Read Eastern Krahn 2 'Korli-chlee-deh: 12 Bible Online

2 'Korli-chlee-deh: 12 - Eastern Krahn bible

2 'Korli-chlee-deh: 12

¹Keen' :mloror', 'jeh 'i 'beh-dih-eh se 'o 'on deh po 'i. Jorwor: 'on :korn 'on 'ye-eh' no 'gboror:. 'De mor :kana :naa, ti 'an 'yli-eh 'kpa-a deh 'i, deh⧾ :Gwlor :baa' no-a, 'de 'on 'ye-a-: 'dekorn: :yih or :to-dih:-a 'on 'i-: me-: :korn dhih 'an mu :za :naa.

²'Klae-a' dhih 'jeh-' :po-nyor :due' 'on yubo:-a, or-: Nyorsoa kpa 'de or 'bli yai' :dha :dhorno'. Eh :no-eh:-' :naa eh-a' zon⧾-a' :bhue: 'yor :nyieh, me-: zi. 'On se-eh yubo: :eh beh or-a' nyior-tu mu 'de 'weh 'jeh ka-: :eh beh or-a' :zulu :due' :oo' :on mu 'de-: Nyorsoa :due', or-: yubo-eh.

³'On yubo-eh' nyor-kpalu: :daa, or :kpa-eh: 'de Nyorsoa 'bli yai' 'weh. :Eh beh or-a' nyior-tu: 'o :on mu 'de-: :eh beh or-a' :zulu :due' :oo', :on mu 'de-: Nyorsoa :due', or-: yubo-eh.

⁴Or :kpa-eh: 'de Nyorsoa 'bli yai' 'weh. 'Do :wor or 'worn-dih: deh⧾ :en :ne-a gban 'i, :en se-a :korn :en 'ye-a' :za-eh: 'de mor :en se-a :korn :en 'ye-a' 'o :gwlor-nyor⧾ worn 'i :yi-dih:.

⁵'An mu 'an 'jeh 'i 'beh-dih: 'do nyor-kpalu: :daa, or-a' dhih bo. Jorwor: :mor eh 'dhu 'an 'jeh 'yor-eh-a' dhih-', 'on :se-eh' :no i. Jorwor: deh on po-a 'on dhen-' dih, 'do :gwlor-nyor⧾ ybei', me-: :korn dhih 'an mu 'an 'jeh 'i 'beh-dih:.

⁶Jorwor: :mor eh 'dhu 'an 'bhorn 'on 'ye 'an 'jeh 'i 'beh-dih:, :yee' eh :se :bobo-deh:. Deh no-eh, dhih-a' 'yor-eh: 'o, 'an mu-' :za. Jorwor: 'on :se-' 'an 'jeh 'i 'beh-dih: i. 'On :se-' 'bhorn nyor⧾ 'ye deh⧾ :nee' :gwluhuh' dih :na-dih: :eh :mor 'on no nyor :klaba'. Jorwor: deh⧾ on 'worn-a, 'de 'on 'worn-: 'dekorn: :yih on 'ye-a 'on, 'an no-a-: me-: on 'ye ya pobo:.

⁷Nyorsoa :to-dih: 'on deh⧾ :kolu'⧾. Jorwor: or dbo deh :neheh' 'noror 'an yau 'zorn, eh-: gweh 'wu :an 'nyna 'on, eh 'ye-eh' no, 'de 'on :sor 'beh-dih: 'an 'jeh 'i. 'Wu :daa, on no 'ku-a' 'bhoi-yu: :or 'ye-a 'on 'worn dih 'beh-dih:, 'de :or 'ye-a 'on 'borboa' 'i po, 'on :sor 'beh-dih:-a 'an 'jeh 'i.

⁸'On bale: :Gwlor :baa' 'weh kpor⧾ taan, or 'ye 'on deh :daa 'de :za.

⁹Jorwor: or :wlu-' 'de 'on bo, or 'dae:, 'An mla :due', or-: :on :korn :on 'ye 'ye. Deh no-eh, 'an 'kpih :kmu-' 'de :on 'di, en :zi 'o ken dih, :mor :an-a' 'kpih :taa chehn. :Yee' :mor eh :ne :ao', 'de 'Klae 'ye or-a' 'kpih 'on 'nyi :chio'lo:, :yee' 'an :porluh-a mu dih 'pehn-: 'gabaa, 'on 'ye 'an 'jeh 'i 'beh-dih: :ka 'an 'kpih-a chehn-a.

¹⁰:Yee' eh-: no-eh, 'de 'an :porluh 'pehn dih, 'an 'kpih-a' :yeh :taa chehn, nyor⧾-a' :yeh 'jle-dih: 'on, 'an :yeh :taa 'kle 'ye, nyor⧾-a' :yeh 'ye-dih: 'on 'kle, deh⧾-a' :yeh :yi-dih: 'on ya dih 'do 'Klae-a' dhih. Deh no-eh, :mor 'an 'kpih :taa chehn, :yee' 'Klae-a' 'kpih-a no-eh' 'de 'an kmu.

