on :se-' a 'worn dih 'beh-dih: i, :ka eh mu-a 'dlu-' :tehn.

¹⁰'Klae-a za-' dhih-a' 'yor-eh 'do ti-a' klehkpeh bo. :Yee' 'ka-: 'an no :ke, :mor 'on 'da nyor se 'noror :Ehki'a-bluhba ken :ne, :or 'ye-a 'on 'borboa' 'i po, :mor 'on :taa 'an 'jeh dhih bo po 'do deh :daa, eh-a' dhih.

¹¹:Eh :korn dhih :oo' :eh? 'On se a-' :ybeh :dhih 'o :e? Nyorsoa yubo-eh', 'on :ybeh a-uh' 'weh.

¹²Deh 'an no-a 'do ti-a' klehkpeh bo, eh-: 'an mu 'dlu bo :kpa, 'de eh 'ye nyor⧾ :dao', :an 'bhorn-a :on 'ye-a an-a' 'jeh 'i 'beh-dih:, 'borboa' 'i po, 'de on :ne-' 'an-a: :koan: 'an no-a, 'an nor 'i :po-dih:.

¹³Nyor⧾-kpalu:⧾ :dao', on :se :Yusu'-a'a: dboo-nyor:⧾ 'jeh :no. An 'tmo sih 'do :koan: an no-a bo. 'De on po an-a' 'jeh 'kpa, on gweh 'Klae-a'a: dboo-nyor:⧾ 'jeh no.

¹⁴Eh :se deh :oo' :eh 'ye 'de a 'di dih 'ma-dih: :deh. 'Ku-a' 'jeh :ke, an za-dih-', 'de an gweh 'enjor: :or :korn-a dhih-a' 'i 'beh-a'-a fan.

¹⁵:Yee' eh :se deh :dele' :mor 'ku-a' 'bhoi-nynuu po an-a' 'jeh 'kpa, 'de on 'ye 'yi 'sleh-Nyorsoa-a' 'bhoi-nynuu gweh. 'Do eh-a' 'dlu-' :jla 'da, deh⧾ on no-a, me-: :korn geli' :za-dih-deh: an mu 'ye-:.

¹⁶:Yee' 'an za-eh-: de :neheh'. Nyor-a' 'da-dih: 'on :bobo-nyor. Jorwor: :mor nyor no-eh, :yee' 'nyi or kpon 'on dih :ka nyor :or kpon-a :bobo-nyor dih, 'de 'on 'ye 'an 'jeh 'i 'beh-dih: :weh-beh:.

¹⁷Deh 'an za-' :naa, eh :se 'tele' :Gwlor :baa' 'nyi-a 'on. 'Jeh 'i 'beh-dih-eh: 'an 'da-a, :ka :bobo-nyor-a wlu-a, 'ka-: 'o 'an wlu.

¹⁸Jorwor: :ka nyor⧾ :dhulu'-a 'beh-dih-a an-a' 'jeh 'i, :ka 'kmo-a no-a, :yee' 'an 'jeh :ke, 'an mu 'an 'jeh 'i 'beh-dih:.

¹⁹A se :ao', a :mor :toror' :korn-nyor:⧾ 'o :neheh' :e? Eh-: :korn dhih, 'de a :za :bobo-nyor⧾ 'yli-eh dih, 'de :porluh⧾-a' dih 'pehn ka 'di :neheh' :e?

²⁰:Yee' :mor nyor :no-dih: a 'ge-yu, a za-or 'yli-eh dih :chio'lo:. 'De mor :mor nyor 'yli a bo, a za-or 'yli-eh dih :chio'lo:. 'De mor :mor or-a' :yeh 'vleh a 'dlu dih, or-a' :yeh po a 'kpa 'yli, a za-or 'yli-eh dih :chio'lo:, 'de or no-eh.

²¹A :korn a-a' deh 'gen o nii:. Jorwor: 'mor :mloror', eh po 'on dhen-' dih, 'on se eh-a' :gwluhuh'-' :ku :kao:, 'on 'ye deh :eh :ne :ao' no 'do a 'bhun o. Jorwor: :mor nyor :ku :gwluhuh' or 'ye or-a' 'jeh 'i 'beh-dih: 'do deh-a' dhih bo, keen' :ke, :yee' 'an mu :gwluhuh' :ku, 'on 'ye 'an 'jeh 'i 'beh-dih: 'do deh :ne-a :due', eh-a' dhih bo :ke. 'An wlu-' :ka :bobo-nyor 'i :naa.

²²An-a' 'jeh :daa, mo-: :Hiblu'-nyor⧾ :oo' :e? 'Ka-: 'on :ne :ke. Mo-: 'Ezlea-nyor⧾ :oo' :e? 'Ka-: 'on :ne :ke. :Ae' mo-: 'Eble'hehn-a' 'di-a'-nynuu :oo' ke? 'Ka-: 'on :ne :ke.

²³:Ae' mo-: 'Klae-a' 'bhoi-nynuu :oo' ke? (:Mor 'on :taa :ao' :wlu-a' no, :yee' sena-: no 'on.) 'On zi-uh' 'weh 'do 'bhoi-yu-deh-a' no 'da. 'On no :koan: :dhulu', 'on zi-uh'. 'On :po-eh: :kasue 'di kpor⧾ :dhulu' 'di, eh zi-uh'. Nyor⧾ bla 'on, eh zi-uh' :ke. 'De 'an pobo 'de 'meh-a' 'yli 'de, 'do ti :dhulu' 'di, eh zi-uh'.

²⁴:Jueh'-nyor⧾-a' sene'eh⧾-a' :kwlaa taan 'yor :meheh' :nyieh, me-: 'on 'ye 'do kpor⧾ :mm' 'di.

²⁵'Wloon-nyor⧾ no 'an tu⧾ :bla-dih-eh kpor⧾ taan. 'De eh :korn ti :due' nyor⧾ :noo' :tba-dih: 'on sobu'⧾ dih, on 'ye 'on 'dba :dee'. 'De 'ni ken-meheh no 'an 'wla-dih-eh kpor⧾ taan. 'De 'on no zorn-we-eh-: glu-we-eh-: 'do yobo' 'worn, ti 'ni ken-meheh 'wla-dih:-a 'on.

²⁶Deh⧾-a' klehkpeh 'an na-' dih, 'an na 'de 'meh-a' 'worn dih. 'Yii'-ni-a' 'dhan-a'-: 'ylii'-nyor⧾ 'nyne-' :yi-dih-eh-: 'on 'bli :Jueh'-nyor⧾-: 'dekorn: nyor⧾ :on :se-a :Jueh'-nyor⧾-: :an 'bhorn-a :on 'ye-a 'on 'dba, 'de gwlor⧾ 'di dih-: 'de 'kwla 'di-: 'de yobo' ken-: 'dekorn: 'de-di'-boi' :an 'da-dih-a an-a' 'jeh 'Klae-a' klei' :zi-nyor⧾ 'de :an 'tmo-a sih-: en-' klehkpeh :dao', me-: 'dhu 'de 'meh-a' 'an na 'de 'worn dih.

²⁷'On no :koan: 'gabaa, eh :zi 'o ken dih. 'Do ti :dhulu' 'di, 'an-a' 'mo. 'De 'moeh-: 'ni 'na-ton-: en no 'on, 'do ti :dhulu' 'di. 'An-a' 'ble dii-deh-: 'dekorn: paa-wla-:. 'De :chehbe'-a no 'on.

²⁸:Yee' 'on :se-' :yih :daa :mlee' 'da. Jorwor: 'gbeh :klaba' 'on 'ble-a eh-: 'dhu, 'an :porluh⧾-a 'beh-dih 'on 'worn dih, zorn 'o zorn, 'do 'chore-nyor⧾-a' klehkpeh-a' dhih bo.

²⁹Or-a' 'nyne :or :korn 'kpih-a: chehn, 'de 'an ne :se-' chehn :ke :eh? Nyor :yoror :or :korn 'be no-eh, 'de or no deh-zon, 'de 'an :porluh :se-' 'plun :eh?

³⁰:Mor eh 'dhu 'on :korn 'on 'ye 'an 'jeh 'i 'beh-dih:, :yee' deh on po-a 'on dhen-' dih :poo: 'do :gwlor-nyor⧾ ybei', eh-: :korn dhih 'an mu 'an 'jeh 'i 'beh-dih:.

³¹Nyorsoa :or no-a :a-a' :Gwlor :baa' :Yusu' :Baa', or yubo-eh' :ka 'on se-a sih 'tmo. :Bhorlie' 'do or bo, :ka ti-a mu-a 'dlu-' :tehn.

³²Ti 'on :ne-a 'de :Dama'kor-gwlor 'di, :yee' 'gomla-nyor⧾-a' nyor :klaba' :or :ne-a 'o 'Keen :Ali'ta 'zorn, or-: po 'o nyor⧾ 'do gwlor-a' gba-dih-gba worn 'i, on 'ye 'on kpon.

³³Jorwor: 'de :too' 'di, 'do :wor nyor⧾ po 'on, 'de on :ya-dih: 'o 'on gba-dih-gba-a' :dha-beh: :or :florn-a worn 'de :too' 'di, 'de on 'si-dih: 'on dih, 'de 'on ple, 'on 'dhan 'de or 'kwa dih.