¹¹:Yee' deh⧾ :bobo-nyor⧾-a no-a, me-: 'o 'an no. Jorwor: a :mor no-eh, 'de 'an no-ih. Deh⧾ 'jeh :ne 'an no-a, a :mor :korn :or 'ye en-' dhih-' :za :dee'. Keen' :mloror' 'on se deh-' 'dhu-eh:, jorwor: :yuh a 'da-dih-a :Yusu'-a'a: dboo-nyor⧾ :on :korn-a dhih 'beh-a' 'i, :on :zi-a 'o nyor⧾-a' klehkpeh-', :ka on no-a, on 'kpa-a deh ken, 'ka-: 'on no, 'on 'kpa deh ken 'de deh⧾-a' klehkpeh 'di.

¹²Nyorsoa :yi-dih: 'on-', 'de or no 'yi :to-dih-deh⧾-: nyor⧾ 'di dih 'ma-dih-deh⧾-: 'dekorn: deh⧾ :kolu'⧾-: 'de a 'nyne-', ti 'an no-a 'an-a: :koan 'de :porluh-a' dih :kpon-eh 'di. Deh⧾ :daa, me-: :to-dih: a 'i :ka 'on 'dhu-a :Yusu'-a'a: dboo-nyor-' deh 'jeh.

¹³Deh 'on no 'do 'chore-nyor:⧾ :noo' 'bhun, 'on :se-' no 'do a 'bhun :eh? :Mor eh 'dhu :yeh 'on se a 'dlu :dhe, :yee' 'on :se-' :mleheh' 'da. :Yee' 'do a 'bli :tehn ya, 'do :mleheh' bo.

¹⁴:Yee' 'on :ne buh⧾ ken, 'on 'ye a 'ye 'da yi, 'do kpor⧾-a' taan neh 'di :naa. 'On :se-' a 'dlu :dhe 'da yi, 'de mor 'on :se-' deh 'bhorn 'de a 'kwa. Jorwor: a-a' nyior-tu 'an 'bhorn. Deh no-eh, eh :se 'nynuu:, an-a' :gban-dih: on :bai'. Jorwor: :bai', mo-: :korn :on 'ye an-a'a: 'nynuu :gban-dih:.

¹⁵Jorwor: 'mor :mloror', eh mu 'on 'mona-' dih 'yi-dih: 'on 'ye 'wlii-a' klehkpeh 'on 'ble-a plo 'do a-a' dhih bo, eh :yeh 'dhu 'an 'jeh 'yor-eh-a' 'kwla :za-eh, 'de eh 'ye a-' :za-dih:. Deh 'on :ybeh-a a-uh' deh :dao', eh-: no-eh, 'de a se 'on-' :ybeh deh 'jeh :e?

¹⁶A yubo-eh' :ka 'on se-a a 'dlu :dhe. Jorwor: nyor⧾ :noo' 'da, 'on no :bhuli'-: sih-: 'de 'on 'ye a-a' :kpon 'da.

¹⁷Nyor⧾ 'on dbo-a 'de a bo, on :se-' a 'dlu dih 'vleh.

¹⁸'On bale: Talor' 'weh, or 'ye 'de a bo yi. 'De 'on :dbo-dih-or 'Klae :de-di' :noror' bo. A 'bhorn a 'ye 'on :gwluhuh' zela: Talor' 'vleh a 'dlu dih :e? Eh :se :gwie: :ne-a :due', :a-a' klehkpeh, :a se kpa :e? 'De mor eh :se kplen or 'ble-a 'on se 'ble :e?

¹⁹Nyor-a' :na-dih-eh' :gwluhuh' dih :eh :mor :a vorn-' :a 'ye :a-a' 'jeh ken :kan-dih: 'de a bo. :A za-' dhih-a' 'yor-eh: 'do Nyorsoa ybei', :ka :a :ne-a 'Klae-'. :Yee' deh⧾-a' klehkpeh :a no-a, :a 'bli-nyor⧾-a:, :a no-ih', en 'ye a-' :za-dih:.

²⁰:Yee' eh-a' dhih, :fano-a: no 'on, :mor 'on 'si 'o a bo dih, 'de deh 'on dhe-a :gwlii' a 'ye-a' no, a :sor se-eh no. 'De mor deh a dhe-a 'on :gwlii' 'on 'ye-a' no, 'on :sor se-eh no. :Fano-a: no 'on, 'on :ne-' jeh-a'-: :gwlehehn'-: 'chehn 'kpa-eh-: 'cheh 'ya 'cheh 'ya-: 'jlei: :po-eh-: nyor⧾ chehn-eh-: 'jeh 'i 'beh-dih-eh-: 'dekorn: deh⧾ ya :gba-eh-: 'ye 'noror a 'nyne-'.

²¹'De mor :fano-a: no 'on, :mor 'on 'si 'o a bo dih :neheh', Nyorsoa :ne-eh' no, 'de dhen :ne 'on no 'do a-a' dhih bo. :Yee' 'an :porluh-a mu 'zorn 'kpa-: 'do nyor⧾ :on no-a deh⧾-zon:⧾ :ne-a :due' on no-a :zai' bo, 'de :on 'see-ih-a 'kpuh ya to, :en 'dhu-a se :vlehehn'-' :gweh-deh⧾-: 'tmeor:⧾ :korn-eh-: 'dekorn: 'pebe' 'i 'kpa-eh-:.